Daaĩth cĩ Latharõ
11
Aavĩ balna eeti ĩmma cĩ athĩ thar Latharõ õlõõ cĩ gaalawu cĩ athĩ Bethani, cĩ ẽẽn kõrõõk cĩ Maria kĩ ngõõnĩ cĩnnĩ Marĩta. 2 Ĩmmõrĩ balna Latharõ cĩ athĩ ngõõnĩ cĩnnĩ Maria, wũ balna avuud thoo cĩk Makayyiokto ngooroca cĩ õngõlĩ medi, ĩthõng upucan thoo cĩk Makayyioktak ĩmmanẽy ĩcĩgĩnĩk. 3 Itiontĩk ngoonogua thõõth Yesu cĩ athĩ ne, “Makayyioit, ĩmmõrĩ goonu wũ gõõ amĩnani niia õrrõt.”
4 Ma balna mĩ aku athĩrar Yesu nyemut coo wo, ikiyyia õthõõth nẽ ĩthĩ ne, “Athii katĩ mõõrĩthĩ cĩnnẽ cĩ ayaha daaĩth, anyi katĩ Nyekuc bulẽnĩt, ĩthõng anyi katĩ Ngẽrĩnĩ cĩnnĩ buu kubulie.”
5 Amĩnan balna Yesu, Marĩta kĩ ngõõnĩ cĩnnĩ Maria kĩ Latharõ.
6 Ma baa ngĩ athĩrar nẽ mõõrĩth cĩ Latharõ wo, aavu nẽ ngatĩ balna aavẽ ẽẽ, wathinniok ramma.
7 Ma balna vurtia, ikiyyia uduwak nẽ wobjiak cĩgĩnĩk ethek ne, “Kimiiryi kõõt looca ĩcĩ Yudea naboo.”
8 Ẽdẽcĩ nẽẽgẽ Yesu ethei ne, “Limannioit, adiim balna nõõnõ Yudei ngĩ õvõccĩ aniitia bĩĩyẽnĩy natẽ, adiimi amiire õkkõ natẽ noko?”
9 Ẽdẽcĩ Yesu ethei ne, “Athii wõnõ cĩ ayak waathĩnĩ itinnya cĩk ẽẽn õmmõtõ kĩ ramma? Athii eeti cĩ õwõ waath cĩ uuk looc, ẽẽl ĩnõõnõ lanyĩtĩ cĩ looc coo.
10 Mĩ õwõ eeti baal, ĩdda gimma ĩnõõnõ kuuk looc, nyatarka athii lanyĩtĩ tõ.”
11 Ĩthõng õthõõth Yesu naboo ĩĩ ne, “Õõngĩ goonietĩ cĩnac Latharõ thõng, ĩthõng kadiimi kõkkõ na katurani ĩnõõnõ kĩcĩnẽ.”
12 Ẽdẽcĩ wobjiaha ethei ne, “Makayyioit, mĩ õõngĩ nẽ thõng, abũnna katĩ nẽ.”
13 Ahad balna wobjiaha cĩgĩnnẽk athĩ ne, acũba yoko Latharõ kĩnyak dĩdĩ, ogoogo athĩ Yesu ne, adaak Latharõ thõng.
14 Ma natẽ, ikiyyia uduwak nẽ ĩnõõgõ mũrũũr ethek ne, “Lõgõth, adaak Latharõ,
15 ĩthõng nyatarka agiitia, katali na ngatĩ athii cĩ kaavẽ na daaĩtha cĩnnĩ itin nĩcẽ, kĩĩ katĩ woccia ẽlẽmtangũ niigia aneeta. Ĩthõng thĩ, ivitia niigia kõõt ĩcĩnnĩ.”
16 Ĩthõng ẽdẽc Tomathĩ, cĩ athĩ thar õõgĩ Didimoth,a uduwak wobjiak õõgĩ ethek ne, “Kõõt naaga buu kadaait kõdõwẽ kĩ ĩnõõnõ.”
