Avaraci Yiona thimatĩth cĩ Makayyiokto
4
Avaracĩth balna kẽnnẽ Yiona õrrõt ngatĩ ũũkcĩ Nyekuci muwẽẽnĩt cĩnnĩ.
2 Ngaatĩ alawĩ nẽ Makayyioit ẽthẽcĩ ne,
“Makayyioit athii wõnõ cĩ ẽẽn thõõth wũ balna kaduwa na baa ngaanĩ kaavẽ õlõõ coo?
Ĩnõõnõ thĩ cĩ kavirie na kõkõyyẽ ĩcĩ Tarthithi wo.
Eeni niia Nyekuc cĩ athimati,
ĩthõng atamatiwu eeta,
ĩthõng omogi thoothonniok õrrõt.
Ẽyẽla niia mĩnan dõ dõõkĩthĩ,
ĩthõng athii cĩ adiimi ngĩ uuki et ĩmma,
kõdẽ woyyia ngĩ ẽẽn eet cĩk looc cĩ rẽẽng.
3 Ĩthõng yoko,
Makayyioit ruwa aneeta,
mayya ngatĩ woccia kadaaknẽ kijiar ngatĩ woccia karũknẽ.”
4 Ẽdẽcĩ kẽnnẽ Makayyioiti ĩnõõnõ ethei ne,
“Abũnna yoko kĩ aniitia ngatĩ avaracẽ,
nyatarka thõõth coo?”
Ũũk ẽrẽẽwõy Yiona kĩcĩn nyia cĩ adĩmanothi Nineve
5 Ma natẽ,
ĩtĩnga Yiona ẽtẽẽk katũga cĩ kõrõõk cĩ gaalawu ĩcĩ obbi ũũk ngatĩvõrĩ aavu loota tõõna ĩcĩ alibanĩ kõrra.
Ngaatĩ õkkõ ẽngẽnycĩ tuggu,
kĩĩ rii cĩ erewinie nẽ natẽ,
kĩĩ katĩ kĩcĩn nyia woccia katĩ cĩ adĩmanothi Nineve.
6 Ma balna natẽ,
aanyĩk Makayyioiti Nyekuci kẽẽt ĩmma cĩ arik natẽ,
kĩĩ rii cĩ ẽẽl Yiona,
ĩthõng balna ẽbẽlbẽl nẽ õrrõt,
nyatarka kẽẽt nĩcẽ.
7 Ma kẽnnẽ ngerethietĩn cĩnnĩ,
itiona Nyekuci kulutianit ĩmma kikiyyia kadak kẽẽt cĩ arik nĩcẽ,
ngaatĩ õdõõngnĩ kẽẽt.
8 Ma balna ngĩ õngõtha kõr,
itiona Nyekuci ngõõt cĩ aaburi cĩ aku tõõna ĩcĩ alibanĩ kõrra,
kuvungan Yiona.
Atũũth balna kõr Yiona kataval.
Ĩthõng abarritek nẽ daaĩth,
ĩthõng õthõõth ĩĩ ne,
“Mayya ngatĩ kadaaknẽ kijiar ngatĩ karũknẽ!”
9 Ẽdẽcĩ kẽnnẽ Nyekuci Yiona ethei ne,
“Ayahi niia thõõth ĩmma cĩ avaracĩcẽ kẽẽt coo?”
Ẽdẽcĩ Yiona athĩ ne,
“Ii,
kavaraci õrrõt kadiimi ngĩ kadaai.”
10 Ĩthõng thĩ,
ĩthĩ Makayyioiti ne,
“Avaraci gõõ niia,
nyatarka kẽẽt wũ balna athii cĩ akati niia,
kõdẽ athũnnẽ buu wo nyia? Alĩnna balna kẽẽt cĩ arik coo baalin codoi dõ, ĩthõng õdõõk baalin cĩ õwõbẽcĩ.
11 Ĩthõng thĩ,
ayak balna Nineve eet cĩk meelĩk cĩk ijiar vucciaknya eet tõrkõnõm (120,000),
cĩk athii cĩ aga thõõth cĩ gerthe kĩ cĩ abũnna,
ĩthõng balna mẽẽlĩ kaala buu.
Athii niia cĩ amui athĩ ne,
kamanni woccia na kõrõõk cĩ gaalawu cobbi wo?”