Ũtũũny Yesu thoo cĩk wobjiak cĩgĩnĩk
13
Ma balna Kõr cobbi cĩ Ngothio cĩ Yudei, ikiyyia aga Yesu athĩ ne, ũtũbanothĩk itini cĩ ũũngnĩcẽ nẽ looc coo, ĩthõng imiirie ũũk cĩ Baatĩnnĩ. Amĩnan balna nẽ wobjiak cĩgĩnĩk cĩk aatĩ loota ngato, ĩthõng yoko, eyelek nẽ ĩnõõgõ mĩnan cobbi cĩnnĩ cĩ amĩnanĩ nẽ ĩnõõgõ õrrõt.
2 Ma balna nga kikiyyia dainti cĩ jiatinu, ikiyyia balna ovolongek alaanĩ cĩ ririwanĩn cĩk gerthek Yudath Ĩthkariot ngẽrtĩ Thimõnẽ kũũk kõvõlõngĩ Yesu.
3 Aga balna Yesu athĩ ne, anyi balna Baatĩnnẽ ĩnõõnõ makathĩt vẽlẽk, ĩthõng aku balna nẽ ĩcĩ Nyekuco, ĩthõng amiiri katĩ nẽ õkkõ ĩcĩnnĩ.
4 Ma balna nga aduwue nẽẽgẽ, ĩtĩnga Yesu noko, ĩthõng aara cẽrẽm ĩmma cĩ abungi ẽlẽ cĩnnĩ, ĩthõng ecebek cẽrẽm cĩ pucaninto thuguma cĩnnĩ.
5 Ĩthõng ĩcĩĩdĩk maam kalaaya, ngaatĩ ũũnyĩ thoo cĩk wobjiak cĩgĩnĩk, ĩthõng upucan cẽrẽma cĩ pucaninto ẽẽ.
6 Ma balna ngĩ õdõlan nẽ Thimõnẽ Pẽtũrũ wo, ikiyyia ijin Pẽtũrũ Yesu ethek ne, “Makayyioit, adiimi ũũnya thoo cĩganĩk?”
7 Ẽdẽcĩ Yesu ethei ne, “Athii niia cĩ aga thõõth cĩ kadĩmani na yoko wo, ĩthõng thĩ, akuni katĩ aga vurtia.”
8 Ẽdẽcĩ Pẽtũrũ ethei ne, “Athii woccia cĩ uunyi niia thoo cĩganĩk kũdũt!”
Ẽdẽcĩ Yesu ethei ne, “Mĩ athii cĩ kuunyi na aniitia, athii niia cĩ eeni et cannĩ.”
9 Ẽdẽc Pẽtũrũ ĩthĩ ne, “Makayyioit, nyĩ ũũnya thĩ thoo dõ, tũnya athĩn kĩ õõ vẽlẽk.”
10 Ẽdẽcĩ Yesu ethei ne, “Eeti cĩ aaranẽ vẽlẽk, adiim ngĩ ũũny nẽ thoo cĩgĩnĩk dõ. Ũbũna ẽlẽ cĩnnẽ. Ũbũntawu niigia, ĩthõng thĩ, et kẽnnẽ codoi dõ cĩ ẽẽn riiriny.”
11 Aga balna Yesu et cĩ katĩ õkkõ õvõlõngĩ ĩnõõnõ, ĩnõõnõ thĩ cĩ athĩnnĩ nẽ ne, “Et codoi dõ cĩ ayak riiriny wo.”
12 Ma balna ngĩ ũũdũt Yesu ngatĩ ũũnyĩ wobjiak cĩgĩnĩk thoo vẽlẽk, itihim nẽ cẽrẽm cĩnnĩ, ĩthõng ũũk aavu loota naboo, ĩthõng ijin nẽ wobjiak ethek ne, “Agayyu yoko niigia thõõth cĩ kĩdĩmana na wo?
13 Avvũyyangũ niigia aneeta ẽthẽccangũ ne, Limannioit kĩ Makayyioit cunung, ĩthõng keeni dĩdĩ.
14 Kũũnyung na Makayyioiti, Limannioiti cunung, thoo cuguk, ũtũũnyĩt niigia buu thoo cĩk goonogu cuguk.
15 Keyelewung na agiitia yelinit vẽlẽk, õõt iticanit niigia buu, kĩ cĩ kadĩmaneccung na agiitia wo.
16 Kaduwacung dĩdĩ, athii nyakapanaiti cĩ ijiar makayyioit cĩnnĩ tõ, ĩthõng athii eeti cĩ itionni, athii cĩ obbua kĩ et cĩ ition ĩnõõnõ.
17 Ivitiawu yoko agayyu niigia buu thoothonniok cĩkkõ, ĩthõng agatannung katĩ Nyekuci mĩ adĩmannu kĩ cĩ kaduwacung na wo.
18 “Athii cĩ kothoothung na agiitia vẽlẽk. Kagga na eet wũk balna kẽbẽra nana. Ĩthõng aku thõõth cĩ eheeddi Nyaragawa ĩcĩ Nyekuco ẽẽn dĩdĩ. Ĩthõng athĩ thõõth neccie ne, ‘Ũtũwũwõthĩha eeti cĩ kaduwena dũũca codoi, ĩthõng ĩdĩmana buth.’a
19 “Kaduwacung na agiitia thõõth coo, nga kedenyiay nẽ. Ma katĩ kõr cĩ edenyiay, avvunnu katĩ agayyu athinnu ne, keeni na Ellioit.
20 Ĩthõng kaduwacung dĩdĩ, eeti cĩ ẽlẽmĩ Et cĩ kittiona nana, ẽlẽmnya aneeta, ĩthõng eeti cĩ ẽlẽmnya aneeta, ẽlẽmĩ Et wũ balna itionana aneeta.”
