Iyiainit cĩ evyiokto
4
Ma balna thĩ natẽ,
ẽtẽrẽhaĩ Yesu ngatĩ alimanĩ eet titimma ĩcĩ Bũlũc cĩ Galilea naboo.
Maka balna meelitini cĩ alutiai ĩnõõnõ õrrõt,
ngaatĩ õtõdĩ nẽ kovowol kĩĩ kaavu loota,
ĩthõng mẽẽlĩ balna eeta titimma nĩcẽ.
2 Aliman balna nẽ ĩnõõgõ thoothonniok cĩk meelĩk cĩk owovothi cĩk alĩtanẽ eet a ne,
3 “Ĩthĩktõy!
Aavĩ balna eeti ĩmma cĩ õkkõ athacĩ kinyomo mana cĩnnĩ.
4 Ma balna ngĩ athacĩ nẽ kinyomo wo,
athanothi kẽnnẽ gwuak gõõla,
ĩthõng ivitia adait kĩballĩ kithiicõ.
5 Ĩthõng athaantothĩk kinyomona gwuak ngĩtĩ ẽẽn bĩĩyẽn, ĩthõng ukullia tamanoko, nyatarka balna athii cĩ mẽẽlĩ tõdõwa.
6 Ĩthõng balna ũtũũth kõr labĩ nĩĩkẽ kodooitõ, nyatarka athii cĩ iithio kẽgẽrõ looc.
7 Ma thĩ balna natẽ athaantothĩk kinyomona gwuak ngĩtĩ ẽẽn bĩlla,
ĩthõng itilithia ngaatĩ akuui bĩlla ĩnõõgõ.
Ma balna thĩna ĩnĩnga labĩna abiiri jurrung.
8 Ma baa natẽ athaantothĩk kinyomona gwuak naboo ngĩtĩ ẽẽn nyũnat,
ĩthõng ivitia balna ukullia labĩna neekie jurrung kitilithia kibiritõ,
ĩthõng ayak balna labitot codoi dõ etĩmma kõmmõtõ,
ayak ĩmma eet iyyio, kĩĩ kayak ĩmma eet tur.”
9 Ma natẽ ikiyyia uduwak Yesu ĩnõõgõ ethek ne,
“Eeti cĩ ayak kĩĩn, anyĩk ĩnõõnõ kĩthĩwõy jurrung!”
Õthõõth Yesu thõõth cĩ owovothi cĩ alĩtanẽ eet
(Bẽl Matewo 13:10-17; Luka 8:9-10)
10 Ma balna ngĩ aavu Yesu nẽdõ,
ivitia ijinit eeta cĩk balna arũmẽ kĩ ĩnõõnõ kĩ tionniak cĩgĩnĩk ẽẽ,
thoothonniok cĩk owovothi cĩk alĩtanẽ nẽ eet ẽẽ.
11 Ẽdẽcĩ kẽnnẽ Yesu ĩnõõgõ ethei ne,
“Anyĩwothiwung balna agiitia thõõth cĩ alugunyi cĩ kabicoc cĩ Nyekuco.
Ĩthõng kaduwai na eet ngatĩvõrĩ thoothonniok cĩk owovothi cĩk alĩta eeta,
12 nyatarka,
aduwa nyaraga cĩ Nyekuco athĩ ne,
“ ‘Acĩnẽ katĩ eeta cĩkkõ kũdũt,
ĩthõng mĩ acĩnẽ wo athii cĩ agawĩ,
ĩthõng athĩknẽ katĩ nẽẽgẽ kũdũt,
ĩthõng mĩ athĩknẽ wo athii kẽnnẽ cĩ agawĩ,
ĩthõng thĩ,
mĩ agaacõ,
õbõda woccia katĩ nẽẽgẽ kĩ Nyekuc,
ĩthõng ẽnyẽẽĩ woccia katĩ nẽ gerthetin cĩnĩng ẽẽ.’ ”a
Uduwa Yesu thõõth cĩ iyiainit cĩ evyiokto
13 Ma thĩ balna ijin Yesu ĩnõõgõ ethek ne,
“Athii niigia cĩ agayyu thõõth coo cĩ alĩta eet wo?
