Luka 17

Gerthetin, leminit kĩ tũngẽnĩt cĩ gerthetino

(Bẽl Matewo 18:6-7, 21-22; Marĩkõ 9:42)

Aduwaai balna Yesu wobjiak cĩgĩnĩk ennei ne, “Aatĩ thẽk katĩ kaala cĩk anyi eet kĩdĩmanit gerthetin. Ĩthõng thĩ, pĩrnanẽt katĩ ĩcĩ et cĩ alabeei ĩnõõgõ kẽgẽrẽthantõy. 2 Abũnna woccia ngatĩ ecebothĩcẽ ĩnõõnõ bĩĩ inyiawa cĩnnĩ, ĩthõng utdukothĩk bũlũcatõ kijiar ngatĩ alabẽcĩ dõõlĩ cĩk kĩdĩk gerthetin. 3 Ebeit eleeti cuguk jurrung.

“Mĩ atican gotonu gerthetin, gerenyek, ĩthõng mĩ ũtũngek gerthetin, tamatĩk. 4 Mĩ adĩmanni nẽ aniitia buth ngõnana tũrgẽrẽm kõr codoi, ĩthõng õbõda ngõnana tũrgẽrẽm, ĩthõng ennei ne, ‘Kabaca thõõth cĩ gerthe,’ tũngek ĩnõõnõ gerthetin cĩnnĩ.”

5 Ngaatĩ ẽthẽcĩ tionniaiti Yesu ne, “Makayyioit, tõõr leminit cĩnang kĩĩ maka!”

6 Ẽdẽcĩ Yesu ĩnõõgõ ennei ne, “Mĩ ayakcu niigia leminit cĩ dĩcĩ cĩ õgõõn kĩ kinyomocĩ cĩ mathtad cĩ dĩcĩlĩm, enneccu woccia thẽk mũũnec nĩcĩ obbi õrrõt ẽẽ, ne, ‘Butianiay bĩt katẽẽ bũlũcatõ,’ Athĩknung woccia thẽk nẽ.

7 “Ma woccia kẽyẽk eeti ĩmma kõrgẽna cunung ticciannioit cĩ evyi manatõ, kõdẽ cĩ ũũwa kaala, ennei woccia nẽ ĩnõõnõ katĩ mĩ õbõda manatõ ne, ‘Ijjia avvu loota ngato, ĩthõng uduwõy?’ 8 Athii koccia nõ nẽ cĩ ennei ĩnõõnõ ne, ‘Dĩmanea nõ aneeta dainit, ĩthõng ẽrẽẽwõy nganĩ kaduwue, ĩthõng thĩ, katĩ ikiyyia niia uduwõy, ĩthõng ũwũdẽ?’ 9 Ennei koccia makayyioiti ticciannioit ne, ibalallẽ, nyatarka itican nẽ tiic wũ aduwaai nẽ ĩnõõnõ kĩdĩman? 10 Ĩthõng niigia buu, mĩ iticantu tiic vẽlẽk wũ balna aduwaccung makayyioiti cunung ĩdĩmanit, ĩĩtõ ne, ‘Keeginna naaga ticcianniok kaganoko, cĩk kadĩmanna gii cĩ aduwacet makayyioiti cĩnang ageeta.’ ”

Eet cĩk ẽẽn õmmõtõ cĩk adak nyataba

11 Ma natẽ ĩtĩnga Yesu ũũk ĩcĩ Yeruthalẽmĩ, atik lõkõrẽ cĩ Thamaria kĩ Galilea. 12 Ma balna mĩ õkkõ nẽ iithio kõrõõk ĩmma natẽ ẽẽ, urumtõy nẽ kĩ eet cĩk ẽẽn õmmõtõ cĩk adak nyataba, abĩlĩ natẽ rẽẽna, 13 ĩthõng acalcallit ĩĩtõ ne, “Yesu, Makayyioit, tamatĩhet ageeta!”

14 Ma balna mĩ acĩn Yesu ĩnõõgõ wo, ethek ne, “Õõt eyelliek paadĩrnya eleeti cuguk.” Ma balna mĩ õvvõ nẽẽgẽ acĩn ẽẽ, ithii nyataba eletinẽy cĩgĩk.

15 Ma balna mĩ acĩn ĩmma ngatĩ abũnnanĩ wo, õbõda, ĩthõng ẽgẽrẽny ĩdĩhĩth Nyekuc. 16 Ngaatĩ aku uuki looc thoonĩy ĩcĩk Yesu, ĩthõng ethek Yesu ne, ibalallẽ. Ĩthõng balna ẽẽn eeti neccie et cĩ looc cĩ Thamaria.

