Anyĩk Yesu et cĩ ĩmmõrĩ kũbũna
5
Ma vurtia cĩnnĩ, imiirie Yesu ũũk Yeruthalẽma, peyiana ĩmmanĩ cĩ Yudei.
2 Aavĩ balna mõõrõ Yeruthalẽma, ngatĩ õjõõn kĩ Araan cobbi cĩ Athaanu. Ayak balna mõõrõ neccie tugguet cĩk obbitik tur. Athĩ balna thar cĩk mõõrõ nĩcẽ Aramayyiey ne, Bethaatha.
3 Ayuwuth baa gõõ tuwulliaha kĩ rubenniak kĩ eet cĩk alalaniay thoona tugguẽtẽy ĩcĩk obbitik. 4 Mẽẽlĩ balna eeta cĩk ĩmmõrĩ, kĩ eet cĩk rubentĩk kĩ eet cĩk ngõõltĩk kĩ eet cĩk awuli, oogin õjõõntĩ mõõra nĩcẽ. 5 Aavĩ balna eeti cĩ ĩmmõrĩ ĩmma ngatĩ õjõõn kĩ mõõrõ, cĩ ĩmmõrĩ balna erkinya cĩk ẽẽn etĩmma kõmmõtõ kĩ turgi.
6 Ma balna mĩ acĩn Yesu ĩnõõnõ, ĩthõng aga erkinya cĩk meelĩk cĩk mõõrĩth cĩnnĩ wo, ikiyyia ijin nẽ ĩnõõnõ ennek ne, “Adiimi bũna?”
7 Ẽdẽcĩ eeti cĩ ĩmmõrĩ ẽẽ, athĩ ne, “Makayyioit, athii eeti cĩ ẽlla kũũk mõõra ĩcĩtõ tõ, katĩ ngĩ ẽthẽhẽc maama mõõrõ. Ma nga kĩngathi kaa ne, kũũk wo, arak eeti ĩmma maam dõõkĩthĩ ĩcĩ owu.”
8 Ma natẽ, uduwak Yesu ĩnõõnõ ennek ne, “Tĩnga, dĩma lotarac cunni, bĩtõ!”
9 Ma tamanoko natẽ, ũbũna eeti neccie! Ngaatĩ adĩmaanĩ lotarac cĩnnĩ wo, ĩthõng õtõõwa!
Atican balna Yesu thõõth cĩ anaat eeta wo, Kõrra cĩ Yuwuthono.a
10 Ma balna mĩ acĩn makayyiowa cĩk Yudei et coo mĩ ayak lotarac cĩnnĩ wo, ivitia uduktiak nẽẽgẽ ĩnõõnõ entek ne, “Ẽẽn kõr coo Kõr cĩ Yuwuthono. Angiranni Ngirana cĩnang ngatĩ odongi niia lotarac Kõrra cĩ Yuwuthono.”
11 Ẽdẽcĩ eeti neccie ĩnõõgõ ennei ne, “Ennecca eeti cĩ anya kũbũna wo ne, ‘Dĩma lotarac cunni, ĩthõng otoowu.’ ”
12 Ẽdẽcĩ makayyiowa ĩnõõnõ ennei ne, “Ngẽnẽ thẽk cĩ aduwaci aniitia ennecci ne, dĩma lotarac, ĩthõng otoowu wo?”
13 Athii balna cĩ aga eeti neccie et cĩ anyi ĩnõõnõ kũbũna ẽẽ, nyatarka balna ithii Yesu meelitina cĩ eetu, cĩ balna aavĩ natẽ.
14 Ma balna vurtia, ikiyyia ũrũbak Yesu et nĩcẽ Ciitha cĩ Nyekuco, ĩthõng othoothĩk ĩnõõnõ ennek ne, “Ũbũna thĩ yoko niinia. Nyĩ nga adĩmani thoothonniok cĩk gerthek naboo, kõdẽ katĩ ngĩ akuneci thõõth ĩmma cĩ gerthe kijiar wũ balna wowu.”
15 Ma natẽ, ẽrẽppan eeti neccie makayyiok cĩk Yudei, ĩthõng uduwak ĩnõõgõ ennek ne, “Monogo Yesu cĩ anya aneeta kũbũna wo!”
Aduwõy Yesu kĩ Baatĩnnĩ thõng
16 Ma natẽ, ivitia ehecit makayyiowa cĩk Yudei Yesu õrrõt, nyatarka balna anyi nẽ et cĩ balna ĩmmõrĩ, kũbũna Kõrra cĩ Yuwuthono.
