Et cĩ ayak ririwanĩn cĩk gerthek
(Bẽl Matewo 8:28-34; Luka 8:26-39)
5
Õõt abaaktẽ Yesu kĩ wobjiak cĩgĩnĩk Bũlũc cĩ Galilea,
ĩthõng ivitia tõõn cĩ titim cĩ õjõõn kĩ looc cĩ athĩ Gẽdarẽnẽth.
2 Ma tamanoko õngõtha Yesu kovowola ngatĩvõrĩ,
ikiyyia urumtõy nẽ kĩ et ĩmma cĩ ayak ririwac cĩ gerthe cĩ ẽẽkta loowuanĩy ĩcĩk daakciawu.
3 Ĩthõng abaak nẽ ngatĩ adawini daakciaha wo kĩĩ kõrõõk cĩnnĩ,
ĩthõng athii eeti cĩ woccia ũũlĩ ngatĩ agamĩ ĩnõõnõ, ĩthõng ẽcẽb ĩnõõnõ ngarikowoca tõ.
4 Nyatarka ẽcẽbẽ nẽ ngõnana cĩk meelĩk,
ĩthõng thĩ, ẽtẽd ngarikowoc cĩ ẽẽn thiihit cĩ ecebini athĩna cĩgĩnnẽk kĩ thoo. Kothii et cĩ ũũlĩ ngatĩ woccia agamĩ ĩnõõnõ vẽlẽk, nyatarka tiir nẽ õrrõt.
5 Alu nẽ tub,
õwõ nẽ kaal ngatĩ adawini daakciaha kĩ thiiryiowẽy,
ẽgẽrẽny, ĩthõng ẽtẽd ẽlẽ cĩnnĩ bĩĩyẽnĩy.
6 Ma balna thĩ mĩ acĩn nẽ Yesu rẽẽna wo,
ivir, ĩthõng ũũk akat kuthungti nguuma cĩnnĩ.
7 Ĩthõng utulu nẽ ẽgẽrẽny ĩthĩ ne,
“Adiimi niia nyia kĩ aneeta,
Yesu Ngẽrtĩ Nyekuc cĩ Ijiar vẽlẽk?
Bũtan niia thaarĩy cĩk Nyekucak,
nyĩ akuni uukca aneeta!”
8 Õthõõth thĩ balna nẽ ketee,
nyatarka balna uduwak Yesu ĩnõõnõ ethek ne, “Tẽẽha niia ririwacĩ cĩ gerthe wo eta coo ngĩtĩvõrĩ!”
9 Ma natẽ ikiyyia ijin Yesu ĩnõõnõ ethek ne,
“Athĩ thar cugunik ngẽnẽ?”
Ẽdẽcĩ nẽ athĩ ne,
“Athĩ thar cĩganĩk Lijion,a
nyatarka keeginna naaga mẽẽlĩ.”
10 Ma balna thĩna ikiyyia ala nẽ Yesu naboo kũtũng ĩnõõgõ athii cĩ ingkawecĩ tuu looca nĩcẽ.
11 Aavĩ balna tẽẽnyĩ cĩ kiborongetu joonui natẽ,
ĩthõng ẽggẽ thiira kabanyca.
12 Ma natẽ alaacõ ririwanĩnẽ cĩk gerthek ẽẽ,
Yesu entek ne, “Tionĩhet baai thẽk niia ageeta kibõrõngẽtẽy nĩĩkẽ.”
13 Ma thĩ balna natẽ ikiyyia ẽlẽmaaĩ Yesu ĩnõõgõ kõõt,
ngaatĩ ẽẽktanẽ ririwanĩnẽ cĩk gerthek wo eta nĩcẽ,
ĩthõng õõt itiothõ eleeti cĩk kiborongetu.
Ngaatĩ agubuanĩ tẽẽnyĩ cĩ kiborongetu cĩk ẽẽn vucciaknya ramma (2,000) titimma ĩcĩ thilo, ĩthõng ubukantothik bũlũc kutdududdie.
14 Ma balna thĩ eeta cĩk ũũwa kibõrõngẽ natẽ ẽẽ,
ivitia ivirit õõt athaantĩk nyemut nĩcẽ kõrõõk cĩ gaalawu kĩ looc cĩ õjõõn natẽ vẽlẽk.
Ngaatĩ õvvõ acĩnĩ eeta thõõth cĩ balna adĩmanni natẽ ẽẽ.
