Ũtũwũ Yesu maam kĩĩ mẽrtẽ
2
Ma vurtia cĩ wathinniok iyyio, aavĩ balna tiẽntĩ ĩmma õlõõ cĩ gaalawu ĩcĩ athĩ Kana, looca cĩ Galilea, ĩthõng balna aavĩ yaatĩ Yesu buu natẽ.
2 Avva balna eeta Yesu kĩ wobjiak cĩgĩnĩk buu, kivitia tihẽnta coo.
3 Ma balna ngĩ edeciay mertia cĩ vĩnõwo, ikiyyia othoothĩk yaatĩ Yesu ĩnõõnõ ethek ne, “Edecia eeta mẽrtẽ.”
4 Ẽdẽcĩ Yesu yaatĩnnĩ ennei ne, “Yaang, nyia jina niia aneeta kĩdĩman thõõth coo wo? Nga kõdõlan itini cĩ woccia kadĩmanẽ na thõõth ĩmma.”
5 Ikiyyia uduwak Maria ticcianniok natẽ ennek ne, “Iticanit nẽnnẽ niigia thõõth cĩ aduwaccung Yesu.”
6 Aatĩ balna ijjionya tõrkõnõm cĩk abbĩththĩ maama, cĩk balna ũũnyẽnẽ eeta kĩcĩ aduwa Ngiranĩ cĩ Yudei. Ayak woccia ijjia codoi lõtõrõnya cĩk ẽẽn etĩmma, ĩthõng ĩmma ayak etĩmma kõmmõtõ.
7 Ma natẽ, uduwak Yesu ticcianniok ennei ne, “Allabbicciek niigia maam ijjionya nĩĩko kĩbbĩtĩt.” Ma balna thĩna allabbicciek nẽẽgẽ maam ijjionya nĩĩkẽ kĩbbĩtĩt.
8 Ma natẽ uduwak Yesu ĩnõõgõ naboo ennek ne, “Itillia maam nĩĩko õõgĩ, ĩthõng anyciwu et cĩ adĩmaneei tihẽnĩt.”
Ĩdĩmanit thĩ nẽẽgẽ kĩ balna mĩ aduwaai ĩnõõgõ Yesu.
9 Ikiyyia thĩ balna atar eeti cĩ tiẽnto ẽẽ, maam nĩĩkẽ õõgĩ, atarĩ kẽnnẽ ngĩ ẽẽn mẽrtẽ cĩ vĩnõwo cĩ aakaatĩ kẽẽk! Athii balna cĩ aga nẽ gõõl cĩ akuni mertia neccie, aga ticcianniowa wũk balna atĩla maam nĩĩkẽ ẽẽ, dõ gõõl cĩ akuni mertia neccie. Ĩthõng ũtũvvũwa nẽ et cĩ ẽẽn nyẽtẽranit ẽẽ, kikiyyia ĩcĩnnĩ,
10 ĩthõng uduwak ethek ne, “Ẽngẽr eeta vẽlẽk mẽrtẽ cĩ vĩnõwo cĩ aakaatĩ ĩcĩ owu, ma katĩ mĩ uwuddie eeta vẽlẽk, kĩĩ thĩ kayaktak cavvuak. Alugunyi kẽnnẽ niia mẽrtẽ cĩ aakaatĩ kuumuc nyia?”
11 Thõõth balna cĩ anaat eeta coo cĩ balna adĩman Yesu ĩcĩ owu, thoothonniowẽy ĩcĩk meelĩk, ĩcĩk anaat eeta õlõõ cĩ Kana, looca cĩ Galilea. Ikiyyia ẽyẽla thõõth coo bulẽnĩt cĩnnĩ natẽ, ĩthõng ivitia elemit wobjiaha cĩgĩnnẽk ĩnõõnõ, nyatarka thõõth coo.
12 Ma vurtia cĩnnĩ, ĩtĩngathõ Yesu kĩ yaatĩnnĩ kĩ gõtõõnõgĩ kĩ wobjiak cĩgĩnĩk, õõt ĩcĩ Kaparnaumi, ĩthõng õõt aavutõ wathinniok cĩk kĩdĩk natẽ.
