Ũtũngtek niigia gerthetin, kõdẽ ngĩ adaaknu
13
Kõr nĩcẽ,
avvu aduwaai balna eeta gwuak Yesu thõõth,
cĩ aduwacĩ Pĩlatõ nyĩcẽkẽr kõõt kuruit eet õõgĩ cĩk Galilea cĩk anyi Nyekuc kaal cĩk cavawu Ciitha cĩ Nyekuco.
2 Ajin kẽnnẽ Yesu ĩnõõgõ ethei ne,
“Ahaddu yoko niigia athinnu ne,
ĩdĩmanit eeta cĩkkõ thoothonniok cĩk gerthek õrrõt,
kijiar eet vẽlẽk Galilea, nyatarka aruwue balna nẽẽgẽ gõõla ĩcoo?
3 Kaduwacung na agiitia dĩdĩ,
athii cĩ õgõõn noko!
Mĩ athii cĩ uungniccu niigia gõõl cĩ gerthetin cunung,
adaaknu katĩ niigia buu kĩ nẽẽgẽ.
4 Ma wõnõ eeta wũk balna ẽẽn õmmõtõ kĩ turgi wũk balna adaaĩ kõr wũ balna amũnyĩ ciith cĩ wuuni ĩnõõgõ Thiloama?
Ahaddu niigia athinnu ne, gẽrthẽ nẽẽgẽ kijiar eet õõgĩ cĩk aatĩ Yeruthalẽma?
5 Kaduwacung na agiitia dĩdĩ,
athii cĩ õgõõn noko!
Mĩ athii cĩ uungniccu niigia buu gõõl cĩ gerthetin cunung,
adaaknu katĩ niigia kĩĩ lõõcĩ ĩĩr kĩ nẽẽgẽ.”
Iyiainit cĩ mũũneco
6 Ngaatĩ aduwacĩ Yesu ĩnõõgõ thõõth cĩ owovothi cĩ alĩta eet wo athĩ ne,
“Aavĩ balna eeti ĩmma cĩ ayak mũũnec manatõ ĩcĩnnĩ.
Ma kõr ĩmma,
ũũk ĩcĩn athĩ ne,
kerebo yoko ibbira. Arubothi kẽnnẽ athii nyegeruana tõ.
7 Ngaatĩ aduwacĩ bekcioit cĩ manu ẽthẽcĩ ne,
‘Laang,
tengedek mũũnec coo tuu.
Ĩĩtõ erkinya iyyio cĩk kakunie na ngato kĩcĩn mũũnec coo,
katĩ ngĩ aari,
alna kẽnnẽ kamũdai kothii mũũnĩ.
Nyia yoko thẽk kũtũngtek kĩmĩcĩ tõdõwa kaganoko wo?’
8 “Ẽdẽcĩ kẽnnẽ bekcioiti neccie ennei ne,
‘Makayyioit,
anyĩk baai thẽk nõ kaavu erkit codoi.
Kuduani katĩ na jurrung, ĩthõng kaarĩha cõõlõ kĩdĩmanit tõdõwa kũbũnta.
9 Ma ngĩ arĩk mũũnecĩ erkit cĩ gõlla,
abũnna thĩ katĩna.
Ma ngĩ kothii etengedewu thĩ tuu.’ ”
Anyĩk Yesu ngaa cĩ awuli kũbũna Kõrra cĩ Yuwuthono
10 Ma balna Kõr ĩmma cĩ Yuwuthono,
aliman balna Yesu eet Ciitha ĩmmanĩ ĩcĩ Lawintio,
11 aavĩ balna ngaa ĩmma cĩ awul ririwacĩ cĩ gerthe ĩnõõnõ erkinya õmmõtõ kĩ turgi.
Agiinyi balna ngaa neccie ngĩ õwõ thõng, athii cĩ abĩlĩ jiena mũrũũr.
12 Ma balna mĩ acĩn Yesu ĩnõõnõ wo,
ũtũvvũ nẽ ĩnõõnõ kikiyyia ĩcĩ owu,
ĩthõng ethek ne,
“Niia ngaa coo,
ũbũna niinia.”
