Alawõõĩ Yesu ẽlẽ cĩnnĩ ĩcĩ Baatĩnnĩ
17
Ma balna ngĩ ẽdẽcak Yesu thõõth cĩ aduwaai nẽ wobjiak cĩgĩnĩk wo, ĩthõng thĩ, ĩcĩn tammutiddin, ĩthõng õthõõth ĩĩ ne, “Baang, ikiyyia itini vẽlẽk. Anyĩk bulẽnĩt Ngeruni, kĩĩ katĩ kaanyi Ngerunie aniitia bulẽnĩt.
2 Anya balna niia aneeta Ngeruni tiirthẽt cĩ kagamẽ na eet vẽlẽk loota ngato, kĩĩ katĩ kaanyĩk eet vẽlẽk wũk balna anya niia aneeta rũgẽt cĩ alna kũdũt.
3 Ĩthõng eeta cĩk aatĩ rũgẽta cĩ alna kũdũt wo, agayyi aniitia dĩdĩ Nyekuc codoi dõ, ĩthõng agayya aneeta ngĩ keeni Yesu Kiristo wũ itionana niinia.
4 Kaanyi na aniitia bulẽnĩt cobbi loota ngato, nyatarka kẽdẽcaha tiic wũ balna aduwacca niia aneeta kĩdĩmanũ.
5 Ĩthõng yoko, Baang, bõdahia bulẽnĩt wũ balna keyei na balna nga karũmẽ kĩ aniitia balna nga ketengenyiay lõõcĩ.
Alawõõĩ Yesu wobjiak cĩgĩnĩk ĩcĩ Baatĩnnĩ
6 “Ẽbẽraha balna niia aneeta wobjiak cĩkkõ loota ngato, ĩthõng keyeleha na ĩnõõgõ ngẽnẽ niia. Ẽẽn balna nẽẽgẽ eet cugunik, ĩthõng anya niia aneeta ĩnõõgõ, ĩthõng ithikti nẽẽgẽ aniitia.
7 Agaacõ yoko nẽẽgẽ vẽlẽk athĩ ne, aku gii vẽlẽk cĩ keyei na kĩ aniitia,
8 nyatarka balna kuduwaha na ĩnõõgõ thõõth wũ balna aduwacca niinia, ĩthõng elemit nẽẽgẽ athĩ ne, kakuni balna na ĩcunni, ĩthõng elemit ĩĩtõ ne, itionana niia aneeta.
9 Kalawinie na ĩnõõgõ, athii cĩ kalawinie eet cĩk abũrĩ thõõth cannĩ. Ĩthõng thĩ, kalawinie na eet wũk balna anya niia aneeta, nyatarka ẽẽn nẽẽgẽ cugunik.
10 Kaala vẽlẽk cĩk keyei na ẽẽn cugunik, ĩthõng kaala vẽlẽk cugunniek ẽẽn cĩganĩk, anyca balna nẽẽgẽ aneeta bulẽnĩt.
11 Baang cĩ Callĩ thĩnĩn, kũtũngea na looc coo, kikiyyia kĩ aniitia, ĩthõng nga kuungni wobjiak cĩganĩk loota ngato. Tũwwa ĩnõõgõ jurrung tiirthẽta ĩcĩ thar cugunik, thar wũk balna anya niia aneeta, kĩĩ katĩ kũrũmtẽ nẽẽgẽ vẽlẽk kõdõwẽ, kĩ cĩ karũmẽ naaga kĩ aniitia kõdõwẽ wo.
12 Kathũnnẽ balna na ĩnõõgõ jurrung, tiirthẽta wũ balna anya niia aneeta, balna nga karũmẽ kõdõwẽ. Kothii codoi cĩ katdukeei tuu, ĩthõng thĩ, et wũ katĩ ovolongia aneeta dõ cĩ katĩ athii, kĩĩ katĩ kikiyyia thõõth wũ balna eheeddi Nyaragawa ĩcĩ Nyekuco kĩĩ dĩdĩ.
13 “Ĩthõng yoko, kakuni na kĩ aniitia, ĩthõng thĩ, kaduwa thoothonniok cĩkkõ nga kaavẽ loota ngato, kĩĩ katĩ katalit wobjiaha cĩganniek gõõla wũ kaanyĩcẽ na ĩnõõgõ kebelbelit kũdũt.
