Yesu kĩ ngaa cĩ ẽẽn Thamaritanoc
4
Ĩthĩraritõ Varithei athĩ ne, ĩĩtõ mẽẽlĩ wobjiaha cĩk õwõb Yesu cĩk anyi nẽ batithimo, ijiar cĩk Yoanẽ Batithta.
2 Athii balna cĩ ẽẽn Yesu cĩ anyi eet batithimo wo, wobjiak cĩgĩnĩk cĩk anyi eet batithimo.
3 Ma balna ngĩ athĩrar Makayyioiti thõõth coo wo, ikiyyia ũtũngek nẽ looc cĩ Yudea, ĩthõng imiirie ũũk ĩcĩ looc cĩ Galilea.
4 Gõõla ĩcĩ balna õkõyyĩ nẽ wo ẽdẽẽm looc cĩ Thamaria.a
5 Ma balna mĩ õkkõ nẽ looca cĩ Thamaria, ikiyyia arawothĩk nẽ kõrõõk cĩ athĩ Thikar, cĩ õjõõn kĩ mana, cĩ balna anyi Yokobĩb ngẽrĩnĩ cĩnnĩ Yothẽbõ.c
6 Aavĩ balna duwwua cĩ Yokobĩ natẽ, ĩthõng ikiyyia uyuwuth Yesu duwwua natẽ, nyatarka balna ĩlĩb nẽ wueet cĩ õwõyyĩ, baa ngĩĩ waathĩn tobbi aavu kõr tiddina.
7 Aku balna ngaa ĩmma cĩ looc cĩ Thamaria atĩla maam, ĩthõng ikiyyia othoothĩk Yesu ĩnõõnõ ennek ne, “Ngaa coo, nyanyaa baai maam õõgĩ kũwũdẽ.” 8 Ma itina nĩcẽ noko, õõt wobjiaha cĩgĩnnẽk õlõõ kõõt kutuyyia dainit ĩmma.
9 Ẽdẽcĩ kẽnnẽ ngaa neccie Yesu ennei ne, “Eeni niia Yudenit, ĩthõng keeni na ngaa cĩ keeni Thamaritanoc. Ajinna niia aneeta maam nyia?” Athii Yudei cĩ aatĩ kĩ eet cĩk Thamaria jurrung.
10 Ẽdẽcĩ Yesu ennei ne, “Mĩ gaa niia gii cĩ adiim anyi aniitia Nyekuci, ĩthõng agawu ngẽnẽ cĩ ajinni aniitia maam wo, ajini woyyia niia ĩnõõnõ, ĩthõng anyi woyyia nẽ aniitia maam cĩk anyi aniitia rũgẽt.”
11 Ẽdẽcĩ ngaa neccie ĩnõõnõ ennei ne, “Makayyioit, kothii nõõnõ aniitia jẽrẽtẽ cĩ atĩĩlianẽ maama, ĩthõng wuun duwwua buu, adĩma woccia katĩ niia maam cĩk anyet rũgẽt ngatdang?
12 Ijiari niia Yokob, et wũ balna ẽẽn baang cĩnang wũ balna adawacet ageeta duwwo coo, ĩthõng awũdẽ nẽ kĩ lõgõõ cĩgĩnĩk kĩ kaal cĩgĩnĩk duwwua coo?”
13 Ẽdẽcĩ Yesu ennei ne, “Mĩ awũd eeta maam cĩkkõ, avvu katĩ aruk kõr ĩnõõgõ naboo,
14 ĩthõng thĩ, eeti cĩ kaanyi na maam cĩganĩk, athii katĩ cĩ aruk ĩnõõnõ kõr naboo kũdũt. Aatĩ maama cĩganniek wo kĩ maama cĩk ẽrẽnnanĩ kebereca cĩ duwwo, ĩthõng anyi eet rũgẽt cĩ alna kũdũt.”
15 Ẽdẽcĩ ngaa neccie ennei ne, “Makayyioit, nyanyaa baai maam nĩĩko aneeta, kĩĩ katĩ athii cĩ arukca kõr naboo, ĩthõng ĩthĩnga kakuni duwwua coo naboo.”
16 Ẽdẽcĩ Yesu ennei ne, “Bĩt tũvvũ maac cunni kikiyyia ngato.”
17 Ẽdẽcĩ ngaa neccie ennei ne, “Athinnia maac tõ.” Ẽdẽcĩ Yesu ennei ne, “Aduwa dĩdĩ ngatĩ athĩ ne, athii niia cĩ ayai maaca.
18 Eyewu balna nõ niia maacua tur, ĩthõng eeti cĩ arumenu yoko wo buu, athii cĩ ẽẽn maac cunni.”
19 Atajan ngaa neccie a ne, “Makayyioit, kacini na ngatĩ ẽnnẽ niia et cĩ othoothi molook cĩ Nyekuco.
20 Duwaha thĩ da, nyia ĩĩtõ niigia eeta cĩk Yudei ne, kalayyiõy thẽk naaga Yeruthalẽma dõ wo? Ĩthõng thĩ, naaga eeta cĩk Thamaria, kalayyiowa thiira ĩcoo,d ngatĩ balna gõõ alawini õõ baangietĩ cĩgaak baa lõõla wo.”
