Ikiyyia Ririwacĩ cĩ Dĩhĩmĩ
2
Ma Kõr cĩ Peyian cĩ Wathinniok eet ramma kõmmõtõ,a aatĩ balna lemnyiowa cĩk Makayyioktak vẽlẽk ngatĩ odoi. 2 Ma tamanoko, ikiyyia moloowĩ cĩ acalcal cĩ tiiri cĩ õgõõn kĩ kuvuro cĩ aku tammuatiddina kikiyyia kĩbbĩt ciith cĩ aatẽ nẽẽgẽ ẽẽ. 3 Ma natẽ, ĩcĩnĩt nẽẽgẽ kaal cĩk alanyca cĩk õgõõn kĩ ahaatuana cĩk guonyawu cĩk avvu mĩn mĩn kivitia kaavutõ eletinẽy ĩcĩgĩk. 4 Ma natẽ, ĩbbĩt Ririwacĩ cĩ Dĩhĩmĩ ĩnõõgõ vẽlẽk, ngaatĩ õthõõthĩ nẽẽgẽ thoothiowẽy mĩn mĩn kĩcĩ anyi Ririwacĩ ĩnõõgõ ẽẽ.5 Aatĩ balna Yudei Yeruthalẽma cĩk ongollie Nyekuc cĩk alũnganiay loociowẽy vẽlẽk. 6 Ma balna ngĩ athĩrar nẽẽgẽ molook coo wo, ivitia uluttiay meelitini natẽ. Ĩthõng thĩ, balna akulei nẽẽgẽ jien, nyatarka balna athĩrar õthõõth lemnyiowa cĩk Makayyioktak thoothiowẽy ĩcĩgĩk mĩn mĩn. 7 Ngaatĩ atubuanĩ thõõth coo ĩnõõgõ õrrõt, ĩthõng ĩĩtõ ne, “Athii wõnõ cĩ ẽẽn eet wũk gõõ õthõõth Galileyiey cĩkkõ? 8 Ĩthõng thĩ, kĩthĩraritõ naaga vẽlẽk cĩk kavvu loociowẽy ĩcĩk rẽẽng thõõth cĩnac cĩ õthõõth eeta neekie wo nyia? 9 Keegin nõõnõ naaga gwuak eet cĩk looc cĩ Parthia, ĩthõng avvu gwuak looca cĩ Meedĩ kĩ cĩk avvu Ẽlama, ĩthõng ĩĩtõ eeta gwuak cĩk looc cĩ Methopotamia kĩ Yudea kĩ Kapadocia. Ĩthõng avvu gwuak looca cĩ Pontuthi kĩ Athia, 10 Virigia kĩ Pamvilia kĩ Ijib kĩ looca cĩ Libia ngatĩ õjõõn kĩ Cirene, eet cĩk Rũma, 11 eet cĩk Kẽrẽẽtẽ kĩ cĩk Arabia. Karittiay balna naaga eeta gwuak keegin Yudei, ĩthõng balna elemit eeta gwuak ĩĩtõ Yudei. Ĩthõng yoko, kĩthĩraritõ ĩnõõgõ ngatĩ aduwanĩ thoothonniok cĩk abũnna cĩk adĩman Nyekuci thoothiowẽy ĩcĩgac mĩn mĩn!” 12 Atubuan balna thõõth coo eet vẽlẽk, ĩthõng atalmanyantẽ ijintõy mĩn ĩĩtõ ne, “Athĩ woccia thõõth coo ne?”
13 Ĩthõng arannĩ balna kẽnnẽ eeta gwuak lemnyiok cĩk Makayyioktak athĩ ne, “Uwuy, ũwũdĩt kette eeta cĩkkõ mẽrtẽ cobbi, ĩthõng ĩbaktẽ õrrõt.”
Irionĩk Pẽtũrũ meelitin
14 Ma natẽ, ĩtĩnga Pẽtũrũ kĩ tionniak cĩk ẽẽn õmmõtõ kĩ codoi ẽẽ, ĩthõng irion moloowa ĩcĩ obbi ĩĩ ne, “Niigia gõõnõga Yudei kĩ agiitia vẽlẽk cĩk attiyyu Yeruthalẽma, anycangũ da kuduwawung thõõth coo. Ĩthĩrarit thõõth cĩ kaduwa na wo jurrung. 15 Athii eeta cĩkkõ cĩ ĩbakci kĩcĩ ahaddu niigia wo. Ma yoko nõõnõ ngaanĩ ẽẽn ngerethietĩn nga ẽẽn itini tõrkõwẽc wo. 16 Athii eeta cĩkkõ cĩ ĩbakci, ĩthõng thĩ, ẽẽn coo thõõth wũ balna aduwa Jõẽlĩ eeti cĩ õthõõth molook cĩ Nyekucob athĩ ne,
17 “ ‘Athĩ Nyekuci wathinniowẽy ĩcĩk aturna ne,
kaanyi katĩ na Ririwac cannĩ eet vẽlẽk.
