Ngẽnẽ cobbi õrrõt Kabicoca cĩ Tammutiddino?
(Bẽl Marĩkõ 9:33-37; Luka 9:46-48)
18
Ma balna itin nĩcẽ, ivitia õõt wobjiaha ĩcĩ Yesu, ĩthõng ijinit ĩnõõnõ entek ne, “Ngẽnẽ cobbi õrrõt kabicoca cĩ tammutiddino?”2 Ma natẽ, ũtũvvũwa balna Yesu doolec cĩ dĩcĩ, ĩthõng aanyĩk ĩnõõnõ kĩbĩl kõrgẽna cĩnĩng. 3 Ĩthõng othoothĩk Yesu ĩnõõgõ ethek ne, “Kaduwacung na dĩdĩ, ma ngĩ athii niigia cĩ athimatu kĩ doolia cĩk kĩdĩk, athii katĩ cĩ iithioyyu kabicoc cĩ tammutiddino. 4 Ĩthõng thĩna, eeti cĩ athimatĩth kĩ doolec cĩ dĩcĩ coo wo, maka nẽ õrrõt kabicoca cĩ tammutiddino. 5 Ĩthõng eeti cĩ ẽlẽmĩ doolec cĩ dĩcĩ wo thaarĩy ĩcĩganĩk, ẽlẽmnya nẽ aneeta.
Kaal cĩk anyet kĩĩtõ gẽrẽthanniok
(Bẽl Marĩkõ 9:42-48; Luka 17:1-2)
6 “Ĩthõng thĩ, ngĩ anyĩk eeti ĩmma doolec cĩ dĩcĩ cĩ ẽlẽmnya aneeta wo, kẽgẽrẽthanõy, abũnna woccia ngatĩ kẽcẽbẽcĩ bĩĩ cobbi inyiawa cĩnnĩ, ĩthõng utdukothĩk nẽ bũlũcatõ kũtũdũdĩt maama. 7 Apĩrna lõõcĩ, nyatarka kaal cĩk anyi eet kẽgẽrẽthantõy! Avvu thẽk katĩ thoothonniowa cĩk gerthek neekie, ĩthõng thĩ, etedothi katĩ pĩrnanẽtĩ cĩ gerthe õrrõt et cĩ avvunni thoothiowa neekie wo! 8 Mĩ anyi athiiti, kõdẽ thoocĩ cunnie aniitia gẽrẽthanõy, tẽẽda, ĩthõng utdukeewu tuu! Mayya ngatĩ woccia ngĩ arugi eeni ngooliait, kijiar ngatĩ ayahẽ athĩn vẽlẽk, kõdẽ thoo vẽlẽk, ĩthõng utdukothiwu guyyia cĩ alna kũdũt. 9 Ĩthõng ngĩ anyi aniitia keberecĩ cunnie gẽrẽthanõy, tõkõca, ĩthõng utdukeewu tuu. Mayya ngatĩ ayahẽ keberec codoi dõ, ngĩ arugi, kijiar ngatĩ ayahẽ niia kẽbẽrẽ vẽlẽk, ĩthõng utdukothiwu guyyia cĩ aavĩ kũdũt.”
Iyiainit cĩ owovothi atheet cĩ athii
(Bẽl Luka 15:3-7)
10 Ma natẽ, õthõõth Yesu ĩthĩ ne, “Nyĩ athinnu dõõlĩ cĩk kĩdĩk wo ne, ẽẽn nẽẽgẽ kaal takarẽẽng. Nyatarka kaduwacung na dĩdĩ, acĩn anjĩlẽta cĩgĩk tammuatiddina dõõkĩthĩ nguum cĩ Baangĩ. 11 Aku balna Ngẽrtĩ Eeto, kikiyyia kẽẽl eet cĩk ithiicõ.
