Ũrũga Yesu daaĩtha
(Bẽl Matewo 28:1-8; Luka 24:1-12; Yoanẽ 20:1-10)
16
Ma vurtia cĩ edecciaĩ Kõr cĩ Yuwuthono jiat,
ĩtĩngathõ Maria Madalẽna kĩ Maria yaatĩ Jemithi kĩ ngaa cĩ athĩ thar Thaloome õõt utuyyia ngooroc cĩ õngõlĩ ẽmmẽdẽ,
cĩ õvvõ avuudi ẽlẽ cĩ Yesu.
2 Ma balna ngerethietĩna Lomidikawa,a
balna nganĩ aliba kõr thõng,
õõt nẽẽgẽ ĩcĩ look wũ balna adawini Yesu.
3 Ajinõy balna nẽẽgẽ gõõla athĩ ne,
“Ngẽnẽ woccia katĩ cĩ õkkõ ellet ageeta ẽnyẽẽĩ bĩĩ katũga?”
4 Ĩthõng thĩ,
ma balna ngĩ õvvõ acĩn nẽẽgẽ look wo,
acĩn kẽnnẽ bĩĩ wũ balna anyũgẽnẽ look ẽnyẽhẽ ũũk kabanyca, ĩthõng maka balna bĩĩ neccie õrrõt.
5 Ma balna ngĩ õvvõ ẽhẽẽt nẽẽgẽ look wo,
acĩn kẽnnẽ ngĩthorowoc ĩmma cĩ ẽẽn anjĩlõ cĩ Nyekuco aavĩ loota loowa ĩcĩ athiit cĩ athio,
ahimit ceremua cĩk võõrĩk pẽr.
Atdirlangan balna thõõth coo ĩnõõgõ õrrõt.
6 Ikiyyia othoothĩk nẽ ĩnõõgõ ethek ne,
“Nyĩ ongolinu.
Kagga na adiimnyu niigia Yesu cĩ Natharẽtĩ wũ balna ododowothi kurucea,
athii nẽ ngato tõ,
ũrũga balna nẽnẽ.
Ĩcĩnĩt da ngĩtĩ balna aari nẽẽgẽ ẽlẽ cĩnnĩ wo.
7 Ĩthõng thĩ,
yoko ĩtĩngath õõt uduktiak wobjiak cĩgĩnĩk kĩ Pẽtũrũ kir entek ne,
‘Utuwanẽ nẽ ũũk ĩcĩ looc cĩ Galilea,
õvvõ katĩ acĩnnu niigia ĩnõõnõ natẽ,
kĩ balna ngĩ aduwaccung nẽ agiitia.’ ”
8 Ngaatĩ ẽẽktanẽ nẽẽgẽ loowatõ,
ĩthõng ivirit nyatarka balna agam ĩnõõgõ barritõnĩ kĩ tongolinit,
ĩthõng athii cĩ aduwaai et ĩmma,
nyatarka balna ongollie nẽẽgẽ thõng.
Ilibak Yesu wobjiak cĩgĩnĩk
(Bẽl Matewo 28:9-10; Yoanẽ 20:11-18)
9 Ma balna vurtia cĩ ũrũgaĩ Yesu daaĩtha,
balna Lomidikawa,
ikiyyia ilibak nẽ Maria Madalẽna ĩcowu,
ngaa wũ balna ingkawa nẽ ririwanĩnẽ tũrgẽrẽm cĩk gerthek ĩcĩnnĩ.
10 Õkkõ balna Maria Madalẽna aduwaai wobjiak wũk balna aatĩ uluana.
11 Kõdẽ woyyia balna ngĩ athĩrar nẽẽgẽ ĩnõõnõ ngĩ athĩ ne,
ũrũga Yesu daaĩtha, ĩthõng ĩcĩn Maria Madalẽna Yesu, athii balna cĩ ẽlẽmĩ nẽẽgẽ thõõth cĩnnĩ ẽẽ.
Ilibak Yesu wobjiak cĩgĩnĩk ramma
(Bẽl Luka 24:13-35)
12 Ma vurtia,
ikiyyia ilibak Yesu wobjiak cĩgĩnĩk ramma gõõla cĩ athii cĩ aga nẽẽgẽ balna ngĩ ũtũngtek nẽẽgẽ Yeruthalẽm.
13 Ĩthõng oboddia balna nẽẽgẽ ivitia uduktiak wobjiak õõgĩ buu thõõth coo,
athii kẽnnẽ cĩ ẽlẽmĩ nẽẽgẽ.
Ilibak Yesu wobjiak cĩgĩnĩk õmmõtõ kĩ codoi
14 Ma vurtia cĩnnĩ vẽlẽk,
ikiyyia ilibak Yesu wobjiak cĩk ẽẽn õmmõtõ kĩ codoi balna nganĩ aduwue nẽẽgẽ.
Angany balna nẽ ĩnõõgõ,
nyatarka athii cĩ ayak leminit,
nyatarka balna ĩnĩnga nẽẽgẽ ẽlẽmĩ thõõth cĩ eet wũk balna ĩcĩnĩt ĩnõõnõ, baa vurtia cĩ ũrũgaĩ nẽ daaĩtha.
15 Ngaatĩ ẽthẽcĩ ĩnõõgõ ne,
“Õõt illimanit eet Nyemut cĩ Abũnna loociowẽy vẽlẽk.
16 Eeti cĩ ẽlẽmĩ,
ĩthõng agam batithimo,
eliay katĩ nẽnẽ,
ĩthõng thĩ, eeti cĩ athii cĩ ẽlẽmĩ, uuki katĩ nẽnẽ.
17 Eeta vẽlẽk cĩk katĩ avvu ẽlẽmnya aneeta adĩman katĩ nẽẽgẽ thoothonniok vẽlẽk cĩk anatti.
Ingka katĩ nẽẽgẽ ririwanĩnẽ cĩk gerthek thaarĩy ĩcĩganĩk,
ĩthõng othoothitõ thoothonniowẽy ĩcĩk jõr.
18 Agam katĩ nẽẽgẽ kũwaanya athĩnẽy cĩgĩk,
ĩthõng mĩ adak kũwaanya ĩnõõgõ athii nẽẽgẽ cĩ adaaĩ,
ĩthõng mĩ awũd nẽẽgẽ kẽgẽrõ cĩk woccia aruk ĩnõõgõ,
athii katĩ cĩ adaaĩ kũdũt. Ĩthõng ataadi katĩ nẽẽgẽ athĩn cĩgĩk eetĩnẽy cĩk ĩmmõrĩ, ĩthõng ũbũnta eeta neekie.”
Imiirie Yesu ũũk tammuatiddina
(Bẽl Luka 24:50-53; Tiicanẽ cĩk Tionniawu 1:9-11)
19 Ma vurtia cĩ othoothioĩ Makayyioiti Yesu kĩ ĩnõõgõ vẽlẽk,
ikiyyia õdõngẽ nẽ ũũk tammuatiddina, ĩthõng ũũk aavu attia cĩ athio ĩcĩ Nyekuco.b
20 Ngaatĩ õvõyyĩ wobjiaha cĩgĩnnẽk alimanĩ thõõth cĩ Kiristo loociowẽy vẽlẽk,
ĩthõng balna aticanni Makayyioiti kõdõwẽ kĩ ĩnõõgõ,
ĩthõng thoothiowa cĩk eyeliay cĩk adĩman nẽẽgẽ ẽẽ, ẽyẽla athĩ ne, ẽẽn nyemut cĩnĩng wo dĩdĩ.