Irion katĩ doolia cuguk cĩk maacĩk
kĩ cĩk ngayyik vẽlẽk thõõth cannĩ.
Ĩthõng acĩn katĩ ngĩthõrõĩ cuguk kaal cĩk Nyekucak,
ĩthõng ayak katĩ eeta cuguk cĩk maacĩk,
cĩk atanganyitõ ngonothiok cĩk meelĩk.
18 Wathinniowẽy nĩĩkẽ, kaanyi katĩ na Ririwac cannĩ
nyakapanak cĩganĩk cĩk maacĩk kĩ cĩk ngayyik,
ĩthõng iriontĩk katĩ eet thõõth cannĩ.
19 Kadĩmani katĩ na kaal cĩk anaat eeta tammuatiddina,
ĩthõng kĩdĩmana katĩ yelintiok looca,
kĩĩ katĩ kĩcĩnĩt eeta biyyie,
kĩ guo kĩ burrut cobbi õrrõt.
20 Adaaĩ katĩ kõr, ĩthõng ũtũwẽ nyĩĩloĩ kĩĩ biyyie
õõwa ĩcĩ ngaanĩ kikiyyia kõr cobbi
cĩ abulie cĩ Makayyiokto.c
21 Ĩthõng ẽẽl katĩ Makayyioiti
eet vẽlẽk cĩk ala ĩnõõnõ.’d
22 “Niigia eeta cĩk Ĩthraĩlĩ ĩthĩrarit thoothonniok cĩkkõ. Ẽẽn balna Yesu cĩ Natharẽtĩ et cĩ itiona Nyekuci, kikiyyia nẽ kĩdĩman thoothonniok cĩk anaat eeta, kĩ kaal cĩk eyeliay, agayyu niigia vẽlẽk thoothonniok cĩkkõ cĩk balna anyi Nyekuci Yesu kĩdĩman kõrgẽna ĩcunung. 23 Ahad balna Nyekuci, ĩthõng thĩ, anyung nẽ agiitia Yesu. Ĩthõng naboo niigia kĩ gẽrẽthanniok otoddoyyu ĩnõõnõ kurucea.e 24 Ĩthõng thĩ, balna ũrũgũtha Nyekuci ĩnõõnõ loowatõ, ĩthõng ithii daaĩthĩ cĩ agam ĩnõõnõ naboo tõ, nyatarka balna athii nẽ cĩ ũũlĩ ngatĩ adaaknĩ naboo. 25 Aduwa alaanĩ Davide thõõth cĩ Yesu athĩ ne,
“ ‘Kacini na Makayyioit dõõkĩthĩ nguuma cannĩ.
Nyatarka aavĩ nẽ attia cannĩ ĩcĩ athio,f
ĩthõng athii katĩ gii cĩ omonnia aneeta tõõ.
26 Ĩthõng thĩna, ẽbẽlbẽl thĩnĩn cannie õrrõt,
ĩthõng atalĩ katĩ ahaatĩ cannie,
aavĩ katĩ ẽlẽ cannie muwẽẽnta cĩ abũnna,
27 nyatarka athii katĩ cĩ ũũngnĩca niia aneeta loowatõ,
kõdẽ ũũngnĩca aneeta Et cunni cĩ Dĩhĩmĩ kummu.
28 Eyeleea balna niia aneeta gõõl cĩ rũgẽtõ,
kĩ ngatĩ aavẽ niia joonui kĩ aneeta anya kẽbẽlbẽl jurrung.’g
29 “Gõtõõnõga kĩ ngõõnõga, kaduwacung na thõõth cĩ ẽẽn dĩdĩ cĩ baangiet cĩnac Davide. Adaaĩ balna, ĩthõng adawẽ, ĩthõng yoko aatĩ bĩĩyẽna cĩgĩnnẽk ngato kĩĩ yoko. 30 Ĩthõng thĩ, balna ẽẽn nẽ et cĩ õthõõth molook cĩ Nyekuco, ĩthõng aga ngatĩ abũtaneei Nyekuci ĩnõõnõ ngatĩ katĩ aarĩcẽ doolec ĩmma cĩ tatũk cĩnnĩ kikiyyia kaavue taaba cĩnnĩ kĩĩ alaan. 31 Nyatarka acĩn Davide thõõth cĩ ngaanĩ avĩya ĩcĩ owu, ngaatĩ aduwanĩ rũgũthanĩt cĩ Kiristoh ngatĩ athii cĩ ũũngnothĩcẽ nẽ loowatõ, kõdẽ kummu ẽlẽ cĩnnẽ.
