Luka 19

Thakawoth et cĩ alũt mũcũrrũ

Ma balna ngĩ ẽdẽẽm Yesu Jeriko, 2 aavĩ balna eeti ĩmma cĩ athĩ Thakawoth cĩ ẽẽn makayyioit cĩ alũt mũcũrrũ, ĩthõng ẽẽn balna nẽ ballioit õrrõt. 3 Adiim balna nẽ ngĩ aga Yesu kir ngẽnẽ, ĩthõng thĩ, balna ẽẽn nẽ et cĩ turi õrrõt, athii cĩ acĩnĩ Yesu meelitina. 4 Ngaatĩ aviri õkõyyĩ ĩcĩ owu, ĩthõng ũũk õtõd mũũnec, kĩĩ kĩcĩn Yesu, nyatarka õkkõ nẽ gõõla nĩcẽ.

5 Ma balna ngĩ arawak Yesu nginicẽ, acĩn kẽnnẽ Thakawoth kẽẽta tiddina ngaatĩ õthõõthĩcẽ ẽthẽcĩ ne, “Thakawoth, luciay taman, kõkkõ wanĩco kaavẽ na õlõõ cunni kõr coo.”

6 Ngaatĩ aluucianẽ Thakawothĩ tamanoko, ĩthõng ikiyyia ĩthaa Yesu talintia.

7 Ma balna mĩ acĩn eeta vẽlẽk cĩk balna aatĩ natẽ ngatĩ ĩthaawõnẽ Yesu kĩ Thakawoth natẽ ẽẽ, uyunito ĩĩtõ ne, “Õkkõ bẽrẽ Yesu õlõõ cĩ gẽrẽthanniokto.”

8 Ma baa natẽ, uduwak Thakawothĩ Yesu ethek ne, “Makayyioit, cĩnũ, kõr coo, kẽngẽrai katĩ na ngĩjũrra ijjio cĩganĩk kõrgẽna, ĩthõng ma da balna kĩtdanya et ĩmma, kadũmani katĩ na ĩnõõnõ ngõnana wec.”

9 Ngaatĩ ẽthẽcĩ Yesu ĩnõõnõ ne, “Ikiyyia elinti kõr coo ciitha ĩcoo, nyatarka ẽẽn eeti coo buu ngẽrtĩ Abrahamĩ. 10 Kakuni balna na Ngẽrtĩ Eeto kidiima eet cĩk athii, ĩthõng kẽẽla ĩnõõgõ.”

Iyiainit cĩ ticcianniok cĩk ẽẽn õmmõtõ

(Bẽl Matewo 25:14-30)

11 Ma balna ngĩ athĩrar nẽẽgẽ thõõth coo wo, uduwak nẽ ĩnõõgõ thõõth cĩ owovothi cĩ alĩtanẽ eet, nyatarka balna ĩthĩ õjõõn nẽ Yeruthalẽma, ĩthõng balna amuk eeta athĩ ne, aku katĩ edenyiay kabicocĩ cĩ Nyekuco nĩĩco noko. 12 Aduwaai balna Yesu ĩnõõgõ ennei ne, “Aavĩ balna eeti ĩmma cĩ ẽẽn ngẽrtĩ alaano cĩ õkkõ ĩcĩ looc cĩ rẽẽnĩ, ĩthõng ũũk eberiay ĩthĩ alaan, ĩthõng katĩ õbõda. 13 Ma balna ngĩ õbõwẽ nẽ ũũk, ũtũvvũ nẽ ticcianniok cĩgĩnĩk cĩk ẽẽn õmmõtõ ẽẽ, ĩthõng aanyĩk ĩnõõgõ codoi codoi locibiro cĩ nyarobinyawu, ĩthõng ethek ne, ‘Iticantõõĩ nyarobinya cĩkkõ kuumuc kĩtooryie gii ngĩ kõbõda nana.’

14 “Ĩthõng thĩ, kẽnnẽ balna aaburneei eeta cĩk looc cĩnnẽ ĩnõõnõ ngatĩ ẽnnẽ alaan cĩnĩng, ngaatĩ itionĩ nẽẽgẽ eet kõõt kentek ne, ‘Athii cĩ kadiimnya naaga et coo kĩĩ alaan cĩnang.’

15 “Ma baa ngĩ eberiay nẽ ĩthĩ alaan õbõda kõrõõk. Ma natẽ, ikiyyia ũtũvvũ ticcianniok wũk balna anyi nẽ nyarobinya kikiyyia kũmũda katĩ mĩ ĩtooryie nyarobinya.

16 “Aku balna ticciannioiti cĩ owu, ĩthõng ethek ne, ‘Makayyioit, ayaha locibiro wunnie wũ nyarobinyawu õõgĩ cĩk ẽẽn õmmõtõ.’

