Nyemut cĩ Abũnna cĩ
Matewo
Yelinit cĩ Matewo
Ẽẽn balna Matewo tionniait cĩ Yesu tionniaĩ cĩk ẽẽn õmmõtõ kĩ ramma. Thoothonniowa balna cĩk eheedi nẽ Nyaraga coo, ẽhẽẽd kuduwak eet cĩk Yudei õõgĩ buu, ngatĩ ẽẽn Yesu Kiristo Ellioit wũ balna abũtaneei Nyekuci athĩ ne, kitionai katĩ ĩnõõgõ. Ĩnõõnõ thĩ cĩ balna ẽtẽrẽhanĩ Matewo Nyaraga ngatĩ ẽhẽẽdĩ baajigi Yesu, ĩthõng Nyaragawa ĩcoo vẽlẽk, ẽyẽla balna nẽ athĩ ne, ẽdẽcak Yesu tiicanẽ cĩk thoothonniok wũk balna aduwa eeta cĩk õthõõth molook cĩ Nyekuco Nyaragawa ĩcĩ Ngẽrẽmngẽrẽm wũ balna Rẽẽnĩ.
Ĩthõng thĩ, aduwacet Matewo ageeta liman cĩ Yesu cĩ athĩ ne, ẽẽn alaanthẽt cĩ Nyekuco cĩ loociok vẽlẽk cĩk atican thõõth cĩ adiim Nyekuci. Terehianta ĩcĩ ẽẽn 5-7, kacĩn naaga Yesu ngĩ aduwaai eet ethei ne, õgõõn alaanthẽt cĩ Nyekuco kuu, terehianta cĩ ẽẽn 10, aliman nẽ gõõl cĩ ĩtoorinie alaanthẽt coo looc vẽlẽk, terehianta cĩ ẽẽn 13, aduwa nẽ thoothonniok cĩk owovothi alaanthẽt cĩ Nyekuco, terehianta cĩ ẽẽn 18, aliman nẽ gõõl cĩ kaatẽ naaga kabicoca cĩ Nyekuco, ĩthõng terehianta ĩcĩ ẽẽn 24-25, ẽyẽla nẽ gõõl cĩ katĩ akuni alaanthẽt cĩ Nyekuco loota ngato. Aturna nyaraga coo ngatĩ aduwanĩ tĩrĩthẽnĩt cĩ Yesu cobbi, cĩ anyĩcẽ tionniak cĩgĩnĩk kõõt kilimantek eet loociok vẽlẽk, kĩĩtõ wobjiak cĩgĩnĩk.
Aduwa Nyaraga coo iyiaintiok cĩk rũgẽt cĩ Yesu balna thẽk terehianta kõdõlan turnanẽt. Arak tuwuanẽt cĩ Yesu, ĩthõng uduwa batithimo cĩnnĩ kĩ tĩman cĩ atĩmanĩ Thĩttanĩ ĩnõõnõ, ĩthõng naboo uduwa iyiaintiok cĩk irion nẽnẽ, kĩ liman kĩ thõõth cĩ anyĩcẽ eet kũbũnta Galilea. Ĩthõng naboo ẽhẽẽd thõõth cĩ heeroni cĩ Yesu cĩ ĩngannĩ Galilea, õkkõ Yeruthalẽma, kĩ thõõth cĩ balna aliba wathinniowẽy ĩcĩk rũgẽt cĩnnĩ cĩ aturna loota ngato, edecciay Nyaraga coo daaĩtha cĩ ododowothi Yesu kurucea kĩ rũgẽt cĩ arũknanĩ nẽ daaĩtha.