17 Ngaatĩ ajinẽnĩ Yesu athĩnnĩ ne, “Athii wõnõ kette cĩ ẽẽn eeta cĩk adĩmani kũbũnta wo õmmõtõ? Õõt tõrkõwẽc nga? 18 Nyia eeti cĩ rẽẽng coo dõ, kõbõda kikiyyia kĩdĩhĩth Nyekuc wo?” 19 Ngaatĩ ẽthẽcĩ Yesu et nĩcẽ ne, “Tĩnga bĩtõ, anyi leminiti cunnie bũna.”

Kabicoc cĩ Nyekuco

(Bẽl Matewo 24:23-28, 37-41)

20 Ma natẽ, ijinit Varithei gwuak Yesu kõr cĩ woccia katĩ akuni kabicocĩ cĩ Nyekuco. Ẽdẽcĩ nẽ ĩnõõgõ ennei ne, “Athii kabicocĩ cĩ Nyekuco cĩ aku gõõla cĩ woccia acĩnnu niigia, 21 kõdẽ gõõla cĩ athĩnnĩ eeta ne, ‘Kabicoc cĩ Nyekuco coo,’ kõdẽ ‘Kabicoc cĩ Nyekuco neccie,’ nyatarka aavu kabicocĩ cĩ Nyekuco kĩ agiitia ngato vẽlẽk.”

22 Ngaatĩ aduwacĩ Yesu wobjiak ẽthẽcĩ ne, “Avvu katĩ wathinniowa cĩk adiim acĩnnu niigia Ngẽrtĩ Eeto, ĩthõng thĩ, kẽnnẽ athii katĩ cĩ acĩnnu niigia ĩnõõnõ. 23 Ĩthõng katĩ mĩ ennecung eeta ne, ‘Ĩnõõnõ neccie!’ Kõdẽ, ‘Ĩnõõnõ coo!’ Nyĩ owobju ĩnõõgõ. 24 Õgõõn katĩ kõr cĩ akuni Ngẽrtĩ Eeto kĩ lanyĩtĩ cĩ abadĩ cĩ icciawinie borowecĩ, cĩ atũkũl looc kĩ tammutiddin vẽlẽk. 25 Ĩthõng thĩ, acananni katĩ nõõnõ Ngẽrtĩ Eeto õrrõt, ĩthõng ũtũbũrĩt eeta cĩk erkinya cĩkkõ.

26 “Mĩ ikiyyia Ngẽrtĩ Eeto, õgõõn katĩ kĩ wathinniowa wũk balna aavẽ Nõõwa. 27 Atumanni balna eeta aduwue, awũdẽ, ĩthõng itiktõy kõdõlan kõr wũ balna iithiowĩ Nõõwa kovowol cobbi. Ĩthõng balna ikiyyia ukku tõwõnĩ eet cĩk loocak vẽlẽk.

28 “Õgõõn balna noko buu wathinniowẽy wũk balna Lõõtĩ, aduwue eeta, awũdẽ, ũũta ijjio, kĩ kutuyyiõĩ, evyi kĩĩ kẽtẽngẽnycõy, 29 ĩthõng thĩ, balna kõrra wũ ĩngannĩ Lõõtĩ Thõdõma, ikiyyia gua tammuatiddina, ĩthõng ũtũũth ĩnõõgõ vẽlẽk.

30 “Õgõõn thẽk katĩ ketee buu kõrra cĩ katĩ alibanĩ Ngẽrtĩ Eeto. 31 Ĩthõng katĩ kõr nĩcẽ, anycĩk et cĩ aavĩ kõlĩlla cĩ ciith cĩnnĩ, kithii cĩ õkkõ adĩmaanĩ ijjio ciiatõ. Athii woccia eeti cĩ aavĩ manatõ cĩ amiirothĩcẽ gimma ĩcĩ olu. 32 Ummuit thõõth cĩ ngaa cĩ Lõõtĩ! 33 Eeti cĩ atĩman ngĩ athũnnĩ rũgẽt cĩnnĩ, atdukeei katĩ nẽ rũgẽt cĩnnĩ tuu, ĩthõng eeti cĩ atdukeei rũgẽt cĩnnĩ tuu, athũnnĩ katĩna. 34 Kaduwacunga, eeta ramma cĩk oogin kwuena codoi baalin nĩcẽ, õkõyyĩ katĩ Ngẽrtĩ Eeto codoi dõ, ĩthõng ũtũngothĩk ĩmma. 35 Ĩthõng ngaay ramma cĩk erekcie ngatĩ odoi doo, õkõyyĩ katĩ nẽ codoi, ĩthõng ũtũngothĩk ĩmma. 36 Mĩ aatĩ katĩ eeta cĩk ẽẽn ramma manatõ, õkõyyĩ katĩ Ngẽrtĩ Eeto codoi, ĩthõng ũtũngek ĩmma.”

37 Ngaatĩ ajini wobjiaha ẽthẽcĩ ne, “Adĩmanni katĩ thõõth coo ngatdang Makayyioit?”

Ẽdẽcĩ Yesu ennei ne, “Ngĩtĩ adaaknĩ eeti, alũtothi thẽk katĩ kodobbwuana.”