Luka 18

Ngaa cĩ bõyyĩ kĩ et cĩ ẽtẽd thõõth

Ngaatĩ aduwacĩ Yesu wobjiak cĩgĩnĩk thõõth cĩ owovothi cĩ alĩta eet wo, kĩĩ katĩ gõõ kalayyiõy kũdũt, kithii cĩ uungni lawinit. 2 Aduwaai balna nẽ ĩnõõgõ ennei ne, “Aavĩ balna eeti cĩ ẽtẽd thoothonniok õlõõ cĩ gaalawu ĩmmanĩ, cĩ athii cĩ ongollie Nyekuc, kõdẽ eeta. 3 Aavĩ balna ngaa cĩ bõyyĩ ĩmma õlõõ cĩ gaalawu nĩcẽ buu cĩ õkkõ ĩlaleei et cĩ ẽtẽd thoothonniok ennei ne, ‘Ẽẽla aneeta dĩmanea baai thõõth cĩ edeemothi kĩ aneeta, kĩ miroit cannĩ.’

4 “Abũrĩ kẽnnẽ eeti cĩ ẽtẽd thoothonniok ngatĩ ẽẽl ĩnõõnõ wathinniok cĩk meelĩk. Ĩthõng thĩ, baa vurtia, ikiyyia umuk ĩĩ ne, ‘Athii cĩ kongollie na Nyekuc, kõdẽ eeta, 5 ĩthõng thĩ, nyatarka ẽhẽcca ngaa cĩ bõyyĩ coo aneeta, ketedi thẽk katĩ na thoothonniok cĩgĩnĩk gõõla cĩ edeemothi, kĩĩ katĩ athii cĩ ẽhẽcca kũdũt!’ ”

6 Ngaatĩ athĩnnĩ Makayyioiti ne, “Ĩthĩrarit thĩ da yoko nõ thõõth cĩ aduwa eeti nĩcĩ gẽrthẽ cĩ ẽtẽd thoothonniok wo. 7 Athii woccia cĩ anyi thẽk Nyekuci eet cĩgĩnĩk dõõkĩthĩ gii cĩ ajin nẽẽgẽ baalina kĩ waathĩna vẽlẽk? Ĩthõng athii woccia thẽk cĩ amĩdmĩdĩ nẽ ngatĩ atajanĩ buu katĩ mĩ ajin nẽẽgẽ ĩnõõnõ? 8 Kaduwacunga, aku thẽk katĩ ẽẽl nẽ ĩnõõgõ tamanoko. Ĩthõng thĩ, yoko ngĩ ikiyyia Ngẽrtĩ Eeto, arũbai woccia katĩ eet cĩk ẽlẽmĩ ĩnõõnõ loota ngato?”

Et cĩ ẽẽn Varithenit kĩ et cĩ alũt mũcũrrũ

9 Aatĩ da eeta gwuak cĩk õkõmĩ thinneti cĩgĩk athĩ ne, ẽẽn nẽẽgẽ eet cĩk abũnna, ĩthõng aharanei eet õõgĩ. Aduwaai balna Yesu ĩnõõgõ thõõth cĩ owovothi cĩ alĩta eet athĩ ne, 10 “Aatĩ balna eeta rammak cĩk õvvõ alayyie Ciitha cĩ Nyekuco. Ẽẽn balna codoi Varithenit, ĩthõng ẽẽn ĩmma et cĩ alũt mũcũrrũ. 11 Õkkõ balna alayyie Varitheniti athĩ ne, ‘Nyekuc, kenneci na ne, ibalallẽ, nyatarka athii na cĩ kogooni kĩ eeta gwuak. Athii na cĩ keeni goryiait, ĩthõng athii cĩ keeni et cĩ gerthe, ĩthõng athii cĩ kõkõyyẽ ngaay cĩk eetu, ĩthõng naboo thẽk athii cĩ kogooni kĩ eeti nĩcĩ alũt mũcũrrũ ẽẽ. 12 Kedethi na ẽlẽ cannĩ daintia wathinniok ramma iinyiay ĩcĩk ẽẽn tũrgẽrẽm dõõkĩthĩ vẽlẽk. Ĩthõng naboo kẽngẽraha Nyekuc gii cĩ dĩcĩ kaalĩy ĩcĩk kamũda vẽlẽk.’

