Anyĩk Yesu et cĩ arittiay ruben kĩcĩnẽ
9
Ma balna nga õwõyya Yesu gõõla, ĩcĩn nẽ et ĩmma cĩ rubenĩ ngaatĩ da aritianĩ.
2 Ma natẽ, ijinit wobjiaha cĩgĩnnẽk ĩnõõnõ ethei ne, “Limannioit, nyia da balna kitirriay eeti coo kĩĩ ruben wo? Ẽgẽrẽthan nẽnẽ, kõdẽ yaatĩnnẽ, kõdẽ baatĩnnĩ cĩk arittia ĩnõõnõ?”
3 Ẽdẽcĩ Yesu ĩnõõgõ ennei ne, “Athiitõ, athii cĩ ẽgẽrẽthan eeti coo, kõdẽ yaatĩnnẽ kĩ baatĩnnĩ! Adiim Nyekuci adĩman thõõth cĩ anaat eeta rubẽnthẽta cĩnnĩ wo.
4 Kiticanit naaga thõõth cĩ Nyekuc wũ balna itionana aneeta wo tamanoko, nga kĩĩ baalin, nyatarka athii eeti cĩ aticanni baal tõ.
5 Keeni na lanyĩt cĩ eet cĩk looc coo, nga kaavẽ na loota ngato.”
6 Ma balna mĩ õthõõth Yesu vẽlẽk, ikiyyia ũtũrĩk nẽ amũt looc, ĩthõng õngõnya tõdõwac ammũtẽĩ nĩĩkẽ, ĩthõng upucanek kẽbẽrẽnĩy ĩcĩk et cĩ rubenĩ ẽẽ.
7 Ĩthõng uduwak ĩnõõnõ ennek ne, “Bĩt tũnya niia tõdõwac nĩco mõõra cĩ Thiloami.” Ngaatĩ õkõyyĩ ũũnyanẽ nẽ, ĩthõng ĩcĩnẽ. Mõõrõ cĩ athĩ Thiloami ẽẽ, athĩ ne, itioniay.
8 Ivitia ijintõy eeta cĩk abakanõy kĩ eet cĩk gõõ acĩn ĩnõõnõ ngatĩ ala eet wo, ĩĩtõ ne, “Athii wõnõ cĩ ẽẽn et wũ gõõ rubenĩ wũ ala eet neccio?”
9 Athĩ eeta gwuak ne, “Ĩnõõnõ thẽk!”
Ĩthõng ĩĩtõ gwuak ne, “Athiitõ, athii cĩ ẽẽn ĩnõõnõ, aavĩ nẽnnẽ thẽk kĩ nẽnẽ!”
Ĩthõng thĩ, arki eeti neccie noko, õthõõth athĩ ne, “Aneeta thẽk et nĩcẽ!”
10 Ngaatĩ ajini nẽẽgẽ ĩnõõnõ ẽnnẽcĩ ne, “Ngẽnẽ cĩ anyi aniitia cĩnẽ wo?”
11 Ẽdẽcĩ balna nẽ ĩnõõgõ ennei ne, “Õngõnya eeti cĩ athĩ Yesu tõdõwac, ĩthõng upucanea kẽbẽrẽ cĩganĩk, ĩthõng uduwaha nẽ aneeta kũũk kũtũũnya mõõra cĩ Thiloami. Ngaatĩ kõkõyyẽ kũũnyanẽ, ĩthõng kĩcĩnẽ yoko!”
12 Ma natẽ, ijinit nẽẽgẽ ĩnõõnõ ethei ne, “Aavĩ eeti coo ngatdang?” Ẽdẽcĩ nẽ ethei ne, “Ẽrẽkcanĩ.”
Ijinit Varithei et nĩcẽ
13 Ngaatĩ ayawothĩcẽ eeta neekie et cĩ rubenĩ ẽẽ, Varithei.
14 Õngõnya balna Yesu tõdõwac, ĩthõng aanyĩk et coo kũbũna Kõrra cĩ Yuwuthono.
15 Ĩthõng ijinit Varithei ĩnõõnõ gõõl cĩ acĩnẽnĩ nẽ wo. Ẽdẽcĩ nẽ ĩnõõgõ ethei ne, “Upucanea nẽ tõdõwac kẽbẽrẽnĩy ĩcĩganĩk, ĩthõng kũtũũnya, ĩthõng yoko kĩcĩnẽ nana.”
16 Õthõõth balna Varithei gwuak athĩ ne, “Athii eeti coo, cĩ aku Nyekuca, nyatarka aticanni nẽ Kõrra cĩ Yuwuthono.”a
Ĩthõng thĩ, õthõõth Varithei gwuak athĩ ne, “Atican woccia gẽrẽthannioiti thoothonniok cĩk anaat eeta wo kuu?” Ngaatĩ thĩ balna engerini meelitini cĩ Varithei.
17 Ma natẽ, ijinit nẽẽgẽ et nĩcẽ naboo ethei ne, “Amui niia ĩnõõnõ ngẽnẽ nẽ? Ubuk nẽ kẽbẽrẽ cugunik wo.”
Ẽdẽcĩ eeti neccie ethei ne, “Ẽẽn nẽ et cĩ õthõõth molook cĩ Nyekuco.”
18 Athii balna cĩ ẽlẽmĩ makayyiowa cĩk Yudei ngatĩ ẽnnẽ balna eeti neccie ruben, ma natẽ õõt thĩ utuvvuyyia baatĩnnĩ kĩ yaatĩnnĩ.
19 Ĩthõng ijinit ĩnõõgõ ethei ne, “Doolec cunung coo? Arittiay balna nẽ ẽẽn ruben? Ma da balna ngĩ arittiay nẽ ruben, ikiyyia thĩ da ĩcĩnẽ kuu?”