13 Ngaatĩ awumi Yesu ĩnõõnõ,
ĩthõng ĩbĩl ngaa neccie mũrũũr tamanoko, ĩthõng ĩdĩhĩth nẽ Nyekuc.
14 Ma balna mĩ acĩn makayyioiti cĩ Ciith cĩ Lawintio,
ngatĩ anyĩcẽ Yesu ngaa cĩ ĩmmõrĩ kũbũna Kõrra cĩ Yuwuthono ẽẽ,
ikiyyia avarac nẽ õrrõt,
ngaatĩ ẽthẽcĩ meelitin ne,
“Ẽẽn wathinniowa dõõkĩthĩ tõrkõnõm cĩk tiicak.
Ivitia anycĩk eleeti cuguk kũbũnta wathinniowẽy nĩĩkẽ dõ, athii cĩ ẽnnẽ Kõrra cĩ Yuwuthono wo.”
15 Ẽdẽcĩ kẽnnẽ Makayyioiti ĩnõõnõ ennei ne,
“Niigia volongnyiaha!
Athii wõnõ niigia cĩ oogju tõmõt, kõdẽ thigiriec cunung Kõrra cĩ Yuwuthono kõõt kuwuddie?
16 Athii woccia yoko niigia cĩ adiimnyu bũwẽnyĩ Abrahamĩ cĩ ẽcẽb Thĩttanĩ erkinya õmmõtõ kĩ turgi,
kooguay Kõrra cĩ Yuwuthono wo?”
17 Ma balna mĩ aduwa nẽ thõõth coo wo,
ikiyyia agam ngawani eet cĩk abũrĩ thõõth cĩnnĩ wo õrrõt,
ĩthõng thĩ, balna ebelbelit eeta cĩk ẽlẽmĩ ĩnõõnõ, nyatarka kaal cĩk atican nẽ wo.
Thõõth cĩ owovothi kinyomoc kĩ nyĩgĩt
(Bẽl Matewo 13:31-32; Marĩkõ 4:30-32)
18 Ngaatĩ ajini Yesu ĩnõõgõ ethei ne,
“Õgõõn woccia kabicocĩ cĩ Nyekuco kĩ niin?
Keyehethei woccia ĩnõõnõ nyia?
19 Õgõõn kĩ kinyomocĩ cĩ mathtad cĩ dĩcĩ cĩ akatĩ eeti manatõ,
ĩthõng ĩtĩlĩtha kĩĩ kẽẽt cobbi,
ĩthõng ivitia ẽtẽngẽnycõy kĩballĩ taliibanẽy cĩgĩnĩk.”
20 Ĩthõng ijinõy Yesu naboo ĩĩ ne,
“Keyehethei woccia thẽk na kabicoc cĩ Nyekuco nyia?
21 Õgõõn nẽ kĩ nyĩgĩta cĩk aari ngaa ĩmma laatawa cobbi õrrõt, gii ngĩ iticantõy nyĩgĩta laatawa vẽlẽk.”
Katũk cĩ lũdũcĩ
(Bẽl Matewo 7:13-14, 21-23)
22 Balna ngĩ õkkõ Yesu Yeruthalẽma õkkõ nẽ aliman eet korookjiowẽy ĩcĩk gaalawu kĩ korookjiowẽy.
23 Ma natẽ,
ijin eeti ĩmma ĩnõõnõ ethek ne,
“Makayyioit,
eliay thẽk katĩ eeta cĩk kĩdĩk kaganoko?”
Ẽdẽcĩ Yesu ennei ne,
24 “Kaduwacung dĩdĩ,
ĩrĩcanta õrrõt ngatĩ iithioyyu katũk cĩ lũdũcĩ,
nyatarka mẽẽlĩ katĩ eeta cĩk atĩman ngatĩ iithiowĩ,
ĩthõng athii cĩ iithiowĩ.
25 Ma thẽk woccia ngĩ ĩtĩnga baatĩ ciitho,
ĩthõng ũnyũk katũk,
abilnu katĩ ngatĩvõrĩ uukcu katũk,
ĩthõng ĩlallu iittu ne,
‘Makayyioit,
owehet baai katũk.’
