Ayaktiay Pẽtũrũ kĩ Yoanẽ lokika
4
Ma balna nganĩ irioni Pẽtũrũ kĩ Yoanẽ eet, ilibtiak paadĩrnyaa kĩ makayyioit cĩ nyĩcẽkẽru cĩ ẽbẽk Ciith cĩ Nyekuco kĩ Thadutheib ĩnõõgõ. 2 Avaracĩth balna nẽẽgẽ õrrõt, nyatarka aliman tionniaha eet ethei ne, eeta cĩk adaaitõ arũkna katĩ daaĩtha, kĩ balna ma ngĩ arũkna Yesu daaĩtha. 3 Ma natẽ, agamit nẽẽgẽ Pẽtũrũ kĩ Yoanẽ, nyatarka balna ĩthĩ lõõcĩ jiatĩn, aryik nẽẽgẽ ĩnõõgõ kĩjana baalin kaal kĩĩ ngerethietĩn. 4 Ĩthõng thĩ, kẽnnẽ balna ĩthĩraritõ eeta cĩk meelĩk nyemut, ĩthõng elemita, ngaatĩ ĩtoorinie kebinietĩ cĩ lemnyiowu kĩĩtõ woccia vucciaknya tur (5,000).5 Ma ngerethietĩn cĩnnĩ, ũlũngantiay makayyiowa kĩ eet cĩk obbitik kĩ limanniok cĩk Ngiranc cĩ Mutha kivitia kurumtõy Yeruthalẽma. 6 Irion balna paadĩrĩ cobbid cĩ athĩ Anath kĩ Kaĩvath kĩ Yoanẽ kĩ Alẽkthanda kĩ eet õõgĩ cĩk obbitik cĩk kõrõõk cĩ paadĩr cobbi kĩ ĩnõõgõ. 7 Ngaatĩ ayahianĩ Pẽtũrũ kĩ Yoanẽ kẽbẽrẽnĩy cĩgĩk, ĩthõng ijinit entek ne, “Tiirthẽt jang cĩ adĩmanu niigia thõõth coo, kõdẽ thar cĩk ngẽnẽ cĩk aticaninu niigia wo?”
8 Ĩbbĩt balna Pẽtũrũ Ririwacĩ cĩ Dĩhĩmĩ ngaatĩ aduwacĩ ĩnõõgõ ẽthẽcĩ ne, “Niigia makayyiowa cĩk eetu kĩ eet cĩk obbitik! 9 Mĩ kavvunna naaga kõr coo kivitiaha kijintea, nyatarka thimatĩth cĩ eyelothi tuwulliait kĩ gõõl cĩ abũnnanĩ nẽnẽ, 10 agaac thẽk nõ niigia thõõth coo kĩ eet cĩk Ĩthraĩlĩ vẽlẽk. Thaarĩy ĩcĩk Yesu Kiristo cĩ Natharẽtĩ, wũ balna ododdicu niigia kurucea, ĩthõng ũrũgũtha ĩnõõnõ Nyekuci daaĩtha, cĩ abũnnanĩ eeti coo, abĩlĩ nguuma cunung wo. 11 Õthõõth Nyaraga cĩ Nyekuco Yesu athĩ ne,
“ ‘Bĩĩ wũ balna ũtũbũrĩt tengenyiowa,
ikiyyia ĩthĩ bĩĩ cĩ tiiri õrrõt ciitha.’e
12 Yesu dõ cĩ ayak tiirthẽt cĩ ẽẽla eeta. Athii Nyekuci cĩ anyet ageeta thar õõgĩ loota ngato cĩk woccia ellet ageeta.”
13 Ma balna ngĩ acĩn nẽẽgẽ ngatĩ õthõõthĩ Pẽtũrũ kĩ Yoanẽ thõõth coo tiirion wo, ĩthõng ẽẽn nẽẽgẽ eet cĩk nga kilimantẽ, ĩthõng ẽẽn eet kaganoko ẽẽ, ivitia angalillie eeta, ĩthõng agaacõ ngatĩ balna gõõ arũmẽẽnĩ Pẽtũrũ kĩ Yoanẽ kĩ Yesu. 14 Ĩthõng thĩ, ma balna mĩ acĩn nẽẽgẽ tuwulliait ngĩ abĩlĩ kĩ wobjiak ũbũna wo, ĩthĩnga ẽpẽkan nẽẽgẽ thõõth coo kũdũt. 15 Ngaatĩ nõõnõ aduwacĩ makayyiowa ĩnõõgõ kõõt ngatĩvõrĩ ciitha ĩcĩ lokikowo.f Ma natẽ, ijintõy nyaguana ĩĩtõ ne, 16 “Kõgõõn woccia eet cĩkkõ kuu? Agaacõ eeta Yeruthalẽma ngato vẽlẽk ngatĩ ĩdĩmantĩ nẽẽgẽ thõõth cĩ anaat eeta cĩ makĩ, ĩthõng woccia athii cĩ kẽpẽkan naaga. 17 Ĩthõng thĩ, ngatĩ kabĩlnĩ naaga thõõth coo kithii cĩ athanothi eet rẽẽna, adiim kaduwai ĩnõõgõ tiirthẽta kithii nẽẽgẽ cĩ abuungi eet thar cĩk Yesu naboo.”
