Atheet cĩ athii
(Bẽl Matewo 18:12-14)
15
Kõr ĩmma,
balna alũtothi eeta cĩk alũt mũcũrrũ kĩ gẽrẽthanniok Yesu kĩthĩraritõ liman cĩnnĩ.
2 Ĩthõng thĩ,
õngõngõcõ Varithei kĩ limanniok cĩk Ngiranak athĩ ne,
“Avvũ eeti coo gẽrẽthanniok, ĩthõng uduktõy kĩ ĩnõõnõ!”
3 Ngaatĩ aduwacĩ Yesu ĩnõõgõ liman cĩ owovothi cĩ alĩta eet wo ethei ne.
4 “Yoko kẽyẽk eeti ĩmma kõrgẽna cunung athaa eet tur,
ĩthõng ithii codoi dõ.
Athii koccia nẽ cĩ uungni athaa cĩk ẽẽn eet wec kõmmõtõ kĩ tõrkõwẽc ẽẽ,
ngatĩ ẽgẽwĩ,
ĩthõng ẽrẽppan codoi ẽẽ, dõ gii ngĩ ijiowa?
5 Ĩthõng thẽk mĩ ijiowa nẽ,
atalĩ katĩ õrrõt, ĩthõng õdõng nẽ ĩnõõnõ
6 ũũwĩ ĩcĩ olu.
Ngaatĩ katĩ õkkõ avaanĩ gõõnõgĩ kĩ eet cĩk abakanõy,
ĩthõng ethek ne,
‘Ivitia kebelbelit naaga vẽlẽk, nyatarka kũrũba na atheet wũ balna athii.’
7 “Kaduwacunga,
gõõla cĩ aavĩ ketee,
aavĩ katĩ talinti cobbi õrrõt tammuatiddina,
nyatarka gẽrẽthannioit codoi doo cĩ ũtũngek gerthetin cĩnnĩ kijiar eet wec kõmmõtõ kĩ tõrkõwẽc cĩk edeemi thoothonniok cĩk athii cĩ adiim tũngẽnĩt cĩ gerthetino.”
Nyarobiiac cĩ athii
8 Ngaatĩ aduwacĩ Yesu ĩnõõgõ naboo ẽthẽcĩ ne,
“Ma ngĩ ayak ngaa ĩmma nyarobinya cĩk ẽẽn thĩĩk cĩk ẽẽn õmmõtõ,
ĩthõng ithii codoi dõ.
Õgõõn woccia nẽ kuu?
Athii woccia cĩ atũkũlei guo,
ĩthõng itivila ciith, ĩthõng ẽrẽpan gii ngĩ ijiowa?
9 Ĩthõng mĩ ijiowa nyarobiiac cĩ ẽẽn thiihit codoi ẽẽ,
avva katĩ gõõnõgĩ kĩ eet cĩk abakanõy,
ĩthõng ethek ne,
‘Ivitia kebelbelit naaga, nyatarka kijiowa nyarobiiac cĩ athii ẽẽ.’
10 Kaduwacunga,
gõõla cĩ aavĩ ketee,
aavĩ katĩ talinti kõrgẽna cĩ anjĩlẽt cĩk Nyekucak, nyatarka gẽrẽthannioit codoi dõ cĩ ũtũngek gõõl cĩ gẽrẽthanniowu.”
Logoo cĩ athii
11 Ma natẽ,
uduwak naboo Yesu ĩnõõgõ ethek ne,
“Aavĩ balna eeti ĩmma cĩ ayak lõgõõ cĩgĩnĩk cĩk ẽẽn ramma.
12 Ma natẽ,
ikiyyia logoo cĩ dĩcĩ ẽẽ,
ethek baatĩnnĩ ne,
‘Baang,
ngẽraha aneeta yoko ijjio cĩganĩk cĩk woccia katĩ anya niia aneeta.’ Ngaatĩ ẽngẽracĩ baatĩnnẽ ĩnõõgõ ijjio.
13 “Ma vurtia cĩ wathinniok cĩk kĩdĩk,
ũlũt logoo cĩ maacĩ cĩ dĩcĩ wo ijjio cĩgĩnĩk vẽlẽk,
ĩthõng ũũk looca ĩcĩ rẽẽnĩ,
ĩthõng ũũk ĩmĩcĩ balinit cĩnnĩ wo kẽdẽca vẽlẽk.
14 Ma balna ngĩ ẽdẽcak nẽ ijjio vẽlẽk,
ikiyyia butuny cobbi õrrõt looca nĩĩcẽ,
ngaatĩ atarĩ nẽ wuciith cĩ magiithu kĩĩ gẽrtha wak.