13 “Abĩlĩ kẽnnẽ balna eeti cĩ alũt mũcũrrũ ẽẽ, rẽẽna, ĩthõng athii cĩ acĩn tammutiddin buu, ĩthõng thĩ, uuk nẽ ĩyyõ cĩnnĩ, ĩthõng ĩthĩ ne, ‘Nyekuc, tamatĩha aneeta gẽrẽthannioit.’ ” 14 Ma natẽ, uduwa Yesu ĩĩ ne, “Kaduwacung dĩdĩ, ũũk balna eeti cĩ alũt mũcũrrũ ẽẽ, õlõõ cĩnnĩ, abũnna balna nẽ ĩcĩ Nyekuco, athii cĩ ẽẽn Varithenit. Ĩthõng eeta cĩk anyi eleeti cĩgĩk kĩĩ obbitẽ avvu katĩ nẽẽgẽ dĩcẽ, ĩthõng eeta cĩk anyi eleeti cĩgĩk kĩĩ dĩcẽ, avvu katĩ nẽẽgẽ obbitẽ.”

Agatan Yesu dõõlĩ cĩk kĩdĩk

(Bẽl Matewo 19:13-15; Marĩkõ 10:13-16)

15 Ayahai balna eeta dõõlĩ cĩk kĩdĩk Yesu, kikiyyia kuwum nẽnẽ. Ma balna mĩ acĩn wobjiaha wo, egerenycek ĩnõõgõ entek ne, nyĩ ayahanu dõõlĩ. 16 Ĩthõng thĩ, avvũ kẽnnẽ Yesu dõõlĩ, ĩthõng ĩĩ ne, “Anycĩk dõõlĩ cĩk kĩdĩk kivitia ĩcannĩ, nyĩ alamnyu, nyatarka ẽẽn kabicocĩ cĩ Nyekuco cĩ eet cĩk aatĩ kĩ yoko nẽẽgẽ wo. 17 Kaduwacung dĩdĩ, eeti cĩ athii cĩ ẽlẽmĩ kabicoc cĩ Nyekuco kĩ doolia cĩkkõ, athii katĩ woccia nẽ cĩ ẽhẽẽt kũdũt.”

Gaalinit cĩ aballie

(Bẽl Matewo 19:16-30; Marĩkõ 10:17-31)

18 Ma natẽ, ijin gaalinti ĩmma Yesu ethei ne, “Limannioit cĩ abũnna, nyia woccia thẽk cĩ kadĩmani na, kĩĩ katĩ kũmũda rũgẽt cĩ alna kũdũt?”

19 Ẽdẽcĩ Yesu ennei ne, “Nyia tũvũwa niia aneeta ennea ne, kabũnna wo? Nyekuc dõ cĩ abũnna. 20 Aga niia tĩrĩthẽntiok cĩk athĩ ne, ‘Nyĩ õkõyyẽ ngaa cĩ et ĩmma, nyĩ arui niia et, nyĩ õgõrthẽ niia, nyĩ õvõlõngẽ niia et cĩ abakanonu lokika, ĩthõng tõngõlẽ niia baaba cunni kĩ yaaya.’ ”

21 Ẽdẽcĩ kẽnnẽ gaalinti neccie athĩ ne, “Kathũnnẽ balna na thoothonniok cĩkkõ vẽlẽk ngaatĩ balna kĩdĩcthẽta.”

22 Ma balna ngĩ athĩrar Yesu wo, uduwak ĩnõõnõ ethek ne, “Ngaanĩ athiinni aniitia gii codoi doo tõ, bĩt tũũwõĩ gii vẽlẽk cĩ ayahi, ĩthõng engerewu ngĩjũrra, ĩthõng thĩ, ikiyyia õwõba aneeta, ĩthõng katĩ ũũk ayawu balinit tammuatiddina.”

23 Ma balna ngĩ athĩrar nẽ thõõth coo wo, õmõthẽ nẽ õrrõt, nyatarka balna ẽẽn nẽ et cĩ aballie õrrõt.

24 Ngaatĩ acĩnĩ Yesu ĩnõõnõ, ĩthõng ĩĩ ne, “Õkõmĩ woccia ngatĩ iithiowĩ ballioiti kabicoc cĩ Nyekuco õrrõt! 25 Dĩdĩ, obokci ngatĩ woccia iithiowĩ nyaakalĩ bẽlẽth cĩ lĩbĩrawõ, kijiar ngatĩ woccia iithiowĩ ballioiti kabicoc cĩ Nyekuco.”

26 Ngaatĩ ajini eeta cĩk balna aatĩ natẽ Yesu ẽthẽcĩ ne, “Et thĩ woccia jang cĩ katĩ ẽẽla Nyekuci thoothonniowẽy ĩcĩk gerthek ĩcĩgĩnĩk?”

