Ilibak Yesu wobjiak cĩgĩnĩk tũrgẽrẽm
21
Ma balna vurtia, ilibak Yesu wobjiak cĩgĩnĩk naboo titimma cĩ bũlũc cĩ Tiberia, ĩthõng balna õgõõn thõõth coo ketee.
2 Wobjiak balna nĩĩkẽ cĩkkõ, Thimõnẽ Pẽtũrũ, Tomath, cĩ athĩ thar õõgĩ Didimoth,a kĩ Nataniele cĩ aku õlõõ cĩ Kana, looca cĩ Galilea, kĩ Jemith kĩ Yoanẽ cĩk ẽẽn dõõlĩ cĩk Thebedeo, kĩ wobjiak õõgĩ ramma, cĩk balna aatĩ natẽ.
3 Ma natẽ, ĩthĩ Thimõnẽ Pẽtũrũ ne, “Kõkkõ na kagami kulugua!”
Ẽdẽcĩ goonogua, ethei ne, “Kiirioit kõdõwẽ.” Ngaatĩ õtõdĩ nẽẽgẽ kovowol õõt, ĩthõng thĩ, athii cĩ agam kulugua baalin nĩcẽ.
4 Ma balna ngerethietĩn cĩnnĩ, ikiyyia ĩbĩl Yesu titimma cĩ bũlũco, ĩthõng balna athii cĩ aga wobjiaha cĩgĩnnẽk ĩnõõnõ buu.
5 Ĩthõng ũtũvvũ Yesu ĩnõõgõ ethek ne, “Lõgõth! Agamtu kulugua õõgĩ?” Ẽdẽcĩ nẽẽgẽ athĩ ne, “Athii tõ!”
6 Ĩthõng uduwak nẽ ĩnõõgõ ethek ne, “Utdukteek da niigia nyeritie ĩcĩ athiit cunung cĩ athio ĩcĩ kovowolo, agamnyu katĩ kulugua õõgĩ.” Ma balna ngĩ atdukeei wo, agamit kulugua cĩk meelĩk õrrõt, kĩdĩngdĩng nyeritie katamac ĩnõõgõ ngatĩ agurraccĩ kovowolatõ buu.
7 Ma natẽ, uduwak wobjiaiti wũ gõõ amĩnan Yesu ennek Pẽtũrũ ne, “Makayyioit neccie!” Ma balna mĩ athĩrar Pẽtũrũ ĩnõõnõ athĩ ne, “Makayyioit neccie ẽẽ,” ikiyyia itihim nẽ ceremua wũk balna aara nẽ, nyatarka tiic, ĩthõng ongothothĩk maam.
8 Õjõõn balna kovowolĩ titimma ekebji thoo eet õmmõtõ kĩ eet tur (300), ĩthõng utuguryia wobjiaha cĩk uungnothi kovowola wo, nyeritie cĩ abbĩththĩ kulugua.
9 Ma balna ngĩ ullucciay wobjiaha kovowola, ivitia ũrũbtak nẽẽgẽ kuluguac ĩmma cĩ avaaddi guyyia ĩcĩ tholomonu, kĩ ahat cĩ avaadiay.
10 Ma natẽ, othoothĩk Yesu ĩnõõgõ ethek ne, “Ivitaaĩ kulugua õõgĩ cĩk agamnyu ẽẽ.”
11 Ikiyyia imiirie Thimõnẽ Pẽtũrũ ũũk kovowola, ĩthõng utugurak nyeritie cĩ kuluguawu wo titimma. Ẽẽn balna kulugua cĩk obbitik nyẽritẽwatõ eet tur kĩ eet ramma kõmmõtõ kĩ iyyio (153), ĩthõng athii cĩ erecci nyeritie buu.
12 Ngaatĩ aduwacĩ Yesu ĩnõõgõ ẽthẽcĩ ne, “Ivitia uduktõy!” Ma balna natẽ athii wobjiaiti cĩ adiim ajin ĩnõõnõ ethei ne, “Ngẽnẽ niia?” Nyatarka aga nẽẽgẽ athĩ ne, ẽẽn nẽ Makayyioit.
13 Ma natẽ, engereek nẽ ĩnõõgõ ahat kĩ kuluguac nĩcẽ.
14 Ẽẽn balna ngõnana iyyio cĩ alibacĩ Yesu, wobjiak cĩgĩnĩk balna ngĩ ũrũga nẽ daaĩtha vẽlẽk.
