Marĩkõ 10

Thõõth cĩ õõgĩ eeti ngaa

(Bẽl Matewo 19:1-12; Luka 16:18)

Ma baa ngĩ ũtũngek Yesu nginicẽ, ĩthõng ũũk looca cĩ Yudea, ĩthõng abaaẽ Lĩĩl cĩ Yordanĩ. Nga avvu alutiay meelitini cĩ eetu ĩnõõnõ noko, ngaatĩ thĩ alimanĩ Yesu ĩnõõgõ kĩ gõõ dõõkĩthĩ.

2 Ma balna natẽ ivitia Varithei gwuak ĩcĩnnĩ, ĩthõng ĩtĩmanit ĩnõõnõ ngatĩ ajini ẽthẽcĩ ne, “Duwaet da, ẽlẽmĩ woccia Ngiranĩ ngatĩ õõgĩ eeti ngaa cĩnnĩ?”

3 Atajan Yesu ĩnõõgõ ethek ne, “Anyung da Mutha agiitia Ngiran jang?”

4 Ẽdẽcĩ nẽẽgẽ Yesu ethei ne, “Ẽlẽmacĩ balna Mutha et cĩ maacĩ kẽtẽhẽẽd nyaraga, cĩ õõgĩ nẽ ngaa cĩnnĩ, ĩthõng anyĩk ĩnõõnõ, ĩthõng umurek ĩnõõnõ tuu.”

5 Ngaatĩ thĩ ẽthẽcĩ Yesu ĩnõõgõ ne, “Nyatarka balna õkõmĩ ooti cuguk, ĩnõõnõ thĩ cĩ ẽhẽẽdacung Mutha Ngiran coo wo. 6 Ĩthõng thĩ, balna ĩcowu ĩcĩ tengenyianĩt cĩ ẽngẽnycanĩ Nyekuci looc, ‘Ẽngẽnyca balna nẽ et cĩ maacĩ kĩ ngaa cĩ ngayyi.’ 7 ‘Ĩnõõnõ thĩ cĩ ũũngnĩcẽ eeti kõrõõk cĩ baatĩnnĩ kĩ cĩ yaatĩnnĩ, ĩthõng ũũk itiwõõy, 8 ĩthõng õõt ũrũmtẽ kĩ ngaa cĩnnĩ kĩĩtõ codoi doo.’ Ĩthõng, ĩthĩnga nẽẽgẽ ẽẽn ramma thõng, ĩthõng thĩ, ivitia nẽẽgẽ odoyyie doo. 9 Ĩthõng thĩna, nyĩ anyi et ĩmma kẽngẽr gii wũ ũrũm Nyekuci kõdõwẽ.”

10 Ma balna ngĩ imiiryie Yesu kĩ wobjiak cĩgĩnĩk õõt ciitha, ivitia ijinit nẽẽgẽ ĩnõõnõ naboo thõõth cĩ ogintio ẽẽ. 11 Ẽdẽcĩ Yesu ĩnõõgõ ethei ne, “Eeti cĩ õõg ngaa cĩnnĩ, ĩthõng itik ĩmma naboo, adĩman nẽ thõõth cĩ gerthe ngatĩ ũũngnĩcẽ ngaa cĩnnĩ. 12 Ĩthõng ma ngĩ abũrĩ ngaa maac cĩnnĩ, ĩthõng ũũk itihie naboo, adĩman nẽ buu thõõth cĩ gerthe.”

Agatan Yesu lõgõõ cĩk kĩdĩk

(Bẽl Matewo 19:13-15; Luka 18:15-17)

13 Ayahai baa eeta gwuak dõõlĩ Yesu, katadĩk nẽ athĩn cĩgĩnĩk ĩnõõgõ, kĩĩ kagatan. Egerenyeei kẽggẽ balna wobjiaha cĩgĩnnẽk eet cĩk ayaha dõõlĩ ẽẽ. 14 Ma balna ngĩ acĩn Yesu thõõth coo wo, ikiyyia avarac nẽ õrrõt, ĩthõng ethek ĩnõõgõ ne, “Anycĩk dõõlĩ kivitia ĩcannĩ, nyĩ alamnyu ĩnõõgõ, nyatarka adiim kabicocĩ cĩ Nyekuco eet cĩk õgõõn kĩ nẽẽgẽ. 15 Kaduwacung na agiitia thõõth dĩdĩ, mĩ athii cĩ ẽlẽmĩ eeti kabicoc cĩ Nyekuco, kĩcĩ ẽlẽmĩ doolec cĩ dĩcĩ wo, athii katĩ nẽ cĩ iithio kabicoc cĩ Nyekuco kũdũt.” 16 Ngaatĩ thĩ balna arabũũtĩ Yesu dõõlĩ athĩnẽy cĩgĩnĩk, ĩthõng atadĩk athĩn ooti cĩgĩk, ĩthõng agatan ĩnõõgõ.