27 Ẽdẽc Yesu athĩ ne, “Gii vẽlẽk cĩ adĩccẽ eet, athii cĩ õkõmĩ ĩcĩ Nyekuco.”

28 Ma natẽ, ijin Pẽtũrũ ĩnõõnõ ethek ne, “Ma yoko naaga cĩk kũtũngtẽẽa kaal vẽlẽk cĩk kayakca, ĩthõng kowobti aniitia wo?”

29 Ẽdẽcĩ Yesu ĩnõõgõ ennei ne, “Kaduwacung dĩdĩ, eeta cĩk ũtũngtek korookjiok cĩgĩk, ngaay cĩgĩk, gõtõõnõgĩ, ngaagĩ kĩ baajigi, kõdẽ dõõlĩ cĩgĩk, nyatarka kabicoc cĩ Nyekuco, 30 anyĩwothi katĩ ĩnõõgõ kaala cĩk ijiar vẽlẽk loota ngato, ĩthõng anyĩwothi katĩ ĩnõõgõ rũgẽtĩ cĩ alna kũdũt tammuatiddina.”

Õthõõth Yesu thõõth cĩ daaĩth cĩnnĩ

(Bẽl Matewo 20:17-19; Marĩkõ 10:32-34)

31 Ma natẽ, ũũwĩ Yesu wobjiak cĩgĩnĩk cĩk ẽẽn õmmõtõ kĩ ramma ẽẽ, kabanyca, ĩthõng ethek ne, “Kõvvõ yoko katĩ naaga Yeruthalẽma, ĩthõng õvvõ katĩ edenyiay thoothiowa vẽlẽk wũk balna ẽhẽẽd eeta cĩk õthõõth molook cĩ Nyekuco, nyatarka Ngẽrtĩ Eeto natẽ. 32 Anyĩwothi katĩ nẽ eet cĩk athii cĩ ẽẽn Yudei. Uuk katĩ nẽẽgẽ ĩnõõnõ, ĩthõng adaaccitõ ĩnõõnõ, ĩthõng uturyik amũta, ĩthõng uruit ĩnõõnõ. 33 Ĩthõng ma katĩ vurtia cĩ wathinniok iyyio, arũkna katĩ nẽ daaĩtha.”

34 Athii balna wobjiaha cĩ aga thõõth cĩ õthõõth Yesu wo, nyatarka balna alugunyi thõõth coo kĩ ĩnõõgõ.

Anyĩk Yesu et cĩ rubenĩ kĩcĩnẽ

(Bẽl Matewo 20:29-34; Marĩkõ 10:46-52)

35 Ma balna ngĩĩ õjõõn Yesu kĩ Jeriko, aavĩ balna eeti cĩ rubenĩ ĩmma cĩ ala eet gõõla kabanyca. 36 Ma balna ngĩ athĩrar nẽ meelitin cĩ õwõ natẽ ẽẽ, ijin nẽ eet ethek ne, “Nyia thĩnõ lõgõth?” 37 Ẽdẽcĩ eeta ethei ne, “Yesu cĩ Natharẽtĩ cĩ õwõ wo.”

38 Ma balna ngĩ athĩrar nẽ ketee wo, ũtũvvũ ĩĩ ne, “Yesu Ngẽrtĩ Davide, tamatĩhanĩ!”

39 Egerenyeei kẽnnẽ eeta cĩk uwuantẽcĩ ẽẽ, ennei ne, tivanẽ. Acalcal kẽnnẽ õrrõt athĩ ne, “Ngẽrtĩ Davide, tamatĩhanĩ!”

40 Ma natẽ, ĩbĩl Yesu ngaatĩ aduwacĩ eet kayakta ĩnõõnõ. Ma balna ngĩ ayahai wo, ijin Yesu ĩnõõnõ ethek ne, 41 “Nyia cĩ adiimi niia kĩdĩmanei na aniitia?”

Ẽdẽcĩ nẽ athĩ ne, “Makayyioit, kadiimi kacĩnẽ.”

42 Ngaatĩ ẽthẽcĩ Yesu ĩnõõnõ ne, “Cĩnẽ. Anyi leminiti cunnie aniitia cĩnẽ.”

43 Ma tamanoko ĩcĩnẽ eeti neccie nĩĩco noko, ĩthõng õwõb Yesu, ĩthõng ĩdĩhĩth Nyekuc. Ma balna ngĩ acĩn eeta vẽlẽk wo, ĩdĩhĩthĩt nẽẽgẽ buu Nyekuc.