12 “Amukcu niigia nyia? Ma ngĩ ayak eeti athaa eet tur, ĩthõng ithii codoi doo. Athii woccia nẽ cĩ uungni cĩk ẽẽn eet wec kõmmõtõ kĩ tõrkõwẽc ẽẽ, thiira, ĩthõng ũũk ẽrẽpan cĩ athii ẽẽ? 13 Ĩthõng thĩ, ngĩ ijiowa nẽ atheet nĩcẽ, kaduwacung na dĩdĩ, ẽbẽlbẽl katĩ nẽ kijiar ngatĩ ayahĩ cĩk ẽẽn eet wec kõmmõtõ kĩ tõrkõwẽc ẽẽ, wũk balna athii cĩ athiinni. 14 Aavĩ kĩyokowẽ buu noko ĩcĩ Baaba cunung cĩ aavĩ tammuatiddina. Athii nẽ cĩ adiim doolec ĩmma dõõlẽnĩy ĩcĩk kĩdĩk koo kithii.
Gotonu cĩ adĩmaneci aniitia gii cĩ gerthe
(Bẽl Luka 17:3)
15 “Ngĩ adĩmaneci aniitia gotonu thoothonniok cĩk gerthek, bĩt yelek ĩnõõnõ gerthetin cĩnnĩ ngatĩ eeginnu niigia dõ kĩ ĩnõõnõ ramma. Mĩ athiknina, ĩthĩ nẽ gotonu cunni naboo. 16 Ĩthõng thĩ, mĩ abũrĩ ngatĩ athikni aniitia, bĩt yaha et codoi, kõdẽ ramma, kĩĩ katĩ, ‘thõõth vẽlẽk cĩ aduwuay kagawẽ eetĩnẽy ĩcĩk ẽẽn kẽbẽrẽ cĩk ẽẽn ramma, kõdẽ iyyioa cĩk acĩn thõõth coo ngatĩ ẽnnẽ dĩdĩ.’b 17 Ngĩ abũrĩ nẽ ngatĩ athĩknĩ ĩnõõgõ, duwak thõõth nĩcẽ eet cĩk kelethiawak. Mĩ abũrĩ nẽ ngatĩ athĩknĩ eet cĩk kelethiawak anycĩk ĩnõõnõ kaavu kĩ eeti cĩ athii cĩ agawĩ thõõth cĩ Nyekuco, kõdẽ kĩ eeti cĩ alũt mũcũrrũ.
18 “Ĩthõng kaduwacung na dĩdĩ, thõõth cĩ ecebju niigia loota ngato, ecebjie thẽk katĩ tammuatiddina buu, ĩthõng mĩ oogju niigia thõõth loota ngato, oogji thẽk katĩ tammuatiddina buu.
19 “Ĩthõng naboo kaduwacung na kethecung ne, mĩ elemonu niigia gii ĩmma ngĩ eeginnu ramma thõõtha ĩmmanĩ cĩ ajinnu loota ngato, adĩman katĩ Baangĩ cannie tammuatiddina thõõth nĩcẽ. 20 Nyatarka ma ngĩ alũtẽ eeta ramma, kõdẽ iyyio ngatĩ odoi, nyatarka thar cĩganĩk, kaavẽ na kõrgẽna cĩnĩng.”
Iyiainit cĩ owovothi ticciannioit cĩ athii cĩ alanẽcĩ et gerthetin cĩnnĩ
21 Ma natẽ, ũũk Pẽtũrũ ĩcĩ Yesu, ĩthõng ijin ethek ne, “Makayyioit, kuungni woccia na gõtõna cĩ adĩmanna aneeta buth ngõnana thõng, ngõnana tũrgẽrẽm?”
