9
Ma thĩ balna uduwak Yesu ĩnõõgõ ethek ne,
“Kaduwacung na dĩdĩ,
aatĩ eeta gwuak kõrgẽna cunung cĩk katĩ athii,
cĩ adaaĩ ngaanĩ kĩcĩnĩt kabicoc cĩ Nyekuco ngatĩ akuni tiirthẽta.”
Othooththiõy Yesu kĩ Mutha kĩ Elija
2 Ma balna vurtia cĩ wathinniok tõrkõnõm,
õvvõ balna Yesu kĩ Pẽtũrũ,
Jemith kĩ Yoanẽ,
iriok õvvõ thiira cĩ wuuni ĩcĩ õvvõ aatẽ nẽẽgẽ dõ.
Ma thĩ balna natẽ,
ũtũwẽ ẽlẽ cĩ Yesu taranyun ĩcĩnĩng.
3 Ĩthõng atalanyit ceremuana cĩgĩnnẽk ĩĩtõ võõrĩ pẽr,
athii cĩ aduwõy kĩ cĩk woccia ũũny eeti ĩmma loota ngato vẽlẽk.
4 Ma natẽ,
ĩcĩnĩt wobjiaha Elija kĩ Mutha ngatĩ õthõõthõnẽ kĩ Yesu.
5 Ngaatĩ thĩ balna õthõõthĩcẽ Pẽtũrũ Yesu ẽthẽcĩ ne,
“Limannioit,
abũnna õrrõt ngatĩ kaatẽ naaga vẽlẽk ngato,
kẽtẽngẽnyca da tugguet iyyio,
cunni codoi,
cĩ Mutha codoi,
ĩthõng ĩthĩ codoi cĩ Elija.”
6 Ẽrẽk thĩ balna Pẽtũrũ thõõth cĩ athĩ ne,
kuduwa, nyatarka balna ongollie nẽẽgẽ thõõth coo õrrõt.
7 Ma natẽ,
ilibak diith cĩ aku abung ĩnõõgõ,
ĩthõng ĩthĩraritõ molook ĩmma diitha cĩ õthõõth athĩ ne,
“Ngẽrnanĩ coo cĩ kamĩnani õrrõt, ĩthĩrarit ĩnõõnõ.”
8 Ma balna mĩ amuudi nẽẽgẽ tamanoko wo,
acĩn kẽnnẽ nẽẽgẽ kothii et ĩmma cĩ arũmẽ kĩ ĩnõõgõ,
Yesu dõ.
9 Ma balna ngĩ ullucciay nẽẽgẽ thiira tiddina ivitia loota,
ikiyyia ĩtĩrĩth Yesu ĩnõõgõ ethek ne,
“Nyĩ ovvoyyu aduwaccu et ĩmma gii wũ viyyio acĩnnu niigia,
gii ngĩ ũrũga Ngẽrtĩ Eeto daaĩtha.”
10 Ma thĩ balna natẽ uthuutti nẽẽgẽ thõõth cĩ atĩrĩthĩ Yesu ĩnõõgõ ẽẽ,
ĩthõng othoothitõ thõõth cĩ õthõõth Yesu cĩ athĩ ne,
“Karũkna katĩ daaĩtha.”
11 Ĩthõng ijinit nẽẽgẽ Yesu entek ne,
“Nyia limanniowa cĩk Ngiran cĩ Mutha kĩĩtõ ne,
uwuantiay koccia Elija ĩcĩ owu ngaanĩ kikiyyia Kiristo wo?”
12 Ẽdẽcĩ Yesu ethei ne,
“Uwuantiay Elija ĩcĩ owu,
kĩĩ katĩ kikiyyia kĩdĩmanek gii vẽlẽk.
Ĩthõng nyia kẽtẽhẽdẽ Nyaragawa cĩ Nyekuco athĩ ne,
apĩrna katĩ Ngẽrtĩ Eeto,
ĩthõng ẽhẽcẽ õrrõt, ĩthõng ũtũbũrĩt eeta ĩnõõnõ wo?a
13 Ĩthõng thĩ,
kaduwacung na agiitia,
ikiyyia Elija vẽlẽk, ĩthõng ĩdĩmantek eeta ĩnõõnõ thoothonniok cĩk gerthek cĩk adiim nẽẽgẽ kĩcĩ aduwa Nyaraga cĩ Nyekuco wo.”b
Anyĩk Yesu logoo cĩ maacĩ kũbũna
(Bẽl Matewo 17:14-20; Luka 9:37-43)
14 Ma balna ivitia Yesu kĩ wobjiak cĩgĩnĩk cĩk ẽẽn iyyio,
amũdaai thĩ kẽnnẽ meelitin cĩ eetu arũmẽ kõdõwẽ kĩ wobjiak wũgĩnĩk õõgĩ.
