Itiling Yesu eet vucciaknya tur (5,000)
(Bẽl Matewo 14:13-21; Marĩkõ 6:30-44; Luka 9:10-17)
6
Ma balna vurtia cĩ ikiyyia abaawõĩ Yesu Bũlũc cĩ Galilea, cĩ athĩ thar õõgĩ Bũlũc cĩ Tiberia,
2 ivitia balna owobit eeta cĩk meelĩk õrrõt Yesu gõõla cĩ õkõyyĩ nẽnẽ, nyatarka ĩcĩnĩt nẽẽgẽ thoothonniok cĩk anaat eeta cĩk adĩman Yesu, cĩk anyĩcẽ nẽ eet cĩk ĩmmõrĩ kũbũnta.
3 Ĩthõng otodit balna Yesu kĩ wobjiak cĩgĩnĩk thiir, ĩthõng õõt aavutõ loota.
4 Ĩthĩ õjõõn balna Kõr cobbi cĩ Ngothio cĩ Yudei.
5 Ma balna ngĩ acĩn Yesu avvu eeta tõõna ĩcĩ aavẽ nẽnẽ, ijin nẽ wobjiait cĩnnĩ Pilipo ennek ne, “Kadĩma woccia katĩ naaga dainit cĩ kaanyi meelitin cĩ ẽẽn noko vẽlẽk wo nga?”
6 Ajinie balna Yesu athĩ ne, kĩtĩman Pilipo thõng, nyatarka balna aga nẽ gii cĩ katĩ õkkõ adĩman nẽnẽ.
7 Ẽdẽcĩ Pilipo ĩnõõnõ ennei ne, “Athii woccia cĩ ẽtẽmanõy nyarobinya cĩk ẽẽn thĩĩka cĩk ẽẽn eet õmmõtõ (200) cĩk meelĩk õrrõt cĩ kũtanẽ dainit cĩ awũpan ĩnõõgõ vẽlẽk.”
8 Ma natẽ, ẽdẽc wobjiaiti cĩnnẽ Anderiya gõtõnĩ Thimõnẽ Pẽtũrũ ĩĩ ne,
9 “Aavĩ logoo cĩ maacĩ ĩmma cĩ dĩcĩ ngato, cĩ ayak aheenin cĩk avaaddi cĩk ẽẽn tur kĩ kulugua ramma, athii katĩ cĩ ẽlẽnõy dainti coo kĩ eet nĩĩko vẽlẽk.”
10 Ma natẽ, othoothĩk Yesu wobjiak cĩgĩnĩk ethek ne, “Uduktiak niigia eet kaavutõ loota.” Ẽẽn balna lõõcĩ natẽ kartienit. Ngaatĩ avvu aatẽ eeta vẽlẽk kartienta loota, ẽẽn balna eeta cĩk maacĩk dõ, vucciaknya tur (5,000).
11 Ĩthõng ikiyyia ĩdĩma Yesu aheenin cĩk avaaddi nĩĩkẽ, ĩthõng ennek Nyekuc ne, ibalallẽ, ĩthõng ikiyyia alawõõĩ kulugua buu, ĩthõng aanyĩk wobjiak cĩgĩnĩk kengeryiek eet cĩk aatĩ loota wo dainit, ĩthõng uduktõy eeta vẽlẽk kẽlẽntõy.
12 Ma balna vurtia ĩcĩ uduktõõĩ eeta kĩccacõ vẽlẽk, ikiyyia uduwak Yesu wobjiak cĩgĩnĩk ennek ne, “Uluttia lõtaabũr cĩk anyigiay, nyĩ atdukeecu ĩmma tuu.”
13 Ma balna ngĩ ulluttia nẽẽgẽ lõtaabũr cĩk ahat cĩ anyigia eeta vẽlẽk, avvu kẽnnẽ abbĩththĩ dongokua õmmõtõ kĩ ramma.
14 Ma baa ngĩ acĩn eeta thõõth cĩ anaat eeta cĩ adĩman Yesu wo, ivitia ĩĩtõ nẽẽgẽ ne, “Dĩdĩ ẽẽn eeti coo et cĩ õthõõth molook cĩ Nyekuco,b cĩ katĩ aku loota ngato!”