Uduwa Yesu thõõth cĩ daaĩth cĩnnĩ
21 Ma balna ngĩ uduwa Yesu thoothonniok cĩkkõ vẽlẽk, ikiyyia õmõthẽ nẽ õrrõt, ĩthõng uduwak wobjiak cĩgĩnĩk ethek ne, “Kaduwacung dĩdĩ, aavĩ eeti ĩmma kõrgẽna cunung cĩ katĩ ovolongia aneeta.”
22 Ma natẽ, ivitia angalillie wobjiaha, nyatarka atalmanyan thõõth cĩ aduwa Yesu ĩnõõgõ, ĩthõng ĩcĩntõy nẽẽgẽ dõ, adiim aga ngẽnẽ cĩ õthõõth nẽ ẽẽ.
23 Arũmẽ balna wobjiaiti ĩmma cĩ balna gõõ amĩnan Yesu,b õbõwõy kĩ ĩnõõnõ itin cĩ aduwacĩ nẽ ĩnõõgõ thõõth coo.
24 Ĩthõng ikiyyia othoothĩk Thimõnẽ Pẽtũrũ wobjiait nĩcẽ athiitia cĩnnĩ ethek ne, “Jin ĩnõõnõ ngẽnẽ cĩ katĩ õvõlõngĩ ĩnõõnõ wo?”
25 Ma natẽ, iginyõthĩk wobjiaiti neccie Yesu, ĩthõng ijin ĩnõõnõ ethek ne, “Makayyioit, ngẽnẽ cĩ othoothi niia kõrgẽna cĩnang wo?”
26 Ẽdẽcĩ Yesu ethei ne, “Kanyũlaneei katĩ na ahat cĩ avaadiay diatia, ĩthõng kaanyĩha et wũ balna kothoothi na ẽẽ.” Ma natẽ, ũnyũlanẽk Yesu ahat diatia, ĩthõng aanyĩk Yudath Ĩthkariot ngẽrtĩ Thimõnẽ.
27 Ma balna mĩ ẽdẽcak Yudathĩ ngatĩ aduwi ahat, ikiyyia ittio ĩnõõnõ Thĩttanĩ.
Ngaatĩ õthõõthĩcẽ Yesu ĩnõõnõ ẽthẽcĩ ne, “Bĩt dĩman thõõth cunni oo taman!”c
28 Ĩthõng thĩ, ẽrẽk balna wobjiak vẽlẽk thõõth cĩ õthõõth Yesu wo.
29 Ahad kẽggẽ nẽẽgẽ athĩ ne, aduwaai yoko Yesu Yudath, kũũk kũtũwa dainit cĩ Peyiano, kõdẽ kaanyĩk piryiak nyarobinya õõgĩ, nyatarka balna ẽẽn nẽ et cĩ agam nyarobinya cĩgĩk.
30 Ma balna natẽ tamanoko uduk Yudathĩ ahat cĩ avaadiay, ĩthõng ĩtĩnga ũũk ngatĩvõrĩ, ẽẽn thĩ baa lõõcĩ baalin.
Tĩrĩthẽnĩt cĩ jõr
31 Ma balna ngĩ ĩtĩnga Yudathĩ ũũk, ikiyyia õthõõth Yesu ĩĩ ne, “Ubuluthie thĩ yoko Ngẽrtĩ Eeto, ĩthõng katĩ ubuluthie Nyekuci buu ĩcĩnnĩ.
32 Ma ngĩ ubuluthie Nyekuci ĩcĩnnĩ, abuluth katĩ Nyekuci Ngẽrĩnĩ ẽla cĩnnĩ, ĩthõng ubuluth ĩnõõnõ tamanoko.
33 “Doolia cĩganniek koo, karũmẽ katĩ na kĩ agiitia itin cĩ dĩcĩ. Ẽrẽppannangũ katĩ niigia, ĩthõng athii cĩ arubanangu buu. Ĩthõng kaduwacung na thõõth wũ balna kaduwai makayyiok cĩk Yudei ketheei ne, athii woccia cĩ õwõbanangũ niigia aneeta ĩcĩ kõkõyyẽ na wo.
34 Ĩthõng kaanyung na agiitia tĩrĩthẽnĩt cĩ jõr, ĩmĩnantõy nyaguana kĩ balna kamĩnanung na agiitia, ĩthõng thĩna, ĩmĩnantõy thẽk niigia.
35 Mĩ amĩnanonu nyaguana, aga katĩ eeta vẽlẽk athĩ ne, eeginnu niigia wobjiak cĩganĩk.”
Bũtan cĩ Pẽtũrũ
(Bẽl Matewo 26:31-35; Marĩkõ 14:27-31; Luka 22:31-34)
36 Ma natẽ, ijin Thimõnẽ Pẽtũrũ ĩnõõnõ ethek ne, “Makayyioit, õkkõ katĩ niia ĩjang?”
Ẽdẽcĩ Yesu ethei ne, “Athii woccia cĩ akuni niia ĩcĩ kõkõyyẽ na yoko wo, õwõbana katĩ vurtia.”
37 Ĩthõng othoothĩk Pẽtũrũ ĩnõõnõ naboo ethek ne, “Makayyioit, kiirioit kõdõwẽ yoko, kadaai katĩ na, nyatarka aniitia!”
38 Ẽdẽcĩ Yesu ethei ne, “Adiimi adaai niia dĩdĩ, nyatarka aneeta? Kaduwaci dĩdĩ, athĩ katĩ niia ne, athii cĩ agayya aneeta ngõnana iyyio, katĩ nga kõrõk lotikõkõrĩ.”