Nyaraga cĩ
Tiicanẽ cĩk Tionniawu
Ũũk Yesu tammuatiddina
1
Theopiloth,a kehedici balna na aniitia thoothonniok vẽlẽk wũk balna ẽtẽrẽhanĩ atican Yesub ĩcowu, ĩthõng illimaneek eet nyaraga wũ balna ĩcĩ owu, 2 gii ngĩ õdõlan kõr wũ balna odongini nẽ õkõyyĩ tammuatiddina vurtia cĩ anyĩcẽ nẽ tĩrĩthẽntiok tionniakc wũk balna ẽbẽra nẽ Ririwaca cĩ Dĩhĩmĩ.d 3 Ma balna vurtia cĩ ĩpĩraĩ Yesu, ĩthõng adaak, ikiyyia eyelek tionniak ẽlẽ cĩnnĩ thoothiowẽy ĩcĩk arũknanĩ nẽ daaĩtha. Ilibak baa nẽ ĩnõõgõ ngõnana cĩk meelĩk wathinniowẽy wũk balna ẽẽn eet ramma, ĩthõng othoothitõ thoothonniok cĩk kabicoc cĩ Nyekuco. 4 Ma balna ngĩ aduwue nẽ kĩ tionniak, ikiyyia uduwak nẽ ĩnõõgõ ethek ne, “Nyĩ uungniccu Yeruthalẽm. Ereyyiõy niigia gii ngĩ itionawung Baangĩ Ririwac cĩ Dĩhĩmĩ wũ baa gõõ kethecung na ne, itiona katĩ nẽ. 5 Nyatarka balna agamecung agiitia Yoanẽ batithimoe maamĩy kaganoko. Ĩthõng thĩ, wathinniowẽy ĩcĩk attĩyya ĩcĩk kĩdĩk kaganoko wo, agamnyu katĩ niigia batithimo Ririwaca cĩ Dĩhĩmĩ.”Õdõngẽ Yesu ũũk tammuatiddina
6 Ma balna ngĩ aruumõy tionniaha vẽlẽk ngatĩ odoi doo, ijinit nẽẽgẽ Yesu entek ne, “Makayyioit, õbõdẽcẽ yoko katĩ niia itin coo alaanthẽt Ĩthraĩl?”
7 Ẽdẽcĩ balna Yesu ĩnõõgõ ethei ne, “Athii woccia cĩ ẽẽn thõõth cĩ agayyu niigia itin, kõdẽ nyĩĩlõwẽ cĩgĩnĩk, nyatarka ẽbẽra balna Baangĩ tiirthẽta ĩcĩnnĩ. 8 Ĩthõng thĩ, amũdanu katĩ tiirthẽt katĩ ngĩ ikiyyia Ririwacĩ cĩ Dĩhĩmĩ ĩcunung. Ĩthõng katĩ iittu niigia kẽbẽrẽ cĩganĩk Yeruthalẽma kĩ looca cĩ Yudea kĩ looca cĩ Thamariaf kĩ looc vẽlẽk.”
9 Ma balna ngĩ uduwa Yesu thõõth coo wo vẽlẽk, õdõngẽ nẽ kẽbẽrẽnĩy ĩcĩgĩk, ĩthõng ubung diith ĩnõõnõ kithii nẽẽgẽ cĩ acĩn ĩnõõnõ.
10 Ma balna nga ahamni nẽẽgẽ tammutiddin, ilibtiak eeta gwuak cĩk ẽẽn ramma cĩk maacĩk tamanoko cĩk ahimit ceremua cĩk võõrĩk pẽr, kivitia kĩbĩlĩt ngatĩ aatẽ nẽẽgẽ kabanyca. 11 Ĩthõng ijinit nẽẽgẽ, ĩnõõgõ entek ne, “Niigia eeta cĩk Galilea, abilnu ngato, ĩthõng atahamtiwu tammutiddin nyia? Yesu cĩ acĩnnu niigia odongnyie õkkõ tammuatiddina wo, õbõda katĩ gõõla nĩĩco dõ kĩcĩ acĩnnu niigia ngatĩ odongini õkõyyĩ tammuatiddina wo.”
