Agamothĩk ngaa kĩ et ĩmma
8
Ĩthõng thĩ, balna ũũk Yesu Thiira cĩ Olivnyawu.a
2 Ma ngerenniet ngaanĩ, õbõda nẽ, ĩthõng ikiyyia ũũk reerunga cĩ Ciith cĩ Nyekuco ĩcĩtõ. Ma natẽ, uluttiay eeta vẽlẽk ivitia kĩ ĩnõõnõ, ngaatĩ aavẽ nẽ loota alimanĩ ĩnõõgõ.
3 Ma natẽ, ẽyẽkta balna Varithei kĩ limanniok cĩk Ngiran cĩ Mutha ngaa ĩmma cĩ agamothi kĩ et ĩmma, ĩthõng ivitia aanycĩk ĩnõõnõ kĩbĩl kõrgẽna cĩ meelitino.
4 Ngaatĩ õthõõthĩcẽ nẽẽgẽ Yesu ẽnnẽcĩ ne, “Limannioit, kagameca naaga ngaa coo, oogin kĩ et ĩmma.
5 Athĩ Ngiranĩ cĩ Mutha ne, kõvõcĩ woccia ngaa cĩ aavĩ ketee kadaak!b Athĩ yoko niia ne?”
6 Ajin balna eeta cĩkkõ Yesu thõõth coo, kedetit ĩnõõnõ, kĩĩ katĩ kõvõlõngtĩ ngatĩ adĩmanĩ nẽ thõõth cĩ gerthe.
Ma natẽ, ululie Yesu, ĩthõng arahaĩ ẽtẽhẽẽd looc attia cĩnnĩ.
7 Ma balna mĩ ajin eeta neekie Yesu noko thõõth cĩ ngaa nĩcẽ ẽẽ. Ĩthõng ĩtĩnga Yesu jiena, ĩthõng othoothĩk ĩnõõgõ ethek ne, “Mĩ aavĩ eeti ĩmma cĩ nga kẽgẽrẽthan thõõth ĩmma kũdũt, anycĩk ĩnõõnõ kẽbẽra bĩĩ, ĩthõng arahaĩ õvõc ngaa nĩco!”
8 Ngaatĩ ullulẽnĩ Yesu, ĩthõng ẽtẽhẽẽd looc naboo.
9 Ma balna mĩ athĩrar nẽẽgẽ thõõth cĩ aduwa Yesu wo, õõt nẽẽgẽ codoi codoi, ẽtẽrẽhanĩ eetĩnẽy ĩcĩk obbitik. Ngaatĩ ũũngnothĩcẽ Yesu kĩ ngaa nĩcẽ dõ.
10 Ma natẽ, ĩtĩnga Yesu jiena, ĩthõng ijin ngaa nĩcẽ ethek ne, “Õõt eeta vẽlẽk ĩjang? Ithii eeti cĩ nga abilni tõ?”
11 Ẽdẽcĩ ngaa neccie ethei ne, “Makayyioit, kothii et.” Ngaatĩ ẽnnẽcĩ Yesu ĩnõõnõ ne, “Athii na buu cĩ kabilni aniitia. Bĩtõ, nyĩ nga õbõdẽcẽ gerthetin nĩcẽ naboo.”
Ẽẽn Yesu lanyĩt cĩ loocu
12 Ngaatĩ õthõõthĩcẽ Yesu eet naboo ẽnnẽcĩ ne, “Aneeta cĩ keeni lanyĩt cĩ eet vẽlẽk loota ngato. Eeti cĩ õwõbja aneeta, athii katĩ nẽ cĩ õwõ muwuratõ, ĩthõng thĩ, amũda katĩ lanyĩt cĩ rũgẽtõ.”
13 Ũtũbũrĩt Varithei thõõth cĩnnĩ, ĩthõng entek ne, “Othoothi nidio thõõth cĩ ẽlẽ cunni dõ. Ĩthõng thõõth cĩ õthõõthĩ niia wo, athii cĩ ẽẽn dĩdĩ.”
14 Ẽdẽcĩ Yesu ethei ne, “Kõdẽ woyyia ma kothoothi thõõth cĩ ẽlẽ cannĩ mĩn, athii cĩ kaduwanẽ võlõng! Nyatarka kagga na ngĩtĩ balna kakunie, ĩthõng kagawa gõõl cĩ kõkõyyẽ. Athii cĩ agayyu niigia ngĩtĩ kakunie, kõdẽ ngĩtĩ kõkõyyẽ nana.
