Thõõth cĩ õõgĩ eeti ngaa cĩnnĩ
(Bẽl Marĩkõ 10:1-12)
19
Ma balna ngĩ ẽdẽcak Yesu ngatĩ alimanĩ eet, ikiyyia ũtũngek nẽ looc cĩ Galilea, ĩthõng ũũk ĩcĩ looc cĩ Yudea abaaẽ Lĩĩl cĩ Yordanĩ. 2 Õwõb balna meelitini cobbi cĩ eetu ĩnõõnõ, ngaatĩ anyĩcẽ nẽ eet cĩgĩk cĩk ĩmmõrĩ kũbũnta.3 Ma natẽ, ivitia Varithei gwuak ĩtĩmanit ĩnõõnõ entek ne, “Ẽlẽmanĩ koccia Ngiranĩ cĩ Mutha ngatĩ õõgĩ eeti ngaa cĩnnĩa thõõtha ĩmmanĩ kaganoko?”
4 Ẽdẽcĩ Yesu ethei ne, “Athii wõnõ niigia cĩ agawu balna ĩcowu ngĩ, ‘Ẽngẽnyca balna nẽ et cĩ maacĩ kĩ ngaa cĩ ngayyi,’b 5 ĩthõng ĩthĩ nẽ ne, ‘Ĩnõõnõ thĩ cĩ ũũngnĩcẽ eeti kõrõõk cĩ baatĩnnĩ kĩ cĩ yaatĩnnĩ, ĩthõng ũũk itiwõõy, ĩthõng õõt ũrũmtẽ kĩ ngaa cĩnnĩ kĩĩtõ codoi doo’?c 6 Ĩthõng thĩna, ĩthĩnga nẽẽgẽ ẽẽn ramma, odoyyie nẽẽgẽ doo. Ĩthõng eeta cĩk ũrũm Nyekuci kõdõwẽ, athii thẽk eeti ĩmma cĩ engeri ĩnõõgõ.”
7 Ma baa thĩ natẽ ivitia ijinit Varithei Yesu entek ne, “Nyia thĩ da Mutha kuduwa kĩĩ ne, anyĩk kẽtẽhẽẽd eeti cĩ maacĩ nyaraga, cĩ õõgĩ nẽ ngaa cĩnnĩ, ĩthõng anyĩk ĩnõõnõ, ĩthõng umurek ĩnõõnõ tuu wo?”d
8 Ẽdẽcĩ Yesu ĩnõõgõ ethei ne, “Ẽlẽmacung balna agiitia Mutha oogit ngaay cuguk, nyatarka õkõmĩ agiitia ooti. Ĩthõng thĩ, balna ĩcowu athii cĩ õgõõn noko. 9 Ĩthõng kaduwacung dĩdĩ, mĩ nga ngaa cunnie kĩtdõlẽ, nyĩ õõgĩ niia ĩnõõnõ. Ĩthõng ma ngĩ oogu niia ĩnõõnõ, ĩthõng itiwu ngaa ĩmma, ĩdĩmanehu niia thõõth cĩ gerthe ngaa cunni.”
10 Ĩthõng entek wobjiaha ĩnõõnõ ne, “Ma ngĩ õgõõn thõõth cĩ et cĩ maacĩ kĩ ngaa noko, abũnna woccia kaatĩ ngĩ athii cĩ katihẽnĩ.”
11 Ngaatĩ ẽdẽcĩ Yesu ĩnõõgõ ẽthẽcĩ ne, “Athii eeta vẽlẽk cĩ ẽlẽmĩ thõõth coo, eet wũk balna anyi Nyekuci anyinit cĩ aatẽ kaganoko athii cĩ atihẽnĩ dõ cĩk woccia ẽlẽmĩ thõõth coo. 12 Athii eeta gwuak cĩ atihẽnĩ, nyatarka arittiay balna nẽẽgẽ kĩyokowẽ ngaatĩ aritianĩ, kõdẽ, nyatarka thõõth cĩ aaranẽ eeta gwuak eleeti cĩgĩk.e Athii gwuak cĩ atihẽnĩ, nyatarka mĩnan cĩ ẽyẽk nẽẽgẽ kabicoca cĩ tammutiddino. Mĩ aavĩ eeti cĩ ẽlẽmĩ thõõth coo, anycĩk thẽk ĩnõõnõ kẽlẽm.”
Agatan Yesu dõõlĩ cĩk kĩdĩk
(Bẽl Marĩkõ 10:13-16; Luka 18:15-17)
13 Ma kõr ĩmma, ayaktak eeta dõõlĩ cĩgĩk Yesu, kĩĩ katĩ katadĩk nẽ athĩn cĩgĩnĩk ĩnõõgõ, ĩthõng alawõy. Egerenyeei kẽnnẽ wobjiaha eet ethei ne, nyĩ eheccu ĩnõõnõ.
14 Ẽdẽcĩ Yesu ĩnõõgõ ethei ne, “Anycĩk dõõlĩ cĩk kĩdĩk wo, kivitia ĩcĩnanĩ, nyĩ abilnuu ĩnõõgõ! Eeta cĩk aatĩ kĩ doolia cĩk kĩdĩk wo, ẽẽn nẽẽgẽ eet cĩk kabicoc cĩ tammutiddino.” 15 Ma balna ngĩ atadĩk Yesu athĩn cĩgĩnĩk dõõlẽnĩy vẽlẽk, ĩtĩnga nẽ natẽ, ĩthõng ũũwa.
