Ẽẽn Yesu gõõl cĩ õkõyyĩ eeti kĩ Baatĩnnĩ
14
Ma natẽ, othoothĩk Yesu wobjiak cĩgĩnĩk ethek ne, “Nyĩ anyiccu thinneti cuguk kabarritit, elemit Nyekuc, ĩthõng ẽlẽmtangũ aneeta buu.
2 Mẽẽlĩ ciithi cĩk ayak Baangĩ õlõõ cĩnnĩ. Athii woccia cĩ kaduwacung na thõõth coo, ma ngĩ athii cĩ ẽẽn thõõth coo dĩdĩ. Kõkkõ na kĩ ĩnõõnõ, kĩĩ katĩ kũũk na kĩdĩmanek ngĩtĩ avvunnu attiyyu niigia.
3 Mĩ katĩ kũwa kiticana thõõth coo, kõbõda katĩ, ĩthõng kikiyyia kuwunga, ĩthõng katĩ kõõt kũrũmtẽ kõdõwẽ.
4 Agayyu niigia ngĩtĩ kõkõyyẽ na wo.”
5 Ẽdẽcĩ Tomathĩ ĩnõõnõ ethei ne, “Makayyioit, erekcet ngĩtĩ õkõyyẽ niia, ĩthõng katĩ kagayyia gõõl kuu?”
6 Ẽdẽcĩ Yesu ĩnõõnõ ethei ne, “Aneeta cĩ keeni gõõla, ĩthõng keeni thõõth dĩdĩ, ĩthõng keeni rũgẽt cĩ aavĩ kũdũt, aneeta dõ cĩ kokoyung ĩcĩ Baangĩ, athii eeti cĩ okoyyung kĩ Baang ngĩ kathii na tõ.
7 Mĩ agayyangũ niigia aneeta dĩdĩ, agayyu yoko woyyia Baang cannĩ buu. Ĩthõng yoko agayyu niigia ĩnõõnõ, ĩthõng icintu niigia ĩnõõnõ.”
8 Ẽdẽcĩ Pilipo ethei ne, “Makayyioit, yelehet Baangiet, thõõth cĩ kadiimnya neccie dõ.”
9 Ẽdẽcĩ Yesu ethei ne, “Pilipo, kũrũmtẽ naaga kĩ agiitia wathinniok cĩk meelĩk, ĩthõng nga gawa buu. Mĩ ĩcĩna eeti ĩmma aneeta ĩcĩn Baang buu. Nyia naboo jina aneeta ennea ne, ‘Yelehet Baang wo’?
10 Athii niia cĩ elemi thõõth cĩ kathĩ na ne, kaavẽ na ĩcĩ Baangĩ, ĩthõng aavĩ Baangĩ kĩ aneeta? Ĩthõng thõõth cĩ kaduwa na wo, athii cĩ aku õõwa cannĩ mĩn, Baang cĩ aavĩ kĩ aneeta, cĩ adĩman thoothonniok cĩgĩnĩk koo.
11 “Elemit niigia thõõth cĩ kaduwa na kathĩ ne, kodowinia na kĩ Baang, ĩthõng odoi Baangĩ kĩ aneeta, kõdẽ ẽlẽmtangũ yoko niigia aneeta, nyatarka thoothonniok cĩk anaat eeta cĩk kadĩmani na wo.
12 Kaduwacung dĩdĩ, mĩ ẽlẽmnya eeti ĩmma aneeta, adĩman katĩ nẽ thoothonniok cĩk kadĩmani na wo. Adĩman katĩ nẽ thoothonniok cĩk ijiar cĩk kadĩmani na yoko wo, nyatarka yoko kimiirie na kũwa ĩcĩ Baangĩ.
13 Ijintangu aneeta, ĩthõng katĩ kadĩmaneccung na thõõth cĩ ajinnu thaarĩy ĩcĩganĩk wo, kĩĩ katĩ kaanyĩk Ngẽrĩnẽ Baatĩnnĩ bulẽnĩt.
14 Kadĩmani katĩ na thõõth cĩ ajinnu niigia thaarĩy cĩganĩk vẽlẽk.
Uduwak Yesu wobjiak gõõl cĩ itionacẽ Ririwac cĩ Dĩhĩmĩ
15 “Mĩ amĩnannangũ niigia aneeta, adĩmannu katĩ thõõth cĩ kaduwacung nana.
