Athii gõtõõnõgĩ Yesu cĩ ẽlẽmĩ ĩnõõnõ
7
Ma vurtia cĩ, ikiyyia aavue nõ Yesu looca cĩ Galilea. Athii balna nẽ cĩ adiim ngĩ õkkõ looca cĩ Yudea, nyatarka balna adiim makayyiowa cĩk Yudei ngĩ aruk ĩnõõnõ.
2 Õbõwẽ balna Peyianĩ cĩ Tuggwetu cĩ Yudei.a
3 Ma natẽ, ivitia othooththik gõtõõnõgĩ Yesu ĩnõõnõ entek ne, “Tũngek ngittio bĩt ĩcĩ looc cĩ Yudea, kĩĩ katĩ kõõt koccia kĩcĩnĩt wobjiaha cugunniek thoothonniok cĩk anaat eeta cĩk adĩmani niia.
4 Athii woccia cĩ agayyie eeti ĩmma meelitina ĩcĩ eetu katĩ mĩ alugunyi nẽ. Yelek eet cĩk loocak vẽlẽk thoothonniok cĩk adĩmani niia cĩk anaat eeta wo!”
5 Nga balna kelemit gotoonogua cĩgĩnnẽk wo, thõõth cĩnnĩ.
6 Ĩthõng thĩna, ẽdẽc Yesu ĩnõõgõ ennei ne, “Nga kũtũbanẽ itini cĩ kõkõyyẽ nana, ovvoyyu woccia niigia itina cĩ ũtũbanẽ.
7 Athii eeta cĩk looc coo cĩ aaburneccung agiitia, aaburnecca nẽẽgẽ aneeta, nyatarka kẽdẽmĩcẽ na ĩnõõgõ thoothonniok cĩk gerthek cĩk atican nẽẽgẽ.
8 Õõt nẽnnẽ niigia Peyiana, athii na cĩ kõkkõ, nyatarka nga kũtũbanẽ itini cannie.”
9 Ma balna ngĩ uduwa Yesu thõõth coo, ikiyyia aavu nõ nẽ Galilea.
Aliman Yesu eet Peyiana Ciitha cĩ Nyekuco
10 Ma balna vurtia, ĩtĩngathõ gõtõõnõgĩ Yesu õõt Peyiana, ikiyyia ĩnĩk nẽ buu õwõb ĩnõõgõ, ĩthõng thĩ, athii cĩ adiim eet kĩcĩnĩt ĩnõõnõ.
11 Ivitia makayyiowa cĩk Yudei ẽrẽppanit Yesu Peyiana, ĩthõng ijintõy ĩĩtõ ne, “Aavĩ nẽ nga?”
12 Ẽpẽkanõnĩ balna eeta cĩk meelĩk Yesu meelitina, õthõõth gwuak athĩ ne, “Ẽẽn nẽ et cĩ abũnna.”
Athĩ gwuak ne, “Ĩgõõl nẽ eeta.”
13 Ongollie balna eeta makayyiok cĩgĩk ngatĩ õthõõthĩ thõõth cĩ Yesu.
14 Ma balna ngĩ arawak Peyianĩ kõrgẽn, ĩtĩnga Yesu ũũk reerunga cĩ Ciith cĩ Nyekuco ĩcĩtõ, ĩthõng ũũk iliman eeta.
15 Atubuanni balna makayyiowa cĩk Yudei, ngatĩ acĩnĩ ĩnõõnõ ngĩ ẽgẽẽnyĩ õrrõt, ĩthõng athĩ ne, “Nga eeti coo kilimanẽ buu, agaai nẽ thõõth õrrõt nyia?”
16 Ẽdẽcĩ balna Yesu ĩnõõgõ ennei ne, “Athii limanĩ cannie cĩ ẽẽn cannĩ dõ, kalimanei na ĩnõõgõ thõõth cĩ Et wũ balna itionana aneeta.
17 Ma ngĩ adĩman eeti ĩmma diimẽnẽt cĩ adiim Nyekuci, aga katĩ mĩ aku thõõth cĩ kalimanei na eet wo kĩ Nyekuc, kõdẽ aku õõwa cannĩ mĩn.
18 Eeti cĩ õthõõth ẽlẽ cĩnnĩ, adiim nẽ eet kĩdĩhĩthĩt ĩnõõnõ, ĩthõng thĩ, eeti cĩ adiim dĩhĩthẽnĩt ĩcĩ et cĩ itiona ĩnõõnõ ẽẽ, ẽẽn nẽ et cĩ adĩman thoothonniok cĩk edeemothi, ĩthõng athii cĩ ẽẽn volongnyiait.
19 Nga wõnõ kaanyung agiitia Mutha Ngiran cĩ Nyekuco? Kothii kẽnnẽ et codoi ĩcunung cĩ athĩrar, ĩthõng uthuutti Ngiran cĩ Nyekuco wo. Adiimnyu niigia ngĩ arukcangũ aneeta nyia?”