21 Ẽdẽcĩ Yesu ennei ne, “Lẽm thõõth cannĩ, aku katĩ kõr cĩ athii cĩ alawu Baang ngato, kõdẽ Yeruthalẽma.
22 Athii niigia eeta cĩk Thamaria cĩ agayyu Nyekuc cĩ alayyu wo, ageeta eet cĩk Yudei cĩk kagayya ĩnõõnõ jurrung, nyatarka aku elinti ĩcĩ Yudei.
23 Aku katĩ itini, ĩthõng ikiyyia vẽlẽk, katĩ ngĩ ala eeta Baang cannĩ dĩdĩ ririwaca kĩ thõõtha ĩcĩ ẽẽn dĩdĩ. Adiim Baangĩ eet cĩk ala ĩnõõnõ gõõla ĩcoo.
24 Ẽẽn Nyekuci Ririwac, ĩthõng eeta cĩk ala ĩnõõnõ buu, adiim thẽk nẽẽgẽ ngĩ ala ĩnõõnõ ririwaca kĩ thõõtha ĩcĩ ẽẽn dĩdĩ.”
25 Ẽdẽcĩ ngaa neccie ennei ne, “Kagga na mĩ aku katĩ Mathaayae cĩ athĩ Kiristo. Mĩ ikiyyia nẽ, aku katĩ alimannet ageeta thoothonniok vẽlẽk.”
26 Ma natẽ, uduwak Yesu ĩnõõnõ ennek ne, “Kiristo nana cĩ kothoothici aniitia yoko wo.”
Imiiryie wobjiaha õõt ĩcĩ Yesu
27 Ma balna natẽ, oboddia wobjiaha cĩgĩnnẽk. Arũbai kẽnnẽ ĩnõõnõ õthõõthõy kĩ ngaa nĩcẽ, ĩthõng ukulliek nẽẽgẽ jien, kothii et ĩmma kõrgẽna cĩnĩng cĩ ajin Yesu kennek ne, “Nyia cĩ adiimi niia wo?” Kõdẽ “Othoothonu niia kĩ ngaa coo nyia?”
28 Ma natẽ, ĩtĩnga ngaa neccie ũtũngek deere cĩ maamu duwwua ĩcoo, ĩthõng imiirie ũũk ĩcolu, ũũk uduwak eet vẽlẽk ennek ne,
29 “Ivitia, ĩcĩnĩt et ĩmma cĩ aduwacca thõõth vẽlẽk cĩ balna kĩdĩmana nana! Ẽẽn woccia nẽ Kiristo?”
30 Ngaatĩ ĩngannĩ eeta õlõõ nĩcẽ vẽlẽk, õvvõ acĩn Yesu.
31 Ma balna thĩna natẽ, uduktiak wobjiaha cĩgĩnnẽk ĩnõõnõ entek ne, “Limannioit, dak gimma.”
32 Ẽdẽcĩ kẽnnẽ Yesu ĩnõõgõ ennei ne, “Keyei na dainit ĩmma cĩ kadui cĩ erekcung agiitia.”
33 Ma natẽ, araktaĩ wobjiaha ijintõy mĩn ĩĩtõ ne, “Ayahak woccia ketee eeti ĩmma ĩnõõnõ ahat?”
34 Ngaatĩ aduwacĩ Yesu ĩnõõgõ ẽnnẽcĩ ne, “Dainit cannĩ cĩ kadĩmanẽ na thõõth cĩ Et, wũ balna itionana aneeta, ĩthõng woccia kẽdẽcai na, tiic cĩnnĩ.
35 Athinnu kẽnnẽ yoko niigia ne, ‘Nga attĩyya nyĩĩlõwẽ wec, ĩthõng katĩ eteddiõy eeta.’ Kaduwacunga, ubuit kẽbẽrẽ cuguk, ĩthõng icintu manẽẽna. Ibbiritõ manẽẽna vẽlẽk, ĩĩ itin cĩ teedintio.
36 Ma thĩ itin coo, ũdũmanẽ ticciannioiti cĩ ẽẽn teedioit, alũta nẽ eet kõõt rũgẽta ĩcĩ alna kũdũt. Ĩthõng thĩ, katĩ ẽbẽlbẽl thaccioiti kĩ teedioit kõdõwẽ.
37 Agayyu niigia thõõth cĩ ẽẽn dĩdĩ cĩ athĩ ne, ‘Ẽẽv eeti ĩmma mana cĩnnĩ, ĩthõng ikiyyia ẽtẽda eeti ĩmma.’
38 Kitionnung na õõt eteddiõy manẽẽnĩy wũk balna athii cĩ evvyu niigia. Aticanni balna eeta gwuak õrrõt, ĩthõng umuddiawu niigia elinit tiica ĩcĩnĩng ẽẽ.”