15 Engeryu niigia thoothonniok kĩ eeta cĩk loocu, ĩthõng athii cĩ kengeri na thõõth cĩ et ĩmma.
16 Ĩthõng thĩ, mĩ kẽngẽra na thõõth cĩ eeto, kengeri jurrung, nyatarka athii cĩ kengeri mĩn. Karũmẽna kĩ Baang wũ balna itionana aneeta.
17 Adiim Ngiranĩ cunung eet cĩk ẽẽn kẽbẽrẽ ramma, kĩĩ katĩ kagawẽ athĩ ne, ẽẽn thõõth cĩnĩng dĩdĩ.
18 Keeni na keberec cĩ ẽlẽ cannĩ, ĩthõng ĩthĩ Baangĩ wũ balna itionana aneeta, ẽẽn keberec ĩmma.”
19 Ẽdẽcĩ nẽẽgẽ ĩnõõnõ ethei ne, “Aavĩ Baaba cunnie ĩjang?” Ẽdẽcĩ Yesu ĩnõõgõ ethei ne, “Athii cĩ agayyangũ niigia aneeta, kõdẽ Baang cannĩ. Mĩ agayyangũ, agayyu woyyia Baang cannĩ buu.”
20 Õthõõth balna Yesu thoothonniok cĩkkõ, balna ngĩ aliman nẽ eet ngatĩ õbõwõy kĩ ngĩtĩ iyangĩ eeta nyarobinya reerunga cĩ Ciith cĩ Nyekuco ĩcĩtõ. Athii balna eeti cĩ agam ĩnõõnõ tõ, nyatarka balna nga kõdõlan itini cĩnnẽ.
Athii niigia cĩ ovvoyyu ngatĩ kõkõyyẽ nana
21 Ma natẽ, ikiyyia othoothĩk Yesu Varithei naboo ethek ne, “Kũwa nana, ĩthõng ẽrẽppannangũ katĩ kuumuc, ĩthõng adaaktu nga ayakcu thoothonniok cĩk gerthek cuguk buu. Athii niigia cĩ avvunnu ĩcĩ kõkõyyẽ na ẽẽ.”
22 Ma natẽ, ijintõy makayyiowa cĩk Yudei mĩn ĩĩtõ ne, “Aruk katĩ nẽ ẽlẽ cĩnnĩ thõng? Nyia kĩthĩ nẽ ne, ‘Athii woccia cĩ avvunnu ĩcĩ kõkõyyẽ na wo’?”
23 Ĩthõng thĩ, ẽdẽcĩ Yesu ĩnõõgõ ethei ne, “Eeginnu niigia eet cĩk ngittio, ĩthõng keeni na et cĩ tammutiddino. Eeginnu niigia eet cĩk looc coo, athii na cĩ keeni cĩ looc coo.
24 Ĩnõõnõ thĩ cĩ kethecung balna na agiitia ne, adaaknu katĩ nga ayakcu thoothonniok cĩk gerthek cuguk koo. Mĩ athii cĩ ẽlẽmnyangũ aneeta, adaaknu katĩ gerthetina cunung.”
25 Ẽdẽcĩ kẽnnẽ nẽẽgẽ Yesu ethei ne, “Ngẽnẽ niia?”
Ẽdẽcĩ Yesu ĩnõõgõ ethei ne, “Aneeta et wũ balna kethecung ĩcĩ owu ne, ngẽnẽ na.
26 Mẽẽlĩ thoothonniowa cuguk cĩk woyyia kothoothi na cĩk ketedicung na agiitia. Ĩthõng thĩ, eeti cĩ itionana aneeta wo, ẽẽn thõõth cĩnnẽ dĩdĩ, ĩthõng kaduwai eet cĩk looc coo thõõth dõ, cĩ kathihi ĩcĩnnĩ.”
27 Athii balna nẽẽgẽ cĩ aga ngatĩ õthõõth nẽ Baatĩnnĩ.
28 Ĩthõng balna nga õthõõth Yesu noko athĩ ne, “Mĩ otoddoyyieangu niigia aneeta Ngẽrtĩ Eeto kurucea, ivitiawu thĩ katĩ agayyiangũ, ngẽnẽ nana. Ĩthõng naboo agayyu katĩ niigia gii wũ kothoothi na ẽlẽ cannĩ ẽẽn dĩdĩ. Athii cĩ kadĩmani na thõõth ĩmma mĩn na dõ. Ĩthõng thĩ, kaduwa na thõõth cĩ alimanecca Baangĩ aneeta.