Ĩthõng agayyu yoko katĩ thĩ niigia thoothonniok õõgĩ cĩk thõõth cĩ alĩta eet ẽẽ, kuu?
14 Athacĩ evyioiti nyemut cĩ ẽẽn thõõth cĩ Nyekuco.
15 Aatĩ eeta gwuak kĩ kinyomona cĩk athaantothĩk gõõla,
athĩrar thõõth cĩ Nyekuco,
ĩthõng tamanoko, ikiyyia Thĩttanĩ ũũwĩ thõõth nĩcẽ thinnetinẽy cĩgĩk.
16 Ĩthõng eeta gwuak aatĩ kĩ kinyomona cĩk athaantothĩk ngĩtĩ ẽẽn bĩĩyẽn,
athĩrar nẽẽgẽ thõõth cĩ Nyekuco tamanoko, ĩthõng elemit nẽẽgẽ thõõth talintia.
17 Ĩthõng thĩ,
nyatarka,
athii cĩ athũnnĩ nẽẽgẽ thõõth jurrung,
athii cĩ aatĩ kuumuc. Ĩthõng mĩ ikiyyia hecinti, kõdẽ pĩrnanẽtĩ, nyatarka thõõth cĩ Nyekuco, uungni katĩ nẽẽgẽ thõõth nĩcẽ tamanoko noko.
18 Aatĩ eeta gwuak kĩ kinyomona cĩk athanothi bĩllanẽy,
ẽẽn nẽẽgẽ eet cĩk athĩrar thõõth cĩ Nyekuco,
19 ĩthõng thĩ,
ahad kẽggẽ nẽẽgẽ rũgẽt cĩ looc nĩco,
kĩ kaal vẽlẽk cĩk abarriteei nẽẽgẽ,
kĩ tĩmaninit cĩ balintio, ĩthõng ivitia ẽgẽrẽthanit thõõth cĩ Nyekuco.
20 Ĩthõng aatĩ eeta gwuak kĩ kinyomona cĩk athacothi ngĩtĩ abũnna tõdõway,
athĩrar nẽẽgẽ thõõth cĩ Nyekuco,
ĩthõng elemita,
adĩman nẽẽgẽ kaal cĩk abũnna jurrung ngõnana etĩmma kõmmõtõ, ĩthõng adĩman gwuak ngõnana eet iyyio, ĩthõng adĩman gwuak ngõnana eet tur.”
Gii cĩ katũkũlẽnĩ
21 Ma baa natẽ ethek Yesu ĩnõõgõ ne,
“Aari woccia eeti ĩmma gii cĩ katũkũlẽnĩ lobela vurtia,
kõdẽ ijjia ĩcĩtõ?
Athii woccia eeti cĩ aari gii cĩ tũkũlẽnto ẽẽ,
tiddina kũtũkũl ciith?
22 Eyeliay katĩ gii vẽlẽk cĩ alugunyi meelitina ngatĩvõrĩ,
ĩthõng gii vẽlẽk cĩ amũtẽẽ, athii katĩ cĩ amũtẽẽ.
23 Mĩ ayak eeti ĩmma kĩĩn cĩk athĩknẽnĩ,
anyĩk ĩnõõnõ kĩthĩwõy jurrung.”
24 Ma natẽ ikiyyia uduwak Yesu ĩnõõgõ naboo ethek ne,
“Uthuutti thoothonniok cĩk athĩknu wo jurrung.
Gii cĩ adĩmanecu niigia et ĩmma,
adĩmanecung katĩ Nyekuci agiitia buu gõõla nĩcẽ dõ noko õrrõt.
25 Eeti cĩ ayak gimma,
anyĩwothi katĩ kaala gwuak kĩĩtõ mẽẽlĩ,
ĩthõng eeti cĩ athii cĩ ayak gimma,
adĩmẽ katĩ gii cĩ dĩcĩlĩm cĩ ayak nẽ ẽẽ,
ĩcĩnnĩ.”
Iyiainit cĩ kinyomoc cĩ alĩnna
26 Ma balna ĩthĩ Yesu naboo ne,
“Aavĩ kabicocĩ cĩ Nyekuco kĩ eeti cĩ athacĩ kinyomo manatõ.