Et cĩ aballie

(Bẽl Matewo 19:16-30; Luka 18:18-30)

17 Ma balna mĩ ithianaĩ Yesu wueet, avira kẽnnẽ eeti ĩmma kĩĩ kakatek ĩnõõnõ kuthungti ĩcowu, ĩthõng ĩĩ ne, “Limannioit cĩ abũnna, kogooni woccia na kuu, kĩĩ katĩ kũmũda rũgẽt cĩ alna kũdũt?”

18 Ẽdẽcĩ kẽnnẽ Yesu ĩnõõnõ ethei ne, “Avvũyya niia aneeta etheca ne, kabũnna nyia? Athii eeti cĩ abũnna tõ, Nyekuc dõ cĩ abũnna. 19 Aga niia tĩrĩthẽntiok cĩk Nyekucak cĩk athĩ ne, ‘Nyĩ arui niia et, nyĩ õkõyyẽ ngaa cĩ et ĩmma, nyĩ õgõrthẽ niia, nyĩ ĩgooli et, nyĩ eyewothi et kirirẽn, ĩthõng tõngõlẽ niia baaba cunni kĩ yaaya.’ ”

20 Ĩthõng ẽdẽc eeti neccie Yesu ethek ne, “Limannioit, kũthũtẽ balna na tĩrĩthẽntiok cĩkkõ baa kũnũũk baa nga keeni dĩca.”

21 Ĩthõng balna atahamĩk Yesu ĩnõõnõ, ĩthõng ĩmĩnan ĩnõõnõ jurrung, ĩthõng ethek ne, “Ũtũngewu niia gii codoi dõ. Bĩt tũũwõĩ kaal vẽlẽk cĩk ayahi niinia, ĩthõng anyiwu nyarobinya nĩĩkẽ eet cĩk ẽẽn ngĩjũrra, ĩthõng ijiowa katĩ niia balinit cunni tammuatiddina. Ĩthõng thĩ, ikiyyia õwõba aneeta.”

22 Ma balna mĩ athĩrar eeti coo thõõth coo wo, angarunyana nguum cĩnnĩ, ĩthõng ũtũwẽ ũũk mothintia, nyatarka balna aballie nẽ õrrõt.

23 Ma thĩ balna natẽ ummudie Yesu, ĩthõng ethek wobjiak cĩgĩnĩk ne, “Õkõmĩ õrrõt ngatĩ iithiowĩ balliowa kabicoc cĩ Nyekuco!”

24 Ma thĩ balna natẽ utubuantẽ wobjiaha, nyatarka thõõth cĩnnĩ ẽẽ, õrrõt. Ĩthõng thĩ, ĩthĩ Yesu naboo ne, “Dõõlĩ cĩganĩk, õkõmĩ õrrõt ngatĩ iithiowĩ eeti ĩmma kabicoc cĩ Nyekuco! 25 Amũjĩ ngatĩ iithiowĩ nyaakalĩ keberec cĩ lĩbĩrawõ, kijiar ngatĩ iithiowĩ eeti cĩ aballie kabicoc cĩ Nyekuco.”

26 Ĩthõng balna ivitia utubuantẽ wobjiaha, nyatarka thõõth coo. Ĩthõng ivitia ijintõy nẽẽgẽ dõ ĩĩtõ ne, “Et jang woccia katĩ cĩ eliay?”

27 Ma thĩ balna ĩcĩn Yesu ĩnõõgõ jurrung, ĩthõng ethek ne, “Õkõmĩ thõõth coo eetĩnẽy, ĩthõng athii kẽnnẽ cĩ õkõmĩ kĩ Nyekuc, nyatarka amũjĩ kaala vẽlẽk kĩ ĩnõõnõ.”

28 Ĩthõng ẽdẽcĩ Pẽtũrũ Yesu ethei ne, “Cĩn da, kũtũngtẽẽa naaga kaal vẽlẽk, ĩthõng kowobti aniitia!”