29 Karũmẽna na kĩ Et wũ balna itionana aneeta kõdõwẽ, ĩthõng athii cĩ ũũngnĩca nẽ aneeta kaavu nyiangũ, nyatarka dõõkĩthĩ kadĩmani na thõõth cĩ ẽbẽlbẽlĩ nẽnẽ.”
30 Ma balna nga õthõõth nẽ, ivitia elemit eeta cĩk meelĩk ĩnõõnõ.
Dõõlĩ cĩk Abrahamĩ
31 Othoothĩk balna Yesu Yudei cĩk ẽlẽmĩ ĩnõõnõ ethei ne, “Mĩ athunnu niigia thõõth cĩ kaduwacung na wo, eeginnu katĩ niigia wobjiak cĩganĩk dĩdĩ.
32 Avvunnu katĩ agayyu thõõth cĩ ẽẽn dĩdĩ, ĩthõng katĩ õõganung agiitia thõõth cĩ ẽẽn dĩdĩ wo.”
33 Ẽdẽcĩ eeta Yesu ethei ne, “Keeginna naaga dõõlĩ cĩk Abrahamĩ,c ĩthõng nga kiittia nyakapanak cĩk eetu kũdũt, nyia ethehet ne, ‘Koogiana katĩ wo’?”
34 Ẽdẽcĩ Yesu ĩnõõgõ ethei ne, “Kaduwacung dĩdĩ, eeti ĩmma cĩ adĩman thoothonniok cĩk gerthek, ẽẽn nẽ nyakapanait cĩ gerthetino.
35 Athii eeti cĩ ẽẽn nyakapanait cĩ aavĩ õlõõ dõõkĩthĩ, ĩthõng thĩ, doolec cĩ olu, cĩ aavĩ õlõõtõtõ kũdũt.
36 Mĩ kõõgawung na Ngẽrtĩ Eeto thoothiowẽy ĩcĩk gerthek ĩcuguk, ĩthĩnga katĩ athii cĩ eeginnu niigia nyakapanak cĩk gerthetino kũdũt!
37 Kagga na eeginnu niigia dõõlĩ cĩk dõõlĩ cĩk Abrahamĩ, ĩthõng adiimnyu kẽnnẽ arukcangũ thõng, nyatarka athii thõõth cannie cĩ iithio thinneti cuguk.
38 Kaduwacung na thõõth cĩ kĩcĩna na balna ngĩ karũmẽna kĩ Baang cannĩ, kĩ cĩ thẽk adĩmannu niigia buu thoothonniok cĩk balna aduwaccung agiitia baaba cunung.”
39 Ẽdẽcĩ nẽẽgẽ ĩnõõnõ ethei ne, “Ẽẽn Abrahamĩ baang cĩnang!” Ẽdẽcĩ Yesu ĩnõõgõ ethei ne, “Mĩ ĩĩtõ niigia dõõlĩ cĩk Abrahamĩ, adĩmannu yoko woyyia thoothonniok cĩk abũnna wũk balna ĩdĩman Abrahamĩ.
40 Adiimnyu kẽnnẽ arukcangũ, nyatarka kaduwacung na thõõth cĩ ẽẽn dĩdĩ, wũ balna kĩthĩha na ĩcĩ Nyekuco. Nga kitican Abrahamĩ thoothonniok cĩk aatĩ noko.
41 Owobju niigia thõõth cĩ atican baaba cunung.”
Ẽdẽcĩ eeta ethei ne, “Nyekuc dõ cĩ ẽẽn Baangiet cĩnang, ĩthõng keeginna naaga dõõlĩ cĩgĩnĩk dĩdĩ, ĩthõng athii cĩ karittiana ngatĩvõrĩ.”
Ẽẽn baaba Thĩttan cunung
42 Ẽdẽcĩ Yesu ĩnõõgõ ethei ne, “Ma kĩĩ Nyekuci Baaba cunung dĩdĩ, amĩnannangũ woyyia niigia aneeta, nyatarka kakuni na kĩ ĩnõõnõ. Athii balna cĩ kakuni na mĩn, ĩnõõnõ balna cĩ itionana aneeta.