27 Õõngĩ evyioiti baal,
ĩthõng ĩcĩnẽ waath.
Ĩthõng kinyomona akula kẽggẽ noko, athii nẽ cĩ agawĩ akula kinyomona cĩkkõ kuu.
28 Tõdõwa cĩk anyi kinyomo kukullia,
kĩtĩlĩthĩt kĩĩ kacavanĩt kĩĩna, ĩthõng ibbiritõ.
29 Ma katĩ mĩ ibbir mana,
agam eeti kabath, nyatarka arawak kõr cĩ teedintio.”
Iyiainit cĩ kinyomoc cĩ dĩcĩ
30 Ma natẽ õthõõth Yesu naboo ĩthĩ ne,
“Kanihith naaga kathĩ ne,
õgõõn kabicocĩ cĩ Nyekuco kĩ niin?
Iyiainit cĩ owovothi cĩ alĩta eet jang cĩ woccia keyehetheei naaga ĩnõõnõ niin?
31 Aavĩ nẽ kĩ kinyomocĩ cĩ mathtadĩ cĩ dĩcĩ cĩ akannẽ tõdõway ĩcĩtõ.
32 Ma thĩ mĩ akatẽ,
ĩtĩlĩtha kĩĩ kẽẽt cobbi õrrõt goonoginiy manatõ.
Ĩthõng acavanta taliibanẽ cĩk makatĩk cĩk avvu ẽngẽnycĩ kĩballĩ ciithi cĩgĩk.”
Nyia kilimanõĩ Yesu iyiaintiok wo
33 Ĩthõng thĩ,
balna illimaneek Yesu eet nyemut cĩnnĩ,
thoothonniowẽy ĩcĩk owovothi ĩcĩk alĩtanẽ eeta, uduwak balna nẽ ĩnõõgõ kagaacõ.
34 Ma thĩ nẽnnẽ dĩdĩ,
othoothiõy balna nẽ kĩ ĩnõõgõ,
thõõtha ĩcĩ owovothi cĩ alĩtanẽ eeta.
Ma baa ngĩ aavu nẽ dõ ũrũmtẽ kĩ wobjiak cĩgĩnĩk,
uduwak thĩ nẽ ĩnõõgõ thoothonniok vẽlẽk.
Ĩbĩlĩ Yesu ngõõt
35 Ma balna jiatĩn nĩcẽ,
ikiyyia uduwak Yesu wobjiak cĩgĩnĩk ethek ne,
“Kabaaktĩ bũlũc kõõt tõõna ĩcĩ gõlla.”
36 Ma balna thĩna ũtũngtek nẽẽgẽ meelitin cĩ eetu,
ĩthõng otodit wobjiaha kovowol cĩ balna aavẽ Yesu ẽẽ, iriok thĩ balna nẽẽgẽ kĩ kõvõwõlẽ õõgĩ.
37 Ma baa tamanoko,
uvungan ngõõtĩ cĩ tiiri õrrõt,
cĩ õmmõnnĩ maam kongoththia kovowolatõ kĩĩ õjõõntĩ kidiimitõ kukwẽcõ kovowol.
38 Õõngĩ thĩ balna Yesu vurtia cĩ kovowolo,
aruwa õõ cĩnnĩ taabawa.
Ma natẽ uturanit wobjiaha ĩnõõnõ entek ne,
“Limannioit, athii cĩ aga niia kõõt kukuyyie naaga?”
39 Ma natẽ ĩtĩnga Yesu jiena,
ĩthõng egerenyek ngõõt ethek ne,
“Bĩlũ!
Tivanẽ!”
Ngaatĩ thĩ balna abĩlnĩ ngõõtĩ, ĩthõng ĩbĩlĩt maama buu kĩĩ lõõcĩ ĩrr.
40 Ma balna thĩna ethek Yesu wobjiak cĩgĩnĩk ne,
“Ongolinu niigia nyia?
Ngaanĩ athii niigia cĩ ayakcu leminit?”
41 Ĩthõng balna thĩ ongollie wobjiaha õrrõt ngatĩ õthõõth athĩ ne,
“Ẽẽn eeti coo ngẽnẽ, cĩ athĩrar ngõõtĩ kĩ maam thõõth cĩnnĩ wo?”