Ũrũgũtha Yesu Latharõ daaĩtha
17 Ma balna ngĩ arawak Yesu natẽ, ikiyyia ũmũdak nẽ Latharõ adawẽ ayak yoko wathinniok wec loowa.
18 Ẽẽn kõrõõgĩ cĩ gaalawu cĩ Bethani wo, maĩlnya ramma kĩ Yeruthalẽm,
19 ĩthõng mẽẽlĩ balna Yudei cĩk avvu agam Marĩta kĩ Maria athĩn uluana cĩ Latharõ.
20 Ma thĩ balna mĩ athĩrar Marĩta athĩ ne, ikiyyia Yesu wo, ĩtĩnga noko ũũk inyaman ĩnõõnõ, ĩthõng kẽnnẽ avĩya Maria õlõõ.
21 Ma natẽ, othoothĩk Marĩta Yesu ethek ne, “Makayyioit, ma woyyia baalia niia avvu ngato, athii woyyia cĩ adaaĩ gõtõna.
22 Ĩthõng thĩ, nẽnnẽ thẽk yoko buu, kagga na, anyi katĩ Nyekuci aniitia gii vẽlẽk cĩ ajini niia.”
23 Ẽdẽcĩ Yesu ĩnõõnõ ethei ne, “Arũkna katĩ gotonu naboo.”
24 Ẽdẽcĩ Marĩta athĩ ne, “Dĩdĩ, arũkna katĩ nẽ naboo, katĩ ngĩ ũrũkta eeta vẽlẽk, kõrra cĩ katĩ ditianẽt cĩ loocu.”
25 Ẽdẽcĩ Yesu ethei ne, “Aneeta cĩ karũgũtha eet daaĩtha, ĩthõng kaanyĩha rũgẽt. Arũgĩ katĩ eeti cĩ ẽlẽmnya aneeta, kõdẽ woyyia ngĩ adaak buu,
26 ĩthõng eeti cĩ arũgĩ, nyatarka ẽlẽmĩ thõõth cannĩ, athii katĩ cĩ adaaĩ nẽ kũdũt. Elemi niia thõõth coo?”
27 Ẽdẽcĩ Marĩta ethei ne, “Ii, Makayyioit, kelemi na ngatĩ eeni niia Kiristo, Ngẽrtĩ Nyekuco, wũ balna woyyia akuni looca coo.”
28 Ma natẽ, ũtũngek nẽ Yesu, ĩthõng ũrũbothĩk Maria, ngaatĩ avaanĩ ĩnõõnõ ngatĩ uluano ẽẽ, ĩthõng othoothĩk ĩnõõnõ ethek ne, “Ikiyyia Limannioit ngato, adiim acininia.”
29 Ma balna ngĩ athĩrar Maria thõõth coo wo, ĩtĩnga tamanoko ũũk ĩcĩn Yesu.
30 Nga balna avĩya nẽ õlõõ ngatĩvõrĩ, ngatĩ ũũngnĩcẽ Marĩta ĩnõõnõ.
31 Ma balna ngĩ acĩn Yudei cĩk agam Maria athiit uluana, ngatĩ ĩngannĩ nẽ ciitha tamanoko, ĩthõng ũũk koo, ahad kẽnnẽ nẽẽgẽ athĩ ne, õkkõ yoko nẽ alu bĩĩyẽnĩy ĩcĩk gõtõnõnĩ. Ngaatĩ õwõbĩ nẽẽgẽ ĩnõõnõ.
32 Ma balna ngĩ arawak Maria ngĩtĩ aavẽ Yesu wo, ikiyyia akatek nẽ Yesu kuthungti, ĩthõng uduwak ĩnõõnõ ethek ne, “Makayyioit, mĩ baalia avvu niia ngato kõr nĩcẽ, athii woyyia baalia cĩ adaaĩ gõtõna cannie.”
