Nyaraga cĩ
Tiicanẽ cĩk Tionniawu
Yelinit cĩ Nyaraga cĩ Tiicanẽ cĩk Tionniawu
Luka balna cĩ ẽhẽẽd Nyaraga coo, ĩthõng naboo ẽtẽhẽẽd Nyaraga cĩ Luka buu. Nyaragawa ĩcoo, aduwa Luka gõõl cĩ balna amiirẽnẽ Yesu õkõyyĩ tammuatiddina. Aduwa naboo nẽ thõõth cĩ balna aduwaai wobjiaha eet cĩk Yudei Nyemut cĩ Abũnna cĩ Yesu ĩcĩ owu, looca cĩnĩng kir, ĩthõng uduktiak eet õõgĩ buu Nyemut cĩ Abũnna loociowẽy gwantĩk vẽlẽk. Aduwa Luka gõõl cĩ balna akuni Ririwacĩ cĩ Dĩhĩmĩ kĩ wobjiak vẽlẽk cĩk Yesu. Ĩthõng balna atĩrĩth Ririwacĩ cĩ Dĩhĩmĩ wobjiak dõõkĩthĩ, ĩthõng aanyĩk ĩnõõgõ kĩ makayyiok cĩgĩk tiirthẽt.
Terehiantiowẽy ĩcĩk ẽẽn 1-12, õthõõth Luka õrrõt tiic cĩ balna atican tionniaiti Pẽtũrũ, kĩ thõõth cĩ balna adĩmanothi wobjiak cĩk Kiristo Yeruthalẽma. Tiicanẽy cĩk meelĩk, ẽẽl balna Ririwacĩ cĩ Dĩhĩmĩ wobjiak kagaacõ kĩĩtõ ne, adiim balna Nyekuci Nyemut cĩ Abũnna cĩ Yesu kaanyĩwothĩk eet cĩk loociok vẽlẽk, athii cĩ ẽẽn eet cĩk Yudei dõ. Ĩthõng naboo terehiantiowẽy cĩk ẽẽn 13-28, aduwa Luka gõõl cĩ ẽyẽlẽcĩ Ririwacĩ cĩ Dĩhĩmĩ Paulo kũũwĩ Nyemut cĩ Abũnna wo loociowẽy cĩk meelĩk, Athia kĩ Yuroba, ĩthõng naboo turnanta ũũwĩ ĩcĩ kõrõõk cĩ gaalawu cobbi cĩ Rũma. Iyiaintiowẽy ĩcĩkkõ vẽlẽk, aduwa Luka thoothonniok vẽlẽk cĩk balna irion Paulo kĩ tionniak õõgĩ vẽlẽk. Ellet thoothiowa cĩkkõ ageeta keyelliek eet mĩn mĩn goolliowẽy cĩk meelĩk Nyemut cĩ Abũnna. Terehiantiowẽy cĩk ẽẽn 16:11-28 õwõ Luka balna iriok kĩ Paulo, ĩthõng acĩn kaal cĩk adĩmanni terehiantiowẽy ĩcĩkkõ.