15 Ma balna ngĩ aku amũda Yesu ngatĩ adiim agamĩ eeta ĩnõõnõ, ĩthõng aryik ĩnõõnõ kĩĩ alaan cĩnĩng wo, ikiyyia ithii nẽ meelitina, ĩthõng ũũk aavu mĩn thiira tiddina.
Õtõ Yesu maamĩy tiddina
(Bẽl Matewo 14:22-27; Marĩkõ 6:45-52)
16 Ma kõr nĩcẽ jiat, ivitia õõt wobjiaha cĩk Yesu ĩcĩ Bũlũc cĩ Galilea,
17 ngaatĩ õtõdĩ nẽẽgẽ kovowol cĩ abaainie bũlũc õvõyyĩ ĩcĩ kõrõõk cĩ gaalawu cĩ Kaparnaumi. Ĩĩ balna baalin, ĩthõng nga kõdõlan Yesu ĩnõõgõ.
18 Ma balna nga aatĩ nẽẽgẽ bũlũcatõ, ilibak ĩnõõgõ ngõõtĩ cĩ tiiri cĩ anyi maam kĩĩ mugẽn õrrõt kũdũt.
19 Ma balna ngĩ õõt nẽẽgẽ gõõla ĩcĩ ẽẽn reenitin cĩ ẽẽn maĩlnya iyyio kĩ kõrgẽn,c ivitia ĩcĩnĩt nẽẽgẽ Yesu maamĩy tiddina. Õwõyya nẽ aku joonui kovowola, ĩthõng ivitia alanglangit nẽẽgẽ õrrõt.
20 Ikiyyia othoothĩk Yesu ĩnõõgõ ennek ne, “Aneeta Yesu, nyĩ ongolinu”
21 Adiim balna wobjiaha cĩgĩnnẽk ngĩ anyi ĩnõõnõ kikiyyia kovowola, ĩthõng arawothi kẽnnẽ kovowolĩ titim cĩ bũlũco, cĩ õvõyyĩ nẽẽgẽ wo tamanoko.
22 Ma ngerethietĩn cĩnnĩ, ivitia eeta wũk balna aatĩ titimma cĩ bũlũco ĩcĩnĩt ngatĩ aavĩ balna kovowolĩ codoi doo, ĩthõng ivitia agaacõ nẽẽgẽ buu ngĩ athĩ ne, nga kõtõd Yesu kovowol kĩ wobjiak cĩgĩnĩk, ogoogo õõt wobjiaha mĩn.
23 Avvu balna kõvõwõlẽta gwuak ĩcĩ kõrõõk cĩ gaalawu cĩ Tiberia, kivitia kõdõlanit ngĩtĩ õjõõn kĩ ngĩtĩ balna agatanĩ Makayyioiti Yesu ahat cĩ avaadiay, ĩthõng uduktõy eeta.
24 Ma balna mĩ amũda meelitini cĩ eetu Yesu kĩ wobjiak cĩgĩnĩk ithiicõ wo, ivitia otodit nẽẽgẽ kõvõwõlẽta, ĩthõng abaaktẽ õõt ĩcĩ Kaparnaumi, õvvõ ẽrẽppan Yesu.
Ẽẽn Yesu ahat cĩ avaadiay cĩ ẽẽn rũgẽt.
25 Ma balna ngĩ õvvõ amũda nẽẽgẽ Yesu wo, ivitia ijinit ĩnõõnõ entek ne, “Limannioit, õdõlani niia ngittio vaangan?”
26 Ẽdẽcĩ Yesu ennei ne, “Kaduwacung dĩdĩ, ẽrẽppannangũ niigia aneeta, athii cĩ ẽẽn, nyatarka icintu niigia thoothonniok wũk anaat eeta wũk balna kĩdĩmana na, ĩthõng thĩ, ẽrẽppannangũ, nyatarka uduktu niigia aheenin cĩk avaadiay ẽlẽntõy,
27 Nyĩ aticaninu niigia, nyatarka dainit cĩ katĩ ẽgẽrẽthanni. Ĩthõng thĩ, iticantõy, nyatarka dainit cĩ rũgẽt cĩ alna kũdũt, cĩ anyung katĩ Ngẽrtĩ Eeto, nyatarka balna aanyĩk Nyekuci Baatĩnnẽ tiirthẽt cĩ ẽyẽla a ne, ẽlẽmĩ nẽ ĩnõõnõ.”