17 Ẽdẽcĩ Yesu ĩnõõgõ ennei ne, “Aticanni Baangĩ cannie kĩĩ yoko, ĩnõõnõ thĩ, cĩ katicaninie na buu dõõkĩthĩ wo.”
18 Ĩnõõnõ thĩ, balna cĩ adiim makayyiowa cĩk Yudei õrrõt ngĩ aruk Yesu, thoothiowẽy ĩcĩk ẽẽn ramma, ngatĩ ẽgẽrẽthanĩ nẽ thõõth ngatĩ aticanini nẽ Kõrra cĩ Yuwuthono, kĩ thõõth cĩ athĩnnĩ nẽ ne, ẽẽn Nyekuci Baatĩnnĩ cĩnnĩ, thõõtha ĩcoo anyi nẽ ẽlẽ cĩnnĩ kuduktõy kĩ Nyekuc thõng.
19 Ma natẽ, ẽdẽc Yesu ĩnõõgõ ennek ne, “Kaduwacung na agiitia dĩdĩ, athii gii cĩ adĩman Ngẽrĩnẽ dõ tõ. Atican nẽ thõõth cĩ acĩn atican Baatĩnnẽ dõ, nyatarka gii cĩ atican Baatĩnnẽ, atican Ngẽrĩnẽ buu.
20 Nyatarka amĩnan Baatĩnnẽ Ngẽrĩnĩ, ĩthõng õthõõth kĩ ĩnõõnõ thoothonniok vẽlẽk cĩk atican nẽ. Atubuaninu katĩ niigia ngĩ eyelek nẽ Ngẽrĩnĩ thoothonniok cĩk obbitik cĩk ijiar cĩk adĩmanĩ Ngẽrĩnẽ et coo kũbũna wo.
21 Kĩ ngĩ arũgũtha Baatĩnnẽ eet cĩk adaaitõ, ĩthõng anyĩk nẽ ĩnõõgõ kũrũgĩt, gõõla nĩcẽ dõ noko, anyi Ngẽrĩnẽ buu eet kũrũgĩt kĩcĩ adiim nẽnẽ.
22 Athii Baatĩnnẽ cĩ ẽngẽr thoothonniok cĩk eetu, ĩthõng thĩ, anyĩk nẽ Ngẽrĩnĩ kẽngẽr thoothonniok cĩk eet vẽlẽk,
23 nyatarka adiim Baatĩnnẽ eet kĩdĩhĩthĩt Ngẽrĩnĩ kaavu kĩcĩ adĩhĩth ĩnõõnõ. Eeti cĩ abũrĩ ngatĩ adĩhĩthĩ Ngẽrĩnĩ, aduwõy kĩ ngatĩ abũrnĩ ngatĩ adĩhĩthĩ Baatĩnnĩ wũ balna itiona ĩnõõnõ buu.
24 “Kaduwacung dĩdĩ, amũda katĩ eeti cĩ athĩrar thõõth cannĩ, ĩthõng ẽlẽm Baang wũ balna itionana aneeta, amũda katĩ nẽ rũgẽt cĩ alna kũdũt, ĩthõng athii katĩ cĩ uuki nẽ, nyatarka gerthetin cĩnnĩ, ĩlĩta nẽ daaĩth, ĩthõng ũmũda rũgẽt cĩ alna kũdũt.
25 Kaduwacung na dĩdĩ, arawak kõr vẽlẽk cĩ katĩ athĩknĩ eeta cĩk adaaitõ molook cĩ Ngẽrtĩ Nyekuco. Arũgĩ katĩ eeta cĩk athĩrar molook cĩnnĩ!
26 Ayak Baangĩ rũgẽt ẽla cĩnnĩ, ĩthõng anyi nẽ Ngẽrĩnĩ makathĩt kayak rũgẽt ẽla cĩnnĩ buu.
27 Anyi nẽ ĩnõõnõ makathĩt cĩ ẽtẽẽdĩ thoothonniok cĩk eet vẽlẽk, nyatarka ẽẽn nẽ Ngẽrtĩ Eeto.
28 “Nyĩ atubuaninu niigia! Aku katĩ kõr cĩ athĩknĩ eeta cĩk adaaitõ vẽlẽk, molook cĩnnĩ,
29 ĩthõng katĩ ẽtẽẽkta nẽẽgẽ loowuanĩy ĩcĩk balna adawini nẽẽgẽ ẽẽ. Arũgna katĩ eeta wũk balna adĩman thoothonniok cĩk abũnna, ĩthõng õõt rũgẽta ĩcĩ aavĩ kũdũt, ĩthõng ũrũkta eeta cĩk balna adĩman thoothonniok cĩk gerthek, ĩthõng uuktie.
