Anyĩk Yesu et kũbũna Kõrra cĩ Yuwuthono
14
Kõr ĩmma cĩ Yuwuthono,
õkkõ balna aduwue Yesu õlõõ cĩ Varithenit ĩmma cĩ agayyi õrrõt.
Ngaatĩ ẽbẽĩ eeta ĩnõõnõ,
2 ĩthõng balna amũdaai aavĩ eeti ĩmma natẽ cĩ iivi thoona.
3 Ngaatĩ ajini Yesu Varithei kĩ limanniok cĩk Ngiranak ẽthẽcĩ ne,
“Ẽlẽmanĩ koccia Ngiranĩ ngatĩ anyĩcẽ et cĩ ĩmmõrĩ kũbũna Kõrra cĩ Yuwuthono?”
4 Ĩjakci kẽnnẽ nẽẽgẽ vẽlẽk tiv.
Ngaatĩ awumi Yesu et cĩ iivi thoona wo kũbũna,
ĩthõng aanyĩk ĩnõõnõ kũũk.
5 Ma natẽ,
ijin Yesu ĩnõõgõ ethek ne,
“Mĩ woccia kẽyẽk eeti ĩmma kõrgẽna cunung logoo cĩ maacĩ,
kõdẽ tang cĩ atdukothi duwwo Kõrra cĩ Yuwuthono, athii woccia cĩ agurrai ngĩtĩvõrĩ tamanoko?”
6 Ĩjakci naboo nẽẽgẽ vẽlẽk tiv noko.
Nyĩ anyi ẽlẽ cunni kĩĩ maka
7 Ma balna mĩ acĩn nẽ kerenniok ngĩ ẽbẽra vatĩk cĩk tiirtik ngatĩ peyiano,
uduwa thõõth cĩ owovothi cĩ alĩta eet cĩ athĩ ne,
8 “Mĩ avvuyyi eeti ĩmma peyiana cĩ tiẽnto,
nyĩ õkkõ aavẽ taabawa cĩ obbi,
nyatarka aku katĩ woccia avva baatĩ olu et ĩmma cobbi cĩ ijiaryi aniitia.
9 Ma ngĩ ikiyyia eeti neccie,
aku katĩ baatĩ olu,
ĩthõng ethei ne,
‘Anyĩk taaba cunni wo et coo.’
Ĩthõng ma natẽ,
agamnyi katĩ ngawani ngatĩ õkkõ aavẽ taabawa cĩ dĩcĩ.
10 Ĩthõng thĩ,
mĩ avvuyyi eeti peyiana,
bĩt avvu taabawa cĩ dĩcĩ,
kĩĩ katĩ mĩ aku baatĩ olu wo,
aku katĩ ennecci ne,
‘Gõõna,
tĩnga bĩt avvu taabawa cĩ obbi ẽẽ.’ Ĩnõõnõ thĩ katĩ cĩ ongolini eeta vẽlẽk kõrgẽna cĩ kerenniowu natẽ.
11 Eeti cĩ adĩma ẽlẽ cĩnnĩ eetĩnẽy vẽlẽk aari kĩĩ obbua,
aritaniai katĩ nẽ looc.
Ĩthõng eeti cĩ aritan ẽlẽ cĩnnĩ,
odongnyie katĩna nẽ.”
12 Ngaatĩ ẽthẽcĩ Yesu baatĩ olu ne,
“Mĩ ayahi katĩ gõõ peyian,
nyĩ avva goonogu,
kõdẽ gotoonogu,
kõdẽ tionniok,
kõdẽ balliok cĩk abakanonu.
Mĩ avva ĩnõõgõ, avvu katĩ avaani nẽẽgẽ buu aniitia kõr ĩmma, ĩthõng ũdũmanti daintia.
13 Ĩthõng thĩ,
ngĩ ayahi peyian, tũvvũ ngĩjũrra kĩ tuwulliak kĩ eet cĩk ngõõltĩk kĩ eet cĩk rubentĩk,
14 ĩnõõnõ thĩ cĩ katĩ agatanni Nyekuci aniitia.
Ĩthõng,
kõdẽ woyyia ma ngĩ athii nẽẽgẽ cĩ adũmanni aniitia, adũmannie niia katĩ mĩ ũrũkta eeta cĩk edeemi thoothonniok daaĩtha.”
Iyiainit cĩ peyian cobbi
(Bẽl Matewo 22:1-10)
15 Ma balna ngĩ athĩrar eeti ĩmma cĩ,
balna aduwue kĩ Yesu natẽ thõõth coo wo,
ikiyyia othoothĩk nẽ Yesu ethek ne,
“Agatanẽ eeti cĩ katĩ adak peyian kabicoca cĩ Nyekuco.”
16 Ẽdẽcĩ Yesu ennei ne,
“Aavĩ balna eeti ĩmma cĩ adĩmaneei peyian cobbi õrrõt,
ĩthõng ũtũvvũwa kerenniok cĩk meelĩk õrrõt.
17 Ma balna ngĩ ĩdĩmanothĩk gii vẽlẽk,
ition nẽ ticciannioit cĩnnĩ kũũk kuduwak eet cĩk adiim nẽ wo kennek ne,
‘Ivitia,
ĩdĩmanothĩk gii vẽlẽk.’
18 “Ĩthõng thĩ,
kẽnnẽ ivitia nẽẽgẽ vẽlẽk udukta thoothonniok codoi codoi.