29 Ma natẽ ẽdẽc Yesu ĩnõõgõ ethek ne, “Kaduwacung na agiitia thõõth dĩdĩ, mĩ ũtũngek eeti ĩmma kõrõõk cĩnnĩ, kĩ ngõõnõgĩ, kõdẽ gõtõõnõgĩ, kõdẽ baatĩnnĩ, kõdẽ yaatĩnnĩ, kõdẽ dõõlĩ, kõdẽ manẽẽn, nyatarka aneeta kĩ Nyemut cĩ Abũnna, 30 amũda katĩ nẽ anyinit ngõnana eet tur korookjiok kĩ gõtõõnõgĩ kĩ ngõõnõgĩ kĩ ngaagĩ kĩ dõõlĩ kĩ manẽẽn, ma katĩ vurtia ĩcĩ canano, amũda katĩ nẽ rũgẽt cĩ alna kũdũt. 31 Ĩthõng thĩ, eeta cĩk meelĩk cĩk yoko uwuantẽ wo, avvu katĩ aturna, ĩthõng cĩk meelĩk cĩk aturna yoko wo, avvu katĩ uwuantẽ.”

Õthõõth Yesu thõõth cĩ daaĩth cĩnnĩ naboo

(Bẽl Matewo 20:17-19; Luka 18:31-34)

32 Õvvõ balna Yesu kĩ wobjiak cĩgĩnĩk gõõla ĩcĩ Yeruthalẽmĩ. Uwuantẽcĩ balna Yesu wobjiak cĩgĩnĩk, atdirlangan balna thõõth cĩ õthõõth Yesu ĩnõõgõ õrrõt, ĩthõng otongollie eeta cĩk õwõba ĩnõõgõ vurtia buu. Ma natẽ naboo, ũũwĩ nẽ wobjiak cĩk ẽẽn õmmõtõ kĩ ramma wo kabanyca, ĩthõng uduwak thoothonniok cĩk katĩ õvvõ edenyiay kĩ ĩnõõnõ. 33 “Ĩthĩktõy, kõvvõ yoko naaga Yeruthalẽma ngatĩ katĩ õkkõ anyĩwothĩcẽ Ngẽrtĩ Eeto makayyiok cĩk paadĩrnyawu kĩ limanniok cĩk Ngiranak. Eteedi katĩ nẽẽgẽ ĩnõõnõ daaĩth, ĩthõng anycĩk ĩnõõnõ eet cĩk athii cĩ ẽẽn Yudei, 34 cĩk katĩ adaac ĩnõõnõ, urthii amũta, uuk thõng, ĩthõng uruita. Ma katĩ vurtia cĩ wathinniok iyyio, arũkna katĩ nẽ daaĩtha.”

Jinẽnĩt cĩ Jemithi kĩ Yoanẽ

(Matewo 20:20-28)

35 Avvu balna lõgõõ cĩk Thebedeo Jemithi kĩ Yoanẽ amũdaai Yesu, ĩthõng ijinit ĩnõõnõ entek ne, “Limannioit, kadiimnyi naaga aniitia dĩmanehet gimma cĩ kajinni aniitia.”

36 Ma natẽ ijin Yesu ĩnõõgõ ethek ne, “Adiimnyu niigia aneeta kĩdĩmanewung agiitia nyia?”

37 Ẽdẽcĩ thĩ balna nẽẽgẽ ĩnõõnõ ethei ne, “Anyet ageeta kaavu ĩmma attia cunni ĩcĩ athio, ĩthõng aavu ĩmma attia cunni ĩcĩ angettio, bulẽnta cĩ makathĩt cunni.”

38 Ĩthõng ẽdẽc Yesu ĩnõõgõ ethek ne, “Athii niigia cĩ agayyu gii cĩ ajinnu niigia wo.” Ulonu woccia niigia ngatĩ awuddu lõkũlkũl cĩ hecinto cĩ katĩ kawudi na, kõdẽ woccia agamnyu batithimo cĩ katĩ kagami na cĩ hecinto wo?

39 Ma thĩ balna edecit nẽẽgẽ ĩĩtõ ne, “Ii.”

Ĩthõng uduwak Yesu ĩnõõgõ ethek ne, “Abũnna, awudeenu katĩ niigia lõkũlkũla ĩcĩ katĩ kawũdẽnẽ na, ĩthõng katĩ agamtu batithimo cĩ kagami na! 40 Ĩthõng thĩ, athii na cĩ kayahẽ makathĩt cĩ woccia kẽbẽranẽ et cĩ woccia aavĩ attia cannĩ ĩcĩ athio, kõdẽ ĩcĩ angettio. Ayait taabĩta cĩkkõ eet cĩk eberyiay vẽlẽk, ĩthõng Nyekuc dõ cĩ ẽbẽra ĩnõõgõ.”