33 Ma thĩ balna ngĩ acĩn Yesu Maria kĩ Yudei cĩk iriowa kĩ ĩnõõnõ ngatĩ alue wo, ikiyyia uwum thõõth cĩ daaĩth cĩ Latharõ wo, ĩnõõnõ thĩnĩn, ĩthõng ẽhẽc ĩnõõnõ õrrõt,
34 ĩthõng ijin ĩnõõgõ ethek ne, “Adayyu balna ĩnõõnõ ngatdang?”
Ẽdẽcĩ nẽẽgẽ ĩnõõnõ ethei ne, “Makayyioit, ijjia baai kõõt cĩn.”
35 Utulu Yesu.
36 Ma natẽ, othoothitõ Yudei ĩĩtõ ne, “Ĩcĩnĩt da niigia, amĩnan nẽ ĩnõõnõ õrrõt!”
37 Õthõõth kẽnnẽ eeta gwuak athĩ ne, “Anyi balna nẽ et cĩ rubenĩ kĩcĩnẽ, ĩthõng athii nẽ cĩ alaam daaĩth cĩ Latharõ nyia?”
Ũrũgũtha Yesu Latharõ daaĩtha
38 Ma natẽ, ikiyyia uwum thõõth coo thĩnĩn cĩ Yesu õrrõt naboo. Ngaatĩ õdõlanĩ nẽẽgẽ bĩĩyẽn cĩk Latharõ. Adayyie balna nẽ ngatĩ ẽẽn ngilom, ĩthõng ũnyũgẽ bĩĩya cobbi.
39 Ma natẽ ikiyyia thĩ uduwak Yesu ĩnõõgõ ennek ne, “Ẽnyẽktĩ bĩĩ nĩco kũũk kabanyca!”
Ẽdẽcĩ Marĩta ĩnõõnõ ethei ne, “Makayyioit, ummu yoko ẽlẽ cĩnnẽ õrrõt, nyatarka balna adawẽ nẽ ayak wathinniok wec.”
40 Ẽdẽcĩ Yesu ethei ne, “Nga wõnõ kuduwai na aniitia ketheei ne, ‘Mĩ elemi niia thõõth cĩ Nyekuco, acini katĩ bulẽnĩt cĩnnĩ’?”
41 Ngaatĩ ẽnyẽẽĩ eeta bĩĩ katũga ĩcĩ ngilom cĩ balna adawini Latharõ. Ma natẽ, ĩcĩn Yesu tammutiddin, ĩthõng ĩĩ ne, “Ibalallẽ Baang ngatĩ athĩkna aneeta.
42 Kagga na cĩ gõõ athĩkna niia aneeta dõõkĩthĩ, ĩthõng kaduwa thõõth coo yoko, nyatarka eet cĩk karũmẽna ngato wo, kĩĩ katĩ kelemit woccia nẽẽgẽ kĩĩtõ ne, aniitia cĩ itionana aneeta.”
43 Ma balna ngĩ ẽdẽcak Yesu lawinit, ũtũvvũwõy nẽ õrrõt ĩĩ ne, “Latharõ, tẽẽha ngatĩvõrĩ!”
44 Ngaatĩ ẽẽktanẽ Latharõ akuni ngatĩvõrĩ, nga ecebjie ceremuanĩy wũk balna adawini noko, ammũtẽ nguum cĩnnẽ cẽrẽma. Ma natẽ, othoothĩk Yesu ĩnõõgõ ethek ne, “Oogit ĩnõõnõ kũũk.”
Idiimitõ makayyiowa cĩk Yudei ngĩ aruk Yesu
(Bẽl Matewo 26:1-5; Marĩkõ 14:1-2; Luka 22:1-2)
45 Ivitia elemit Yudei cĩk meelĩk Yesu, cĩk balna arũmẽ kĩ Maria uluana, nyatarka ĩcĩnĩt nẽẽgẽ thõõth cĩ adĩman Yesu wo.
46 Ĩthõng thĩ, õvõyyĩ balna kẽnnẽ eeta gwuak thõõth cĩ adĩman Yesu wo, ĩthõng uduktiak nẽẽgẽ Varithei.
