Yesu kĩ Nikodemoth
3
Aavĩ balna eeti ĩmma cĩ athĩ Nikodemoth, cĩ ẽẽn Varithenit, ĩthõng balna ẽẽn nẽ buu makayyioit cobbi eetĩnẽy cĩk Yudei.
2 Ma kõr ĩmma jiat, ũrũbothĩk nẽ Yesu, ĩthõng othoothĩk ennek ne, “Limannioit, kagayya naaga eeni niia limannioit cĩ itionani Nyekuci. Athii woccia cĩ adĩmani niia thoothonniok cĩk anaat eeta wo kĩ yelintiok, mĩ athii cĩ aavĩ Nyekuci ĩcunni.”
3 Ẽdẽcĩ Yesu ĩnõõnõ ennei ne, “Kaduwaci dĩdĩ, athii woccia cĩ acĩn eeti ĩmma kabicoc cĩ Nyekuco gii ngĩ itirriay naboo!”
4 Ẽdẽcĩ Nikodemothĩ Yesu ennei ne, “Arittiay woccia eeti katĩ ngĩ atangany nẽ kuu? Dĩdĩ athii nẽ cĩ ẽhẽẽt kẽẽngatõ ĩcĩ yaatĩnnĩ ngõnana ramma, ĩthõng itirriay naboo.”
5 Ẽdẽcĩ Yesu ĩnõõnõ ennei ne, “Kaduwaci thõõth dĩdĩ, athii eeti cĩ iithio kabicoc cĩ Nyekuco, gii ngĩ itirriay nẽ maamĩy kĩ Ririwaca cĩ Dĩhĩmĩ tõ.
6 Arittiay eeta eletinẽy ĩcĩk ngaagikni kĩ baajikni, ĩthõng thĩ, itirria Ririwacĩ cĩ Dĩhĩmĩ ririwac.
7 Nyĩ akulei jien katĩ kennecci na ne, adiim mĩ aritanu niigia naboo.
8 Avungan ngõõtĩ õkkõ ngatĩ adiim nẽ. Athihi niia ngõõt, ĩthõng thĩ, athii cĩ aga aku ĩjang, kõdẽ õkkõ ĩjang. Ĩthõng thĩ, erekci aniitia ngĩ arittiay eeti Ririwaca cĩ Dĩhĩmĩ kuu?”
9 Ĩthõng ijin Nikodemothĩ Yesu ennek ne, “Nyia gõõ cĩ õgõõn ketee?”
10 Ẽdẽcĩ Yesu ĩnõõnõ ennei ne, “Eeni niia Limannioit cobbi cĩ Ĩthraĩlĩ, ĩthõng athii niia cĩ agawẽ thoothonniok cĩkkõ?
11 Kaduwaci na dĩdĩ, kõthõõththa naaga thõõth cĩ kagayya, ĩthõng kuduktiaha thoothonniok wũk balna kĩcĩnta naaga, ĩthõng thĩ, alna athii niigia cĩ elemnyu thoothonniok cĩgaak kũdũt.
12 Mĩ athii cĩ athĩknangũ niigia aneeta katĩ ngĩ kaduwacung na thoothonniok cĩk aatĩ loota ngato, elemnyu katĩ ngatĩ kaduwacung thoothonniok cĩk tammutiddinak kuu?
13 Nga kõdõlan eeti ĩmma tammutiddin, Ngẽrtĩ Eeto dõ cĩ balna ulucciay tammuatiddina kikiyyia loota ngato.
14 Odongnyie thĩ, katĩ Ngẽrtĩ Eeto kũũk tiddina, kĩ balna mĩ õdõng Mutha kũwaat cĩ adĩmaniay thĩĩktaa baatha ĩcĩ õdõõĩ kak,
15 kĩĩ katĩ, kũrũbta eeta vẽlẽk cĩk ẽlẽmĩ ĩnõõnõ rũgẽt cĩ alna kũdũt codoi codoi.
16 “Nyatarka amĩnan Nyekuci eet cĩk looc coo õrrõt kũdũt, ĩthõng ẽlẽmaaĩ nẽ Ngẽrĩnĩ cĩnnĩ codoi dõ, kĩĩ katĩ kumuddia eeta cĩk ẽlẽmĩ ĩnõõnõ rũgẽt cĩ alna kũdũt, ĩthõng ĩthĩnga adaaĩ.
17 Athii cĩ itioniai Nyekuci Ngẽrĩnĩ cĩnnĩ looc coo, kĩĩ katĩ kikiyyia kuuk eet cĩk looc coo thõng, itiona nẽ ĩnõõnõ kikiyyia kẽẽla ĩnõõgõ.
18 Athii cĩ uuk eet cĩk ẽlẽmĩ Ngẽrĩnĩ, ĩthõng thĩ, eeta cĩk athii cĩ ẽlẽmĩ ĩnõõnõ, ẽngẽrẽ thõõth cĩnĩng vẽlẽk, nyatarka athii cĩ ẽlẽmĩ nẽẽgẽ Ngẽrtĩ Nyekuco dõ.”
