Anyĩk Pẽtũrũ tuwulliait kũbũna
3
Õvvõ balna kõr ĩmma, Pẽtũrũ kĩ Yoanẽ Ciitha cĩ Nyekuco itin cĩ lawintio balna ngĩ ẽẽn itini iyyio yiomona. 2 Aavĩ balna eeti ĩmma cĩ ngõõlĩ balna thẽk tiriathẽtĩna cĩnnĩ cĩ odongothi araana cĩ reerung cĩ Ciith cĩ Nyekuco cĩ athĩ eeta thar cĩgĩnĩk ne, Araan cĩ Dĩhĩmĩ. Odongothi nẽ dõõkĩthĩ kala eet cĩk ẽhẽẽt reerung cĩ Ciith cĩ Nyekuco. 3 Ma baa ngĩ acĩn nẽ Pẽtũrũ kĩ Yoanẽ balna ngĩ ĩĩtõ õjõõntĩ idiimitõ itiothõ reerung ĩcĩtõ ẽẽ, ala nẽ ĩnõõgõ nyarobinya. 4 Ngaatĩ acĩnĩ Pẽtũrũ kĩ Yoanẽ ĩnõõnõ. Ma natẽ, ĩthĩ Pẽtũrũ ne, “Cĩnet da ageeta!” 5 Ngaatĩ ahammĩcẽ nẽ ĩnõõgõ, ahadeci ngatĩ anyĩcẽ ĩnõõnõ gimma.6 Ma natẽ, ethek Pẽtũrũ ĩnõõnõ ne, “Laang, athiina nyarobinya cĩk ẽẽn thĩĩk cĩk athĩ kathalkathal,a kõdẽ daab tõ. Ĩthõng thĩ, nẽnnẽ thẽk kaanyi gimma cĩ kayai. Thaarĩy ĩcĩk Yesu Kiristo cĩ Natharẽtĩ, tĩnga bĩtõ.” 7 Ngaatĩ agamĩ Pẽtũrũ ĩnõõnõ athiit cĩnnĩ cĩ athio kĩbĩl nẽ jiena. Ma natẽ, ũbũnta thoona cĩk tabanyĩk kĩ kẽbẽrẽ cĩk thoonu cĩk eetak noko. 8 Ma natẽ, õngõth balna nẽ kĩbĩl jiena, ngaatĩ õwõyyĩ. Irioit kĩ Pẽtũrũ kĩ Yoanẽ itiothõ reerung cĩ Ciith cĩ Nyekuco, ĩthõng ĩtĩnga nẽ õngõth ĩdĩhĩth Nyekuc jiena. 9 Acĩn balna eeta vẽlẽk ĩnõõnõ ngatĩ õwõyyĩ, ĩthõng ĩdĩhĩth Nyekuc jiena. 10 Ma natẽ, agaacõ ngatĩ ẽnnẽ nẽ tuwulliait wũ gõõ ala eet Araana cĩ Dĩhĩmĩ ĩcĩ Ciith cĩ Nyekuco, ngaatĩ akulẽcĩ eeta jien õrrõt, nyia cĩ anyi ĩnõõnõ kaavu noko ẽẽ.