17 “Ẽdẽcĩ makayyioiti cĩnnẽ ennei ne, ‘Ĩdĩmanu jurrung õrrõt ticciannioiti cannie cĩ abũnna wo. Ĩthõng nyatarka eeni niia et cĩ athũnnẽ gii cĩ dĩcĩ, ĩĩthĩ katĩ et cĩ agami korookjiok cĩk gaalawu cĩk ẽẽn õmmõtõ.’

18 “Ma natẽ, ikiyyia ticciannioiti cĩ õwõbẽcĩ, ĩthõng ĩthĩ ne, ‘Makayyioit, ayaha locibiro wunnie wũ nyarobinyawu õõgĩ cĩk ẽẽn tur.’

19 “Ẽdẽcĩ makayyioiti athĩ ne, ‘Gam korookjiok cĩk gaalawu tur.’

20 “Ma naboo natẽ, ikiyyia ticciannioiti ĩmma, ĩthõng ĩthĩ ne, ‘Makayyioit, locibiro wunni wũ nyarobinyawu wũ balna anya coo, kiitiangi balna na locococa cĩ ceremo. 21 Kongolini balna na aniitia, nyatarka eeni niia et cĩ eeni kiddiait, eeni et cĩ adiimi õkõyyẽ kaal cĩk athii cĩ ẽẽn cugunik, ĩthõng naboo eeni et cĩ adiimi eteddie manatõ ĩcĩ ngaanĩ ẽvõyĩ.’

22 “Ẽdẽcĩ makayyioiti ennei ne, ‘Niia ticciannioiti cĩ eeni gẽrtha wo, ketedi katĩ na thõõth cunni thõõtha cĩ aduwa ẽẽ. Aga niia ngatĩ keeni na et cĩ kokomi, ĩthõng kĩĩthĩ et cĩ kõkõyyẽ kaal cĩk athii cĩ ẽẽn cĩganĩk, ĩthõng kẽtẽdõy ngatĩ ngaanĩ kẽẽvõĩ. 23 Athii da thĩ cĩ aari niia locibiro cannĩ wũ nyarobinyawu ciitha ĩcĩ iyiangini nyarobinya nyia? Baalia ma ngĩ kõbõda kũmũdaha thĩ woyyia na nyarobinya cĩganĩk ĩtooryie.’

24 “Ngaatĩ ẽthẽcĩ eet cĩk balna abĩlĩ natẽ ne, ‘Agamta et coo locibiro codoi cĩ nyarobinyawu, ĩthõng anyciwu et cĩ ayak õmmõtõ ẽẽ.’

25 “Ẽdẽcĩ kẽnnẽ eeta neekie ennei ne, ‘makayyioit, ma yoko ngĩ ayak nẽ locibironya cĩk nyarobinyawu cĩk ẽẽn õmmõtõ vẽlẽk wo!’

26 “Ẽdẽcĩ makayyioiti ennei ne, ‘Eeti cĩ ayak gii cĩ dĩcĩ, anyĩwothi katĩ kaala cĩk meelĩk, ĩthõng eeti cĩ kothii gii ĩmma, agammiay katĩ gii cĩ dĩcĩ cĩ ayak nẽ, kaavu athĩnẽy kollin. 27 Ĩthõng thĩ, aatĩ thĩ yoko mĩrõwa cĩganniek wũk balna athii cĩ adiimnya aneeta kĩthĩ alaan wo, ayakta ĩnõõgõ, ĩthõng uruktu kẽbẽrẽnĩy ĩcĩganĩk.’ ”

Ittio Yesu Yeruthalẽm

(Bẽl Matewo 21:1-11; Marĩkõ 11:1-11; Yoanẽ 12:12-19)

28 Ma balna ngĩ ẽdẽcak Yesu ngatĩ aduwanĩ thõõth coo, ĩtĩnga nẽ ũũk ĩcĩ Yeruthalẽmĩ. 29 Ma balna ngĩĩ õjõõn nẽ kĩ korookjiok cĩk Bethvage kĩ Bethani wo, Thiira cĩ Olivnyawu, ition wobjiak cĩgĩnĩk ramma kõõt ĩcowu, ĩthõng ethek ne, 30 “Õõt õlõõ ĩcĩ aavĩ ĩcĩ owu ẽẽ, ĩthõng mĩ iithioyyu, amũdothicu katĩ thigiriec cĩ dĩcĩ cĩ ngaanĩ kõtõõwĩ eeti ĩmma kũdũt, cĩ ecebjie natẽ. Õõkta, ĩthõng ayaktawu ĩnõõnõ ngato. 31 Ĩthõng mĩ ajinnung eeti ĩmma ethecung ne, ‘Õõganu nyia?’ Entek ne, ‘Adiim Makayyioiti.’ ”

32 Ma balna ngĩ õvvõ nẽẽgẽ wo, arubothi thẽk aavĩ kĩ viyyio ngĩ aduwaai Makayyioiti ĩnõõgõ. 33 Ma baa ngĩ õõg nẽẽgẽ thigiriec wo, ajin kẽggẽ baajigi thigirieco ĩnõõgõ ennei ne, “Õõganu thigiriec nyia?”