18 Ngaatĩ avaanĩ ĩnõõgõ koboddia ciiatõ ĩcĩ lokikowo naboo, ĩthõng ommoktek ĩnõõgõ kithii cĩ õthõõth, kõdẽ aliman eet thaarĩy ĩcĩk Yesu. 19 Ĩthõng thĩ, ẽdẽcĩ kẽnnẽ balna Pẽtũrũ kĩ Yoanẽ athĩ ne, “Ahadit da nõõnõ niigia katĩ ngĩ edeemothi gõõla cĩ Nyekuco ngatĩ woccia kathiknung naaga agiitia kijiar Nyekuc. 20 Athii woccia cĩ kativaninia thõõth wũ balna kĩthĩraryia, ĩthõng kĩcĩnta.”
21 Ngaatĩ ẽgẽrẽnyẽcĩ makayyiowa ĩnõõgõ, ĩthõng anycĩk kõõt. Athii balna cĩ amũda nẽẽgẽ thõõth cĩ woccia uuki ĩnõõgõ, nyatarka balna adĩhĩth eeta vẽlẽk Nyekuc thoothiowẽy ĩcĩk adĩman nẽ ẽẽ. 22 Ayak balna eeti cĩ ngõõlĩ cĩ balna anyĩwothi kũbũna thõõtha ĩcĩ anatti ẽẽ, erkinya eet ramma.
Lawinit cĩ lemnyiowu
23 Ma balna ngĩ ooktiay Pẽtũrũ kĩ Yoanẽ, edecciek nẽẽgẽ õõt uduktiak eet cĩgĩk thõõth vẽlẽk wũ balna aduwaai ĩnõõgõ makayyiowa cĩk paadĩrnyawu kĩ eet cĩk obbitik. 24 Ma balna ngĩ athĩrar lemnyiowa thõõth coo wo, uluttiay nẽẽgẽ vẽlẽk ngatĩ odoi, ĩthõng alaacõ Nyekuc ĩĩtõ ne, “Makayyioit Tiiryioit, wũ balna ẽngẽnyca niia tammutiddin kĩ looc kĩ bũlũc kĩ kaal vẽlẽk cĩk aatẽ ĩnõõgõ. 25 Ĩthõng Ririwaca ĩcĩ Dĩhĩmĩ othoothonu balna niia kĩ baangiet cĩnang Davide. Ẽẽn balna nẽ ticciannioit cunni, ĩthõng uduwawu niia ĩnõõnõ ethei ne,
“ ‘Nyia kavaracitõ loociowa,
ĩthõng eeta cĩk atukwuan thõõth cĩ gerthe wo,
athii nẽẽgẽ cĩ ayak tiirthẽt cĩ adĩmanĩ?
26 Aito alaanẽta cĩk loociowu jore,
ĩthõng athaddie makayyiowa kõõt kuuktõy
kĩ Makayyioit kĩ alaan cĩ balna ẽbẽra nẽnẽ.’g
27 Ĩthõng dĩdĩ urumtõy balna Ẽrõõdĩh kĩ Pontioth Pĩlatõ kĩ eet cĩk athii cĩ ẽẽn Yudei kĩ eet cĩk Ĩthraĩlĩ Yeruthalẽma ngato, ĩthõng ĩlĩhĩt ticciannioit cunni cĩ callĩ Yesu wũ balna ẽbẽra niinia. 28 Ĩdĩmanit balna nẽẽgẽ thõõth wũ balna aduwa niia tiirthẽta kĩ gẽẽnyĩtha cunni kikiyyia kedenyiay. 29 Makayyioit, thĩk thõõth cĩ gerthe cĩ a nẽẽgẽ ne, adĩmanecet woccia katĩ nẽẽgẽ ageeta ẽẽ. Anyĩk ticcianniok cugunik kothoothitõ nyemut cunni tiirion. 30 Yelehet ageeta tiirthẽt cunni kaanyĩk eet kũbũnta, ĩthõng ĩdĩmanu niia kaal cĩk anaat eeta thaarĩy ĩcĩk ticciannioit cunni cĩ dĩhĩmĩ Yesu.”
31 Ma balna ngĩ alayyiõy nẽẽgẽ vẽlẽk, õtõmmõ ngĩtĩ alawini nẽẽgẽ ẽẽ. Ma natẽ, ĩbbĩt Ririwacĩ cĩ Dĩhĩmĩ ĩnõõgõ, ngaatĩ õthõõthĩ nẽẽgẽ nyemut cĩ Nyekuco tiirion.
Otholit lemnyiowa ijjio cĩgĩk
32 Ayak balna lemnyiowa vẽlẽk muwẽẽnĩt kĩ thĩnĩn codoi doo. Athii balna eeti cĩ ayak ijjio cĩgĩnĩk mĩn tõ, ĩthõng thĩ, balna õthõl nẽẽgẽ kaal vẽlẽk cĩk ayahĩ. 33 Tiirthẽta ĩcĩ obbi, aduwaai balna tionniaha eet ngatĩ ũrũgaĩ Makayyioiti Yesu daaĩtha, ĩthõng balna aanyĩk Nyekuci lemnyiok vẽlẽk bũnnathĩt õrrõt. 34 Athii balna eeti cĩ amaatĩ kõrgẽna cĩnĩng tõ. Nyatarka balna gõõ eeta cĩk ayak manẽẽn, kõdẽ ciithi ũũtẽnẽ, ĩthõng thĩ, ayaktak nyarobinya, 35 tionniak kengeryiek eet cĩk amaatĩ.