Ẽpẽkanõy balna limanniowa cĩk Ngiranak wo kĩ ĩnõõgõ.
15 Ma natẽ ivitia ukulliek eeta jien õrrõt ngatĩ acĩnĩ Yesu,
ngaatĩ aviri õvvõ ĩthaawĩ ĩnõõnõ.
16 Ma thĩ baa natẽ ijin Yesu wobjiak cĩgĩnĩk ethek ne,
“Nyia cĩ ẽpẽkanonu niigia kĩ ĩnõõgõ wo?”
17 Ẽdẽcĩ eeti ĩmma meelitina athĩ ne,
“Limannioit,
kayahaci na aniitia logoo cannĩ,
nyatarka ayak nẽ ririwac cĩ gerthe, ĩthõng athii cĩ õthõõthĩ.
18 Ĩthõng dõõkĩthĩ ngĩ agam ĩnõõnõ ririwacĩ cĩ gerthe wo,
uuki ĩnõõnõ looc,
ĩthõng anyĩk kuduv kũtũgĩ,
adak nẽ nyĩgĩt cĩgĩnĩk,
ĩthõng anyĩk kõkõm ẽlẽ kak.
Kaduwai balna na wobjiak cugunik koo kitingkacõ ririwac nĩcẽ, amaacĩ kẽnnẽ ĩnõõgõ kũdũt.”
19 Ĩthõng balna natẽ uduwak Yesu ĩnõõgõ ethek ne,
“Niigia eeta cĩk athii cĩ ayakcu leminit wo,
karũmẽ thẽk katĩ na kĩ agiitia kĩĩ tĩngan?
Nyia thẽk kũrũmtẽ na kĩ agiitia wo?
Ayakta doolec ngato ĩcannĩ.”
20 Ngaatĩ thĩ balna ayahacĩ nẽẽgẽ ĩnõõnõ Yesu.
Ma balna mĩ acĩn ririwacĩ cĩ gerthe wo Yesu,
õtõmõõĩ logoo coo tamanoko uuki ĩnõõnõ looc, kipirpir doolec kuduv kũtũgĩ cĩnnẽ.
21 Ĩthõng ijin Yesu baatĩ dooleco ethek ne,
“Ẽẽn wathinniowa,
ĩthõng cĩ õgõõnĩ nẽ ketee?”
Ẽdẽcĩ baatĩ dooleco athĩ ne, “Ngaatĩ thẽk balna kĩdĩcthẽta.
22 Atdukeei ĩnõõnõ ririwacĩ cĩ gerthe wo gõõ guyyiatõ,
kõdẽ maamĩytõ adiim aruk ĩnõõnõ. Ĩthõng thĩ, ngĩ ayai niia tiirthẽt tamatĩhet ageeta.”
23 Ẽdẽcĩ Yesu ĩnõõnõ ethei ne,
“Nyia ethea niia aneeta ne,
‘Ngĩ ayai niia tiirthẽt wo’? Amũjĩ kaala vẽlẽk eta cĩ ẽlẽmĩ thõõth cĩ Nyekuco.”
24 Ma natẽ tamanoko utulu baatĩ dooleco nĩco noko ĩthĩ ne,
“Kayai na leminit,
ẽẽla niia tooriihia kĩĩ maka!”
25 Ma balna mĩ acĩn Yesu meelitin ngatĩ avĩjahacĩ ĩnõõnõ joonui,
egerenyek nẽ ririwac cĩ gerthe ẽẽ,
ethek ne,
“Niia ririwacĩ cĩ anyi eet kidiitie kĩĩna,
ĩthõng athii cĩ õthõõth wo, kaduwaci na ketheci ne, tẽẽha ẽla cĩ dooleco, ĩthõng nyĩ nga amiirothi ẽlẽ cĩnnĩ naboo!”