20 Ẽdẽcĩ meelitini Yesu ennei ne, “Eyei niia ririwac cĩ gerthe.b Adakci aniitia ngaamõnĩ, ngẽnẽ cĩ adiim arukci aniitia wo?”
21 Ẽdẽcĩ Yesu athĩ ne, “Kĩdĩmana balna na thõõth codoi cĩ anaat eeta,c ĩthõng atubuaninu kẽnnẽ niigia vẽlẽk.d
22 Aduwaccung balna Mutha athĩ ne, anycĩk lõgõõ cuguk kũbũũrantẽe athii balna cĩ ẽẽn Mutha cĩ aduwaccung wo, õõ baatĩ, baatĩ, baaba wũk balna aduwaccung, kĩĩ katĩ etedit niigia lõgõõ cuguk Kõrra ĩcĩ Yuwuthono.
23 Ma ngĩ ũbũũranẽ doolec Kõrra cĩ Yuwuthono, kĩĩ katĩ athii cĩ ẽgẽrẽthanini Ngiranĩ cĩ Mutha, nyia avaracit niigia ngatĩ kaanyĩcẽ na et kũbũna Kõrra cĩ Yuwuthono wo?
24 Nyĩ etedicu niigia eet thõõth kĩ eeti colli kaganoko, eteddik eet thõõth gõõla ĩcĩ edeemothi.”
Ẽẽn Yesu Kiristo?
25 Õthõõth balna eeta gwuak cĩk aatĩ Yeruthalẽma athĩ ne, “Athii wõnõ cĩ ẽẽn et cĩ adiim aruk nẽẽgẽ wo coo?
26 Ĩcĩnĩt da! Irion nẽ meelitina ĩcĩ eetu, ĩthõng athii nẽẽgẽ cĩ õthõõth ĩnõõnõ buth. Ahad woccia makayyiowa athĩ ne, ẽẽn nẽ Kiristo dĩdĩ?
27 Ĩthõng thĩ, ma naboo kagga naaga kõrõõk cĩ akuni nẽ wo. Mĩ ikiyyia Kiristo, aliba katĩ nẽ, ĩthõng athii eeti ĩmma cĩ katĩ aga ngĩtĩ akuni nẽ tõ.”
28 Ma balna nga aliman Yesu eet reerunga cĩ Ciith cĩ Nyekuco ĩcĩtõ, ikiyyia othoothĩk nẽ ĩnõõgõ õrrõt ennek ne, “Agayyangũ thẽk niigia aneeta, ĩthõng kakuni na ĩjang? Athii balna cĩ kakunie na mĩn. Itionana aneeta Eeti cĩ ẽẽn dĩdĩ cĩ athii cĩ agayyu niigia,
29 ĩthõng thĩ, kagga na ĩnõõnõ, nyatarka kakuni na ĩcĩnnĩ, ĩthõng itionana nẽ aneeta.”
30 Ma natẽ, idiimitõ nẽẽgẽ agamit ĩnõõnõ, kothii kẽnnẽ et cĩ aari ĩnõõnõ athiit, nyatarka balna nga kũtũbanẽ itini cĩnnẽ.
31 Mẽẽlĩ balna eeta cĩk ẽlẽmĩ ĩnõõnõ meelitina, ĩthõng athĩ ne, “Ma ngĩ ikiyyia Kiristo, adĩman nẽ woccia katĩ thoothonniok cĩk anaat eeta cĩk meelĩk cĩk ijiar cĩk adĩman eeti coo?”
Itionitõ makayyiowa nyĩcẽkẽr kõõt kagamit Yesu
32 Ma balna mĩ athĩrar Varithei eet cĩk amumut meelitina, nyatarka Yesu wo, ivitia uluttie nẽẽgẽ kĩ makayyiok cĩk paadĩrnyawu, ĩthõng itionitõ nyĩcẽkẽr cĩk ẽbẽk Ciith cĩ Nyekuco, kõõt kagamit ĩnõõnõ.
33 Ĩthõng othoothĩk Yesu ĩnõõgõ ennek ne, “Nga nõ na karũmẽ kĩ agiitia kĩdĩĩc, ĩthõng kamiire katĩ na kõkkõ Eta wũ balna itionana aneeta.
34 Ẽrẽppannangũ katĩ aneeta, ĩthõng thĩ, athii cĩ amũdanangũ, ĩthõng athii niigia cĩ ovvoyyu ngatĩ kõkõyyẽ na ẽẽ.”
35 Ma natẽ, ivitia ijintõy makayyiowa cĩk Yudei nẽgẽdõ ĩĩtõ ne, “Õkkõ katĩ nẽ ĩjang, katamacet nẽ ageeta katĩ ngatĩ kijiowanĩ ĩnõõnõ wo? Õkkõ woccia katĩ looca cĩ Girihi, ĩthõng iliman ĩnõõgõ?
