Luka 16

Ticciannioit cĩ õvõlõngĩ

Ma natẽ, uduwak Yesu wobjiak cĩgĩnĩk ethek ne, “Aavĩ balna ballioiti ĩmma cĩ ayak ticciannioit cĩ athũnnĩ ijjio cĩgĩnĩk. Ĩthõng balna uduktiak eeta ballioit entek ne, amĩnyĩ ticciannioiti cunnie nyarobinya. 2 Ngaatĩ avaanĩ nẽ ticciannioit nĩcẽ kikiyyia ciitha, ĩthõng ethek ne, ‘Nyia cĩ kathĩrari na athĩ eeta ne, adĩmani niia wo? Yahaha da nyaraga wũ gõõ ẽhẽẽdĩcẽ niia nyarobinya, nyatarka athii woccia niia cĩ agami tiic coo.’

3 “Ma natẽ, umuk ticciannioiti neccie ĩĩ ne, ‘Kogooni woccia kuu? Itingkawa bẽrẽ katĩ aneeta baatĩ tiico, ĩthõng athii na cĩ keeni tiir ngatĩ kevinie buu, ĩthõng kangawana ngatĩ woccia kalawẽ eet buu. 4 Kagga na gii cĩ katĩ kadĩmani, kĩĩ katĩ kẽlẽmta eeta aneeta korookjiowẽy ĩcĩgĩk katĩ mĩ kitingkawẽ tiica cannĩ.’

5 “Ngaatĩ avaanĩ ticciannioiti neccie eet cĩk balna acuwana nõ ijjio cĩk makayyioit cĩnnĩ wo, codoi codoi, ĩthõng ijin cĩ owu ethek ne, ‘Nyia da balna cĩ acuwana nõ niia ĩcĩ makayyioit cannĩ ẽẽ?’

6 “Ẽdẽcĩ thĩ kẽnnẽ athĩ ne, ‘Kacuwuana balna na boromilẽt cĩk ẽẽn õmmõtõ kĩ tõrkõnõm cĩk ngooroc cĩ olivi.’

“Ngaatĩ ẽthẽcĩ nẽ ĩnõõnõ ne, ‘Avvu loota taman, ĩthõng eteheediwu nyaragawa ĩcoo, boromilẽt cĩk ẽẽn turgi.’

7 “Ngaatĩ ajini ĩmma ẽthẽcĩ ne, ‘Ma wõnõ balna niia acuwana ĩcĩnnĩ, ĩthõng?’

“Ĩthõng ẽdẽcĩ neccie athĩ ne, ‘Kacuwuani balna na dongokua cĩk ẽẽn vucciak codoi cĩk labinu.’

“Ngaatĩ ẽthẽcĩ nẽ ĩnõõnõ ne, ‘Avvu loota taman, ĩthõng eteheediwu nyaragawa ĩcoo, dongokua cĩk ẽẽn, eet eet ramma.’

8 “Ma natẽ, ikiyyia ĩdĩhĩth ballioiti ticciannioit cĩ ẽẽn makayyioit cĩ tiic cĩnnĩ cĩ ẽẽn gooliait ẽẽ, õrrõt ngatĩ arĩcananĩ nẽ ẽlẽ cĩnnĩ. Nyatarka eeta cĩk looc coo, ẽgẽẽnyĩ nẽẽgẽ õrrõt gõõla cĩ adĩmanĩ eet cĩk õgõõn kĩ nẽẽgẽ kijiar eet cĩk lanyĩtak. 9 Kaduwacunga, iticantõõĩ balinit cĩ looc coo elli eet õõgĩ, kĩĩ katĩ kivitia nẽẽgẽ kĩ agiitia kĩĩtõ goonogu cuguk. Ĩthõng katĩ ma ngĩ ithii balinti cunung wo, avvuyyung katĩ agiitia Nyekuci korookjiowẽy ĩcĩk aatĩ kũdũt tammuatiddina.

10 “Eeti cĩ athũnnĩ kaal cĩk kĩdĩk cĩk anyi eeti ĩmma jurrung, athũnnĩ katĩ cĩk meelĩk buu jurrung. Ĩthõng eeti cĩ ẽgẽrẽthan kaal cĩk kĩdĩk, ẽgẽrẽthan thẽk katĩ cĩk meelĩk buu. 11 Mĩ athii cĩ athunnu niigia balinit cĩ looc coo jurrung, ngẽnẽ thĩ katĩ cĩ anyung uthuutti balinit cĩ ẽẽn dĩdĩ wo? 12 Mĩ athii cĩ athunnu niigia ijjio cĩk eetu, ngẽnẽ katĩ cĩ anyung agiitia ijjio õõgĩ kĩĩ cuguk?

13 “Athii woccia ticciannioiti cĩ aticanothi makayyiok ramma. Aaburneei woccia nẽ codoi, ĩthõng ĩmĩnan woccia nẽ ĩmma, kõdẽ aticanothi ĩmma õrrõt, ĩthõng aharek woccia ĩmma. Athii woccia niia cĩ aticanothi Nyekuc kĩ nyarobinya buu.”

Thoothonniok õõgĩ cĩk aduwa Yesu

(Bẽl Matewo 5:31-32; 11:12-13; Marĩkõ 10:11-12)

14 Ma balna mĩ athĩrar Varithei thõõth coo wo, ivitia atararyi nẽẽgẽ Yesu, nyatarka ẽẽn nẽẽgẽ eet cĩk amĩnan nyarobinya. 15 Ngaatĩ ẽthẽcĩ Yesu ĩnõõgõ ne, “Agiitia thẽk wũk gõõ engerennu athinnu ne, abũnnanu bẽrẽnĩy cĩk eet vẽlẽk, ĩthõng thĩ, aga nẽnnẽ Nyekuci thinneti cuguk. Kaala cĩk amĩnan eeta õrrõt, ẽẽn kaal cĩk gerthek kĩ Nyekuc.