Elemit eeta cĩk meelĩk cĩk Thamaria Yesu
39 Elemit balna eeta cĩk meelĩk cĩk Thamaria õlõõ ĩcĩ gaalawu Yesu, nyatarka thõõth cĩ aduwaai ngaa neccie ĩnõõgõ ẽnnẽcĩ ne, “Aduwacca eeti coo thõõth vẽlẽk cĩ balna kadĩmani nana.”
40 Ma balna mĩ avvu eeta cĩk Thamaria kĩ Yesu wo, ivitia uduktiak nẽẽgẽ ĩnõõnõ entek ne, “Kũrũmtẽ nõõnõ kĩ ageeta.” Ĩthõng ũrũmtẽ nẽ kĩ ĩnõõgõ wathinniok ramma.
41 Ĩthõng nyatarka thoothonniok cĩgĩnĩk, ivitia elemit eeta cĩk meelĩk ĩnõõnõ.
42 Ma balna natẽ, ivitia uduktiak nẽẽgẽ ngaa nĩcẽ entek ne, “Kẽlẽmta naaga ĩnõõnõ athii cĩ ẽẽn, nyatarka thõõth wũ balna aduwacet niia dõ, ĩthõng thĩ, yoko kĩthĩkta naaga thõõth cĩ aduwa nẽ, ĩthõng kagayya naaga ẽẽn nẽ Ellioit cĩ loocu dĩdĩ!”
Anyĩk Yesu ngẽrtĩ gaalĩnto kũbũna
(Bẽl Matewo 8:5-13; Luka 7:1-10)
43 Ma vurtia cĩ wathinniok cĩk ẽẽn ramma wo, ĩtĩnga Yesu ũũk Galilea,
44 õthõõth balna nẽ athĩ ne, “Athii cĩ ongollie eeta et cĩ õthõõth molook cĩ Nyekuco looca cĩnnĩ.”
45 Ma balna mĩ õdõlan nẽ Galilea, ĩthaacõ balna eeta natẽ ĩnõõnõ, nyatarka balna ĩcĩnĩt nẽẽgẽ kaal cĩk adĩman nẽ Kõrra cobbi cĩ Ngothio Yeruthalẽma balna ma ngĩ aatĩ nẽẽgẽ natẽ.
46 Ma natẽ, imiirie nẽ ũũk ĩcĩ kõrõõk cĩ Kana looca cĩ Galilea, wũ balna ũũkcĩ nẽ maam kĩĩ mẽrtẽ cĩ vĩnõwo. Aavĩ balna gaalinti ĩmma õlõõ ĩcĩ gaalawu Kaparnauma cĩ ĩmmõrĩ ngẽrĩnẽ õrrõt.
47 Ma balna mĩ athĩrar nẽ athĩ ne, õbõda Yesu ĩcĩ looc cĩ Yudea õkkõ ĩcĩ Galilea wo, ikiyyia ijin nẽ Yesu, kĩĩ katĩ, kaanyĩk ngẽrĩnĩ cĩ balna õbõwẽ adaak ẽẽ, kũbũna.
48 Ma natẽ, uduwak Yesu gaalinit nĩcẽ ennek ne, “Elemnyu niigia thõõth cannĩ, katĩ mĩ icintu yelintiok kĩ thoothonniok cĩk anatti thõng dõ?”
49 Ẽdẽcĩ gaalinti neccie Yesu ennei ne, “Makayyioit, ijjia baai niia cĩneea doolec nga kadaak!”
50 Ẽdẽcĩ Yesu ĩnõõnõ ennei ne, “Miirie niia bĩt ĩcolu, arũgĩ katĩ ngerunie cunnie.”
Ikiyyia ẽlẽm gaalinti neccie thõõth cĩ Yesu, ĩthõng ĩtĩnga ũũk ĩcolu.
51 Ma balna nga nẽ kõdõlan kõrõõk cĩnnĩ, urumtik ĩnõõnõ ticcianniowa cĩgĩnnẽk gõõla, ĩthõng uduktiak ĩnõõnõ nyemut cĩ athĩ ne, “Ũbũna logoo cĩnnẽ aavu jurrung!”
52 Ma natẽ, ijin nẽ ĩnõõgõ itin cĩ balna ũbũnaĩ ngẽrĩnẽ cĩnnẽ ẽẽ. Ẽdẽcĩ nẽẽgẽ ennei ne, “Ithii aburthẽt cĩnnẽ bõlõwath itina ĩcĩ ẽẽn codoi, balna mĩ igiinyie kõrra.”
53 Ikiyyia aga baatĩ dooleco ĩĩ ne, abũnna doolec itin wũ balna aduwacĩ Yesu ĩnõõnõ ẽnnẽcĩ ne, “Arũgĩ katĩ ngerunie cunnie.” Ma thĩ balna ivitia elemit gaalinti kĩ eet cĩk ciith cĩnnĩ vẽlẽk Yesu.
54 Yelinit cĩ ẽẽn ramma cĩ balna adĩman Yesu cĩ anaat eeta coo. Balna ngĩ õbõda nẽ ĩcĩ looc cĩ Yudea, ikiyyia ũũk ĩcĩ looc cĩ Galilea.