Ngĩthorowoc cĩ aballie
(Bẽl Marĩkõ 10:17-31; Luka 18:18-30)
16 Akunei balna eeti ĩmma Yesu, ĩthõng ijin ĩnõõnõ ethek ne, “Limannioit, nyia woccia cĩ abũnna cĩ kadĩmani na, kĩĩ katĩ kũmũda rũgẽt cĩ alna kũdũt?”
17 Ẽdẽcĩ Yesu ĩnõõnõ ethei ne, “Nyia jina thõõth cĩ abũnna wo? Nyekuc dõ cĩ abũnna. Ma ngĩ adiimi niia iithio kabicoc cĩ tammutiddino, tõngõlẽ thoothonniok cĩk Ngiranak cĩk Nyekucak.”
18 Ẽdẽcĩ eeti neccie Yesu ethei ne, “Thoothonniok cĩgang?”
Ẽdẽcĩ Yesu ĩnõõnõ ethei ne, “ ‘Nyĩ arui niia et, nyĩ õkõyyẽ niia ngaa cĩ et ĩmma, nyĩ õgõrthẽ niia, nyĩ õvõlõngẽ niia et cĩ abakanonu lokika, 19 tõngõlẽ niia baaba cunni kĩ yaaya,’g ĩthõng ‘Mĩnan et cĩ abakanonu kaavu kĩcĩ amĩnani niia ẽlẽ cunni.’ ”fh
20 Ẽdẽcĩ ngĩthorowocĩ Yesu ethei ne, “Kõwõba balna na thoothonniok cĩk tĩrĩthẽntiok cĩkkõ vẽlẽk. Nyia ĩmma cĩ woccia kadĩmani na?”
21 Ẽdẽcĩ Yesu ethei ne, “Ma ngĩ adiimi ĩthĩ et cĩ abũnna õrrõt, bĩt tũũwõĩ kaal vẽlẽk cĩk ayahi niia, ĩthõng anyiwu nyarobinya eet cĩk apĩrna, ĩthõng katĩ ijiowa balinit tammuatiddina. Ĩthõng thĩ, ikiyyia õwõba aneeta.”
22 Ma balna ngĩ ĩthĩrar ngĩthorowocĩ neccie thõõth cĩ Yesu wo, ũcũdũrẽ nẽ, ĩthõng ũũwa, nyatarka balna aballie nẽ õrrõt.
23 Ngaatĩ aduwacĩ Yesu wobjiak cĩgĩnĩk ẽthẽcĩ ne, “Kaduwacung na agiitia thõõth cĩ ẽẽn dĩdĩ, õkõmĩ õrrõt kũdũt ngatĩ woccia iithiowĩ eeti cĩ aballie kabicoc cĩ tammutiddino! 24 Ĩthõng naboo kaduwacunga, obokci ngatĩ woccia iithiowĩ nyaakalĩ bẽlẽth cĩ lĩbĩrawõ, kijiar ngatĩ woccia iithiowĩ eeti cĩ aballie kabicoc cĩ Nyekuco.”
25 Ma balna ngĩ athĩrar wobjiaha thõõth coo wo, ivitia ukulliek nẽẽgẽ jien õrrõt, ĩthõng ijinit Yesu entek ne, “Ngẽnẽ thĩ woccia cĩ eliay?”
26 Ma natẽ, akatĩ Yesu ĩnõõgõ kẽbẽrẽ, ĩthõng ethek ne, “Aatĩ thoothonniowa cĩk adĩccẽ eet, ĩthõng thĩ, ĩcĩ Nyekuco athii cĩ adinie.”
27 Ma natẽ, ẽdẽc Pẽtũrũ ĩnõõnõ ethek ne, “Kũtũngtẽẽa naaga kaal vẽlẽk, ĩthõng kowobti aniitia! Nyia katĩ cĩ anyet Nyekuci ageeta?”
28 Ẽdẽcĩ Yesu ĩnõõgõ ethei ne, “Kaduwacung na dĩdĩ, looca cĩ jõr ĩcĩ katĩ ẽngẽnyẽt Nyekuci katĩ ngĩ aavu Ngẽrtĩ Eeto loota taabawa cĩnnĩ ĩcĩ bulẽnto, attiyyu katĩ niigia buu taabĩtẽy ĩcĩk ẽẽn õmmõtõ kĩ ramma, ĩthõng eteddu thoothonniok cĩk eet cĩk tatũgẽt õmmõtõ kĩ ramma cĩk Ĩthraĩlĩ. 29 Eeti cĩ ũtũngek kõrõõk cĩnnĩ, kõdẽ gõtõõnõgĩ kĩ ngõõnõgĩ, kõdẽ baatĩnnĩ kĩ yaatĩnnĩ, kõdẽ dõõlĩ, kõdẽ manẽẽn cĩgĩnĩk, nyatarka aneeta, amũda katĩ nẽ anyinit ngõnana eet tur, ĩthõng katĩ ijiowa rũgẽt cĩ alna kũdũt. 30 Ĩthõng thĩ, eeta cĩk meelĩk cĩk uwuantẽcĩ aatĩ katĩ vurtia, ĩthõng cĩk meelĩk cĩk ẽẽn vurut uwuantẽcĩ tĩna.”