15 Ma balna mĩ avvu arawothi nẽẽgẽ Yesu wo,
acĩn kẽnnẽ et wũ gõõ ayak ririwanĩnẽ cĩk gerthek cĩk meelĩk ẽla cĩnnĩ,
aavĩ loota ahimit ceremua, ĩthĩ et cĩ ũbũna õõ jurrung, ĩthõng ongollie nẽẽgẽ vẽlẽk õrrõt.
16 Ma thĩ balna eeta wũk ĩcĩnĩt thõõth nĩcẽ kir,
uduktiak eet thõõth cĩ et wũ balna ayak ririwanĩnẽ cĩk gerthek ẽẽ,
ĩthõng kĩ thõõth cĩ kiborongetu buu.
17 Ngaatĩ thĩ baa avvu alawĩ nẽẽgẽ Yesu kũtũngek looc cĩnĩng.
18 Ma balna mĩ õtõd Yesu kovowol,
ikiyyia ala eeti wũ balna ayak ririwanĩnẽ cĩk gerthek ẽẽ,
ĩnõõnõ ethek ne,
“Anya baai kiirioit kĩ aniitia!”
19 Athii balna cĩ ẽlẽmĩ Yesu ngatĩ irioĩ kĩ ĩnõõnõ,
ethei kẽnnẽ ne,
“Miirie bĩt ĩcĩ olu, ĩthõng bĩt duwak eet cĩk kõrõõk cunung nyia kir cĩ adĩmaneci aniitia Makayyioiti kĩ gõõl wũ balna amannici nẽ aniitia.”
20 Ngaatĩ thĩ baa õkõyyĩ eeti coo korookjiowẽy ĩcĩk gaalawu vẽlẽk ĩcĩk ẽẽn õmmõtõ ẽẽ,
ĩthõng ũũk uduwak eet thõõth wũ balna adĩmanẽcĩ Yesu ĩnõõnõ.
Ĩthõng eeta vẽlẽk cĩk balna athĩrar thõõth coo wo,
ivitia utubuantẽ.
Bũweec cĩ adaaĩ kĩ ngaa cĩ ĩmmõrĩ
21 Ma baa ngĩ abaaẽ Yesu kovowola ũũk titimma cĩ bũlũco,
uluttiak ĩnõõnõ meelitini cobbi õrrõt balna nga aavĩ nẽ titimma cĩ bũlũco.
22 Aavĩ balna makayyioiti ĩmma cĩ Ciith cĩ Lawintio,
cĩ athĩ thar cĩgĩnĩk Jairoth.
Ma baa ngĩ ĩcĩn nẽ Yesu wo,
ikiyyia akatek ĩnõõnõ kuthungti thoonĩy cĩgĩnĩk,
23 ĩthõng ĩlalek ĩnõõnõ ethek ne,
“Õbõwẽ doo cannie cĩ ngayyi wo,
adaaha. Ijjia baai bĩt wum ĩnõõnõ athĩnẽy cugunik, kĩĩ katĩ kũbũna kũrũk!”
24 Ĩthõng irioit Yesu kĩ ĩnõõnõ.
Ĩthõng õwõb meelitini cobbi õrrõt ĩnõõgõ, ĩthõng õõt ũnyũmtothĩk ĩnõõnõ.
25 Aavĩ thĩ balna ngaa ĩmma cĩ ĩpĩra õrrõt cĩ ĩmmõrĩ mõõrĩth cĩ ẽrẽnnĩ ẽlẽ biyyie erkinya õmmõtõ kĩ ramma.
26 Ĩthõng balna anyi akĩĩmẽta cĩk meelĩk ĩnõõnõ kẽgẽrõ mĩn mĩn,
ĩthõng thĩ,
athii cĩ abũnnanĩ nẽ.
Ẽdẽcak nẽ ijjio cĩgĩnĩk vẽlẽk avuthita cĩ mõõrĩth cĩnnĩ ẽẽ, ĩthõng thĩ, ĩtooryi kẽnnẽ mõõrĩthĩ kĩĩ gẽrtha õrrõt.
27 Ma baa ngĩ ĩthĩrar nẽ thõõth cĩ Yesu wo,
ikiyyia õwõb nẽ ĩnõõnõ meelitina, ĩthõng ũũk uwum cẽrẽm cĩnnĩ ĩcĩ bowuco,
28 nyatarka ahad balna nẽ athĩ ne,
“Ma nẽnnẽ thẽk kuwum cẽrẽm cĩnnĩ kaganoko,
kabũnna thĩ katĩ kẽnnẽ na.”
29 Ma balna ngĩ uwum nẽ cẽrẽm cĩ Yesu wo,
ikiyyia ĩbĩl mõõrĩthĩ cĩ ẽrẽnnĩ ẽlẽ cĩnnẽ ẽẽ,
tamanoko, ĩthõng aga nẽ buu ĩthĩ ne, ithii mõõrĩthĩ cĩnnẽ ẽẽ.
