Ũũkcĩ katĩ mothinti ẽẽn tali
16
“Kaduwacung na agiitia thõõth coo, kĩĩ katĩ athii cĩ uungniccu thoothonniok cĩganĩk.
2 Ingkaweccung katĩ eeta ngĩtĩvõrĩ Ciitha cĩ Lawintio, ĩthõng aku katĩ itini cĩ ammuwi eeta cĩk arukcung agiitia wo athĩ ne, adĩman nẽẽgẽ tiic cĩ Nyekuco ngatĩ aruwung agiitia.
3 Atican katĩ nẽẽgẽ ketee, nyatarka nga kagayyia nẽẽgẽ aneeta, kõdẽ Baang.
4 Kaduwacung na agiitia thõõth coo yoko, ma katĩ kõr cĩ ikiyyiaĩ thõõth coo, kĩĩ katĩ ahaddia thõõth wũ balna kaduwacung na agiitia.
Tiic cĩ Ririwac cĩ Dĩhĩmĩ
“Nga balna kuduwawung na agiitia kaal cĩkkõ ĩcĩ owu, nyatarka karũmẽ na kĩ agiitia.
5 Ĩthõng yoko, kimiirie na kũwa ĩcĩ Baang wũ balna itionana aneeta, ĩthõng kothii et ĩmma kõrgẽna cunung cĩ ajinna etheca ne, ‘Õkkõ niia ĩjang?’
6 Omothinu kẽnnẽ ngatĩ kaduwanẽ na kaal cĩkkõ.
7 Ĩthõng thĩ, kethecung na dĩdĩ ne, abũnna mĩ kõkkõ, kĩĩ katĩ kitionawung na agiitia Tirithioit cĩ ẽẽn Ririwac cĩ Dĩhĩmĩ kĩĩ Limannioit cunung kikiyyia keelung agiitia, ĩthõng thĩ, mĩ kũtũngewung na, kitionacung katĩ na ĩnõõnõ.
8 “Mĩ ikiyyia Ririwacĩ cĩ Dĩhĩmĩ, aku katĩ eyeleei eet cĩk looc coo thoothonniok dĩdĩ cĩk gerthetin cĩnĩng, kĩ bũnnathĩt cĩ Nyekuco, kĩ gõõl cĩ katĩ ẽngẽrĩ nẽ thoothonniok cĩgĩk.
9 Eyeleei katĩ Ririwacĩ ĩnõõgõ gerthetin cĩnĩng, nyatarka athii cĩ ẽlẽmnya nẽẽgẽ aneeta.
10 Eyeleei katĩ Ririwacĩ ĩnõõgõ bũnnathĩt cĩ aku kĩ Nyekuc, nyatarka kõkkõ na ĩcĩ Baangĩ, ĩthõng athii katĩ cĩ acĩnnangũ naboo.
11 Eyeleei katĩ Ririwacĩ ĩnõõgõ gõõl cĩ ẽngẽrĩ Nyekuci thoothonniok jurrung, nyatarka ẽngẽr Nyekuci thoothonniok cĩk Thĩttanak, alaan cĩ looc coo vẽlẽk.
12 “Kayai na thõõth cobbi õrrõt cĩ woccia kaduwacunga, ĩthõng thĩ, athii woccia katĩ niigia cĩ athĩknu yoko.
13 Ĩthõng thĩ, mĩ ikiyyia Ririwacĩ cĩ ẽẽn dĩdĩ, eyelecung katĩ agiitia thõõth cĩ ẽẽn dĩdĩ. Athii cĩ aduwa Ririwacĩ cĩ Dĩhĩmĩ thõõth cĩnnĩ dõ, aduwaccung katĩ nẽ thõõth cĩ athĩhĩ, ĩthõng katĩ anyung agaac thoothonniok cĩk katĩ nga avvu.
14 Adĩhĩththa katĩ Ririwacĩ cĩ Dĩhĩmĩ aneeta, gõõla cĩ ayahanĩ thõõth cannĩ, ĩthõng uduwawung agiitia.
15 Ẽẽn gii vẽlẽk cĩ ayak Baangĩ, cannĩ. Ĩnõõnõ thĩ, cĩ kaduwacung na agiitia kathĩ ne, ayaha katĩ Ririwacĩ cĩ Dĩhĩmĩ thõõth cannĩ, ĩthõng uduwawung agiitia.”
Ũũkcĩ katĩ mothinti kĩĩ tali
16 Aduwaai balna Yesu wobjiak cĩgĩnĩk ethei ne, “Athii nõõnõ katĩ cĩ acĩnnangũ kĩdĩĩc, ma katĩ vurtia acĩnnangũ katĩ kĩdĩĩc.”
17 Ivitia wobjiaha gwuak cĩgĩnnẽk ijintõy nyaguana ĩĩtõ ne, “Nyia cĩ õthõõth Yesu athĩ ne, ‘Athii nõõnõ katĩ cĩ acĩnnangũ kĩdĩĩc wo, ma katĩ vurtia acĩnnangũ katĩ kĩdĩĩc wo?’ Nyia cĩ athĩnnĩ nẽ ne, ‘Nyatarka kõkkõ na ĩcĩ Baangĩ’?
