Tũwayyioit cĩ abũnna
10
Õthõõth Yesu athĩ ne, “Kaduwacung na dĩdĩ, eeti cĩ õtõd lũwat katĩ adiim õgõrõth athaa, athii cĩ ẽhẽẽt araana, ẽẽn nẽ goryiait.
2 Eeti cĩ ẽhẽẽt araana, ẽẽn nẽ tũwayyioit cĩ athaa cĩgĩnĩk.
3 Oowi bekcioiti ĩnõõnõ araan, ĩthõng ĩthĩraritõ athaa molook cĩnnĩ. Avvũ nẽ athaa cĩgĩnĩk kẽẽ thaarĩy ĩcĩgĩk, ĩthõng ũũwĩ ĩnõõgõ gewwua.
4 “Uwuantẽcĩ nẽ athaa cĩgĩnĩk õkõyyĩ gewwua, ĩthõng ũtũwa ĩnõõgõ jurrung, ĩthõng owobit ĩnõõnõ athaa, nyatarka athĩrar nẽẽgẽ molook cĩnnĩ.
5 Athii athaa cĩ õwõb et cĩ rẽẽng, avir kẽggẽ thõng, nyatarka athii cĩ aga nẽẽgẽ molook cĩnnĩ.”
6 Aduwaai balna Yesu eet iyiainit coo, ĩthõng thĩ, athii cĩ aga nẽẽgẽ thõõth cĩ õthõõth nẽ ẽẽ.
Ẽẽn Yesu Tũwayyioit cĩ abũnna
7 Ĩthõng thĩna, othoothĩk Yesu ĩnõõgõ naboo ennek ne, “Kaduwacung dĩdĩ, aneeta cĩ keeni araan cĩ athaanu.
8 Ẽẽn balna eeta vẽlẽk, wũk balna avvu ĩcĩ owu ĩcannĩ, ẽẽn nẽẽgẽ goryiak kĩ eet cĩk agama ijjio eet, ĩthõng thĩ, balna athii cĩ athĩrar athaa ĩnõõgõ.
9 Aneeta cĩ keeni araan, ĩthõng eeti ĩmma cĩ aku ĩcannĩ eliay katĩna. Aku katĩna nẽ ĩcĩtõ, ĩthõng ũũk ngatĩvõrĩ kũmũda kartẽ cĩk abũnna.
10 Aku goryiaiti õgõrõth athaa, ĩthõng uruk ĩnõõgõ. Kakuni na, kĩĩ katĩ kaanyĩk ĩnõõgõ rũgẽt cĩ abũnna õrrõt.
11 “Aneeta cĩ keeni tũwayyioit cĩ kabũnna, cĩ kẽlẽmanẽ rũgẽt cannĩ, nyatarka athaa.
12 Eeti cĩ adũmanni kũtũwwa athaa, athii nẽ cĩ ẽẽn tũwayyioit, ĩthõng athii athaa neekie cĩ ẽẽn cĩgĩnĩk. Mĩ acĩn nẽ kudumoc, uungni nẽ athaa, ĩthõng ivira. Ĩthõng ikiyyia athaan kudumocĩ athaa.
13 Avir eeti neccie, nyatarka adũmanni nẽ thõng, ĩthõng athii cĩ arĩcana nẽ athaa.
14 “Aneeta cĩ keeni tũwayyioit cĩ kabũnna. Kagga na athaa cĩganĩk, ĩthõng agayya athaa cĩganniek aneeta.
15 Kagga na Baang kĩcĩ agayya nẽ aneeta, ĩthõng kẽlẽmanẽ na rũgẽt cannĩ, nyatarka athaa cĩganĩk.
16 Nga keyei athaa õõgĩ cĩk athii cĩ aatĩ booratoto ĩcoo, cĩk kadiimi kẽyẽha ĩnõõgõ buu kũrũmek kõdõwẽ, kĩĩ katĩ kĩthĩraritõ nẽẽgẽ molook cannĩ, ĩthõng õdõwẽ tẽẽnyĩ kĩĩ kõdõwẽ tũwayyioiti buu.
17 “Amĩnanna Baangĩ aneeta, nyatarka kẽlẽmanẽ na rũgẽt cannĩ, kĩĩ katĩ kikiyyia kũmũda ĩnõõnõ naboo.
18 Athii eeti cĩ agamana aneeta rũgẽt cannĩ tõ. Kẽlẽmanẽ katĩ na rũgẽt cannĩ thõng! Keyei na tiirthẽt cĩ kẽlẽmanẽ rũgẽt cannĩ, ĩthõng kõbõdaẽ ĩnõõnõ naboo, kĩ balna ngĩ aduwacca Baangĩ.”
19 Ma natẽ, ikiyyia ẽngẽr thõõth coo Yudei naboo.
20 Mẽẽlĩ balna eeta cĩk õthõõth athĩ ne, “Ayak nẽ ririwac cĩ gerthe! Adak ĩnõõnõ ngaamõnĩ! Nyia ĩthĩhĩt niigia ĩnõõnõ wo?”
21 Ĩthõng balna õthõõth eeta gwuak athĩ ne, “Athii eeti cĩ ayak ririwac cĩ gerthe athii cĩ õthõõth ketee. Anyi woccia gõõ ririwacĩ cĩ gerthe et cĩ rubenĩ kĩcĩnẽ?”
