Ũũk Yiona Nineve
3
Ma natẽ,
ikiyyia Makayyioiti uduwak Yiona ngõnana ramma ethek ne,
2 “Tĩnga bĩt õlõõ ĩcĩ gaalawu cobbi ĩcĩ Nineve,
bĩt duwak eet thõõth wũ balna kaduwaci na aniitia.”
3 Ngaatĩ wanĩco aku athĩknĩ Yiona Makayyioit,
ĩthõng ĩtĩnga ũũk ĩcĩ Nineve.
Maka balna kõrõõgĩ cĩ gaalawu coo õrrõt,
ayak wathinniok iyyio ngatĩ kõyõkõnĩ kĩcĩnĩt ĩnõõnõ vẽlẽk.
4 Ma balna waathĩna ĩcĩ owu,
ithianaĩ Yiona ũũk õtõ õlõõ cobbi ĩcĩ gaalawu,
ĩthõng ũũk uduwak eet ethek ne,
“Wathinniowẽy ĩcĩk ẽẽn eet ramma,
ithiananĩ kõr coo,
agiiriay katĩ Nineve kĩĩ lõõcĩ ĩĩr!”
5 Ma natẽ,
ivitia elemit eeta cĩk Nineve thõõth cĩ Nyekuco,
ngaatĩ aarĩcẽ nẽẽgẽ itin cĩ ẽdẽẽthĩ eleeti daintia,
ĩthõng itihimit ceremua cĩk gerthek,
keyellia mothinit cĩnĩng cĩ gerthetin cĩnĩng.
Arahanĩ balna thõõth coo eetĩnẽy ĩcĩk obbitik,
ĩĩthõng kõdõlan cĩk kĩdĩk.
6 Ma balna ngĩ athĩrar alaanĩ cobbi cĩ Nineve thõõth cĩ aduwa Yiona wo,
ikiyyia ũtũngek nẽ taaba cĩnnĩ cĩ alaantheto,
ĩthõng ũppũrũca ceremua cĩgĩnĩk.
Ĩthõng itihim ceremua cĩk gerthek,
ĩthõng aavu loota tuduwaca.
7 Ngaatĩ aduwacĩ alaanĩ kĩ eet cĩgĩnĩk cĩk obbitik,
eet cĩk Nineve vẽlẽk thõõth cĩ athĩ ne,
“Athii eeti ĩmma cĩ woccia adak,
kõdẽ awũd gimma tõ, ĩthõng athii kaala cĩk woccia adak, kõdẽ awũd gimma tõ kũdũt.
8 Ĩthõng thĩ,
anycĩk eet kitihimit ceremua cĩk uluanak,
ĩthõng ubungit kaal buu ceremuanĩy cĩk uluanak.
Anycĩk eet vẽlẽk kalaacõ Nyekuc tamanoko thinnetinẽy ĩcĩk odoi.
Anycĩk eet vẽlẽk kũtũngtek ngatĩ adĩmanĩ thoothonniok cĩk gerthek kĩ jõrẽnĩna.
9 Ngẽnẽ woccia cĩ aga?
Kerebo katĩ ũũwũ Nyekuci thĩnĩn cĩnnĩ kĩĩ katamatĩhet ageeta,
ĩthõng ĩbĩlĩ varac cĩnnĩ, kĩĩ katĩ athii cĩ kadaaĩ naaga.”
10 Ma balna ngĩ ĩcĩn Nyekuci thoothonniok cĩk atican nẽẽgẽ kĩ ngatĩ ũũngnĩcẽ thoothonniok cĩk gerthek wo,
ikiyyia ũtũwũ thĩnĩn cĩnnĩ,
ĩthõng ĩthĩnga agĩĩra ĩnõõgõ kĩ balna ngĩ aduwa nẽnẽ.