30 Ma natẽ noko,
ikiyyia aga Yesu ngatĩ ũũk tiirthẽtĩ ĩmma ẽla cĩnnĩ ngatĩvõrĩ.
Ngaatĩ thĩ ammudẽnẽ nẽ meelitina,
ĩthõng ijinõy ĩthĩ ne,
“Ngẽnẽ cĩ awum cẽrẽm cannĩ wo?”
31 Ma natẽ edecit wobjiaha cĩgĩnnẽk ĩnõõnõ entek ne,
“Cĩn nõ niia buu ngatĩ iyotti meelitini,
ĩthõng naboo ijinõy niia ĩthĩ ne,
‘Ngẽnẽ cĩ awumnya aneeta wo?’ ”
32 Ĩthõng thĩ, balna nga kẽnnẽ Yesu amuudi adiim acĩn ngẽnẽ cĩ awum ĩnõõnõ wo.
33 Ĩthõng thĩ,
aga ngaa ngatĩ ithiiwi mõõrĩthĩ cĩnnẽ ẽẽ,
ĩthõng ikiyyia õtõngõlẽ nẽ õrrõt,
ĩthõng akat kuthungti nguuma cĩ Yesu, kĩĩ kuduwak ĩnõõnõ thõõth vẽlẽk.
34 Ma balna natẽ ẽdẽc Yesu ngaa nĩcẽ ethek ne,
“Anyi aniitia leminiti cunnie bũna,
bĩt avvu jurrung talintia,
nyatarka ithii pĩrnanẽtĩ cunnie.”
35 Ma balna nga õthõõth nẽ ketee wo,
alibai kẽnnẽ eeta gwuak cĩk avvu ciitha cĩ Jairo cĩ ẽẽn makayyioit cĩ Ciith cĩ Lawintio,
ĩthõng ivitia uduktiak ĩnõõnõ entek ne,
“Adaak bũwẽnyunie cunnie,
nga acanani limannioit noko nyia?”
36 Ma balna ngĩ athĩrar Yesu thõõth cĩ aduwaai eeta Jairo wo,
ikiyyia uduwak nẽ ĩnõõnõ ethek ne,
“Nyĩ ongollie,
yak niia leminit dõ.”
37 Athii balna nẽ cĩ ẽlẽmĩ et ĩmma kõwõb ĩnõõnõ,
ĩthõng thĩ, ẽlẽmĩ balna nẽ Pẽtũrũ kĩ Jemith kĩ gõtõnĩ Yoanẽ dõ.
38 Ma balna mĩ ivitia õdõlanit nẽẽgẽ kõrõõk cĩ Jairo,
amũdaai kẽnnẽ Yesu ulua cĩ alue eeta õrrõt.
39 Ngaatĩ thĩ baa iithiowĩ nẽ ciith,
ĩthõng ũũk uduwak ĩnõõgõ ethek ne,
“Nyia utuluth niigia õrrõt,
ĩthõng uuktu eleeti cuguk looc wo?
Nga kadaak dooleca, nga õõngĩ nẽ thõng.”
40 Avvu kẽnnẽ balna arannĩ eeta ĩnõõnõ thõng.
Ma balna natẽ itingka nẽ ĩnõõgõ vẽlẽk kõõt ngatĩvõrĩ,
ĩthõng ikiyyia ũũwĩ nẽ baatĩ dooleco kĩ yaatĩ dooleco dõ kĩ wobjiak cĩgĩnĩk wũk balna ẽẽn iyyio ngatĩ aavẽ doolec ẽẽ.
41 Ĩthõng agam nẽ doolec athiit,
ĩthõng ethek ne,
“Talitha koum,”
athĩ thõõth coo ne,
“Doolec cĩ dĩcĩ wo, ketheci na aniitia ne, tĩnga jiena!”
42 Ma natẽ noko,
ĩtĩnga doolec cĩ ẽẽn baa erkinya õmmõtõ kĩ ramma wo jiena,
ĩthõng õtõõwa. Ngaatĩ atdirlanganĩ thõõth coo ĩnõõgõ õrrõt kũdũt.
43 Ma balna thĩ uduwak Yesu ĩnõõgõ tiirthẽta ethek ne,
“Nyĩ aduwaccu et ĩmma thõõth coo kũdũt,”
ĩthõng uduwak ĩnõõgõ naboo ethek ne,
“Anycĩk ĩnõõnõ gimma kadak.”