Agamit Yudei Yesu
(Bẽl Matewo 26:47-56; Marĩkõ 14:43-50; Luka 22:47-53)
18
Ma balna ngĩ ẽdẽcak Yesu lawinit, ĩtĩngathõ nẽẽgẽ kĩ wobjiak cĩgĩnĩk ẽngẽrkẽthanit dwarac cĩ Kidronĩ, ĩthõng õõt itiothõ ngĩtĩ akulanĩ kẽẽna cĩk olivnyawu.a
2 Aga balna Yudathĩ buu volongnyiaiti ngini wũ aavẽ Yesu kĩ wobjiak cĩgĩnĩk, nyatarka aruumõy Yesu gõõ kĩ wobjiak cĩgĩnĩk natẽ.
3 Anyi balna gaala gwuak cĩk makayyiok cĩk paadĩrnyawu kĩ Varithei Yudath nyĩcẽkẽr kiirioit kĩ ĩnõõnõ. Ayak balna nẽẽgẽ guonya kartẽnẽẽĩ, ĩthõng eyeit ijjio cĩk jorak buu.
4 Aga balna Yesu thõõth cĩ katĩ akunei ĩnõõnõ vẽlẽk, ngaatĩ õkkõ arumone nẽ kĩ ĩnõõgõ, ĩthõng ijin ethek ne, “Ngẽnẽ cĩ adiimnyu niigia wo?”
5 Ẽdẽcĩ nẽẽgẽ athĩ ne, “Kadiimnya Yesu cĩ Natharẽtĩ.”
Ẽdẽcĩ Yesu ethei ne, “Et nĩcẽ na!” Abĩlĩ balna Yudathĩ volongnyiaiti kĩ eet nĩĩkẽ natẽ.
6 Ma balna ngĩ ẽdẽcĩ Yesu ĩnõõgõ ethei ne, “Et nĩcẽ na,” ivitia uukitõ nẽẽgẽ vẽlẽk looc tahanykany!
7 Ikiyyia ijin Yesu ĩnõõgõ naboo ethei ne, “Adiimnyu niigia ngẽnẽ?”
Ẽdẽcĩ nẽẽgẽ athĩ ne, “Kadiimnya Yesu cĩ Natharẽtĩ.”
8 Ẽdẽcĩ Yesu ĩnõõgõ ethei ne, “Viyyio kuduwawung na vẽlẽk kenneccung ne, et nĩcẽ na! Ĩthõng thĩ, ma ẽrẽppannangũ aneeta, anycĩk eet cĩkkõ õõgĩ kõõt.”
9 Õthõõth balna nẽ ketee, kĩĩ katĩ kikiyyia thõõth wũ balna aduwa nẽ kĩĩ thõõth dĩdĩ wũ balna athĩ ne, “Nga kutdukek et codoi doo tuu, wũ balna anya niia aneeta.”b
10 Ma natẽ, ĩdĩma Thimõnẽ Pẽtũrũ nyetubat cĩnnĩ, ĩthõng apacana kĩtat cĩ Malkuthi cĩ athiit cĩ athio, et cĩ balna ẽẽn ticciannioit cĩ paadĩr cobbi.
11 Ma natẽ, uduwak Yesu Pẽtũrũ ethek ne, “Bõdẽẽĩ nyetubat cunni nyakõrõwa! Athii woccia cĩ kawudi na lõkũlkũl cĩ pĩrnanẽtc wũ balna anya aneeta Baangĩ?”
Ootti eeta Yesu ĩcĩ Paadĩr cobbi
(Bẽl Matewo 26:57-58; Marĩkõ 14:53-54; Luka 22:54)
12 Ma natẽ, agamit nyĩcẽkẽrĩ kĩ gaalinit cĩnĩngd kĩ gaala cĩk Yudei Yesu, ĩthõng ecebita,
13 ĩthõng ootti nõõnõ ĩnõõnõ ĩcĩ Anathĩ wũ balna atik Kaĩvathĩ doo cĩnnĩ, ẽẽn balna Kaĩvathĩ paadĩr cobbi erkit nĩcẽ.