Umur Yesu tuyyiak Ciitha cĩ Nyekuco
(Bẽl Matewo 21:12-13; Marĩkõ 11:15-17; Luka 19:45-46)
13 Ma balna ngĩ õbõwẽ Kõr cobbi cĩ Ngothio cĩ Yudei,a ikiyyia ũũk Yesu Yeruthalẽma.
14 Ma reerunga cĩ Ciith cĩ Nyekucob ĩcĩtõ, ũrũbothĩk Yesu eet cĩk ũũtẽnẽ tĩĩna, kĩ athaa, kĩ kurrienya cĩk woccia ũũtĩ kĩĩ anyinit cĩ Nyekuco, kĩ eet cĩk atalõnẽ nyarobinya, aatĩ lõbẽlẽtẽy.
15 Ma natẽ ĩdĩmana Yesu kalli ĩmma lõõrõnẽtẽy, ĩthõng itingkawek eet nĩĩkẽ ngĩtĩvõrĩ kõdõwẽ kĩ athaa kĩ tĩĩn vẽlẽk kõõt ngatĩvõrĩ reerunga cĩ Ciith cĩ Nyekuco. Õbõrbõran nẽ lõbẽlẽt cĩk eet cĩk atalõnẽ nyarobinya, ĩthõng athaanĩk nyarobinya cĩgĩk koo tuu.
16 Ma natẽ, uduwak eet cĩk ũũtẽnẽ kurrienya wo ennek ne, “Ootti kurrienya nĩĩko ngatĩvõrĩ! Nyĩ aryu Ciith cĩ Baangĩ kĩĩ ciith cĩ tũwẽnto!”
17 Ma natẽ, ahaddia wobjiaha cĩgĩnnẽk thoothonniok cĩk eheeddi Nyaragawa ĩcĩ Nyekuco athĩ ne, “Kamĩnani na Ciith cunni kĩ gua cĩ atũũthĩ ẽla cannĩ.”c
18 Ma natẽ, ũlũngantiak makayyiowa cĩk Yudei ĩnõõnõ, ĩthõng ijinit entek ne, “Thõõth jang cĩ anaat eeta cĩ adĩmani niia cĩ eyelecet ageeta kagayyia makathĩt cunni cĩ adĩmanẽ kaal cĩkkõ wo?”
19 Ẽdẽcĩ Yesu ĩnõõgõ ennei ne, “Evereit Ciith cĩ Nyekuco wo, ĩthõng katĩ kẽtẽngẽnya na ĩnõõnõ wathinniowẽy ĩcĩk ẽẽn iyyio kũbũna naboo.”
20 Edecit makayyiowa cĩk Yudei ĩnõõnõ ennei ne, “Ẽngẽnycẽ balna Ciith cĩ Nyekuco wo, erkinya eet ramma kĩ tõrkõnõm, engenyeti yoko katĩ niia kũbũna wathinniowẽy cĩk ẽẽn iyyio kuu?”
21 Ĩthõng thĩ, ma ngĩ õthõõth balna Yesu thõõth cĩ Ciith cĩ Nyekuco, õthõõth nẽ ẽlẽ cĩnnĩ.
22 Ma balna mĩ ũrũga Yesu daaĩtha, ivitia ahaddia wobjiaha cĩgĩnnẽk thõõth cĩ ẽngẽnycĩ Yesu Ciith cĩ Nyekuco wo, wathinniowẽy ĩcĩk ẽẽn iyyio. Kĩĩ kelemit nẽẽgẽ thõõth wũ eheeddi Nyaragawa ĩcĩ Nyekucod wo, kĩ thõõth wũ aduwa Yesu.
Aga Yesu thõõth cĩ ayak eeta thinnetinẽy
23 Ma balna mĩ avĩya Yesu Kõrra cobbi cĩ Ngothio Yeruthalẽma, ivitia elemit eeta cĩk meelĩk ĩnõõnõ ĩĩtõ ne, ẽẽn Yesu Ellioit dĩdĩ, nyatarka thoothonniok cĩk meelĩk cĩk anaat eeta kĩ yelintiok cĩk adĩman nẽnẽ.
24 Ĩthõng thĩ, athii balna cĩ ẽlẽmĩ Yesu thõõth cĩnĩng, nyatarka aga nẽ thoothonniok cĩk ayak eeta vẽlẽk thinnetinẽy cĩgĩk.
25 Ĩthõng athii Yesu cĩ adiim et ĩmma kuduwak ĩnõõnõ thõõth cĩ eetu, nyatarka aga nẽ ĩnõõgõ thinneti cĩgĩk jurrung.