“Ĩthõng thĩ,
kẽnnẽ ẽdẽcĩ katĩ nẽ athĩ ne, ‘Athii na cĩ kagayyunga, kõdẽ avvunnu niigia ngatdang.’
26 “Ĩthõng edeccu katĩ niigia enneccu ne,
‘Ageeta wũk kaduwue,
ĩthõng kuwuddie kĩ aniitia kõdõwẽ. Ĩthõng ilimanet vatĩkẽy ĩcĩgak?’
27 “Ĩthõng thĩ,
ẽdẽcĩ kẽnnẽ katĩ nẽ athĩ ne,
‘Kaduwacung na agiitia,
athii cĩ kagayyung na agiitia, ĩthõng athii cĩ kagga looc cĩ avvunnu. Ẽnyẽktĩ nguuma cannĩ, niigia eeta cĩk adĩmannu kaal cĩk gerthek wo!’
28 “Aluyyu katĩ õrrõt,
ĩthõng adaktu katĩ nyĩgĩt cuguk,
mĩ icintu Abraham kĩ Aĩthak kĩ Yokob kĩ eet cĩk õthõõth molook cĩ Nyekuco vẽlẽk kabicoca cĩ Nyekuco, ĩthõng thĩ, kẽnnẽ utduktothiwu katĩ niigia ngĩtĩvõrĩ.
29 Avvu katĩ eeta tonniok vẽlẽk looca ĩcĩ tõõn cĩ alibanĩ kõrra,
kĩ ĩcĩ okolothĩcẽ kõrra,
kĩ cĩ lootu,
kĩ ĩcĩ diinu vẽlẽk,
kivitia kaavutõ loota,
ĩthõng adait peyian cobbi õrrõt kabicoca cĩ Nyekuco.
30 Ĩthõng dĩdĩ,
avvu katĩ eeta cĩk aturna wo,
ĩcĩ owu,
ĩthõng cĩk aatĩ ĩcowu wo, avvu katĩ aturna.”
Yesu kĩ Ẽrõõd
31 Ma kõr nĩcẽ,
ivitia uduktiak Varithei gwuak Yesu entek ne,
“Tĩnga ngato,
bĩt ngamanĩ mĩn, nyatarka adiim Ẽrõõdĩ ngĩ arukci aniitia.”
32 Ẽdẽcĩ kẽnnẽ Yesu ĩnõõgõ ennei ne,
“Õõt uduktiak Ẽrõõd cĩ õgõõn kĩ kireerĩ ẽẽ,a
entek ne,
‘Kingka katĩ na ririwanĩn cĩk gerthek,
ĩthõng kaanyĩha eet kũbũnta kõr coo, kĩ lootha, ĩthõng kẽdẽcaha tiic cannĩ loithiet.’
33 Kõkkõ na gõõla cannĩ kõr coo kĩ lootha,
ĩthõng katĩ kõdõlana Yeruthalẽm loithiet.
Ĩthõng dĩdĩ,
athii eeti cĩ õthõõth molook cĩ Nyekuco cĩ woccia adaaĩ ngatĩvõrĩ Yeruthalẽma tõ.”
Amĩnan Yesu Yeruthalẽm
(Bẽl Matewo 23:37-39)
34 Ma natẽ,
ĩthĩ Yesu ne,
“Uwuy Yeruthalẽm,
Yeruthalẽm,
uruit balna eeta cugunniek eet cĩk õthõõth molook cĩ Nyekuco,
ĩthõng ovoccit bĩĩyẽnĩy eet wũk balna itionaci eeta aniitia.
Ĩthõng kadiimi na dõõkĩthĩ kalũta dõõlĩ cugunik,
kĩ gõõ mĩ alũteei tũwũlũcĩ dõõlĩ cĩgĩnĩk kaavutõy ĩcĩtõ,
athii kẽnnẽ eeta cugunniek cĩ anya kũlũta.
35 Cĩnũ aavu ciith cunnie kaganoko.
Ĩthõng kaduwaci na aniitia dĩdĩ,
ketheci ne,
athii katĩ niia cĩ acinia aneeta kũdũt,
gii ngĩ ikiyyia itini cĩ athĩ niia ne, ‘Agatanẽ eeti cĩ aku thaarĩy ĩcĩk Makayyioktak.’ ”bc