41 Ma balna ngĩ athĩrar wobjiaha cĩk ẽẽn õmmõtõ thõõth coo wo, ivitia avaraccik nẽẽgẽ Jemith kĩ Yoanẽ. 42 Ngaatĩ thĩ balna avaanĩ Yesu ĩnõõgõ vẽlẽk, ĩthõng ethek ne, “Agayyu niigia alaanẽta cĩk eet cĩk athii cĩ ẽẽn Yudei ayak makayyiok, ĩthõng ẽyẽla tiirthẽt, ĩthõng amĩnan makayyiowa cĩk obbitik ngatĩ ẽyẽlanĩ tiirthẽt cĩnĩng makathĩta. 43 Ĩthõng thĩ, nyĩ anyiccu thõõth coo kutugu ketee ĩcunung. Ĩthõng mĩ adiim eeti ĩmma ẽẽn makayyioit cunung, anycĩk niigia ĩnõõnõ kĩĩ nyakapanait cĩ gõõnõgĩ õõgĩ vẽlẽk, 44 ĩthõng mĩ adiim eeti ĩmma ngĩ uwuantecung agiitia, anycĩk niigia ĩnõõnõ kĩĩ nyakapanait cĩ eet vẽlẽk. 45 Nyatarka athii balna cĩ aku Ngẽrtĩ Eeto loota ngato, kĩĩ katĩ kivitia kiticantothĩk eeta ĩnõõnõ, aku balna nẽ, kĩĩ katĩ kiticanothĩk nẽ eeta, ĩthõng anyĩk rũgẽt cĩnnĩ kẽẽla eet vẽlẽk.”

Anyĩk Yesu Bartimewo kĩcĩnẽ

(Bẽl Matewo 20:29-34; Luka 18:35-43)

46 Ma balna mĩ ivitia õdõlanit nẽẽgẽ Jeriko. Ĩtĩngathõ Yesu kĩ wobjiak cĩgĩnĩk kĩ meelitin cĩ balna arũmẽ kĩ ĩnõõnõ, ĩthõng ũtũngtek Jeriko, aavĩ balna rubenniaiti ĩmma cĩ athĩ thar Bartimewo ngẽrtĩ Timeo loota natẽ. 47 Ma balna ngĩ athĩrar nẽ athĩ ne, Yesu cĩ Natharẽtĩ cĩ õwõ ẽẽ, ẽgẽrẽny nẽ ĩthĩ ne, “Yesu! Ngẽrtĩ Davide, tamatĩha aneeta!”

48 Egerenyeei balna eeta cĩk meelĩk ĩnõõnõ ethei ne, “Tivanẽ!” Ĩthõng thĩ, balna nga ẽgẽrẽny nẽ õrrõt noko athĩ ne, “Ngẽrtĩ Davide, tamatĩha aneeta!”

49 Ma balna natẽ, ĩbĩl Yesu, ĩthõng uduwak eet ethek ne, “Utuvvuyyia da ĩnõõnõ kikiyyia ngato.” Ĩthõng ũtũvvẽcõ nẽẽgẽ rubenniait nĩcẽ entek ne, “Anyĩk thĩnĩn cunni kõkõm, tĩnga jiena, avvuyyi aniitia Yesu.” 50 Ngaatĩ thĩ balna atdũkẽcĩ rubenniaiti cẽrẽm cĩ ahimit nẽ ẽla cĩnnĩ ẽẽ, loota, ĩthõng õngõth tiddina ũũk ĩcĩ Yesu.

51 Ĩthõng thĩ, balna ijin Yesu ĩnõõnõ ethek ne, “Adiimi niia kadai na aniitia nyia?”

Ẽdẽcĩ rubenniaiti Yesu ethei ne, “Limannioit, kadiimi na kacĩnẽ.”

52 Ngaatĩ thĩ balna aduwacĩ Yesu ĩnõõnõ ẽthẽcĩ ne, “Bĩtõ, anyi aniitia leminiti cunnie bũna.” Ma balna natẽ ĩcĩnẽ nẽ, ĩthõng õwõb Yesu.