Aduwa cĩ owu athĩ ne,
‘Nga,
jõr kũũta mana, ĩthõng abũnna ngĩ kebeei, nyanyaa nõ kũũk kẽbẽwũ.’
19 “Athĩ ĩmma ne,
‘Ngaanĩ jõr kũũta tõmõnya cĩk ẽẽn õmmõtõ cĩk evintiak,
ĩthõng kadiimi nõõnõ kõkkõ katĩmani ĩnõõgõ,
nyẽ nõ kũũk kĩtĩmanũ.’
20 “Ẽdẽcĩ naboo ĩmma athĩ ne,
‘Athii woccia cĩ kakunie,
nga balna na jõr katihie.’
21 “Ngaatĩ õkkõ aduwacĩ ticciannioiti makayyioit cĩnnĩ ẽẽ.
Ma natẽ,
ikiyyia avarac makayyioiti,
ngaatĩ ẽthẽcĩ ticciannioit ne,
‘Bĩt goolliowẽy ĩcĩk kõrõõk cĩ gaalawu,
ĩthõng ũlũtaha ngĩjũrra kĩ tuwulliak kĩ eet cĩk rubentĩk kĩ eet cĩk ngõõltĩk. Vir taman.’
22 “Ma balna ngĩ õbõda ticciannioiti ẽẽ,
ikiyyia uduwak makayyioit ethek ne,
‘makayyioit,
kĩdĩmana kĩ viyyio ngĩ aduwa niinia,
ĩthõng thĩ, ngaanĩ maka ngĩtĩ aatẽ eeta gwuak.’
23 “Ngaatĩ ẽthẽcĩ makayyioiti ticciannioit cĩnnĩ ne,
‘Miirie bĩt goolliowẽy kĩ korookjiowẽy ĩcĩk attĩyya ngatĩvõrĩ ẽẽ,
vẽlẽk,
ĩthõng ũlũngana eet kivitia, kĩĩ katĩ kĩbbĩt ciith cannie jurrung.
24 Kaduwacina,
athii thẽk katĩ eeta wũk balna kavvũ na cĩ atarĩ dainit cĩ peyian cannĩ wo.’ ”
Thõõth cĩ kẽnnẽ wobjiait cĩ Yesu
(Bẽl Matewo 10:37-38)
25 Iriok balna eeta cĩk meelĩk õrrõt kĩ Yesu,
ĩthõng ũtũwẽ Yesu kĩĩ kẽdẽnya ĩnõõgõ,
ĩthõng ethek ne,
26 “Ma ngĩ aku eeti ĩmma kĩ aneeta,
ĩthõng athii cĩ amĩnanna aneeta kijiar baatĩnnĩ,
yaatĩnnĩ,
ngaa cĩnnĩ,
dõõlĩ cĩgĩnĩk,
gõtõõnõgĩ kĩ ngõõnõgĩ,
kõdẽ rũgẽt cĩnnĩ kir,
athii woccia cĩ ẽẽn wobjiait cannĩ.
27 Ĩthõng eeti cĩ athii cĩ õdõng kuruce cĩnnĩ,
ĩthõng õwõba aneeta,
athii cĩ ẽẽn wobjiait cannĩ.
28 “Yoko thẽk kidiim kẽtẽngẽny eeti ĩmma kõrgẽna cunung ciith,
athii nõ woccia cĩ aavĩ loota,
ĩthõng umuk katĩ mĩ ayak nyarobinya cĩk awũpan ngatĩ ẽdẽcacĩ ciith?
29 Mĩ arahanĩ nẽ ẽngẽnyẽt ciith,
ĩthõng ĩnĩnga ẽdẽca,
avvu katĩ arannĩ eeta ĩnõõnõ athĩ ne,
30 ‘Arahaĩ da nẽnnẽ thẽk eeti ẽtẽngẽnyõy,
ĩthõng bẽrẽ atamaac gõõla ĩnĩnga ẽdẽcaai.’
31 “Mĩ kĩĩ cĩ adiim uukõnẽ alaanĩ cĩ ayak nyĩcẽkẽr cĩk ẽẽn vucciaknya õmmõtõ (10,000) kĩ alaan cĩ ayak nyĩcẽkẽr cĩk ẽẽn vucciaknya etĩmma (20,000).
Athii woccia nõõnõ nẽ cĩ aavĩ loota,
ĩthõng umuk katĩ woccia ngĩ ũũlĩ ngĩ ijiar ĩnõõnõ?
32 Mĩ acĩn nẽ athii woccia cĩ ũũlĩ,
ition woccia nẽ eet cĩgĩnĩk kõõt kijinit ganõn ma ngaanĩ avĩya alaanĩ neccie rẽẽna.
33 Ĩthõng gõõla ĩcĩ aduwõy noko,
kothii woccia et cĩ ẽẽn wobjiait cannĩ katĩ nga kũtũngek gii vẽlẽk.
Balang kĩ lanyĩt
(Bẽl Matewo 5:13; Marĩkõ 9:50)
34 “Abũnna balangĩ,
ĩthõng thĩ,
mĩ ithii mũcarõnĩ cĩnnẽ tõ, aku woccia amũcarĩ naboo kuu?
35 Athii cĩ abũnna ngatĩ õngõtanothi kĩ tõdõwa,
kõdẽ cõõlõ,
ĩthõng utdukothĩk tuu kaganoko.
“Eeti cĩ ayak kĩĩn, anyĩk ĩnõõnõ kĩthĩwõy jurrung!”