Othoothiõy Yesu kĩ Thimõnẽ Pẽtũrũ
15 Ma balna vurtia cĩ duwẽnto, ijin Yesu Thimõnẽ Pẽtũrũ ethek ne, “Thimõnẽ ngẽrtĩ Yoanẽ, amĩnanna niia aneeta jiar goonogu?” Ẽdẽcĩ nẽ athĩ ne, “Ii Makayyioit, aga niia kamĩnani na aniitia.” Ẽdẽcĩ Yesu ethei ne, “Tiling nyio cĩganĩk.”b
16 Ma natẽ ijin Yesu ĩnõõnõ naboo ethek ne, “Thimõnẽ ngẽrtĩ Yoanẽ, amĩnanna niia aneeta?” Ẽdẽcĩ Pẽtũrũ ethei ne, “Ii Makayyioit, aga niia kamĩnani na aniitia.” Ĩthõng uduwak Yesu ĩnõõnõ ethek ne, “Thũũtĩ athaa cĩganĩk!”
17 Ikiyyia ijin Yesu ĩnõõnõ ngõnana iyyio ethek ne, “Thimõnẽ ngẽrtĩ Yoanẽ, amĩnanna niia aneeta?”
Ma natẽ ikiyyia õmõthẽ Pẽtũrũ õrrõt ngatĩ ajini Yesu ĩnõõnõ ngõnana iyyio. Ngaatĩ ẽdẽcĩ nẽ Yesu ẽthẽcĩ ne, “Makayyioit, aga niia thoothonniok vẽlẽk, aga kamĩnani na aniitia.”
Ẽdẽcĩ Yesu ethei ne, “Ĩthõng thĩ, kẽnẽcĩ ne, tiling athaa cĩganĩk!
18 Kaduwaci na dĩdĩ, baa nga eeni niia dĩc, ahimiti niia cẽrẽm, ĩthõng uuwu gõõla ĩcĩ adiimi niia. Ĩthõng thĩ, ma katĩ mĩ atanganyu, itioni katĩ niia et ĩmma athiit cunni, ĩthõng katĩ uuwi nẽ aniitia gõõla ĩcĩ athii cĩ adiimi niia õkõyyẽ.”
19 Aduwaai balna Yesu Pẽtũrũ thõõth coo, kĩĩ katĩ kagga woccia Pẽtũrũ gõõl cĩ woccia adaaknĩ nẽ, kĩĩ katĩ kaanyĩk daaĩthĩ cĩnnẽ Nyekuc bulẽnĩt. Ĩthõng uduwak Yesu ĩnõõnõ ethek ne, “Wõbanĩ.”
Yesu kĩ wobjiait wũ balna amĩnan nẽnẽ
20 Ma balna natẽ, ummudie Pẽtũrũ, ĩthõng ĩcĩn wobjiait wũ balna amĩnan Yesu, õwõb ĩnõõgõ. Wobjiait wũ balna aginyothi nẽ Yesu balna ngĩ aduwue nẽẽgẽ jiatĩn wũ balna nga kadaaĩ Yesu, ĩthõng ijin ĩnõõnõ ethek ne, “Makayyioit, ngẽnẽ kõrgẽna cĩnang cĩ katĩ ovolongi aniitia wo?”
21 Ma natẽ ijin Pẽtũrũ Yesu ethek ne, “Makayyioit, ma wobjiaiti coo, adak katĩ niin ĩnõõnõ?”
22 Ẽdẽcĩ Yesu ethei ne, “Mĩ kadiimi na ĩnõõnõ kũrũk kuumuc, gii ngĩ kõbõda na, tiic cunni niin? Wõba niia aneeta.”
23 Nyatarka thõõth coo, õthõõth wobjiaha cĩk meelĩk nẽẽgẽ dõ athĩ ne, athii katĩ cĩ adaaĩ wobjiaiti neccie kũdũt. Ĩthõng thĩ, balna athii cĩ aduwa Yesu athĩ ne, athii woccia cĩ adaaĩ wobjiaiti neccie. Athĩ nẽ ne, “Mĩ kadiimi na ĩnõõnõ kũrũk kuumuc, gii ngĩ kõbõda na, tiic cunni niin?”
24 Wobjiait coo cĩ aduwa thõõth coo vẽlẽk. Ĩnõõnõ cĩ ẽhẽẽd kaal cĩkkõ, ĩthõng kagayya naaga ẽẽn thõõth cĩnnẽ dĩdĩ.
25 Adĩman balna Yesu thoothonniok cĩk meelĩk õrrõt gimmanoko looca coo, ma baalia keteheddie nẽẽgẽ nyaragẽtẽy, athii woyyia ngĩtĩ awũthĩ nyaragẽta vẽlẽk looca coo tõ.