14 Kaĩvath wũ balna aduwaai makayyiok cĩk Yudei ethei ne, abũnna ma ngĩ adaaĩ eeti codoi dõ, nyatarka eet vẽlẽk.e
Ẽpẽkan Pẽtũrũ Yesu
(Bẽl Matewo 26:69-70; Marĩkõ 14:66-68; Luka 22:55-57)
15 Ma natẽ, owobit Thimõnẽ Pẽtũrũ kĩ wobjiait ĩmma, Yesu. Aga balna wobjiaiti neccie paadĩr cobbi ẽẽ, ngaatĩ õwõbĩ nẽ Yesu kitio reerung cĩ paadĩr cobbi wo,
16 ĩthõng thĩ, ũũk ũtũngothĩk Pẽtũrũ katũga ngatĩvõrĩ, ma natẽ õbõda wobjiaiti, wũ balna aga paadĩrĩ cobbi ĩnõõnõ, ũũk ĩcĩnnĩ ngatĩvõrĩ, ĩthõng ikiyyia othoothiõy kĩ doolec ĩmma cĩ ngayyi, cĩ ẽbẽk katũk, ĩthõng anyĩk Pẽtũrũ kitio.
17 Ma balna natẽ, ikiyyia ijin bũwẽẽcĩ neccie Pẽtũrũ ethek ne, “Athii wõnõ cĩ eeni niia wobjiait cĩ et nĩcẽ?” Ẽdẽcĩ Pẽtũrũ ethei ne, “Athii tõ!”
18 Alalĩ balna lõõcĩ õrrõt, ĩthõng avadit nyakapanaĩ kĩ gaala guo ĩmma natẽ cĩ attiyie nẽẽgẽ. Aavĩ balna Pẽtũrũ natẽ, arũmẽ kĩ ĩnõõgõ aavẽ guo.
Ijin Paadĩrĩ cobbi Yesu
(Bẽl Matewo 26:59-66; Marĩkõ 14:55-64; Luka 22:66-71)
19 Ma balna natẽ, ikiyyia ijin paadĩrĩ cobbi Yesu thõõth cĩ wobjiak cĩgĩnĩk, kĩ thõõth cĩ alimanĩ nẽ eeta.
20 Ẽdẽcĩ Yesu ĩnõõnõ ethei ne, “Aga eeta cĩk meelĩk thõõth cĩ balna kalimanẽ na ĩnõõgõ wo, nyatarka cĩ gõõ kalimani na ĩnõõgõ dõõkĩthĩ Ciitha cĩ Nyekuco kĩ Ciithẽnẽy cĩk Lawintiak ngatĩ avvunni Yudei vẽlẽk. Ĩthõng nga kiliman thõõth ĩmma cĩ alugunyi.
21 Ajinna niia aneeta nyia? Jin eet wũk gõõ kalimani na, aga nẽẽgẽ thõõth cannĩ.”
22 Ma balna mĩ õthõõth Yesu thõõth coo wo, ikiyyia apan gaalinti ĩmma ĩnõõnõ, ĩthõng ethek ne, “Edeci niia paadĩr cobbi wo kĩyokowo nyia?”
23 Ẽdẽcĩ Yesu ethei ne, “Mĩ kẽgẽrẽthana na thõõth ĩmma, duwahanĩ, ĩthõng thĩ, ma nga kẽgẽrẽthan gimma, apanna thĩ niia aneeta nyia?”
24 Ma balna nga ecebjie Yesu noko, ikiyyia ition Anathĩ ĩnõõnõ kũũk ĩcĩ paadĩr cobbi Kaĩvath.
Ẽpẽkan Pẽtũrũ Yesu ngõnana iyyio
(Bẽl Matewo 26:71-75; Marĩkõ 14:69-72; Luka 22:58-62)
25 Ma balna nga abĩlĩ Pẽtũrũ aavẽ guo, ivitia ijinit eeta gwuak ĩnõõnõ ethei ne, “Athii wõnõ cĩ eeni niia buu wobjiait cĩ Yesu?” Ẽpẽkan Pẽtũrũ athĩ ne, “Athiitõ, athii cĩ ẽẽn aneeta!”
26 Aavĩ balna ticciannioiti ĩmma cĩ paadĩr cobbi natẽ buu, cĩ balna ẽẽn tionnioit cĩ et wũ balna apacana Pẽtũrũ kĩtat, ikiyyia ijin nẽ buu ĩnõõnõ ethek ne, “Nga wõnõ balna kicini na aniitia buu kĩ Yesu kẽẽnĩy ĩcĩk olivnyawu?”
27 Ẽpẽkan Pẽtũrũ naboo, ĩthõng ma natẽ tamanoko õrõk lotikõkõrĩ.
Ibilli makayyiowa Yesu ĩcĩ Pĩlatõ
(Bẽl Matewo 27:1-2, 11-14; Marĩkõ 15:1-5; Luka 23:1-5)
28 Ma ngaanĩ ngerenniet, ĩtĩngaththi nẽẽgẽ Yesu õlõõ cĩ Kaĩvathĩ, ĩthõng ootti ciitha ĩcĩ aavẽ gaalinti cobbi cĩ Rũma. Ereyyi balna kẽnnẽ nẽẽgẽ ngatĩvõrĩ, kĩĩ katĩ athii cĩ ẽẽn nẽẽgẽ riiriny, ĩthõng thĩ, uduit woccia nẽẽgẽ ahat cĩ Kõr cobbi cĩ Ngothio.