22 Ẽdẽcĩ Yesu ethei ne, “Athii cĩ ẽẽn ngõnana tũrgẽrẽm dõ! Ĩthõng ẽẽn ngõnana eet iyyio kõmmõtõ kĩ tũrgẽrẽm.c
23 “Ĩthõng thĩna, aavĩ kabicocĩ cĩ tammutiddino kĩ alaanĩ cĩ adiim ticcianniok cĩgĩnĩk kũdũmantek ĩnõõnõ nyarobinya wũk balna acuwana nẽẽgẽ ĩcĩnnĩ. 24 Ma balna ngĩ idiim nẽ nyarobinya cĩgĩnĩk, ayahiak ĩnõõnõ eeti ĩmma cĩ balna acuwana locibironya vucciaknya õmmõtõ cĩk daabak.d 25 Ma balna ngĩ acĩn alaanĩ ngatĩ amaacĩ ticciannioiti neccie ngatĩ adũmanĩ nyarobinya nĩĩkẽ ẽẽ, ikiyyia uduwak nẽ eet kutuyyiõĩ ticciannioit nĩcẽ, kĩ ngaa cĩnnĩ, kĩ dõõlĩ cĩgĩnĩk, kĩ gii vẽlẽk cĩ ayak nẽ, kĩĩ katĩ kũdũmantothĩk nyarobinya cĩgĩnnẽk alaan.
26 “Ngaatĩ akanẽcĩ ticciannioiti alaan kuthungti, ĩthõng ala ĩnõõnõ ĩthĩ ne, ‘Rẽẽwõy baai thẽk nõõnõ kĩdĩĩc, kadũmaneci thẽk katĩ na aniitia nyarobinya cugunik.’ 27 Ma natẽ, atamatĩk alaanĩ ticciannioit cĩnnĩ wo, ngaatĩ anyĩcẽ ĩnõõnõ kithii cĩ adũman nyarobinya nĩĩkẽ, ĩthõng ũtũngek ĩnõõnõ kũũk.
28 “Ĩthõng thĩ, balna ngĩ ũtũngothĩk ticciannioiti neccie, ikiyyia ũũk agam nẽ ticciannioit ĩmma cĩ balna acuwana nyarobinya cĩgĩnĩk wũk ẽẽn thĩĩke eet tur, ma natẽ, agam ĩnõõnõ logorlong, ĩthõng ucuda. Ĩthõng ethek ne, ‘Dũman nyarobinya cĩganĩk!’
29 “Ma balna natẽ, ikiyyia akatek ticciannioiti neccie buu ĩnõõnõ kuthungti, ĩthõng ĩlalek ĩnõõnõ ethek ne, ‘Rẽẽwõy baai thẽk nõõnõ kĩdĩĩc, ĩthõng katĩ kadũmaneci na aniitia nyarobinya cugunik.’
30 “Abũrĩ kẽnnẽ nẽ thõõth cĩ aduwaai ticciannioiti ẽẽ, ngaatĩ aarĩcẽ ĩnõõnõ kĩjana kuumuc gii ngĩ ũdũman nyarobinya cĩgĩnĩk ẽẽ. 31 Ma balna ngĩ acĩn ticcianniowa gwuak thõõth coo wo, ivitia omoththie nẽẽgẽ õrrõt. Ngaatĩ õvvõ aduwacĩ alaan thõõth cĩ atican ticciannioiti neccie ẽẽ.
32 “Ngaatĩ balna avaanĩ alaanĩ ticciannioit cĩ adĩman gõõnĩ buth ẽẽ, ĩthõng ethek ne, ‘Niia ticciannioiti cĩ gerthe wo, kutungeei balna na aniitia nyarobinya wũk baa gannĩk vẽlẽk, nyatarka balna ĩlalleca niia aneeta kutungeeina. 33 Athii da thẽk niia cĩ amanni goonu kĩ balna ngĩ kamanici na aniitia nyia?’ 34 Avaraci balna alaanĩ ticciannioit nĩcẽ õrrõt, ngaatĩ aarĩcẽ ĩnõõnõ kĩjana kuukitõ eeta õrrõt gii ngĩ ũdũman nyarobinya wũk baa acuwana nẽ.
35 “Gõõl cĩ katĩ adĩmannung Baangĩ cĩ aavĩ tammuatiddina buu agiitia neccio, mĩ athii niigia cĩ uungniccu gotoonogu cuguk thinnetinẽy.”