26 Ĩthõng thĩ,
balna utulu ririwacĩ cĩ gerthe ẽẽ,
ĩthõng õtõmõõĩ doolec õrrõt uuki looc,
ngaatĩ ẽẽktanẽ ririwacĩ cĩ gerthe ẽẽ,
ĩcĩnnĩ. Ĩthõng ikiyyia aavu doolec kĩcĩ adaaha, ĩthõng balna natẽ ĩĩtõ eeta vẽlẽk ne, “Adaaha!”
27 Ĩthõng thĩ, ẽẽl Yesu ĩnõõnõ, ĩthõng agam nẽ athiit cĩnnĩ, ĩthõng ĩbĩl doolec jiena.
28 Ma balna vurtia cĩ ẽtẽẽĩ Yesu ciith kĩ wobjiak cĩgĩnĩk,
õõt aavutõ mĩn,
ĩthõng ivitia ijinit nẽẽgẽ ĩnõõnõ dõ mĩn entek ne,
“Nyia da kerehet ageeta ngatĩ kingkawua ririwac cĩ gerthe ẽẽ?”
29 Ẽdẽcĩ Yesu ethei ne,
“Ingkayyi woccia ririwacĩ cĩ gerthe coo lawintia dõ.”
Õthõõth Yesu thõõth cĩ daaĩth cĩnnĩ naboo
(Bẽl Matewo 17:22-23; Luka 9:43b-45)
30 Ngaatĩ thĩ balna ũũngnĩcẽ Yesu kĩ wobjiak cĩgĩnĩk nginicẽ,
kĩĩ kõõt gõõla cĩ Galilea.
Athii balna nẽ cĩ adiim eet kagaacõ ngĩtĩ õkõyyĩ nẽ wo,
31 nyatarka aliman balna Yesu wobjiak cĩgĩnĩk ethei ne,
“Anyĩwothi katĩ Ngẽrtĩ Eeto athĩn cĩk eet cĩk katĩ õvvõ aruk ĩnõõnõ.
Ma vurtia ĩcĩ wathinniok iyyio,
arũkna katĩ nẽ daaĩtha.”
32 Ĩthõng thĩ,
balna athii cĩ aga nẽẽgẽ thõõth cĩ aduwa Yesu ẽẽ, ĩthõng ongollie ngatĩ ajini nẽẽgẽ ĩnõõnõ thõõth nĩcẽ.
Ngẽnẽ cobbi?
(Bẽl Matewo 18:1-5; Luka 9:46-48)
33 Ma balna mĩ ivitia õdõlanit Yesu kĩ wobjiak cĩgĩnĩk Kaparnaum,
ĩthõng ma balna mĩ aatĩ nẽẽgẽ ciitha ẽẽ,
ijin Yesu ĩnõõgõ ethek ne,
“Nyia wũ viyyio ẽpẽkanonu niigia gõõla?”
34 Ĩjakci balna wobjiaha athii cĩ ẽdẽcĩ ĩnõõnõ,
nyatarka balna ẽpẽkanõnĩ nẽẽgẽ thõõth cĩ athĩ ne,
“Ngẽnẽ cobbi kõrgẽna cĩnĩng.”
35 Ngaatĩ thĩ balna aavẽ Yesu loota,
ĩthõng ũtũvvũwa wobjiak cĩgĩnĩk cĩk ẽẽn õmmõtõ kĩ ramma ẽẽ,
ĩthõng ethek nẽ ĩnõõgõ ne,
“Ma ngĩ adiim eeti ĩmma uwantanĩ,
anycĩk ĩnõõnõ kutuura eetĩnẽy vẽlẽk,
ĩthõng ĩthĩ nẽ ticciannioit cĩ eet vẽlẽk.”
36 Ĩthõng thĩ,
õdõnga Yesu doolec,
kĩĩ kaanyĩk ĩnõõnõ kĩbĩl kõrgẽna cĩnĩng vẽlẽk,
ĩthõng arabũũt ĩnõõnõ athĩnẽy cĩgĩnĩk, kĩĩ kethek ĩnõõgõ ne,
37 “Eeti ĩmma cĩ ẽlẽmĩ doolec cĩ õgõõn kĩ cĩ kodongi na wo,
thaarĩy ĩcĩganĩk,
ẽlẽmnya aneeta,
ĩthõng eeti cĩ ẽlẽmnya aneeta,
athii cĩ ẽlẽmnya aneeta dõ,
ĩthõng thĩ, ẽlẽmĩ nẽ Et wũ balna itionana aneeta buu.”