32 “Ũrũgũtha Nyekuci Yesu daaĩtha, ĩthõng yoko keegin naaga vẽlẽk kẽbẽrẽ cĩk thõõth kir cĩ ẽẽn dĩdĩ. 33 Õdõngẽ balna Yesu ũũk tammuatiddina kũũk kaavu attia ĩcĩ athio ĩcĩ Nyekuco, ĩthõng anyi Baangietĩ ĩnõõnõ Ririwac cĩ Dĩhĩmĩ kĩ balna ngĩ abũtana nẽ. Ẽẽn Yesu buu et cĩ anyet ageeta Ririwac cĩ Dĩhĩmĩ, ĩnõõnõ yoko thõõth cĩ acĩnnu, ĩthõng ithiktu wo. 34 Athii balna cĩ õtõd Davide tammutiddin, ĩthõng athii cĩ õthõõth ẽlẽ cĩnnĩ balna ngĩ athĩ ne,
“ ‘Aduwaai Makayyioiti Makayyioit cannĩi ethei ne,
“Avvu niia ĩcĩ athiit cannĩ cĩ athio,j
35 kuumuc gii ngĩ kaarĩha mĩrõk cugunik
loota thoonĩy ĩcugunik.” ’k
36 “Ĩthõng thĩna, eeta vẽlẽk cĩk Ĩthraĩlĩ abũnna ma ngĩ agayyu dĩdĩ ngatĩ anyĩcẽ balna Nyekuci Yesu wũ balna ododdicu niigia kurucea kĩĩ Makayyioit, ĩthõng ĩthĩ Kiristo.”
37 Ma balna ma ngĩ athĩrar eeta thõõth coo wo, omoththie õrrõt, ĩthõng entek Pẽtũrũ kĩ tionniak õõgĩ ne, “Gõtõõnõga, kutuguthia thẽk yoko naaga kuu?”
38 Ẽdẽcĩ Pẽtũrũ ethei ne, “Ũtũngtek niigia vẽlẽk gerthetin cunung, ĩthõng agamtu batithimo thaarĩy ĩcĩk Yesu Kiristo, kĩĩ katĩ kẽnyẽktẽ thoothonniowa cĩk gerthek cuguk. Ĩthõng thĩ, katĩ anyĩwothiwung anyinti cĩ Ririwac cĩ Dĩhĩmĩ. 39 Ẽẽn thõõth cĩ abũtanni wo cunung kĩ dõõlĩ cuguk kĩ cĩ eet vẽlẽk cĩk katĩ ẽbẽra Makayyioiti Nyekuci cĩnac vatĩkẽy vẽlẽk ĩcĩk aatẽ nẽẽgẽ.” 40 Ma natẽ, uduwak Pẽtũrũ ĩnõõgõ thoothonniok õõgĩ cĩk meelĩk õrrõt. Ngaatĩ ĩlalẽcĩ, ĩthõng irionĩk ethek ne, “Eelia eleeti cuguk thõõtha ĩcĩ katĩ aku kĩ eet cĩk erkinya cĩkkõ, nyatarka ẽẽn nẽẽgẽ gẽrẽthanniok.” 41 Agamit balna eeta cĩk elemit nyemut coo batithimo waathĩn nĩcẽ. Ẽẽn balna kebinietĩ cĩnĩng vucciaknya iyyio (3,000). 42 Ĩthõng balna arũmẽ nẽẽgẽ kĩ tionniak, aliman thõõth cĩnĩng, ĩthõng ũrũmtẽ kõdõwẽ kĩ lemnyiok õõgĩ. Ẽngẽr nẽẽgẽ ahat cĩ avaadiay, ĩthõng uduita kĩĩ kalayyiõy kõdõwẽ.
Rũmẽnĩt cĩ wobjiawu
43 Itdirlangtẽ balna eeta vẽlẽk ngatĩ aticanĩ tionniaha thoothonniok cĩk anaat eeta cĩk meelĩk kĩ kaal cĩk eyeliay. 44 Ĩthõng balna arũmẽ lemnyiowa, ĩthõng engerit dainit kĩ ijjio cĩk ayak nẽẽgẽ vẽlẽk kõdõwẽ. 45 Ũũtẽnẽ gõõ nẽẽgẽ ijjio cĩgĩk, ĩthõng engerit kaal vẽlẽk gõõla ĩcĩ adiimi eeta vẽlẽk. 46 Wathinniok vẽlẽk, aruumõy nẽẽgẽ reerunga cĩ Ciith cĩ Nyekuco.l Agatan ahat cĩ avaadiay korookjiowẽy, ĩthõng uduktõy kõdõwẽ talintia thinnetinẽy ĩcĩk võõrĩk, 47 adĩhĩth nẽẽgẽ Nyekuc, ĩthõng atalĩ balna eeta vẽlẽk ĩnõõgõ. Ĩtoori Makayyioiti meelitin cĩ lemnyiowu eet cĩk eliay wathinniowẽy vẽlẽk.