28 Ẽdẽcĩ nẽẽgẽ Yesu ennei ne, “Kĩdĩmanta yoko woccia nyia kiticanta tiicanẽ cĩk adiim Nyekuci?”
29 Ẽdẽcĩ Yesu ennei ne, “Thõõth cĩ adiim Nyekuci agiitia iticanit wo coo, elemit ĩnõõnõ wũ balna itiona nẽnẽ.”
30 Ẽdẽcĩ nẽẽgẽ Yesu ennei ne, “Yelehet thõõth cĩ anaat eeta, kĩĩ katĩ kelemti naaga aniitia. Aticani katĩ niia nyia?
31 Uduit balna õõ baatĩ, baatĩ, baangĩ cĩgaak dainit wũ balna athĩ maana,d balna ngĩ õwõ nẽẽgẽ ajalili baatha ĩcĩ õdõõĩ kak, kĩcĩ eheeddi Nyaragawa ĩcĩ Nyekuco athĩ ne, ‘Aanyĩk balna Nyekuci ĩnõõgõ dainit cĩ aku tammuatiddina kuduit.’ ”e
32 Ĩthõng õthõõth Yesu ĩĩ ne, “Kaduwacung dĩdĩ athii balna cĩ anyung Mutha agiitia ahat cĩ avaaddi cĩ aku tammuatiddina ẽẽ, Baang cĩ anyung balna agiitia ahat cĩ avaaddi dĩdĩ cĩ aku tammuatiddina ẽẽ.
33 Ĩthõng ahat cĩ avaaddi cĩ anyung Nyekuci cĩ ẽẽn dĩdĩ wo, ẽẽn ĩnõõnõ cĩ allucciay tammuatiddina kikiyyia keyehak eet cĩk looc coo rũgẽt.”
34 Ẽdẽcĩ balna nẽẽgẽ Yesu ennei ne, “Makayyioit! Anyet niia ageeta ahat cĩ avaaddi coo dõõkĩthĩ.”
35 Ẽdẽcĩ balna Yesu ennei ne, “Aneeta cĩ keeni ahat cĩ avaaddi cĩ kaanyung rũgẽt! Eeti cĩ aku kĩ aneeta, ĩthĩnga katĩ adak ĩnõõnõ boobo kũdũt, ĩthõng eeti cĩ ẽlẽmnya aneeta, athii tĩ cĩ aruk kõr kũdũt.
36 Ĩthõng thĩ, kĩ balna ngĩ kuduwawung balna na agiitia, ẽdẽnycahangũ niigia aneeta, ĩthõng ngaanĩ niigia athii cĩ ẽlẽmnyangũ aneeta.
37 Avvu katĩ eeta vẽlẽk cĩk ẽbẽra Baangĩ kĩ aneeta, ĩthõng eeti cĩ aku kĩ aneeta, athii katĩ na cĩ kingkaweĩ ĩnõõnõ tuu kũdũt.
38 Nyatarka balna kakuni na tammuatiddina, athii cĩ kakuni kĩdĩman diimẽnẽt cannĩ, ĩthõng thĩ, kakuni kĩdĩman diimẽnẽt cĩ Et wũ balna itionana aneeta.
39 Diimẽnẽt cĩ adiim nẽ wo coo, athii woccia na cĩ kaanyi et codoi doo kithii, eetĩnẽy wũk balna anya nẽ aneeta, ĩthõng thĩ, karũgũtha katĩ na ĩnõõgõ daaĩtha, kõrra cĩ katĩ ditianẽt cĩ loocu.
40 Adiim Baangĩ eet vẽlẽk cĩk ẽrẽppan Ngẽrĩnĩ, ĩthõng elemit ĩnõõnõ, kũrũbta rũgẽt cĩ alna kũdũt, ĩthõng katĩ karũgũtha na ĩnõõgõ kõrra cĩ ditianẽt cĩ loocu.”
