Uvuudie Yesu ngooroca Bethani
(Bẽl Matewo 26:6-13; Marĩkõ 14:3-9)
12
Ma balna nga kĩĩtõ wathinniowa tõrkõnõm, Kõr cobbi cĩ Ngothio, ũũk Yesu ĩcĩ kõrõõk cĩ Bethani, nginiwa wũ balna anyĩcẽ nẽ Latharõ kũrũga daaĩtha.
2 Adĩmaneei balna eeta Yesu dainit natẽ, ĩthõng balna Marĩta cĩ ẽngẽr dainit, ĩthõng aavĩ balna Latharõ buu tõ natẽ eetĩnẽy nĩĩkẽ kĩ ĩnõõnõ.
3 Ĩthõng ĩdĩma Maria ngooroc ĩmma cĩ õngõlĩ medi, cĩ balna ũũta nẽ nyarobinyay cĩk meelĩk, cĩ balna aavĩ deera ĩcĩ dĩcĩ, ĩthõng utduutik thoo cĩk tabanyĩk cĩk Yesu, ĩthõng upucan ĩmmanẽy ĩcĩgĩnĩk. Ma natẽ, ikiyyia õtõngõl ciith vẽlẽk ngooroc coo.
4 Ma natẽ, ikiyyia balna avarac Yudathĩ Ĩthkariotĩ, wobjiaiti wũ katĩ õkkõ õvõlõngĩ Yesu, ĩthõng õthõõth, ĩthĩ ne,
5 “Nyia woccia da athii cĩ ũũtĩ ngooroc coo, ĩthõng anycĩwothĩk nyarobinya eet cĩk apĩrna wo? Adũman baalia nyarobinya cĩkkõ, et cĩ aticanni erkit codoi.”
6 Õthõõth balna Yudathĩ ketee, nyatarka athii nẽ cĩ ẽẽn et cĩ amĩnan eet cĩk apĩrna thõng, ĩthõng thĩ, nyatarka ẽẽn balna nẽ et cĩ gõõ agam nyarobinya cĩgĩk, ĩthõng õgõrõth gõõ õõgĩ naboo.
7 Ẽdẽcĩ Yesu ĩnõõnõ ethei ne, “Tũng doo nĩco mĩn kiitiang ngooroc cĩnnĩ nyiangũ, kĩĩ katĩ kuvudĩa aneeta kõrra cĩ daaĩth cannĩ.
8 Arumenu katĩ niigia dõõkĩthĩ kĩ eet cĩk apĩrna, ĩthõng thĩ, athii katĩ niigia cĩ karũmẽ kĩ aneeta kuumuc.”
9 Ma balna mĩ athĩrar Yudei cĩk meelĩk athĩ ne, arawak Yesu Bethani wo, ivitia nẽẽgẽ, nyatarka adiim acĩn Yesu, ĩthõng idiimitõ ĩcĩnĩt Latharõ, et wũ balna arũgũtha Yesu daaĩtha.
10 Ma natẽ, idiimitõ makayyiowa cĩk paadĩrnyawu uruit Latharõ buu,
11 nyatarka elemit Yudei cĩk meelĩk Yesu, nyatarka thõõth cĩ arũknanĩ nẽ Latharõ daaĩtha.
Ũũk Yesu Yeruthalẽma
(Bẽl Matewo 21:1-11; Marĩkõ 11:1-11; Luka 19:28-40)
12 Ma ngerethietĩn cĩnnĩ, ivitia ĩthĩraritõ eeta cĩk meelĩk wũk balna avvu Peyiana athĩ ne, aku katĩ Yesu õkkõ Yeruthalẽma.
13 Ma natẽ, ĩdĩmta nẽẽgẽ lõbũrtũllẽn cĩk kũtdenu, ĩthõng õõt, ĩcĩnĩt Yesu, ĩthõng egerenyit ĩĩtõ ne,
“Hothana!”
“Agatanẽ eeti cĩ aku thaarĩy ĩcĩk Makayyioktak!”ab
“Anycĩk Nyekuc kagatan Alaan cĩ Ĩthraĩlĩ!”
14 Ma natẽ, ũrũba Yesu thigiriec ĩmma cĩ dĩcĩ, ĩthõng atadothĩk nẽ ĩnõõnõ kĩ ngĩ aduwa Nyaraga cĩ Nyekuco athĩ ne,
15 “Niigia eeta cĩk Thionĩc nyĩ ongolinu.
Ĩcĩnĩt ikiyyia Alaanĩ cunung,
õdõnga thigiriecĩ cĩ dĩcĩ ĩnõõnõ.”d
16 Athii cĩ aga wobjiaha cĩgĩnnẽk thoothonniok cĩkkõ ĩcĩ owu. Ma balna ngĩ anyĩwothĩk Yesu bulẽnĩtĩ, ivitia ahaddia wobjiaha thoothonniok cĩkkõ vẽlẽk, acĩn ngatĩ eheeddi thoothonniowa cĩkkõ, nyatarka ĩnõõnõ, ĩthõng adĩmaneei nẽẽgẽ kaal cĩkkõ ĩnõõnõ.