36 Nyia cĩ athĩ nẽ ne, ‘Ẽrẽppannangũ katĩ aneeta, ĩthõng thĩ, athii cĩ amũdanangũ’ ĩthõng ‘Athii niigia cĩ ovvoyyu ngatĩ kõkõyyẽ na ẽẽ’?”
Maam cĩk anyet rũgẽt
37 Ma katĩ turnanta cĩ kõr cobbi cĩ Peyiano, ĩtĩnga Yesu, ĩthõng õthõõth õrrõt ĩthĩ ne, “Mĩ aruk et ĩmma kõr, anycĩk ĩnõõnõ kikiyyia ĩcannĩ kũwũdẽ.
38 Eeti ĩmma cĩ ẽlẽmĩ thõõth cannĩ, anycĩk ĩnõõnõ kikiyyia kũwũdẽ ĩcannĩ, nyatarka aduwa Nyaraga cĩ Nyekuco athĩ ne, ariha katĩ lilliowa cĩk meelĩk cĩk ayak maam cĩk rũgẽtak ẽla cĩnnĩ.”
39 Õthõõth balna Yesu thõõth cĩ Ririwac cĩ Dĩhĩmĩ, cĩ anyĩwothi eet vẽlẽk cĩk ẽlẽmĩ ĩnõõnõ. Nga balna kaanyĩwothĩk Ririwacĩ cĩ Dĩhĩmĩ et ĩmma, nyatarka balna nga kaanyĩwothĩk Yesu bulẽnĩtĩ cĩnnẽ.
Engeryiõy eeta, nyatarka Yesu
40 Ma balna mĩ athĩrar meelitini thõõth cĩ õthõõth Yesu ketee wo, ivitia othoothitõ gwuak athĩ ne, “Ẽẽn eeti coo et cĩ õthõõth molook cĩ Nyekuco.”
41 Õthõõth eeta gwuak athĩ ne, “Ẽẽn nẽ Kiristo!”
Ĩthõng õthõõth gwuak naboo athĩ ne, “Aku woccia thẽk Kiristo looca cĩ Galilea?
42 Aduwa Nyaraga cĩ Nyekuco athĩ ne, arittiay katĩ Kiristo tatũga cĩ õõ alaan Davide,f ĩthõng arittiay katĩ nẽ Bẽtẽlẽhẽma õlõõ cĩ abaaĩ Davide?”g
43 Ivitia engeryiõy eeta, nyatarka ẽpẽkanõnĩ nẽẽgẽ thõõth cĩ Yesu.
44 Adiim eeta gwuak agam ĩnõõnõ, kothii kẽnnẽ et cĩ awumei athiit ĩnõõnõ.
Abũrĩ makayyiowa cĩk Yudei ngatĩ ẽlẽmĩ Yesu
45 Ma balna ngĩ imiiryie nyĩcẽkẽrĩ cĩk Ciith cĩ Nyekuco, õõt ijinit ĩnõõgõ makayyiok cĩk paadĩrnyawu kĩ eet cĩk Varithei entek ne, “Athii niigia cĩ ẽyẽhanu ĩnõõnõ ngato nyia?”
46 Ẽdẽcĩ nyĩcẽkẽrĩ ennei ne, “Cĩ gõõ nga kĩthĩkta et cĩ õthõõth noko!”
47 Ẽdẽcĩ Varithei ĩnõõgõ ennei ne, “Ĩgoollung nẽ agiitia buu?
48 Aavĩ yoko woccia eeti ĩmma kõrgẽna ĩcĩ makayyiowu, kõdẽ ĩcĩ Varithei cĩ ẽlẽmĩ thõõth cĩ et nĩcẽ?
49 Athii tõ! Ĩthõng thĩ, meelitini coo cĩ, athii cĩ aga Ngiran cĩ Mutha wo, anycĩk Nyekuc kĩcĩĩn ĩnõõgõ!”
50 Aavĩ balna Nikodemothĩ natẽ tõ cĩ ẽẽn nẽ makayyioit ĩmma makayyiõĩ, cĩ balna õkkõ ĩcĩ Yesu. Ĩthõng ethek ĩnõõgõ ne,
51 “Ẽlẽmĩ Ngiranĩ cĩnac ngĩ ẽngẽr thõõth cĩ et ĩmma, gii ma ngĩ kĩthĩraritõ naaga thõõth cĩ ĩdĩman balna nẽ?”
52 Ẽdẽcĩ nẽẽgẽ Nikodemoth ethei ne, “Akuni niia looca cĩ Galilea? Bẽl Nyaraga cĩ Nyekuco, ĩthõng amũda katĩ niia ngĩ athii eeti cĩ ẽẽn molook cĩ Nyekuco cĩ aku looca cĩ Galilea tõ.”
53 Ma natẽ, ivitia athaantẽ eeta vẽlẽk õõt korookjiowẽy ĩcĩgĩk.