34 Ẽdẽcĩ nẽẽgẽ ennei ne, “Adiim Makayyioiti.”

35 Ngaatĩ ayawothĩcẽ nẽẽgẽ thigiriec Yesu, ĩthõng ĩdĩmta ceremua cĩgĩk kĩĩ karyik bowuca cĩ thigirieco, ĩthõng odongtek Yesu kaavue. 36 Ma balna ngĩ õwõ thigiriecĩ cĩ aavẽ Yesu wo, etevettiek eeta ceremua cĩgĩk gõõla cĩ õkõyyĩ nẽ ẽẽ.

37 Ma baa ngĩ arawak nẽ ngĩtĩ alũũcẽnẽ gõõl õkõyyĩ Thiira cĩ Olivnyawu, araktaĩ meelitini kĩ wobjiak ubuluthit Nyekuc õrrõt talintia, nyatarka ĩcĩnĩt balna nẽẽgẽ thoothonniok wũk anaat eeta.

38 Athĩ balna nẽẽgẽ ne,

“Agatanẽ Alaanĩ cĩ aku thaarĩy ĩcĩk Makayyioktak.”

“Aavĩ ganõnĩ tammuatiddina,

ĩthõng aavu bulẽnĩtĩ kĩ Nyekuc!”

39 Aduwaai kẽnnẽ Varithei gwuak Yesu meelitina ennei ne, “Limannioit, gerenyek wobjiak cugunik koo kitivantẽ.”

40 Ẽdẽcĩ Yesu ennei ne, “Kaduwacunga, ma ngĩ itivantẽ nẽẽgẽ, alu woccia katĩ bĩĩyẽna cĩkkõ õrrõt.”

41 Ma baa ngĩĩ õjõõn nẽ Yeruthalẽma, ĩcĩn nẽ kõrõõk cĩ gaalawu cobbi, ĩthõng utului ĩnõõnõ, 42 ĩthõng õthõõth ĩĩ ne, “Athii cĩ agayyu niigia gii cĩ woccia ẽyẽhacung ganõn kõr coo, ĩthõng thĩ, yoko alugunyi kẽbẽrẽnĩy ĩcuguk. 43 Aku katĩ itini cĩ aliheei mĩrõwa cĩk ẽẽn nyĩcẽkẽr Yeruthalẽm, ĩthõng etengenyit dilat cĩ õkõmĩ kuluwung agiitia, ĩthõng unyuktiwung agiitia ĩcĩtõ tonniok vẽlẽk. 44 Arukcung katĩ nẽẽgẽ agiitia kĩ dõõlĩ cuguk vẽlẽk. Athii katĩ cĩ uungni bĩĩ ĩmma cĩ aavĩ bĩĩya ĩmmanĩ. Athanni katĩ gii vẽlẽk, nyatarka athii cĩ agawu niigia kõr cĩ akuni Nyekuci kĩ agiitia.”

Yesu Ciitha cĩ Nyekuco

(Bẽl Matewo 21:12-17; Marĩkõ 11:15-19; Yoanẽ 2:13-22)

45 Ma natẽ, ũũk ittio Yesu reerung cĩ Ciith cĩ Nyekuco, ĩthõng itingkawek eet cĩk balna ũũtẽnẽ kaal ngĩtĩvõrĩ. 46 Ĩthõng ethek ne, “Eheeddi thõõth athĩ ne, ‘Ẽẽn katĩ Ciith cannie Ciith cĩ lawintio,’ aryu kẽnnẽ niigia ‘kĩĩ ngĩtĩ alugunyẽnĩ goryiaha.’ ”

47 Ĩthõng wathinniok nĩĩkẽ vẽlẽk aliman balna nẽ eet Ciitha cĩ Nyekuco. Adiim kẽnnẽ ngĩ aruk ĩnõõnõ makayyiowa cĩk paadĩrnyawu kĩ limanniok cĩk Ngiranak, kĩ makayyiok cĩk eetu. 48 Ĩthõng thĩ, balna adĩccẽ ĩnõõgõ ngatĩ ẽrẽpanĩ gõõl cĩ woccia arui ĩnõõnõ, nyatarka balna aatĩ eeta vẽlẽk natẽ cĩk athĩrar ĩnõõnõ.