Ẽẽn Yesu kẽẽt cĩ vĩnõwo cĩ abbiri dĩdĩ
15
Aduwaai balna Yesu wobjiak cĩgĩnĩk ethei ne, “Aneeta cĩ keeni kẽẽt cĩ vĩnõwo cĩ abiiri cĩ ẽẽn dĩdĩ,a ĩthõng ẽẽn Baangĩ baatĩ manu.
2 Ẽtẽdai nẽ taliibanẽ cĩganĩk cĩk athii cĩ aari tuu, ĩthõng abacũwek taliibanẽ õõgĩ tuu, kĩĩ katĩ kibiritõ nyegeruana kĩĩ mẽẽlĩ.
3 Ũbũntawu niigia vẽlẽk, nyatarka thõõth wũ balna kaduwacung na agiitia.
4 Aavut kĩ aneeta, ĩthõng kaavu na buu kĩ agiitia. Athii taliibanti cĩ aari nyegerua nẽdõ tõ, gii katĩ ngĩ ũrũmtẽ kĩ kẽẽta. Ĩthõng thĩ, athii cĩ aaricu niigia nyegerua gii ma ngĩ karũmẽ kĩ aneeta.
5 “Aneeta cĩ keeni kẽẽt cĩ vĩnõwo, ĩthõng eeginnu niigia taliibanẽ. Mĩ alna karũmẽna na kĩ et ĩmma, ĩthõng aavu nẽ kĩ aneeta, aari katĩ nẽ nyegerua cĩk meelĩk. Athii gii cĩ adĩmannu niigia tõ, ma kothii aneeta.
6 Mĩ athii cĩ aavĩ eeti ĩmma kĩ aneeta, aavĩ katĩ nẽ kĩ taliibanti cĩ oyowuay, ĩthõng utdukothĩk tuu kĩĩ kõdõõk. Taliibanẽ cĩk aatĩ noko, aluttiay, ĩthõng utduktothĩk guyyiatõ, ĩthõng utuuththie.
7 Mĩ kũrũmtẽ kĩ aneeta, ĩthõng uthuuttu liman cannĩ, ĩthõng alayyiangũ gimma, kaanyung katĩ na agiitia.
8 Mĩ athunnu niigia thõõth cannĩ jurrung, avvunnu katĩ aaricu nyegerua cĩk meelĩk cĩk ẽyẽla athĩ ne, eeginnu niigia wobjiak cĩganĩk, ĩthõng gõõla ĩcoo ẽyẽhacu katĩ niigia Baang cannĩ bulẽnĩt cobbi.
9 “Kĩ cĩ amĩnanna aneeta Baangĩ, kamĩnanung na buu agiitia, ĩthõng aavut mĩnana cannĩ.
10 Mĩ elemnyu niigia tĩrĩthẽntiok cĩganĩk, ĩthõng ĩdĩmantu, kamĩnanung katĩ na agiitia buu, kĩ cĩ kelemi na, ĩthõng kĩdĩmana tĩrĩthẽntiok cĩk Baangĩ, ĩthõng ĩmĩnana nẽ aneeta.
11 “Kaduwacung na agiitia thõõth coo, kĩĩ katĩ ebelbelit õrrõt kĩcĩ kebelbeli na wo.
12 Kaduwacunga, ĩmĩnantõy nyaguana, kĩ cĩ balna kamĩnanung na agiitia.
13 Mĩnanĩ cobbi cĩ amĩnanĩ eeti gõõnõgĩ eyeliay ngĩ adaaĩ, nyatarka ĩnõõgõ.
14 Ĩthõng eeginnu niigia gõõnõga cĩganĩk katĩ mĩ adĩmannu thõõth cĩ kaduwacung na wo.
15 Athii katĩ cĩ kavvuyyung na agiitia kethecung ne, nyakapanak naboo, nyatarka athii nyakapanaiti cĩ aga tiic cĩ makayyioit cĩnnĩ. Kavvuyyung na agiitia kethecung ne, gõõnõga, nyatarka keyelewung na agiitia kaal vẽlẽk wũk balna aduwacca aneeta Baangĩ.
16 “Athii balna cĩ ẽẽn agiitia cĩk ebẽranangũ aneeta, aneeta cĩ kẽbẽranung agiitia, ĩthõng kitionnung õõt iticanit tiic cĩ abũnna, kĩĩ katĩ õõt aryik nyegerua cĩk katĩ avvu aatĩ kuumuc. Ĩthõng thĩ, katĩ anyung agiitia Baangĩ gii vẽlẽk cĩ ajinnu niigia ĩnõõnõ thaarĩy cĩganĩk.
17 Ĩthõng kaduwacung na agiitia tĩrĩthẽnĩt coo kethecung ne, ĩmĩnantõy nyaguana.
Aaburyiek eeta cĩk looc coo wobjiak cĩk Yesu
18 “Mĩ aaburneccung eeta cĩk looc coo agiitia, agaac ĩĩtõ ne, aaburnecca balna aneeta ĩcĩ owu.
19 Ma ĩĩtõ niigia eet cĩk loocu, amĩnannung woyyia yoko nẽẽgẽ agiitia. Athii kẽnnẽ cĩ eeginnu niigia eet cĩk looc coo. Kẽbẽrawung balna na, kĩĩ katĩ ũtũngtek thoothonniok cĩk looc coo, ĩnõõnõ thĩ cĩ aaburneccung eeta cĩk looc coo wo.
20 Ahaddia thõõth wũ balna kaduwacung na kethecung ne, ‘Athii nyakapanaiti cĩ ijiar makayyioit cĩnnĩ.’ Mĩ adĩmanna aneeta eeta buth, adĩmannung katĩ agiitia buu buth. Mĩ athũnnĩ nẽẽgẽ liman cĩ kaduwai na ĩnõõgõ, athũnnĩ katĩ nẽẽgẽ cĩk aduwuanu niigia buu.
21 “Adĩmannung katĩ eeta kĩ balna ngĩ adĩmanna aneeta, nyatarka eeginnu niigia eet cĩganĩk, ĩthõng athii nẽẽgẽ cĩ aga Et wũ balna itionana aneeta.
22 Ma kithii na cĩ kakunie balna kiliman ĩnõõgõ, athii yoko woyyia nẽẽgẽ cĩ gẽrthẽ, ĩthõng thĩ, yoko agaacõ gerthetin cĩnĩng.
23 “Eeti cĩ aaburnecca aneeta, aaburneei nẽ Baang cannĩ buu.
24 Ma da nga kĩdĩman balna na thoothonniok cĩk anaat eeta cĩk nga kitican eeti ĩmma, athii yoko woyyia nẽẽgẽ cĩ gẽrthẽ. Ĩthõng thĩ, yoko ĩcĩnĩt balna nẽẽgẽ thoothonniok cĩk kadĩmani na wo, ĩthõng nga aaburnecca balna nẽẽgẽ aneeta kĩ Baang cannĩ.
25 Ĩnõõnõ thĩ cĩ aduwanĩ Ngiranĩ cĩnĩng thõõth cĩ ẽẽn dĩdĩ, ngatĩ athĩnnĩ ne, ‘Aaburnecca balna nẽẽgẽ aneeta kaganoko.’b