14 Kuduwaha balna na ĩnõõgõ thõõth cunni, ĩthõng aaburneei kẽggẽ balna eeta cĩk looc nĩco ĩnõõgõ thõng, nyatarka athii cĩ ẽẽn nẽẽgẽ eet cĩk looc coo, kĩ cĩ athii na buu cĩ keeni et cĩ looc coo wo.
15 Kalayyie na kennecci ne, nyĩ õkõyyẽ ĩnõõgõ ngatĩvõrĩ looca ĩcoo, kennecci ne, thũũtĩ ĩnõõgõ Thĩttana.
16 Athii nẽẽgẽ cĩ ẽẽn eet cĩk looc coo, kĩcĩ athii cĩ keeni na et cĩ looc coo wo.
17 “Ẽẽn thõõth cunnie thõõth cĩ ẽẽn dĩdĩ, anyĩk thõõth cunni cĩ ẽẽn dĩdĩ wo, kaanyĩk ĩnõõgõ kĩĩtõ eet cĩk callĩk.
18 Kitionii na ĩnõõgõ looc kĩ balna ngĩ itionana niia aneeta.
19 Kẽlẽmanẽ na ẽlẽ cannĩ kĩĩ anyinit cĩ callĩ, nyatarka ĩnõõgõ, kĩĩ katĩ kẽlẽmtaĩ nẽẽgẽ buu eleeti cĩgĩk kĩĩtõ callẽ kĩ aniitia dĩdĩ.
Alawõõĩ Yesu eet cĩk ẽlẽmĩ ĩnõõnõ ĩcĩ Baatĩnnĩ
20 “Athii cĩ kalawinie na wobjiak cĩganĩk dõ, kalawinie eet vẽlẽk cĩk katĩ ẽlẽmĩ thõõth cannĩ cĩ alimaneei ĩnõõgõ wobjiaha cĩganniek.
21 Baang, kadiimi na ĩnõõgõ vẽlẽk kũrũmtẽ woccia kõdõwẽ kĩ cĩ yoko karũmẽ naaga kĩ aniitia kõdõwẽ wo. Ĩthõng kadiimi na ĩnõõgõ buu kũrũmtẽ kõdõwẽ kĩ ageeta, kĩĩ katĩ kelemit eeta cĩk looc coo kĩĩtõ ne, itionana niia aneeta.
22 Kubulutha na wobjiak cĩganĩk kĩ balna ngĩ abulutha niia aneeta, kĩĩ katĩ kũrũmtẽ nẽẽgẽ vẽlẽk kõdõwẽ kĩ cĩ karũmẽ naaga wo.
23 Kaavẽ na kĩ ĩnõõgõ, ĩthõng aavu niia kĩ aneeta, kĩĩ katĩ kivitia kĩĩtõ nẽẽgẽ buu vẽlẽk codoi doo. Ĩthõng thĩ, katĩ ivitia agaacõ eeta cĩk looc coo athĩ ne, aniitia cĩ itionana balna aneeta, ĩthõng amĩnani niia wobjiak cĩganĩk kaavu kĩ balna mĩ amĩnanna niia aneeta.
24 “Baang, kadiimi na kũrũmtea kĩ eet vẽlẽk wũk balna anya niia ngatĩ kaavẽ na. Ĩthõng katĩ ivitia agaacõ nẽẽgẽ athĩ ne, abulutha niia aneeta bũlũthẽnta wũ balna anya niia, balna nga ketengenyiay lõõcĩ.
25 “Baang cĩ edeemi thõõth, athii eeta cĩk looc coo cĩ agaawi aniitia, ĩthõng thĩ, kagayyi na aniitia, ĩthõng aga wobjiaha cĩganniek athĩ ne, itionana balna niia aneeta.
26 Kuduwaha balna na ĩnõõgõ avuthit cĩ katĩ agaawi nẽẽgẽ aniitia, ĩthõng nga katĩ kaduwai na ĩnõõgõ noko naboo, kĩĩ katĩ kaavu mĩnanĩ cĩ anya niia aneeta wo, ĩcĩnĩng, ĩthõng kaavu woccia na kĩ ĩnõõgõ.”