Eeti cĩ athii cĩ aaburneccet ageeta ẽẽn cĩnac
38 Aduwaai balna Yoanẽ Yesu ethei ne,
“Limannioit,
kacĩnna balna naaga et ĩmma cĩ athii cĩ ẽẽn et cĩ meelitin cĩnac,
ngĩ ingka ririwac cĩ gerthe thaarĩy cugunik,
ĩthõng kuduktiaha naaga ĩnõõnõ kĩbĩl ngatĩ ingkawĩ ririwac cĩ gerthe thaarĩy ĩcugunik,
nyatarka athii cĩ ẽẽn nẽ et cĩnac.”
39 Ĩthõng balna thĩ ẽdẽc Yesu ĩnõõgõ ethek ne,
“Nyĩ abilnuu ĩnõõnõ,
nyatarka athii eeti ĩmma cĩ atican thõõth cĩ anaat eeta thaarĩy cĩganĩk,
ĩthõng ũtũwẽ õthõõtha aneeta vurtia tamanoko buth tõ,
40 nyatarka eeti cĩ athii cĩ abũrnet ageeta,
ẽẽn nẽ et cĩnac.
41 Ĩthõng kaduwacung na agiitia thõõth dĩdĩ,
mĩ anyung eeti ĩmma maam cĩk awuddu thaarĩy ĩcĩganĩk,
nyatarka eeginnu niigia eet cĩk Kiristo, amũda katĩ eeti neccie anyinit cĩnnĩ.
Tĩman cĩ anyet kẽgẽrẽthantõy
42 “Ĩthõng mĩ anyi eeti ĩmma doolec ĩmma cĩ ẽlẽmnya aneeta kẽgẽrẽthan thõõth cannĩ,
abũnna woccia ngatĩ ecebecu bĩĩ cobbi inyiawa cĩnnĩ,
ĩthõng utdukteewu ĩnõõnõ bũlũca.
43 Ĩthõng mĩ anyi aniitia athiiti cunnie dĩman thõõth cĩ gerthe,
tẽẽdak tuu.
Mayya ngatĩ iithiowe rũgẽt cĩ aavĩ kũdũt ayahi athiit codoi dõ,
kijiar ngatĩ ẽyẽhẽ athĩn vẽlẽk, ĩthõng uuwu guyyia cĩ aavĩ kũdũt,c
44 ngatĩ aavẽ kulutanti cĩnĩng cĩ athii cĩ adaaĩ, ĩthõng athii cĩ adĩĩtĩ gua kũdũt.
45 Ĩthõng mĩ anyi aniitia thoocĩ cunnie dĩman thõõth cĩ gerthe tẽẽdak tuu,
mayya ngatĩ õkõyyẽ rũgẽta cĩ aavĩ kũdũt ayahi thooc codoi dõ,
46 ngatĩ aavẽ kulutanti cĩnĩng cĩ athii cĩ adaaĩ, ĩthõng athii cĩ adĩĩtĩ gua kũdũt.
47 Ĩthõng naboo mĩ anyi aniitia keberecĩ cunnie dĩman thõõth cĩ gerthe,
tõkõcak tuu,
mayya ngĩ ayai keberec codoi ngatĩ iithio kabicoc cĩ Nyekuco kijiar mĩ ayai kẽbẽrẽ ramma, ĩthõng utdukothiwu guyyia ĩcĩ aavĩ kũdũt,
48 ngatĩ
“ ‘aavẽ kulutanti cĩnĩng cĩ athii cĩ adaaĩ,
ĩthõng athii cĩ adĩĩtĩ gua kũdũt.’d
49 Amũda katĩ eeta vẽlẽk tĩmaninit cĩ hecinto guyyia.
50 “Abũnna balangĩ,
ĩthõng mĩ ikiyyia ũcũlal,
akuni katĩ anyi niia ĩnõõnõ kũmũcar naboo kuu?
Ayait balang cĩ gõõnĩthẽto kõrgẽna cunung,
ĩthõng aavut jurrung kĩ goonogu.”