19 Ẽngẽr Nyekuci thoothonniok ketee. Ikiyyia lanyĩtĩ loota ngato vẽlẽk, ĩthõng amĩnan kẽnnẽ eeta muwur kijiar lanyĩt, nyatarka adĩman nẽẽgẽ kaal cĩk gerthek.
20 Eeti cĩ adĩman gerthetin, aaburneei lanyĩt, ĩthõng ĩthĩnga nẽ akunei lanyĩt, nyatarka athii nẽ cĩ adiim gerthetin cĩnnẽ keyeliay ngĩtĩvõrĩ.
21 Ĩthõng thĩ, eeti cĩ adĩman thoothonniok cĩk ẽẽn dĩdĩ aku lanyĩta, kĩĩ katĩ keyeliay kĩĩ ne, adĩman nẽ thoothonniok nĩĩko, nyatarka athĩrar nẽ thõõth cĩ Nyekuco.
Õthõõth Yoanẽ Batithta thõõth cĩ Yesu
22 Ma balna vurtia cĩnnĩ, ĩtĩngathõ Yesu kĩ wobjiak cĩgĩnĩk õõt looca cĩ Yudea, ngatĩ balna õkkõ aavẽ nẽ arũmẽẽnĩ kĩ ĩnõõgõ wathinniok õõgĩ, ĩthõng agameek eet batithimo.
23 Anyi Yoanẽ eet batithimo buu ngatĩ athĩ, Enon, ngatĩ õjõõn kĩ Thalim, ngatĩ mẽẽlĩ maama, ĩthõng avvu eeta kũdũt kivitia kagamit batithimo.
24 Adĩmanni thõõth coo balna nga kẽcẽbẽ Yoanẽ.
25 Ma natẽ, ẽpẽkantõy wobjiaha cĩk Yoanẽ kĩ et cĩ Yudei ĩmma, thõõtha cĩ thõõth cĩ ngiran cĩnĩng cĩ tũnyẽntõ.
26 Ma natẽ, ivitia õõt nẽẽgẽ ĩcĩ Yoanẽ, ĩthõng ijinit ĩnõõnõ entek ne, “Limannioit, ahada niia et wũ balna othoothi niia, wũ balna arumenu kĩ ĩnõõnõ baarenu, Lĩĩla ĩcĩ Yordanĩ? Anyi eeti neccie eet batithimo, ĩthõng õõt eeta vẽlẽk ĩcĩnnĩ.”
27 Ẽdẽcĩ Yoanẽ ĩnõõgõ ennei ne, “Athii gimma cĩ woccia adĩman eeti ĩmma katĩ nga kẽlẽmaĩ tammutiddin ĩnõõnõ tõ.
28 Nga ahadanu niigia thõõth wũ balna kennecung na ne, ‘Athii cĩ keeni na Kiristo nuun, ĩthõng thĩ, kitioniay na ĩcĩ owu ĩcĩnnĩ.’
29 Ĩthõng tihẽnta, atik eeti bũweec. Ĩthõng aavĩ thĩ gõõnĩ et nĩcẽ buu tõ atalĩ ngatĩ athĩknĩ molook cĩnnĩ. Ĩnõõnõ thĩ, cĩ katalnẽ na buu ẽẽ.
30 Aku thẽk nẽ ijiarya aneeta, ĩthõng thẽk keeni na dĩc ĩcĩnnĩ.
Aku Yesu tammuatiddina
31 “Eeti cĩ aku tammuatiddina, ijiar nẽ eet vẽlẽk. Eeti cĩ aku loota ngato, ẽẽn nẽ et cĩ looc coo, ĩthõng õthõõth thoothonniok cĩk looc coo. Eeti cĩ aku tammuatiddina ijiar nẽ eet vẽlẽk,
32 nyatarka õthõõth nẽ thõõth cĩ balna acĩn nẽ, ĩthõng ĩthĩha. Athii kẽnnẽ eeti cĩ ẽlẽmĩ thõõth cĩnnĩ tõ.
33 Eeti cĩ ẽlẽmĩ thõõth cĩnnĩ athĩ ne, õthõõth Nyekuci thõõth cĩ ẽẽn dĩdĩ.
34 Itiona balna Nyekuci Ngẽrĩnĩ kikiyyia kuduwak eet thõõth cĩnnĩ, nyatarka anyi Nyekuci Ngẽrĩnĩ tiirthẽt vẽlẽk cĩ Ririwac cĩnnĩ cĩ Dĩhĩmĩ.
35 Amĩnan Baatĩnnẽ Ngẽrĩnĩ cĩnnĩ, ĩthõng anyĩk ĩnõõnõ gii vẽlẽk athĩnẽy cĩgĩnĩk.
36 Eeti cĩ ẽlẽmĩ Ngẽrtĩ Nyekuco, amũda katĩ nẽ rũgẽt cĩ alna kũdũt, ĩthõng eeti cĩ abũrĩ Ngẽrtĩ Nyekuco, athii katĩ cĩ amũda rũgẽt nĩcẽ, ĩthõng avaracii katĩ Nyekuci ĩnõõnõ kũdũt.”