16 “Aliman balna eeta Ngiran cĩ Mutha kĩ thoothonniok cĩk eet cĩk õthõõth molook cĩ Nyekuco kõdõlan Yoanẽ. Ĩthõng yoko ilimanothĩk eet Nyemut cĩ Abũnna cĩ kabicoc cĩ Nyekuco, ĩthõng ngaanĩ thẽk balna atĩman eeta vẽlẽk tiirthẽta ngatĩ woccia õvvõ ĩcĩnnĩ. 17 Amũjĩ ngatĩ woccia athiinni tammutiddin kĩ looc, kijiar ngatĩ woccia athiinni thõõth cĩ dĩcĩ cĩ Ngirano.

18 “Eeti cĩ õõg ngaa cĩnnĩ, ĩthõng itik ngaa ĩmma naboo, atican gerthetin, ĩthõng eeti cĩ atik ngaa cĩ õõg eeti ĩmma, atican nẽ buu gerthetin.

Ballioit kĩ Latharõ

19 “Aavĩ balna ballioiti ĩmma cĩ ahimit ceremua cĩk rẽgẽẽtĩk cĩk õkõmĩ õrrõt, ĩthõng adak dainit cĩ abũnna wathinniok vẽlẽk. 20 Ĩthõng balna naboo aavĩ ngĩjũrraiti ĩmma cĩ athĩ Latharõ cĩ dõõkĩthĩ ala dainit katũga cĩ balliokto ẽẽ. Ayak balna Latharõ kaakuanya cĩk meelĩk ẽla cĩnnĩ. 21 Ĩthõng balna adiim nẽ ngĩ aduk lõtaabũr cĩk, atdukuay lobela cĩ aduwẽẽnĩ ballioiti ẽẽ. Avvu balna naboo gõõ thẽk agĩlan kũrthĩĩ kaakuanya cĩgĩnĩk wo buu natẽ.

22 “Ma balna natẽ, ikiyyia adaak Latharõ, ĩthõng ivitia ootti anjĩlẽta cĩk Nyekucak ĩnõõnõ ngatĩ aavẽ Abrahamĩ. Ma vurtia cĩnnĩ, ikiyyia adaak ballioiti neccie buu ngaatĩ adawini. 23 Ũũk utdukothĩk nẽ guo cĩ aavĩ kũdũt, ngatĩ õkkõ ehecini nẽ õrrõt. Ma balna ngĩ acĩn nẽ tammutiddin wo, acĩn kẽnnẽ nẽ Abraham rẽẽna arũmẽ kĩ Latharõ. 24 Ngaatĩ õthõõthĩcẽ ĩnõõnõ ẽthẽcĩ ne, ‘Papa Abraham, tamatĩhanĩ! Tiona Latharõ kikiyyia kokolek athiit maamĩytõ, ĩthõng ĩtĩlanea ahaat cannĩ kalalĩthanta maama aneeta, nyatarka aaburi gua ngato padahac.’

25 “Ẽdẽcĩ kẽnnẽ Abrahamĩ ĩnõõnõ ennei ne, ‘Laang, muk da, eeni balna niia et cĩ anycĩwothihi kaala cĩk abũnna balna ngaanĩ arugi, ĩthõng acananẽ balna Latharõ, ĩthõng thĩ, yoko ẽbẽlbẽl nẽ ngato, ĩthõng ẽhẽcẽ niinia. 26 Ĩthõng thẽk nẽnnẽ dĩdĩ, aavĩ looru cĩ wuuni õrrõt kõrgẽna cĩnac cĩ alamnyet ageeta, athii eeti ĩcĩnang cĩ woccia awũthĩ ĩcunung tõ, kõdẽ athii eeti cĩ woccia aku ĩcunung kĩ ageeta tõ.’

27 “Ẽdẽcĩ ballioiti athĩ ne, ‘Mĩ õgõõn kĩyokowẽ, kamanicina, tionĩha Latharõ kũũk õlõõ cĩ baangĩ, 28 nyatarka kayai gõtõõnõga tur õlõõ. Anyĩk ĩnõõnõ kũũk kirionĩk ĩnõõgõ, kĩĩ katĩ athii cĩ avvu nẽẽgẽ buu ngatĩ hecinto wo.’

29 “Ẽdẽcĩ Abrahamĩ naboo ballioit ennei ne, ‘Anyĩk gotoonogu kebelit thoothonniok wũk balna ẽhẽẽd Mutha kĩ eet cĩk õthõõth molook cĩ Nyekuco, anyĩk thoothonniok nĩĩkẽ kĩtĩrĩthĩt ĩnõõgõ.’

30 “Ẽdẽcĩ ballioiti athĩ ne, ‘Baang Abraham athii woccia cĩ õgõõn noko, abũnna ma ngĩ õkkõ eeti ĩmma cĩ adaaha, ĩthõng uungni katĩ nẽẽgẽ gerthetin.’

31 “Ethei kẽnnẽ Abrahamĩ ĩnõõnõ ne, ‘Mĩ athii cĩ athĩrar nẽẽgẽ thõõth cĩ Mutha kĩ eet cĩk õthõõth molook cĩ Nyekuco, nga thẽk katĩ athii cĩ athĩknĩ thõõth, kõdẽ woyyia ma ngĩ kitioni et cĩ arũkna daaĩtha.’ ”