47 Ngaatĩ alũtẽnĩ makayyiowa cĩk paadĩrnyawu kĩ Varithei kĩ eet cĩk obbitik cĩk lokikak,b ĩthõng irionitõ nẽẽgẽ ĩĩtõ ne, “Kadaĩ woccia et coo nyia? Adĩman nẽ thoothonniok cĩk anaat eeta cĩk meelĩk.
48 Mĩ kuungni naaga et coo ketee mĩn, ẽlẽmĩ katĩ eeta vẽlẽk ĩnõõnõ, ĩthõng katĩ ivitia athaanitõ nyĩcẽkẽrĩ cĩk Rũma Ciith cĩ Nyekuco kĩ looc cĩnac vẽlẽk.”
49 Ma natẽ, ikiyyia othoothĩk paadĩrĩ cobbic cĩ athĩ Kaĩvath ĩnõõgõ ethek ne, “Erekcung agiitia thõõth kũdũt.
50 Athii cĩ agayyu niigia woccia ngĩ abũnna ĩcunung katĩ ngĩ adaaĩ eeti codoi dõ, nyatarka eet vẽlẽk, kĩĩ katĩ woccia athii cĩ adĩtĩane eeta cĩgaac vẽlẽk.”
51 Athii balna cĩ aduwa nẽ thõõth coo nẽ dõ, ĩthõng thĩ, aduwa, nyatarka ẽẽn nẽ paadĩr cobbi, ĩthõng aduwa balna nẽ a ne, adaaĩ woccia Yesu, nyatarka looc cĩnĩng.
52 Ĩthõng nẽnnẽ thẽk, athii woccia cĩ adaaĩ Yesu, nyatarka eet cĩk Yudei dõ, ĩthõng thĩ, adaaĩ woccia nẽ, nyatarka eet cĩk Nyekucak cĩk athanothi looc coo vẽlẽk, kĩĩ katĩ kũlũta nẽ ĩnõõgõ vẽlẽk, ĩthõng anyĩk ĩnõõgõ kodoyyie.
53 Balna thẽk kõr nĩcẽ, araktaĩ makayyiowa cĩk Yudei ĩdĩmantek gõõl cĩ katĩ aruwi nẽẽgẽ Yesu.
54 Ĩthõng thĩna, ĩthĩnga Yesu õwõ meelitina, nyatarka thõõth cĩ adiim aruwi makayyiowa cĩk Yudei ĩnõõnõ. Ĩthõng ĩtĩnga nẽ ũũk ĩcĩ kõrõõk cĩ gaalawu cĩ Eviraimi, ĩcĩ õbõwõy kĩ baath cĩ õdõõĩ kak, ĩthõng õõt aavutõ nĩcẽ kĩ wobjiak cĩgĩnĩk.
55 Õbõwẽ balna Kõr cobbi cĩ Ngothio cĩ Yudei. Mẽẽlĩ balna eeta cĩk allũnganniay korookjiowẽy, avvu õvvõ Yeruthalẽma, kõõt kũtũũnyĩtõ eleeti cĩgĩk, ngirana wĩnĩng, kĩĩ katĩ kĩdĩmantothĩk nẽẽgẽ Kõrra cobbi ĩcĩ Ngothio.
56 Ẽrẽppan balna nẽẽgẽ Yesu, ĩthõng ivitia uluttie nẽẽgẽ reerunga cĩ Ciith cĩ Nyekuco ĩcĩtõ, ivitia ijintõy nyaguana mĩn ĩĩtõ ne, “Ahaddu niigia nyia, aku woccia katĩ Yesu Peyiana?”
57 Ĩthõng thĩ, ivitia uduktiak makayyiowa cĩk paadĩrnyawu kĩ Varithei eet ethei ne, “Ma ngĩ ĩcĩn eeti ĩmma Yesu, abũnna woccia thẽk ngĩ aku aduwaai ĩnõõgõ, kĩĩ katĩ kagamit woccia nẽẽgẽ ĩnõõnõ.”