17 Aku balna meelitini cĩ acĩn ngatĩ arũknanĩ Yesu Latharõ daaĩtha, ĩthõng õõt uduktiak eet õõgĩ buu, thõõth nĩcẽ.
18 Ma balna eeta cĩk meelĩk balna ma ngĩ athĩhĩ thõõth cĩ anaat eeta cĩ adĩman nẽ ẽẽ, õõt urumtõy kĩ ĩnõõnõ.
19 Ma natẽ, othoothitõ Varithei nyaguana ĩĩtõ ne, “Athii gii cĩ woccia nga kadĩmanna naaga tõ, owobit eeta vẽlẽk ĩnõõnõ.”
Õthõõth Yesu kõr cĩ daaĩth cĩnnĩ
20 Õvvõ balna eeta cĩk Girihi gwuak ĩcĩ Yeruthalẽmĩ, õvvõ alayyie Peyiana.
21 Ĩthõng õõt ijinit nẽẽgẽ Pilipo ethei ne, “Laang, kadiimnya kacĩnna Yesu.” Aavĩ balna nẽ õlõõ cĩ gaalawu cĩ Beththaida looca ĩcĩ Galilea.
22 Ikiyyia uduwak Pilipo Anderiya thõõth nĩcẽ, ĩthõng õõt nẽẽgẽ vẽlẽk uduktiak Yesu.
23 Ngaatĩ ẽdẽcĩ Yesu ĩnõõgõ ẽthẽcĩ ne, “Arawak kõr cĩ edenyianẽ bulẽnĩtĩ cĩ Ngẽrtĩ Eeto.
24 Kaduwacung dĩdĩ, mĩ athii cĩ atdukothi kinyomocĩ cĩ labitoto tõdõway, ĩthõng ũgũdanẽ, athii katĩ cĩ aari, ĩthõng aavĩ katĩ codoi dõ. Ĩthõng thĩ, ma ngĩ adaak aari katĩ kinyomo cĩk meelĩk.
25 Eeti cĩ aari thĩnĩn cĩnnĩ rũgẽta ĩcĩ looc coo, ĩthõng ĩmĩnan ẽlẽ cĩnnĩ dõ, athii katĩ cĩ amũda nẽ rũgẽt cĩ alna kũdũt. Ĩthõng eeti cĩ aharneei rũgẽt cĩ looc coo, amũda katĩ nẽ rũgẽt cĩ alna kũdũt.
26 Ĩthõng eeti cĩ adiim ẽẽn ticciannioit cannĩ, abũnna thẽk ma ngĩ õwõbja aneeta, ĩthõng aavĩ ticciannioiti cannie ngatĩ kaavẽ nana. Ongollie katĩ Baangĩ et cĩ aticanothĩca aneeta.
27 “Komoththie na yoko õrrõt, kẽrẽha thõõth cĩ woccia kaduwa buu. Ĩthõng woccia kethek Baang ne, ‘Baang, ẽẽla aneeta itina ĩcoo’? Athiitõ, kakuni balna na, nyatarka itin coo.
28 Baang, anyĩk thar cugunik bulẽnĩt.”
Ngaatĩ õthõõthĩ moloowĩ ĩmma tammuatiddina athĩnnĩ ne, “Kubulutha na thar cĩganĩk vẽlẽk, ĩthõng kabuluthi katĩ naboo!”
29 Ma balna mĩ athĩrar meelitini cĩ eetu molook nĩcẽ, ahad gwuak athĩ ne, borowec cĩ ẽgẽrẽny wo, ĩthõng ĩĩtõ gwuak ne, othoothĩk anjĩlõ ĩnõõnõ.
30 Ngaatĩ õthõõthĩcẽ Yesu ĩnõõgõ ẽthẽcĩ ne, “Õthõõth moloowĩ cĩ athĩknu niigia wo, kĩĩ katĩ keelung nẽ agiitia, athii cĩ ẽẽn aneeta.
31 Arawak itini cĩ uuki Nyekuci eet cĩk loocu, ĩthõng katĩ itingkawothĩk alaanĩ cĩ looc coo tuu.
32 Ĩthõng thĩ, mĩ kõdõngẽ na looca ĩcoo, kẽyẽha katĩ na eet vẽlẽk kivitia ĩcannĩ.”
33 Õthõõth balna Yesu gõõl cĩ katĩ adaaknĩ nẽ.
34 Ĩthõng ĩĩtõ eeta ne, “Athĩ Ngiranĩ ne, arũgĩ katĩ Kiristo kũdũt! Nyia ĩthĩ niia ne, ‘Adaaĩ katĩ Ngẽrtĩ Eeto wo?’ Ngẽnẽ cĩ athĩ niia ne, ‘Ẽẽn Ngẽrtĩ Eeto wo’?”
