Ũtũwẽ ẽlẽ cĩ Yesu
(Bẽl Marĩkõ 9:2-13; Luka 9:28-36)
17
Ma balna vurtia cĩ wathinniok tõrkõnõm, ikiyyia ũũwĩ Yesu Pẽtũrũ kĩ Jemith kĩ Yoanẽ gõtõnĩ Jemithi, thiira ĩcĩ wuuni õrrõt. 2 Ma baa thiira nĩcẽ, ikiyyia ũtũwẽ ẽlẽ cĩ Yesu kẽbẽrẽnĩy ĩcĩgĩk. Ataalĩth balna nguum cĩnnẽ kaavu kĩ kõrra, ĩthõng võõrĩ balna ceremuana cĩgĩnnẽk kaavutõ kĩ lanyĩtĩ. 3 Ma balna natẽ noko, ilibtiak Mutha kĩ Elijaa ĩnõõgõ, ngaatĩ avvu õthõõthõnẽ kĩ ĩnõõnõ.4 Ma natẽ, othoothĩk Pẽtũrũ Yesu ethek ne, “Makayyioit, abũnna õrrõt ngatĩ kaatẽ naaga ngato. Mĩ thẽk adiimi niia, nyẽ kẽtẽngẽnycaha tugguet iyyio, cunni codoi, cĩ Mutha codoi, ĩthõng cĩ Elija codoi.”
5 Ma balna ngaanĩ õthõõth nẽ, ikiyyia ũmmũt ĩnõõgõ diith ĩmma cĩ ataalĩth õrrõt, ĩthõng õthõõth moloowĩ ĩmma diitha ĩĩ ne, “Ngẽrnanĩ cĩ kamĩnani coo, katali na õrrõt, nyatarka ĩnõõnõ. Ĩthĩhĩt niigia ĩnõõnõ!”
6 Ma balna ngĩ athĩrar wobjiaha thõõth coo wo, ivitia otongollie nẽẽgẽ õrrõt, ngaatĩ akannĩ nẽẽgẽ kuthungti looc, ĩthõng ululit nguumti cĩgĩk. 7 Ĩthõng thĩ, balna natẽ, ikiyyia uwum Yesu ĩnõõgõ, ĩthõng ethek ne, “Nyĩ ongolinu! Ĩtĩngath jiena.” 8 Ma balna ngĩ acĩnẽ nẽẽgẽ ẽẽ, acĩn kẽggẽ Yesu dõ.
9 Ma balna ngĩ ullucciay nẽẽgẽ thiira tiddina, ikiyyia ĩtĩrĩth Yesu ĩnõõgõ ethek ne, “Nyĩ ovvoyyu aduwaccu et ĩmma gii wũ acĩnnu niigia kũdũt, kuumuc gii katĩ ngĩ ũrũga Ngẽrtĩ Eeto daaĩtha.”
10 Ngaatĩ ajini wobjiaha ĩnõõnõ ẽthẽcĩ ne, “Nyia kĩĩtõ limanniowa cĩk Ngiran cĩ Mutha ne, aku thẽk katĩ Elija ĩcĩ owu wo?”
11 Ẽdẽcĩ Yesu ĩnõõgõ ethei ne, “Kaduwacung na dĩdĩ, aku katĩ adĩmaneei Elija kaal vẽlẽk jurrung. 12 Ĩthõng thĩ, kaduwacung na dĩdĩ, ikiyyia Elija vẽlẽk, ĩthõng athii kẽnnẽ nẽẽgẽ cĩ agawĩ ĩnõõnõ. Ĩthõng thĩ, balna adĩman nẽẽgẽ ĩnõõnõ buth gõõla ĩcĩ gerthe õrrõt. Ĩthõng gõõla nĩcẽ dõ noko, õkkõ katĩ acananni Ngẽrtĩ Eeto athĩnẽy ĩcĩgĩk.” 13 Ngaatĩ balna avvunni agawĩ wobjiaha ngĩ, õthõõth Yesu thõõth cĩ Yoanẽ Batithta.
Anyĩk Yesu doolec cĩ maacĩ kũbũna
(Bẽl Marĩkõ 9:14-29; Luka 9:37-43)
14 Ma balna ivitia Yesu kĩ wobjiak cĩgĩnĩk ilibtiak meelitin, ĩthõng ikiyyia akatek eeti ĩmma ĩnõõnõ kuthungti, ĩthõng ethek ne, 15 “Makayyioit, tamatĩk logoo cannĩ wo, ẽhẽcĩ nabangkara ĩnõõnõ, ĩthõng apĩrna nẽ õrrõt. Ĩthõng cĩ gõõ atdukothi nẽ guyyia, kõdẽ maamĩy. 16 Kayahai balna na ĩnõõnõ wobjiak cugunik, ĩthõng athii nẽẽgẽ cĩ anyi ĩnõõnõ kũbũna.”