20 Ẽdẽcĩ baatĩnnẽ kĩ yaatĩnnĩ ethei ne, “Kagayya naaga ngĩ ẽẽn nẽ logoo cĩnang, arittiay balna nẽ ngĩ ẽẽn ruben.
21 Ĩthõng thĩ, athii cĩ kagayya ngĩ aku acĩnẽ nẽ kuu, kõdẽ et cĩ anyi ĩnõõnõ kĩcĩnẽ wo. Ĩĩ nẽ et cĩ ĩĩ maka, anycĩk ĩnõõnõ kuduwawung agiitia.”
22 Õthõõth balna baatĩnnẽ kĩ yaatĩnnĩ ketee, nyatarka ongollie nẽẽgẽ makayyiok cĩk Yudei, cĩk balna aduwaai eet ethei ne, “Mĩ õthõõth eeti ĩmma athĩ ne, ẽẽn Yesu Kiristo, ingkayyi katĩ nẽ Ciitha cĩ Lawintio.”
23 Ĩnõõnõ thĩ cĩ õthõõthĩ nẽẽgẽ athĩnnĩ ne, “Ĩĩ nẽ et cĩ ĩthĩ maka, ijinit niigia ĩnõõnõ.”
24 Ma natẽ, utuvvuyyia makayyiowa cĩk Yudei et nĩcẽ naboo, ĩthõng entek ne, “Buluth Nyekuc, nyatarka kagayyia naaga ngĩ ẽẽn eeti coo gẽrẽthannioit.”
25 Ẽdẽcĩ nẽ ethei ne, “Athii cĩ kagga na mĩ ẽẽn nẽ gẽrẽthannioit, kagga na balna ngĩ keeni ruben ma yoko, kĩcĩnẽ!”
26 Ẽdẽcĩ nẽẽgẽ ethei ne, “Adĩmaneci balna thẽk nẽ aniitia nyia? Anyi balna nẽ aniitia cĩnẽ kuu?”
27 Ẽdẽcĩ nẽ ethei ne, “Ĩcĩnĩt da! Viyyio kuduwawung na thõõth coo vẽlẽk. Nga ketee ĩthĩktangũ? Nyia adiimnyu kuduwawung naboo? Idiimtu niigia buu mĩ eeginnu wobjiak cĩgĩnĩk?”
28 Ma natẽ, adaaccitõ nẽẽgẽ ĩnõõnõ õrrõt ethei ne, “Aniitia cĩ eeni wobjiait cĩnnĩ, keeginna naaga wobjiak cĩk Mutha.
29 Kagayya balna naaga aduwaai Nyekuci Mutha thõõth, ĩthõng thĩ, erekcet ageeta, aku eeti coo ĩjang?”
30 Ẽdẽcĩ eeti neccie ĩnõõgõ ethei ne, “Nyia kerewung aku nẽ nga wo? Anya nẽ aneeta kĩcĩnẽ.
31 Kagayya naaga ngĩ athii Nyekuci cĩ athĩrar eet cĩk ẽẽn gẽrẽthanniok. Ẽdẽcĩ nẽ et cĩ athĩrar ĩnõõnõ, ĩthõng ĩdĩman diimẽnẽt cĩnnĩ.
32 Nga kĩthĩk eeti ĩmma ngatĩ anyĩcẽ eeti et cĩ arittiay ruben kĩcĩnẽ.
33 Mĩ baalia athii eeti coo cĩ aku Nyekuca, athii woyyia cĩ adĩmanĩ gimma.”
34 Ẽdẽcĩ nẽẽgẽ ĩnõõnõ ethei ne, “Arittiay balna niia eeni gẽrẽthannioit, ĩthõng yoko adiimi niia alimannet ageeta!” Ngaatĩ ingkawecĩ nẽẽgẽ ĩnõõnõ tuu.
Ngẽnẽ cĩ rubenĩ thõõtha ĩcĩ Nyekuco
35 Balna ngĩ athĩrar Yesu thõõth cĩ ingkawĩ makayyiowa et nĩcẽ, ikiyyia ũmũda nẽ ĩnõõnõ, ngaatĩ ajini ĩnõõnõ ẽnnẽcĩ ne, “Elemi niia Ngẽrtĩ Eeto?”
36 Ẽdẽcĩ eeti neccie ethei ne, “Makayyioit, duwaha aneeta ngẽnẽ nẽ, kĩĩ katĩ kẽlẽm woccia na ĩnõõnõ.”
37 Ẽdẽcĩ Yesu ethei ne, “Icinu yoko niia ĩnõõnõ, ĩthõng ĩnõõnõ cĩ othoothonu kĩ aniitia wo.”
38 Ẽdẽcĩ eeti neccie ethei ne, “Makayyioit, kelemnyi na aniitia,” ngaatĩ alawĩ nẽ Yesu.
39 Ma natẽ, ĩthĩ Yesu ne, “Kakuni balna na kẽngẽr thoothonniok cĩk eet cĩk looc coo, kĩĩ katĩ kĩcĩntẽ eeta cĩk rubentĩk, ĩthõng eeta cĩk acĩnẽ ĩĩtõ rubẽnẽ.”
40 Ma baa mĩ athĩrar Varithei cĩk abĩlĩ natẽ thõõth coo wo, ivitia ijinit nẽẽgẽ ĩnõõnõ ethei ne, “Athĩ niia ne, keeginna naaga rubẽnẽ?”
41 Ẽdẽcĩ Yesu ethei ne, “Mĩ ĩĩtõ niigia rubẽnẽ, athii woyyia cĩ adĩmannu thõõth cĩ gerthe, ĩthõng thĩ, yoko nyatarka athinnu ne, acĩnenu niigia, athii katĩ cĩ adĩmẽ gerthetini cunung.”