41 Ivitia uyunito Yudei, nyatarka athĩ nẽ ne, “Aneeta cĩ keeni ahat cĩ avaadiay cĩ balna aku tammuatiddina.”
42 Ma natẽ, ijintõy nẽẽgẽ ĩĩtõ ne, “Athii eeti coo cĩ ẽẽn Yesu ngẽrtĩ Yothẽbõ, wũ kagga naaga yaatĩnnĩ kĩ baatĩnnĩ? Nyia naboo cĩ athĩ nẽ ne, ‘Kaluciay balna tammuatiddina wo’?”
43 Ẽdẽcĩ Yesu ennei ne, “Ibilli thõõth cĩ avaracconu nyaguana.
44 Athii eeti cĩ aku kĩ aneeta, ma nga kayaha Baangĩ ĩnõõnõ, wũ balna itionana nẽ aneeta, ĩthõng karũgũtha katĩ na ĩnõõnõ kõrra cĩ ditianẽt cĩ loocu.
45 Ẽhẽẽd balna eeta cĩk õthõõth molook cĩ Nyekuco Nyaragawa ĩcĩ Nyekuco thõõth athĩ ne, ‘Aliman katĩ Nyekuci ĩnõõgõ vẽlẽk,’f ĩthõng eeta vẽlẽk cĩk athĩrar Baang, ĩthõng illimanit thõõth cĩnnĩ avvu tĩ ĩcĩnanĩ.
46 Nga kĩcĩn eeti ĩmma Baang, et wũ balna aku Nyekuca dõ cĩ ĩcĩn Baang.
47 Kaduwacung dĩdĩ, eeti cĩ ẽlẽmnya aneeta ayak rũgẽt cĩ aavĩ kũdũt.
48 “Aneeta cĩ keeni ahat cĩ avaadiay cĩ rũgẽtõ.
49 Uduit balna õõ baatĩ, baatĩ, baaba maana cĩ aku kĩ Nyekuc baatha ĩcĩ õdõõĩ kak, ĩthõng vurtia adaaitõ.
50 Ĩthõng thĩ, ahat cĩ avaadiay coo, cĩ aku tammuatiddina, ĩthõng eeti cĩ aduk ĩnõõnõ, ĩthĩnga adaaĩ kũdũt.
51 Aneeta cĩ keeni ahat cĩ avaadiay cĩ arũgĩ cĩ aku tammuatiddina. Mĩ aduk eeti ĩmma ahat cĩ avaadiay coo, arũgĩ katĩ nẽ kũdũt. Ẽẽn ahat cĩ avaadiay coo ẽlẽ cannĩ, cĩ kaanyi na eet cĩk looc coo, kĩĩ katĩ kũrũgĩt.”
52 Ngaatĩ ẽpẽkanõnĩ Yudei nyaguana athĩ ne, “Anyet woccia gõõ eeti coo ẽlẽ cĩnnĩ kuduit kuu?”
53 Ẽdẽcĩ Yesu ĩnõõgõ ennei ne, “Kaduwacung dĩdĩ, mĩ athii cĩ adukcu ẽlẽ cĩ Ngẽrtĩ Eeto, ĩthõng uwuddu biyyie cĩgĩnĩk, athii katĩ cĩ eyekcu rũgẽt cĩ aavĩ kũdũt eletinẽy cuguk.
54 Eeti ĩmma cĩ aduk ẽlẽ cannĩ, ĩthõng ũwũd biyyie cĩganĩk, amũda katĩ nẽ rũgẽt cĩ alna kũdũt, ĩthõng karũgũtha katĩ na ĩnõõnõ kõrra cĩ ditianẽt cĩ loocu.
55 Ẽẽn ẽlẽ cannie ahat cĩ ẽẽn dĩdĩ cĩ adukcu niigia, ĩthõng ĩĩtõ biyyieta cĩganniek biyyie cĩk ẽẽn dĩdĩ cĩk awuddu niigia.
56 Ĩthõng eeti ĩmma cĩ aduk ẽlẽ cannĩ, ĩthõng ũwũd biyyie cĩganĩk, aavĩ katĩ nẽ kĩ aneeta, ĩthõng kaavẽ katĩ na ĩcĩnnĩ.
57 “Baang balna wũ ayak rũgẽt cĩ itionana aneeta, ĩthõng karugi na, nyatarka ĩnõõnõ, ĩthõng gõõla ĩcoo dõ, eeti cĩ adukca aneeta, arũgĩ katĩ nẽ, nyatarka aneeta.