17 Ma baa natẽ, uduwak Yesu ĩnõõgõ ethek ne, “Eeginnu niigia eet cĩk athii cĩ ayakcu leminit, ĩthõng ahaddu thoothonniok cĩk gerthek, karũmẽ yoko thẽk katĩ na kĩ agiitia kuumuc kĩĩ katĩngan? Komogi koccia katĩ yoko thõõth cunung kĩĩ tĩngan? Yahaha aneeta doolec cĩ maacĩ wo ngato.” 18 Ngaatĩ baa ẽgẽrẽnyẽcĩ Yesu ririwac cĩ gerthe ẽẽ, tiirthẽta, ĩthõng ẽtẽha logoota nĩĩcẽ ngĩtĩvõrĩ, ngaatĩ abũnnanĩ nẽ itin nĩcẽ noko.
19 Ma balna vurtia cĩnnĩ, ivitia umuddiothĩk wobjiaha Yesu kabanyca, ĩthõng ijinit ĩnõõnõ entek ne, “Nyia kette katamacet ageeta ngatĩ kingkayyia ririwac cĩ gerthe ẽẽ?”
20 Ẽdẽcĩ Yesu ĩnõõgõ ethei ne, “Nyatarka ayakcu niigia leminit cĩ dĩcĩ! Ĩthõng thĩ, kaduwacung na dĩdĩ, mĩ ayait leminit cĩ dĩcĩ cĩ ẽẽn kĩ buracoc cĩ dĩcĩlĩm cĩ kẽẽt cĩ athĩ mathtad, enneccu woccia thẽk thiir coo ne, ‘Tĩnga ngato bĩt natẽ,’ ĩngathĩ thẽk katĩna. Athii katĩ thõõth cĩ amaacung agiitia tõ. 21 Ĩthõng thĩ, athii ririwacĩ cĩ gerthe coo cĩ õkkõ ngatĩvõrĩ, gii ngĩ ingkayyi lawintia kĩ ngatĩ kẽdẽthĩ eleeti daintia dõ.”
Õthõõth Yesu thõõth cĩ daaĩth cĩnnĩ naboo
(Bẽl Marĩkõ 9:30-32; Luka 9:43b-45)
22 Ma balna ngĩ nga õvvõ Yesu kĩ wobjiak cĩgĩnĩk Galilea, ikiyyia nẽ ethek ĩnõõgõ ne, “Õkkõ katĩ anyĩwothi Ngẽrtĩ Eeto eeta, 23 ĩthõng õvvõ katĩ nẽẽgẽ aruk ĩnõõnõ, ĩthõng thĩ, vurtia cĩ wathinniok iyyio, arũkna katĩ nẽ daaĩtha.” Ngaatĩ anyĩcẽ thoothiowa neekie vẽlẽk wobjiak komoththie õrrõt.
Dũmaninit cĩ mũcũrrũ cĩ Ciith cĩ Nyekuco
24 Ma balna ngĩ õdõlanit Yesu kĩ wobjiak cĩgĩnĩk kõrõõk cĩ gaalawu cĩ Kaparnaumi, õõt ijinit eeta cĩk alũt mũcũrrũ nyarobinya cĩk ẽẽn thĩĩk cĩk ẽẽn ramma cĩk Ciith cĩ Nyekuco Pẽtũrũ, entek ne, “Adũman thẽk limannioiti cunung ẽẽ, mũcũrrũ cĩ Ciith cĩ Nyekuco?”
25 Ẽdẽcĩ Pẽtũrũ ethei ne, “Ii, adũmanĩ.”
Ma balna ngĩ arawak Pẽtũrũ ciith, ẽtẽrẽhaĩ Yesu ijin ĩnõõnõ ethei ne, “Thimõnẽ, amui niia kuu, thõõth cĩ ajin eeta cĩk alũt mũcũrrũ wo? Alũta alaanẽta cĩk loocu mũcũrrũ ĩcĩ lõgõõ cĩgĩk, kõdẽ ĩcĩ eet õõgĩ?”
26 Ẽdẽcĩ Pẽtũrũ ethei ne, “Alũta ĩcĩ eet õõgĩ.”
Ĩthõng ẽdẽc Yesu ĩnõõnõ ethek ne, “Ĩthõng thĩ, athii lõgõõ cĩgĩk cĩ adũman mũcũrrũ. 27 Kĩĩ katĩ, athii naaga cĩ kaanyi eet cĩkkõ kavaracitõ, bĩt tdukek gii cĩ detinto bũlũcatõ, ĩthõng utugura kuluguac cĩ owu cĩ agami. Ngaak kũtũk cĩnnĩ, amũda katĩ niia nyarobiiac cĩ obbi cĩ ẽẽn thiihitb kũtũga cĩnnĩ cĩ ẽlẽnõy ngatĩ adũmanẽ mũcũrrũ cugunik kĩ cĩganĩk buu.”