Eberiay Matiyiathĩ kabarĩc ngĩtĩ Yudathĩ
12 Ngaatĩ amiirẽnẽ tionniaha Thiira ĩcĩ Olivnyawug õvõyyĩ Yeruthalẽma. Õjõõn balna Thiir cĩ Olivnyawu wo, kĩ Yeruthalẽm, ayak reenitin cĩ athii cĩ õdõlan maĩlh codoi. 13 Ma balna ngĩ õdõlanit nẽẽgẽ kõrõõk cĩ gaalawu, õõt otodit ciith tiddina, ĩthõng õõt aavutõ balna nẽẽgẽ natẽ. Tionniak wũk balna aatĩ natẽ wo cĩkkõ, Pẽtũrũ kĩ Yoanẽ, Jemith kĩ Anderiya, Pilipo kĩ Tomath, Bartholomewo kĩ Matewo, Jemith ngẽrtĩ Alivewo kĩ Thimõnẽ wũ baa gõõ muotĩ õrrõt Ĩthraĩla, kĩ Yudath ngẽrtĩ Jemithi. 14 Aruumõy nẽẽgẽ dõõkĩthĩ, ĩthõng alayyiõy ngatĩ odoi kĩ ngaay õõgĩ kĩ Maria yaatĩ Yesu kĩ gõtõõnõgĩ Yesu.
15 Ma wathinniok nĩĩkẽ, ĩtĩnga Pẽtũrũ kõrgẽna cĩ lemnyiok cĩk Yesu vẽlẽk cĩk balna ẽẽn eet tur kĩ etĩmma, 16 ĩthõng õthõõth ĩĩ ne, “Gõtõõnõga kĩ ngõõnõga, ikiyyia thõõth wũ balna eheeddi Nyaragawa ĩcĩ Nyekucoi edenyiay gõõla wũ balna aduwa Ririwacĩ cĩ Dĩhĩmĩ baa lõõla kũtũga cĩ Davidej thõõth cĩ ẽyẽlẽcĩ Yudathĩ eet kagamit Yesu. 17 Ẽẽn balna Yudathĩ et cĩnac cĩ kiiriok kõdõwẽ, ĩthõng katicani kĩ ĩnõõnõ kõdõwẽ.
18 “Ĩthõng nyatarka anyinit cĩ amũda nẽ, nyatarka gerthetin cĩnnĩ wo, ũũk ũtũwa mana. Ma natẽ, ũũk uuki õõ looc manatõ cĩnnĩ noko lir kapaaẽ kẽẽng kilibta kũlũktẽna ngatĩvõrĩ. 19 Ma balna ngĩ ivitia ĩthĩraritõ eeta Yeruthalẽma thõõth coo, akattiek mana nĩcẽ thar cĩk athĩ ne, Akeldama athĩ thõõth coo thõõtha ĩcĩnĩng ne, Mana cĩ Biyyietu.”
20 Ngaatĩ thĩ balna athĩnnĩ Pẽtũrũ ne, “Eheeddi Nyaragawa ĩcĩ Tegeluanu athĩ ne,
“Nyekuc, anyĩk woccia niia ciith cĩnnĩ
kaavu kaganoko, kithii eeti cĩ aavẽ tõ.”k
Ĩthõng naboo ĩĩ ne,
“Abarĩc woccia katĩ eeti ĩmma taaba cĩnnĩ cĩ makathĩto.”l
21 Ĩthõng thĩna, nẽnnẽ yoko kadiim kẽbẽra et ĩmma, eetĩnẽy ĩcĩk gõõ karũmẽ kĩ ageeta wathinniok wũk balna gõõ kiirioĩ kĩ Makayyioit Yesu, 22 ẽtẽrẽhanĩ kõr wũ balna agamẽcĩ Yoanẽ Yesu batithimo, ĩĩthõng kikiyyia kõdõngẽ Yesu kũũk tammuatiddina. Nyatarka kĩĩ katĩ keberyia et cĩ katĩ ẽẽn keberec cĩ thõõth wũ balna arũknanĩ Makayyioiti Yesu.
23 Ngaatĩ abũũngĩ eeta vẽlẽk eet ramma. Athĩ balna ĩmma Yothẽbõ cĩ athĩ thar õõgĩ Barthabath, ĩthõng athĩ thar õõgĩ Juthtuth, ĩthõng balna athĩ ĩmma naboo Matiyiath. 24 Ma natẽ, alayyiõy nẽẽgẽ vẽlẽk ĩĩtõ ne, “Makayyioit, aga niia thinneti cĩk eet vẽlẽk. Yelehet et jang da balna cĩ ẽbẽra niia, 25 kĩĩ kabarĩc tiic cĩ tionniakto wũ balna uungni Yudathĩ, ĩthõng ũũk ngatĩnnĩ.” 26 Ma natẽ, ĩmmĩcĩt nẽẽgẽ lirlir, ngaatĩ balna ẽbẽranĩ lirliri, Matiyiath kũrũmõthĩk tionniak cĩk ẽẽn õmmõtõ kĩ codoi ẽẽ.