29 Ma natẽ, ikiyyia ẽtẽha gaalinti cobbi cĩ Rũma cĩ athĩ thar cĩgĩnĩk Pĩlatõ, ĩthõng ikiyyia ijin ĩnõõgõ ethek ne, “Abilnuu niigia et coo nyia?”
30 Ẽdẽcĩ nẽẽgẽ athĩ ne, “Ma kithii balna nẽ cĩ ẽẽn et cĩ atican thoothonniok cĩk gerthek, athii woyyia cĩ kayahaci naaga ĩnõõnõ aniitia.”
31 Uduwak balna Pĩlatõ ĩnõõgõ ethek ne, “Ootti, ĩthõng engeryu thõõth cĩnnĩ Ngirana cunung.”
Ĩthõng ĩĩtõ makayyiowa cĩk Yudei ne, “Angiranni kĩ ageeta ngatĩ karuwua et ĩmma.”
32 Ĩthõng gõõla cĩ ikiyyiaĩ thõõth wũ balna aduwa Yesu gõõl cĩ daaĩth cĩnnĩ, cĩ katĩ õkkõ adaaknĩ nẽnẽ, ĩĩ thõõth dĩdĩ.
33 Ma natẽ, imiirie Pĩlatõ ũũk ciitha cĩnnĩ, ĩthõng uduwak eet cĩgĩnĩk kẽyẽktak ĩnõõnõ Yesu, ĩthõng ikiyyia ijin ĩnõõnõ ethek ne, “Eeni niia Alaan cĩ Yudei?”
34 Ẽdẽcĩ Yesu ethei ne, “Ajinna õõwa cunni mĩn, kõdẽ aduwacĩ eeta gwuak thõõth coo?”
35 Ẽdẽcĩ Pĩlatõ ethei ne, “Keeni na Yudenit? Eet cuguk kĩ makayyiok cĩk paadĩrnyawu cĩk ẽyẽhani aniitia kĩ aneeta ngato wo. Nyia da cĩ ẽgẽrẽthani niia wo?”
36 Ma natẽ, ẽdẽc Yesu ethek ne, “Athii alaanthẽt cannie cĩ ẽẽn cĩ looc coo. Ma kĩthĩ alaanthẽt cannie kĩĩ cĩ looc coo, moko woyyia baalia ivitia uuktõy wobjiaha cĩganniek kĩ eet cĩk Yudei, itina wũ balna agamia makayyiowa cĩk Yudei. Ĩthõng thĩ, athii alaanthẽt cannie cĩ ẽẽn cĩ looc coo.”
37 Ẽdẽcĩ Pĩlatõ ethei ne, “Eeni niia thẽk yoko thĩ Alaan!” Ẽdẽcĩ Yesu ethei ne, “Aniitia cĩ athĩ ne, keeni na Alaan, ĩthõng aduwa dĩdĩ. Karittiay balna na looca coo, kĩĩ katĩ kuduwak eet thõõth cĩ ẽẽn dĩdĩ. Eeta vẽlẽk cĩk amĩnan thõõth cĩ ẽẽn dĩdĩ, aga athĩ ne, kaduwa na thõõth dĩdĩ.”
38 Ĩthõng ijin Pĩlatõ Yesu ethek ne, “Nyia cĩ ẽẽn dĩdĩ wo?”
Etedothĩk Yesu daaĩth
(Bẽl Matewo 27:15-31; Marĩkõ 15:6-20; Luka 23:13-25)
Ma natẽ, imiirie nẽ ũũk ngatĩvõrĩ, ĩthõng uduwak eet cĩk ẽẽn Yudei ethek ne, “Nga kẽgẽrẽthan eeti coo thõõth ĩmma.
39 “Eyekcu niigia vowoth cĩ ajinnangu aneeta kõõga et cĩ ecebjie kĩjana codoi dõ erkita, erkinyiay vẽlẽk, itina cĩ Kõr cobbi ĩcĩ Ngothio. Adiimnyu niigia, kõõgawung katĩ na Alaan cĩ Yudei wo?”
40 Ẽgẽrẽny kẽggẽ eeta athĩ ne, “Nyĩ õõgacet et coo! Õgaẽt Barabath!” Ẽẽn balna Barabathi et cĩ uukõy kĩ gaala cĩk Rũma.