Irion Pẽtũrũ Ciitha cĩ Nyekuco
11 Ma balna ngaanĩ odongnothi tuwulliaiti Pẽtũrũ kĩ Yoanẽ, ivitia eeta vẽlẽk cĩk balna acĩn thõõth cĩ anatti ẽẽ, ivir meelitini ũũk ĩcĩnĩng nginiwa ĩcĩ athĩ thar Buul cĩ Thõlõmõnẽ.b 12 Ma baa ngĩ acĩn Pẽtũrũ meelitin ẽẽ, ethek ĩnõõgõ ne, “Niigia eeta cĩk Ĩthraĩlĩ, akulecu niigia jien nyia? Akanecetu ageeta kẽbẽrẽ kaavuttia kĩcĩ ẽẽn tiirthẽt cĩnang, kõdẽ bũnnathĩt cĩ kaanyicia tuwulliait coo kõtõõ wo nyia? 13 Nyekuc cĩ Abrahamĩ,c Nyekuc cĩ Aĩthaĩd kĩ Nyekuc cĩ Yokobĩ,e Nyekuc cĩ õõ baatĩ baajigi baangietĩ cĩgaac cĩ abuluth ticciannioit cĩnnĩ Yesu wũ balna ovolongu niigia ĩnõõnõ kuruwue. Aburnu ĩnõõnõ kẽbẽrẽnĩy ĩcĩk Pĩlatõ, kõdẽ woyyia balna adiim uungni Pĩlatõ ĩnõõnõ kũũk. 14 Aburnu kẽnnẽ balna niigia Et cĩ Callĩ cĩ Edeemi Thoothonniok, ĩthõng ijintu Pĩlatõ kõõgawung et cĩ gerthe cĩ aruk eeta. 15 Uruktu balna niigia Et cĩ anyet rũgẽt, ĩthõng thĩ, balna ũrũgũtha Nyekuci ĩnõõnõ daaĩtha. Keeginna yoko naaga kẽbẽrẽ cĩk thoothonniok cĩk adĩman nẽ wo. 16 Icintu niigia tuwulliait coo, ĩthõng agayyu ĩnõõnõ. Nyatarka leminit cĩnnĩ ĩcĩ Yesu ikiyyia ũbũna nẽ. Anyi leminti cĩ ẽlẽmĩ nẽ Yesu wo, ĩnõõnõ kũbũna jurrung kĩ yoko ngĩ acĩnnu niigia ĩnõõnõ wo.
17 “Gõtõõnõga kĩ ngõõnõga, kagga na ngĩ erekcung agiitia gii wũ balna adĩmannu kĩ balna mĩ adĩman makayyiowa cuguk. 18 Ĩthõng thĩ, ẽẽn coo gõõl cĩ ẽnnẽ thõõth cĩ Nyekuci dĩdĩ, wũ balna aduwa eeta cĩk õthõõth molook cĩ Nyekuco ngatĩ athĩnnĩ nẽẽgẽ ne, apĩrna woccia katĩ Kiristo. 19 Ũtũngtek niigia gerthetin cunung, ĩthõng ivitiawu ĩcĩ Nyekuco, kĩĩ katĩ kẽnyẽktẽ thoothonniowa cĩk gerthek cuguk, 20 ĩthõng thĩ, aku katĩ itini neccie cĩ katĩ anyi aniitia Makayyioiti tiirthẽt cĩ jõr. Itionacung katĩ nẽ Yesu wũ balna ẽbẽra Nyekuci kĩĩ Kiristo. 21 Ĩthõng thĩ, aavĩ Yesu tammuatiddina kuumuc kikiyyia kõr cĩ anyĩcẽ Nyekuci kaal vẽlẽk kĩĩtõ jõr kĩ balna mĩ aduwa eeta wũk dĩhĩmĩk wũk õthõõth molook cĩ Nyekuco baa lõõla. 22 Nyatarka balna athĩ Muthaf ne, ‘Ẽbẽra katĩ Makayyioiti Nyekuci cunung et cĩ õthõõth molook cĩ Nyekuco ĩmmag cĩ õgõõn kĩ na eetĩnẽy cuguk. Ĩthĩrarit thẽk niigia thõõth vẽlẽk cĩ aduwaccung nẽ agiitia. 23 Eeti cĩ athii cĩ athĩrar ĩnõõnõ, athii katĩ cĩ arũmẽ kĩ eet cĩk Nyekucak naboo.’h
24 “Uduktia balna Thamuelei kĩ eet cĩk õthõõth molook cĩ Nyekuco wũk balna avvu vurtia buu thõõth cĩ yoko acĩnnu wo. 25 Ĩthõng eeginnu niigia dõõlĩ cĩk eet cĩk õthõõth molook cĩ Nyekuco kĩ cĩk ngẽrẽmngẽrẽm wũ balna adak Nyekuci kĩ baajigu. Ethei balna nẽ Abraham ne, ‘Amũda katĩ eeta cĩk loociowu vẽlẽk gataninit dõõlẽnĩy ĩcĩk dõõlĩ cĩk dõõlĩ cugunik.’j 26 Ma balna ngĩ ũrũgũtha Nyekuci ticciannioit cĩnnĩ Yesu, itiona balna nõõnõ nẽ ĩnõõnõ kikiyyia kagatanung agiitia codoi codoi, katĩ ngĩ ũtũngtewu niigia gerthetin cunung.”