16 Ĩthõng thĩ, katĩ kuduwaha na Baang kitionawung agiitia Tirithioit ĩmma, cĩ katĩgõ ellung agiitia thoothiowẽy, ĩthõng katĩ ũrũmtewu kĩ agiitia kũdũt,
17 ĩthõng ẽẽn nẽ Ririwac cĩ Dĩhĩmĩ cĩ ẽẽn dĩdĩ. Ĩthõng athii cĩ ẽlẽmĩ eeta cĩk looc coo ĩnõõnõ, nyatarka athii cĩ acĩn nẽẽgẽ, kõdẽ aga ĩnõõnõ. Agayyu niigia Ririwac nĩco, cĩ arumenu kĩ agiitia, ĩthõng aavĩ katĩ thinnetinẽy ĩcuguk.
18 “Athii woccia cĩ kuungnicung na agiitia aavut kĩ boyyiowa. Kõbõdaccung katĩ na agiitia.
19 Wathinniowẽy ĩcĩ kĩdĩk, athii katĩ cĩ acĩnna eeta cĩk looc coo aneeta, ĩthõng thĩ, acĩnnangũ katĩ niigia. Aruknu niigia, nyatarka karugi nana.
20 Mĩ ikiyyia kõr neccie, agayyu katĩ niigia athinnu ne, kodowinia na kĩ Baang, ĩthõng niigia attiyyu kõdõwẽ kĩ aneeta, ĩthõng kodoyyie na kĩ agiitia.
21 Eeti cĩ ẽlẽmĩ tĩrĩthẽntiok cĩganĩk, ĩthõng ĩmĩnana aneeta, atican katĩ thõõth cĩ kaduwa na wo. Ĩthõng katĩ ĩmĩnan Baangĩ ĩnõõnõ, ĩthõng kamĩnani katĩ na buu ĩnõõnõ, ĩthõng keyeleha ĩnõõnõ ẽlẽ cannĩ.”
22 Ĩthõng ĩthĩ Yudathĩ ĩmma wũ, athii cĩ ẽẽn Yudath Ĩthkariot ne, “Makayyioit, nyia cĩ athĩ niia ne, eyelecet katĩ ageeta avuthit cunni, ĩthõng athii cĩ eyeleei eet cĩk looc coo wo?”
23 Ẽdẽcĩ Yesu ethei ne, “Mĩ amĩnanna eeti ĩmma aneeta, ongollie katĩ nẽ thõõth cannĩ, ĩthõng ĩmĩnan katĩ Baangĩ ĩnõõnõ buu, ĩthõng katĩ kivitiaha naaga kĩ ĩnõõnõ, ĩthõng kũrũmtea kĩ ĩnõõnõ.
24 Eeti cĩ athii cĩ amĩnanna aneeta, athii katĩ cĩ atican thõõth cannĩ. Thõõth cĩ athĩraryu niigia ĩcannĩ wo, athii cĩ aku kir kĩ aneeta, aku kĩ Baang, wũ balna itionana aneeta.
25 “Kaduwacung na agiitia thoothonniok cĩkkõ, nga karũmẽ kĩ agiitia.
26 Ĩthõng thĩ, aku katĩ Tirithioiti cĩ ẽẽn Ririwac cĩ Dĩhĩmĩ ellung agiitia thoothiowẽy vẽlẽk, nyatarka itiona Baangĩ Ririwac kikiyyia kabarĩca aneeta. Aku katĩ Ririwacĩ alimannung thoothonniok vẽlẽk, ĩthõng ahadawung thoothonniok vẽlẽk wũk balna kaduwacung na balna nga karũmẽ.
27 “Kaanyung na agiitia ganõn, ganõnĩ cannie cĩ kaanyung na agiitia, athii cĩ aduwõnĩ kĩ ganõn cĩ anyung eeta cĩk looc coo. Nyĩ attiyyu tongolintia, kõdẽ nyĩ anyiccu thinneti cuguk kabarritit.
28 “Ĩthĩktangũ viyyio niigia aneeta ngatĩ kathĩ ne, ‘Kõkkõ na, ĩthõng kõbõda katĩ naboo kĩ agiitia.’ Mĩ amĩnannangũ niigia aneeta dĩdĩ, atalnu katĩ ngatĩ kõkõyyẽ na kĩ Baang, nyatarka maka nẽ kĩ aneeta.
29 Kuduwawung balna na agiitia thoothonniok cĩkkõ nga kedenyciay, kĩĩ katĩ ngĩ ilibtia thoothiowa cĩkkõ, ẽlẽmnyangũ katĩ niigia aneeta.
30 Athii katĩ na cĩ kõthõõthõy kĩ agiitia kuumuc, nyatarka aku katĩ alaanĩ cĩ looc coo. Ĩthõng athii cĩ ayak nẽ tiirthẽt cĩ ijiaria aneeta,
31 ĩthõng thĩ, thẽk adiim eeta cĩk looc coo kagaacõ, ngatĩ kamĩnani na Baang cannĩ, ĩthõng kadĩmani na thõõth cĩ aduwacca nẽ.
“Ũtũbanothĩk itini, ĩtĩngath kõõtõ.”