Ũtũbũrĩt eeta Yesu
22 Ma balna ĩĩ attiena erkit neccie, aavĩ balna Yesu Yeruthalẽma, Peyiana Cobbi cĩ Ciith cĩ Nyekuco.b
23 Ĩthõng kõr nĩcẽ, balna õwõ Yesu reerunga cĩ Ciith cĩ Nyekuco ĩcĩtõ, Buula cĩ Thõlõmõnẽ.
24 Ma natẽ, ivitia ĩlĩkta ĩnõõnõ Yudei, ĩthõng ijinit entek ne, “Amigẽnẽ thõõth kuumuc kĩĩ tĩngan? Mĩ eeni niia Kiristo, duwaet ageeta thõõth mũrũũr!”
25 Ẽdẽcĩ Yesu ĩnõõgõ ethei ne, “Kuduwawung balna na agiitia thõõth coo vẽlẽk, ĩthõng athii niigia cĩ elemnyu thõõth cannĩ. Thoothiowa cĩk kadĩmani na cĩk anaat eeta thaarĩy ĩcĩk Baangĩ wo ẽyẽla ngĩ ẽẽn ngẽnẽ na,
26 ĩthõng thĩ, athii niigia cĩ elemnyu thõõth cannĩ, nyatarka athii niigia cĩ eeginnu athaa cĩganĩk.
27 Athĩrar athaa cĩganniek molook cannĩ, ĩthõng kagga na ĩnõõgõ, ĩthõng õwõbta nẽẽgẽ aneeta.
28 Kaanyi na ĩnõõgõ rũgẽt cĩ alna kũdũt, ĩthõng athii katĩ nẽẽgẽ cĩ adaaĩ kũdũt. Athii eeti cĩ woccia agamana aneeta ĩnõõgõ athĩnẽy cĩganĩk tõ.
29 Anya aneeta Baangĩ ĩnõõgõ, ĩthõng ijiar nẽ vẽlẽk. Ĩnõõnõ thĩ cĩ athii eeti ĩmma cĩ woccia agama ĩnõõgõ athĩnẽy ĩcĩk Baangĩ tõ.
30 Kodowinia na kĩ Baang.”
31 Ĩthõng naboo natẽ, eberyia makayyiowa cĩk Yudei bĩĩyẽn cĩk adiim õvõccĩ Yesu,
32 ĩthõng thĩ, ẽdẽc Yesu ĩnõõgõ ethei ne, “Kĩdĩmana na thoothonniok cĩk meelĩk cĩk anaat eeta kõrgẽna cunung, cĩk abũnna, cĩk balna aduwacca Baangĩ. Thoothonniowẽy ĩcĩkkõ adiimnyu yoko õvõccangũ thõõtha ĩjang?”
33 Ẽdẽcĩ Yudei athĩ ne, “Athii cĩ kadiimnya naaga kovocci aniitia, nyatarka thõõth cĩ abũnna, kadiimnya naaga kovocci, nyatarka adaacci niia Nyekuc. Eeni niia et kaganoko, cĩ adiimi aari ẽlẽ cunni kĩĩ Nyekuc.”
34 Ẽdẽcĩ Yesu ethei ne, “Athii cĩ eheeddi Ngirana cunung athĩ ne, athĩ Nyekuci ne, ‘Kathĩ na ne, eeginnu niigia nyekucnya’?c
35 Ma ngĩ avvũ Nyekuci ĩnõõgõ a ne, ‘nyekucnya,’ õõ ngẽnẽ cĩk amũda thõõth cĩ Nyekuco, ĩthõng thĩna, athii niigia cĩ ẽpẽkannu thõõth cĩ eheeddi Nyaragawa ĩcĩ Nyekuco.
36 Nyia niigia ĩĩtõ ne, kadaaci na Nyekuc ma kathĩ ne, keeni na Ngẽrtĩ Nyekuco wo? Ẽbẽrana balna Baangĩ aneeta kitican tiic cĩ tiiri, ĩthõng itionana aneeta kikiyyia looca coo.
37 Nyĩ elemnyu thõõth cannĩ, gii ngĩ kadĩmani na thoothonniok cĩk adĩman Baangĩ.
38 Ĩthõng thĩ, ma ngĩ kadĩmani na thoothonniok cĩk anaat eeta, elemit thoothonniok nĩĩko, kõdẽ woyyia athii cĩ ẽlẽmnyangũ aneeta. Ĩthõng agayyu woccia athinnu ne, aavĩ Baangĩ ĩcannĩ, ĩthõng kaavẽ na ĩcĩ Baangĩ.”
39 Ma natẽ, idiimitõ nẽẽgẽ agamit Yesu naboo, ngaatĩ alĩtanẽ nẽ ĩnõõgõ, ĩthõng ũũk gõõla ĩcĩnnĩ.
40 Õkkõ balna nẽ abaakci Lĩĩla cĩ Yordanĩ, ĩthõng ũũk ngatĩ balna anyĩcẽ Yoanẽ Batithta eet batithimo. Aavu nõõnõ nẽ natẽ,
41 ĩthõng mẽẽlĩ balna eeta cĩk avvu kĩ ĩnõõnõ õrrõt, õthõõth nyaguana athĩ ne, “Kõdẽ woyyia balna ngĩ athii Yoanẽ Batithta cĩ adĩman thõõth cĩ anaat eeta, ĩthõng thoothiowa wũk balna õthõõthĩ nẽ et coo vẽlẽk, ẽẽn dĩdĩ.”
42 Ma natẽ, ivitia elemit eeta cĩk meelĩk thõõth cĩ Yesu.