58 Ẽẽn coo ahat cĩ avaadiay, cĩ aku balna tammuatiddina. Ĩthõng thĩ, balna uduit õõ baatĩ, baatĩ, baaba maana, ĩthõng ivitia adaaitõ, ĩthõng thĩ, eeti cĩ aduk ahat cĩ avaadiay coo arũgĩ katĩ nẽ kũdũt.”
59 Õthõõth balna Yesu thoothonniok cĩkkõ, baa ngĩ aliman nẽ eet cĩk Yudei Ciitha cĩ Lawintiog Kaparnauma.
Thoothiok cĩk rũgẽt cĩ aavĩ kũdũt
60 Ma balna ngĩ athĩrar wobjiaha cĩgĩnnẽk cĩk meelĩk thõõth coo wo, ivitia othoothitõ nẽẽgẽ ĩĩtõ ne, “Õkõmĩ limanĩ coo õrrõt, ngẽnẽ woccia cĩ ẽlẽmĩ?”
61 Aga balna Yesu ngatĩ amumuti wobjiaha cĩgĩnnẽk, ngaatĩ ajini nẽ ĩnõõgõ ẽnnẽcĩ ne, “Eheccung agiitia thõõth coo?
62 Ma woccia ngĩ icintu niigia Ngẽrtĩ Eeto ngatĩ õkõyyĩ tammuatiddina ĩcĩ balna akuni nẽ ẽẽ, athinnu woccia ne?
63 Ririwac cĩ Dĩhĩmĩ cĩ anyi eet rũgẽt cĩ aavĩ kũdũt, athii tiirthẽtĩ cĩ et colli cĩ anyung rũgẽt. Ĩthõng thõõth wũ kaduwacung na agiitia, aku kĩ Ririwac cĩ Dĩhĩmĩ cĩ anyung rũgẽt.
64 Ĩthõng attiyyu niigia gwuak cĩk athii cĩ elemnyu thõõth cannĩ.” Õthõõth balna Yesu ketee, nyatarka balna aga nẽ ĩcĩ owu, aatĩ wobjiaha gwuak cĩk athii cĩ ẽlẽmĩ ĩnõõnõ, ĩthõng aga et cĩ katĩ õvõlõngĩ ĩnõõnõ.
65 Ngaatĩ õthõõthĩ nẽ athĩnnĩ ne, “Athii eeti cĩ aku kĩ aneeta tõ, gii ngĩ anyĩk Baangĩ ĩnõõnõ kikiyyia kĩ aneeta. Ĩnõõnõ thĩ, cĩ balna kaduwacung na agiitia kaal cĩkkõ wo.”
66 Ma ngato, ivitia ũtũbũrĩt wobjiaha cĩgĩnnẽk cĩk meelĩk ngatĩ õwõbĩ ĩnõõnõ.
67 Ngaatĩ ajini Yesu wobjiak cĩk ẽẽn õmmõtõ kĩ ramma wo ẽnnẽcĩ ne, “Idiimtu niigia buu ũtũngteangũ?”
68 Ẽdẽc Thimõnẽ Pẽtũrũ, athĩ ne, “Makayyioit, ngẽnẽ ĩmma naboo cĩ woccia kovvoyyia naaga wo? Thõõth cunni dõ cĩ anyet rũgẽt cĩ alna kũdũt.”
69 Kẽlẽmnya naaga thõõth cunni, ĩthõng kagayyia kathĩnna ne, odoyyie ngĩ eeni Et cĩ Callĩ cĩ akuni ĩcĩ Nyekuco.
70 Ẽdẽcĩ Yesu ĩnõõgõ ennei ne, “Kẽbẽrawung balna na agiitia cĩk eeginnu õmmõtõ kĩ ramma wo vẽlẽk, aavĩ kẽnnẽ eeti ĩmma kõrgẽna cunung cĩ ayak ririwac cĩ gerthe!”
71 Õthõõth balna Yesu ketee, nyatarka Yudath, ngẽrtĩ Thimõnẽ Ĩthkariotĩ, cĩ katĩ õvõlõngĩ ĩnõõnõ, kõdẽ woyyia balna aavĩ nẽ buu wobjiaĩ ĩcĩk ẽẽn õmmõtõ kĩ ramma ẽẽ.