30 Athii thõõth cĩ kadĩmani na mĩn tõ, kengeri na thõõth kĩcĩ aduwa nẽnẽ, ĩthõng thõõth cĩ kengeri na wo, ẽẽn dĩdĩ, nyatarka athii cĩ kadiimi katal na, ĩthõng thĩ, kadiimi na Et wũ itionana aneeta katal.
Eet cĩk ẽẽn kẽbẽrẽ cĩk õthõõth Yesu
31 “Ma kothoothi na ẽlẽ cannĩ dõ, kaduwa na thõõth cĩ athii cĩ ẽẽn dĩdĩ.
32 Aavĩ eeti ĩmma cĩ othoothia aneeta, ĩthõng kagga na thõõth cĩ aduwa nẽ, nyatarka aneeta wo, ẽẽn dĩdĩ.
33 “Itionicu balna niigia Yoanẽ Batithta eet õõgĩ, ĩthõng ũũk uduwak nẽ ĩnõõgõ thõõth cĩ ẽẽn dĩdĩ.
34 Athii cĩ kadiimi na thoothonniok cĩk othoothia eeta aneeta, kaduwacung na thoothonniok cĩkkõ, kĩĩ katĩ eliay niigia thoothonniowẽy ĩcĩk gerthek ĩcuguk.
35 Õgõõn balna Yoanẽ kĩ gii cĩ katũkũlẽnĩ cĩ anyi lanyĩt kũtũkũlõy, ĩthõng ivitia atallu niigia kĩdĩĩc, nyatarka lanyĩt cĩnnĩ.
36 “Kayai na thõõth cĩ õthõõththa aneeta cĩ ijiar Yoanẽ. Nyatarka anya Baangĩ aneeta tiicanẽ cĩk kadĩmani, ĩthõng aduwa tiicanẽ cĩkkõ athĩ ne, itionana balna Baangĩ aneeta.
37 “Ĩthõng Baangĩ cĩ itionana aneeta wo, othoothia nẽ aneeta. Ĩthõng nga balna ĩthĩrarit niigia molook cĩnnĩ, kõdẽ nga urumtõy kĩ ĩnõõnõ nguumti,
38 kõdẽ nga elemit niigia liman cĩnnĩ thinnetinẽy cuguk dĩdĩ, nyatarka utuburyu niigia ngatĩ elemnyu Et wũ balna itiona nẽnẽ.
39 “Ẽrẽppannu niigia Nyaraga cĩ Nyekuco athinnu ne, kamũdana katĩ rũgẽt cĩ alna kũdũt Nyaragawa coo. Õthõõth Nyaraga cĩ Nyekuco thõõth cannĩ,
40 aburnu kẽnnẽ niigia ngatĩ avvunnu ĩcannĩ, kĩĩ katĩ umuddia rũgẽt cĩ aavĩ kũdũt.
41 “Athii cĩ kodongothi na bulẽnĩt cĩ eetu,
42 ĩthõng thĩ, kagga dĩdĩ kathĩ ne, athii cĩ amĩnannu niigia Nyekuc thinnetinẽy cuguk dĩdĩ.
43 Kakuni balna na makathĩta cĩ Baangĩ, ĩthõng athii cĩ ẽlẽmnyangũ aneeta, ĩthõng thĩ, mĩ aku eeti ĩmma makathĩta cĩnnĩ, elemnyu kiggia katĩ ĩnõõnõ.
44 Ẽlẽmnyangũ woccia niigia aneeta, mĩ adiimnyu niigia ĩdĩhĩthĩt eleeti cuguk nyaguana, ĩthõng athii cĩ adiimnyu dĩhĩthẽnĩt cĩ woccia anyung Nyekuci buu kuu?
45 “Ĩthõng thĩ, nyĩ ahaddu athinnu ne, kabilnung katĩ na agiitia kĩ Baang. Mutha wũ balna elemnyu niigia cĩ katĩ abilnunga!
46 Ma baalia elemit Mutha, ẽlẽmnyangũ yoko woyyia aneeta buu, nyatarka balna ẽhẽẽd Mutha thoothonniok cĩk õthõõththa aneeta.
47 Ĩthõng thĩ, mĩ athii cĩ elemnyu thõõth wũ balna ẽhẽẽd nẽnẽ, ẽlẽmnyangũ woccia katĩ aneeta kuu?”