15 Ngaatĩ balna õkkõ aticanothĩcẽ nẽ et ĩmma cĩ looc nĩcẽ cĩ balna anyi ĩnõõnõ kũtũwwa kibõrõngẽ.
16 Adiim balna nẽ ngĩ aduk lõtaabũr cĩk aduwẽẽnĩ kibõrõngẽ kaganoko,
athii kẽnnẽ eeti cĩ anyi ĩnõõnõ lõtaabũr tõ.
17 “Ngaatĩ balna thĩna amui nẽ õrrõt athĩnnĩ ne,
‘Ayak nõ baangĩ ticcianniok cĩk meelĩk õrrõt cĩk aduwue jurrung!
Ĩthõng kĩpĩra na ngato kadaawũ!
18 Kamiire katĩ na kõkkõ ĩcĩ baangĩ,
ĩthõng kũwa kennea ne,
baang,
kẽgẽrẽthana na bẽrẽnĩy ĩcĩk Nyekuc cĩ tammutiddin, ĩthõng kĩ aniitia buu.
19 Athii na cĩ kawũpanẽ ngatĩ kẽnnẽ ngeruni.
Anya kĩthĩ ticciannioit codoi cunni ticcianniowĩy ĩcugunik.’
20 Ngaatĩ balna ĩngannĩ nẽ,
ĩthõng imiirie ũũk ĩcĩ baatĩnnĩ.
“Ĩthõng thĩ,
balna ma nganĩ õwõyya nẽ gõõla,
ĩcĩn baatĩnnẽ ĩnõõnõ rẽẽna,
ĩthõng atamatĩk ĩnõõnõ, ngaatĩ avirothĩcẽ kũũk karabũt athĩnẽy, ĩthõng ĩthaa ĩnõõnõ cũcũwẽnta.
21 “Ma natẽ,
ethek nẽ baatĩnnĩ ne,
‘Baang,
kẽgẽrẽthana na bẽrẽnĩy ĩcĩk Nyekuc cĩ tammutiddin,
ĩthõng kĩ aniitia buu. Athii na cĩ kawũpanẽ ngatĩ kẽnnẽ ngeruni.’
22 “Ĩthõng thĩ,
othoothi kẽnnẽ baatĩnnẽ ticcianniok cĩgĩnĩk ennei ne,
‘Õtõõth taman,
ayakta cẽrẽm cĩ jõr,
ĩthõng itihimtewu ĩnõõnõ.
Aryihi thiihit attia ĩcĩnnĩ, ĩthõng itihimtewu nakavacĩt thoo cĩgĩnĩk.
23 Ayakta moolet wũ gõõ adĩhĩ ngato,
ĩthõng ucuwantu.
Kadiim ngĩ kadak naaga peyian,
ĩthõng katalit naaga.
24 Agamaha balna lõõcĩ logoo cio,
ĩthõng yoko aavu kĩ eeti cĩ arũkna daaĩtha.
Ithii balna nẽ,
ĩthõng yoko ijiowuay.’
Ngaatĩ arahanĩ nẽẽgẽ adaĩ peyian.
25 “Amũdaai balna ngaanĩ avĩya ngẽrĩnẽ cobbi manatõ.
Ma balna mĩ aku ĩthĩ õjõõn kĩ kõrõõk wo,
athĩrar kẽnnẽ belinit kĩ rũgũmõn õlõõtõtõ.
26 Ngaatĩ avaanĩ ticciannioit ĩmma,
ĩthõng ijin ethek ne,
nyia thĩnõ kette cĩ adĩmanni õlõõtõtõ wo.
27 Ẽdẽcĩ ticciannioiti ĩnõõnõ ennei ne,
‘Õbõda gotonu.
Ngaatĩ yoko acuwanẽcĩ baaba cunnie moolet wũ gõõ adĩhĩ,
nyatarka atalĩ nẽ ngatĩ õbõdaĩ gotonu jurrung.’
28 “Ma balna ngĩ athĩrar nẽ thõõth coo wo,
ikiyyia avarac õrrõt kuumuc kũtũbũr ngatĩ iithiowĩ kõrõõk.
Ngaatĩ õkkõ baatĩnnẽ amanymanyanĩ ĩnõõnõ.
29 Ẽdẽcĩ kẽnnẽ nẽ baatĩnnĩ ennei ne,
‘Cĩn nõõnõ,
kiticanothihi balna na aniitia erkinya cĩkkõ vẽlẽk kĩ nyakapanaiti,
ĩthõng athii cĩ kaburi thõõth cunni kũdũt.
Ĩthõng thẽk athii cĩ anya nyion nẽnnẽ kaganoko kadakta kĩ gõõnõga cĩganĩk.
30 Ma thĩ yoko ngĩ aku ngerunie wũ balna amĩnyĩ ijjio cugunik kĩ tegemnyiak wo,
ikiyyia ucuwanewu ĩnõõnõ moolet wũ gõõ adĩhĩ!’