35 Ẽdẽcĩ Yesu ethei ne, “Aavĩ katĩ lanyĩtĩ kĩdĩĩc kĩ agiitia itin cĩ dĩcĩ, kĩĩ katĩ õtõõth lanyĩta nga kikiyyia muwuri, nyatarka eeti cĩ õwõ muwuratõ, athii cĩ aga ngĩtĩ õkõyyĩ nẽ wo.
36 Elemit lanyĩt nga aavĩ wo, kĩĩ katĩ ivitia niigia ĩĩtõ dõõlĩ cĩk lanyĩt coo.” Ma balna mĩ õthõõth Yesu vẽlẽk, ikiyyia ĩtĩnga nẽ, ĩthõng uluguny ẽlẽ cĩnnĩ ĩcĩnĩng.
Abũrĩ eeta ngatĩ ẽyẽhĩ leminit kĩ Yesu
37 Kõdẽ woyyia balna ngĩ adĩman Yesu thoothonniok cĩk anaat eeta kẽbẽrẽnĩy cĩk eetu vẽlẽk, athii woccia nẽẽgẽ cĩ ẽlẽmĩ ĩnõõnõ.
38 Õgõõn balna thõõth coo ketee, kĩ balna ngĩ aduwa Ĩthaia wũ balna ẽẽn et cĩ õthõõth molook cĩ Nyekuco kĩĩ dĩdĩ, balna athĩ ne,
“Makayyioit, ngẽnẽ cĩ balna ẽlẽmĩ nyemut cĩnang,
ĩthõng ngẽnẽ cĩ balna eyelek Makayyioiti
athiit cĩnnĩ cĩ tiiri?”e
39 Athii balna cĩ ẽlẽmĩ eeta ĩnõõnõ, nyatarka balna aduwa Ĩthaia, athĩ ne,
40 “Ũmmũt Nyekuci kẽbẽrẽ cĩgĩk,
ĩthõng aanyĩk ooti cĩgĩk kokomit.
Atican nẽ ketee, kĩĩ katĩ athii cĩ acĩnẽnĩ nẽẽgẽ,
ĩthõng ĩthĩnga athĩknẽ,
ĩthõng athii nẽẽgẽ cĩ avvu kĩ Nyekuc,
ĩthõng anyĩk nẽ ĩnõõgõ kũbũnta.”f
41 Õthõõth Ĩthaia ketee, nyatarka ĩcĩn nẽ bulẽnĩt cĩ Yesu, ĩthõng õthõõth thõõth cĩ õkkõ kĩ ĩnõõnõ.g
42 Ivitia balna elemit eeta kĩ makayyiok cĩk Yudei cĩk meelĩk Yesu, ĩthõng thĩ, athii nẽẽgẽ cĩ aduwaai et ĩmma, nyatarka ongollie nẽẽgẽ ngatĩ katĩ ingkawĩ woccia Varithei ĩnõõgõ Ciitha cĩ Lawintio,
43 nyatarka atarnanĩ nẽẽgẽ dĩhĩthẽnĩt cĩ eetu kijiar dĩhĩthẽnĩt cĩ Nyekuco.
Ikiyyia Yesu kĩĩ kẽẽla looc
44 Ĩthõng ikiyyia ẽgẽrẽny balna Yesu õrrõt ĩthĩ ne, “Eeti cĩ ẽlẽmnya aneeta, athii cĩ ẽlẽmnya aneeta dõ, ĩthõng thĩ, ẽlẽmĩ Baang wũ balna itionana aneeta buu.
45 Eeti cĩ acĩnna aneeta, acĩn nẽ Et wũ balna itionana aneeta.
46 Kakuni balna na loota ngato, kĩthĩ lanyĩt, kĩĩ katĩ eeta vẽlẽk cĩk ẽlẽmnya aneeta, ĩthĩnga aatĩ muwuratõ.
47 “Athii na cĩ kengeri thõõth cĩ et cĩ abũrĩ liman cannĩ. Kakuni balna na loota ngato, kĩĩ katĩ kikiyyia kẽẽla eet cĩk looc coo, athii na cĩ kengeri thoothonniok cĩgĩk.
48 Ĩthõng eeti cĩ abũrĩ liman cannĩ, ẽngẽr katĩ thoothiowa cĩk kaduwa na yoko wo ĩnõõnõ, kõrra cĩ katĩ ditianẽt cĩ loocu.
49 Ĩthõng thõõth cĩ kothoothi na wo, athii cĩ kaduwa õõwa cannĩ mĩn, Baang wũ balna itionana aneeta, cĩ aduwacca thõõth cĩ kaduwa na wo.
50 Ĩthõng kagga na thõõth cĩ aduwa nẽ wo, ayaha rũgẽt cĩ alna kũdũt. Ĩnõõnõ thĩ, cĩ kaduwacung na kir thõõth cĩ balna aduwacca aneeta Baangĩ wo.”