18 Nyia cĩ õthõõth nẽ athĩ ne, ‘Kĩdĩĩc nõõnõ wo’? Erekcet thõõth cĩ õthõõth nẽ wo.”
19 Aga balna Yesu, ngĩ adiim nẽẽgẽ ajin ĩnõõnõ thoothonniok cĩkkõ, ngaatĩ õthõõthĩcẽ nẽ ĩnõõgõ ẽthẽcĩ ne, “Nyia cĩ ajinoonu niigia nyaguana, nyatarka thõõth wũ balna kothoothi na kathĩ ne, ‘Athii nõõnõ katĩ cĩ acĩnnangũ kĩdĩĩc wo, ma katĩ vurtia acĩnnangũ katĩ kĩdĩĩc wo’?
20 Kaduwacung na dĩdĩ, omothinu katĩ, ĩthõng utuluthu, ẽbẽlbẽl katĩ kẽggẽ eeta cĩk looc coo thõng. Omothinu katĩna niigia, ĩthõng thĩ, katĩ ũũkcĩ mothinti cunung ẽẽn bẽlbẽllõn.
21 “Katĩ mĩ adiim ngaa ũũkca doolec, awuci õrrõt, ĩthõng thĩ, katĩ ngĩ utuwuay ikiyyia ẽbẽlbẽla, nyatarka itiriak nẽ doolec cĩ jõr looc coo.
22 Ĩthõng gõõla ĩcĩ aduwõy, omothinu niigia yoko õrrõt, ĩthõng thĩ, katĩ vurtia, kakuni katĩ kacinnung na naboo, ĩthõng katĩ ivitiawu atallu õrrõt, athii katĩ eeti cĩ agamanung talinit cunung wo tõ.
23 Ma õdõlan kõr neccie, athii katĩ gii cĩ ajinnangu aneeta tõ. Ĩthõng kaduwacung dĩdĩ, anyung katĩ Baangĩ gii vẽlẽk cĩ ajinnu niigia ĩnõõnõ thaarĩy cĩganĩk.
24 Nga ijinit niigia Baang gimma cĩ adiimnyu niigia gõõla ĩcoo. Ĩthõng yoko, ijinit ĩnõõnõ gii cĩ adiimnyu thaarĩy cĩganĩk, ĩthõng katĩ anyung nẽ agiitia gii cĩ ajinnu wo, ĩthõng atallu thinnetinẽy cuguk kũdũt.
25 “Kaduwacung na agiitia yoko thoothonniok cĩk addi cĩk athii cĩ agayyu niigia, ĩthõng aku katĩ kõr cĩ athii na cĩ kõthõõthẽ ketee, ĩthõng thĩ, kedemiccung katĩ na agiitia thõõth cĩ Baangĩ.
26 Ma itin nĩcẽ, ajinnu katĩ niigia Baang thaarĩy cĩganĩk, ĩthõng athii na cĩ kajinecung ĩnõõnõ agiitia.
27 Amĩnannung agiitia Baangĩ, nyatarka amĩnannangũ niigia aneeta, ĩthõng elemnyu niigia athinnu ne, kakuni balna na ĩcĩ Nyekuco.
28 Kakuni balna na ĩcĩ Baangĩ, kakuni looc coo, ĩthõng yoko katĩ kũtũngea looc coo, kimiirie kũwa ĩcĩ Baangĩ.”
29 Ẽdẽcĩ wobjiaha ĩnõõnõ ethei ne, “Uduwaet wanĩco thõõth mũrũũr! Athii cĩ othoothicet thoothiowẽy cĩk õkõmĩ.
30 Ĩthõng yoko, kagayyia kiittia ne, agawu niia thoothonniok vẽlẽk, ĩthõng athii eeti ĩmma cĩ woccia nga ajinni thõõth ĩmma tõ. Ĩthõng nyatarka thoothiowẽy cĩkkõ vẽlẽk, kẽlẽmta naaga kiittia ne, akuni balna niia kĩ Nyekuc.”
31 Ẽdẽcĩ Yesu ĩnõõgõ ethei ne, “Ẽlẽmnyangũ niigia aneeta yoko dĩdĩ!
32 Ĩthõng thĩ, aku katĩ itini, ĩthõng aavu vẽlẽk, cĩ katĩ athaaninu niigia, ĩthõng imiiryiewu oottu ĩcĩ korookjiok cuguk, ĩthõng kũtũngõthĩha na dõ. Ĩthõng thĩ, athii cĩ ũũngnĩcangũ aneeta dõ, karũmẽna na kĩ Baang cannĩ.
33 Kaduwacung na thõõth coo, kĩĩ katĩ aavut ganõna, nyatarka aneeta. Anyung katĩ eeta cĩk looc coo acanantẽ. Ĩthõng thĩ, anycĩk thinneti cuguk kokomit, nyatarka balna kijara na gerthetin cĩ looc coo.”