43 Athii cĩ agayyu niigia thõõth cĩ kaduwacung na wo nyia? Nyatarka athii niigia cĩ elemnyu thõõth cĩ kaduwacung nana!
44 Ẽẽn Baaba cunung alaan cĩ ririwanĩn cĩk gerthek,d ĩthõng adĩmannu niigia thoothonniok cĩk adiim nẽnẽ. Aavĩ balna nẽ kuumuc, ẽẽn et cĩ aruk eet kũdũt kaganoko. Ĩthõng uduwawung võlõng, nyatarka ẽẽn nẽ volongnyiait, ĩthõng ẽẽn baatĩ volongo.
45 Athii niigia cĩ ẽlẽmnyangũ aneeta, nyatarka kaduwacung na agiitia thõõth cĩ ẽẽn dĩdĩ!
46 Ngẽnẽ cĩ woccia abilnia aneeta etheca ne, kẽgẽrẽthana na thõõth ĩmma? Ma naboo kaduwacung na thõõth cĩ ẽẽn dĩdĩ wo, athii cĩ ẽlẽmnyangũ nyia?
47 Eeti cĩ ẽẽn doolec cĩ Nyekuco, athĩrar thõõth cĩ Nyekuco. Ĩthõng aburnu niigia thõõth cĩnnĩ, nyatarka athii cĩ eeginnu niigia dõõlĩ cĩgĩnĩk.”
Yesu kĩ Abraham
48 Ma natẽ, edecit Yudei Yesu ethei ne, “Mũrra thõõth cĩnang ngatĩ kathĩnna ne, akuni niia looca cĩ Thamaria, ĩthõng eyei niia ririwac cĩ gerthe!”
49 Ẽdẽcĩ Yesu ethei ne, “Athiitõ, athii na cĩ keyei ririwac cĩ gerthe, kongollie na Baang cannĩ, ĩthõng aburnu niigia ngatĩ ongolinangũ aneeta.
50 Athii cĩ kabuluthi na ẽlẽ cannĩ, aavĩ Eeti cĩ adiimnya aneeta kubulie, ĩthõng ĩnõõnõ cĩ ẽngẽr thoothonniok vẽlẽk.
51 Kaduwacung dĩdĩ, eeti cĩ athũnnĩ liman cannĩ, athii cĩ adaaĩ kũdũt!”
52 Ẽdẽcĩ Yudei ethei ne, “Kagayyi yoko, ngatĩ ayahĩ niia ririwac cĩ gerthe dĩdĩ! Adaaitõ Abrahamĩ kĩ eet cĩk õthõõth molook cĩ Nyekuco, athĩ kẽnnẽ niia ne, ma ngĩ athĩrar eeti liman cunni, athii cĩ adaaĩ kũdũt.
53 Ijiari niia baang cĩnang Abraham, wũ balna adaak vẽlẽk? Ijiari niia eet cĩk õthõõth molook cĩ Nyekuco wũk balna adaaitõ? Ngẽnẽ yoko thẽk niia kir?”
54 Ẽdẽcĩ Yesu ethei ne, “Mĩ kabuluthi na ẽlẽ cannĩ mĩn ẽẽn bulẽnĩtĩ cannie wo, gii cĩ kaganoko. Baangĩ cannie cĩ athinnu ne, ẽẽn nẽ Nyekuc cunung wo, cĩ abulutha aneeta.
55 Ĩthõng thĩ, naboo athii cĩ agayyu ĩnõõnõ buu. Kagga na ĩnõõnõ. Ma ngĩ kathĩ na ne, athii na cĩ kagawẽ ĩnõõnõ, keeni woccia volongnyiait kĩ niigia, ĩthõng thĩ, kagga na ĩnõõnõ, ĩthõng kĩthĩrara thõõth cĩnnĩ.
56 Ẽbẽlbẽl balna baaba cunung Abrahamĩ, ngatĩ woccia acĩnĩ nẽ kõr cĩ kakunie na loota ngato. Ĩcĩn balna nẽ kõr cannĩ, ĩthõng ẽbẽlbẽla.”
57 Ẽdẽcĩ Yudei ĩnõõnõ ethei ne, “Nga kĩĩtõ erkinya cugunniek eet ramma kõmmõtõ buu, ĩthõng ĩthĩ niia ne, icinu balna Abraham!”