Anyĩk Yesu et cĩ alalaniay thoona kũbũna
(Bẽl Marĩkõ 2:1-12; Luka 5:17-26)
9
Õtõd balna Yesu kovowol õkkõ õlõõ ĩcĩ gaalawu ĩcĩnnĩ. 2 Ma natẽ, ayaktak eeta gwuak ĩnõõnõ et cĩ alalaniay thoona cĩ õthõllanni kwuena. Ma balna mĩ acĩn Yesu leminit cĩnĩng wo, ethek nẽ et cĩ alalaniay thoona wo ne, “Doolec, anyĩk thĩnĩn cunni kõkõm, ẽnyẽktẽ aniitia thoothonniowa cĩk gerthek.”3 Ma natẽ, entek limanniowa gwuak cĩk Ngiran cĩ Mutha eleeti cĩgĩk ne, “Adaac eeti coo Nyekuc!”
4 Aga balna Yesu muwẽẽnĩt cĩnĩng ẽẽ, ngaatĩ ẽthẽcĩ ne, “Nyia ummuit thoothonniok cĩk gerthek thinnetinẽy cuguk wo? 5 Thõõth jang cĩ amũjĩ, cĩ kẽnẽcĩ et ne, ‘Ẽnyẽktẽ aniitia thoothonniowa cĩk gerthek,’ kõdẽ cĩ kẽnẽcĩ ne, ‘Tĩnga jiena, ĩthõng otoowu’? 6 Ĩthõng thĩ, keyelecung na agiitia ngatĩ ayahĩ Ngẽrtĩ Eeto makathĩt cĩ ẽnyẽẽĩ thoothonniok cĩk gerthek loota ngato.” Ngaatĩ ẽthẽcĩ nẽ et cĩ alalaniay thoona ẽẽ, ne, “Tĩnga jiena! Dĩma kwuen cunni wo bĩt õlõõ.”
7 Ngaatĩ ĩngannĩ eeti, ĩthõng ũũk õlõõ. 8 Ma balna ngĩ acĩn meelitini cĩ eetu thõõth coo wo, ivitia otongollie eeta õrrõt kũdũt, ĩthõng ĩdĩhĩthĩt Nyekuc, cĩ anyi eet makathĩt nĩcẽ.
Ũtũvvũ Yesu Matewo
(Bẽl Marĩkõ 2:13-17; Luka 5:27-32)
9 Ma balna ngĩ ũtũngek Yesu nginicẽ, acĩn kẽnnẽ et ĩmma cĩ athĩ thar Matewo aavĩ loota ngatĩ aavẽ nẽ alũtĩ mũcũrrũ. Ma natẽ, ũtũvvũ ĩnõõnõ, ĩthõng ethek ne, “Wõba aneeta.” Ngaatĩ ĩngannĩ Matewo, ĩthõng õwõb ĩnõõnõ.
10 Ma baa ngaanĩ aduwue Yesu ciitha cĩ Matewo kĩ wobjiak cĩgĩnĩk, ivitia eeta cĩk meelĩk cĩk alũt mũcũrrũ kĩ gẽrẽthanniok vẽlẽk ivitia adait dainit kĩ ĩnõõgõ. 11 Ma baa ngĩ acĩn eeta cĩk ẽẽn Varithei thõõth coo wo, ijinit wobjiak cĩgĩnĩk entek ne, “Nyia kuduktõy limannioiti cunung kĩ eet cĩk alũt mũcũrrũ kĩ gẽrẽthanniok wo?”
12 Ma baa ngĩ athĩrar Yesu thõõth coo wo, ẽdẽc ĩnõõgõ ethek ne, “Athii eeta cĩk abũnna cĩ adiimi akĩĩm, mooryiak dõ cĩk adiim akĩĩm. 13 Õõt niigia illimanit thõõth cĩ aduwa Nyaraga cĩ Nyekuco athĩ ne, ‘Kadiimi na tamati athii cĩ ẽẽn gii cĩ cavĩto.’a Nyatarka athii balna na cĩ kakuni kũtũvũwa eet cĩk edeemi thoothonniok. Kakunei balna na gẽrẽthanniok.”
Jinẽnĩt cĩ kẽdẽthĩ eleeti
(Bẽl Marĩkõ 2:18-22; Luka 5:33-39)
14 Ĩthõng, ivitia ijinit wobjiaha cĩk Yoanẽ, Yesu entek ne, “Nyia da kedethia naaga kĩ Varithei eleeti cĩgaak wo, ĩthõng thĩ, athii wobjiaha cugunniek cĩ ẽdẽẽth eleeti cĩgĩk wo?”
15 Ẽdẽcĩ Yesu ethei ne, “Alu woccia gõõ eeta cĩk tihẽntak katĩ ngaanĩ arũmẽ nẽẽgẽ kĩ nyẽtẽranit cĩ maacĩ wo kuu? Aku katĩ itini cĩ agamanĩ eeta nyẽtẽranit ẽẽ, ĩthõng thĩ, katĩ edeethito nẽẽgẽ eleeti cĩgĩk.
16 “Athii eeti cĩ ahubeei cẽrẽm cĩ jõr cẽrẽm cĩ ũnũũk tõ, nyatarka ẽrrẽc kẽnnẽ katĩ cẽrẽm cĩ jõr wo cĩ ũnũũk ẽẽ, kĩĩ maka ngĩtĩ erecci. 17 Athii eeta cĩ adũddei mẽrtẽ cĩ jõr buruwẽtẽy ĩcĩk ũnũũĩtõ tõ. Ma ngĩ utuddudiek nẽẽgẽ, aduuvi kẽnnẽ mertia cĩ jõr wo, alib kẽnnẽ katĩ buruwet cĩk ũnũũĩtõb wo, kutduutie mertia kũũk twua. Adũddei woccia nẽẽgẽ mẽrtẽ cĩ jõr dẽrẽẽnẽy ĩcĩk jõr, kĩĩ katĩ athii cĩ alibie buruweta, ĩthõng ĩthĩnga atduuti mertia.”
Bũweec cĩ adaaĩ kĩ ngaa cĩ ĩmmõrĩ
(Bẽl Marĩkõ 5:21-43; Luka 8:40-56)
18 Ma balna nga õthõõth Yesu, ikiyyia gaalinti ĩmma akatek ĩnõõnõ kuthungti, ĩthõng ethek ne, “Adaak aneeta doolec cĩ ngayyi. Ijjia baai tadĩk athiit cunni dooleca, kĩĩ katĩ kũrũk.” 19 Ma natẽ ĩtĩngathõ Yesu kĩ wobjiak cĩgĩnĩk, ĩthõng irioit kĩ ĩnõõnõ.
20 Ma natẽ, ikiyyia õwõb ngaa ĩmma Yesu vurtia, cĩ balna innia ẽlẽ cĩnnẽ erkinya õmmõtõ kĩ ramma, ĩthõng ikiyyia uwum ngeetoc cĩ cẽrẽm cĩnnĩ. 21 Ahad balna ngaa coo thĩnĩna cĩnnĩ athĩ ne, “Ma thẽk ngĩ kuwuma ngeetoc cĩ cẽrẽm cĩnnĩ kaganoko, kabũnna katĩ nana.”
22 Ma natẽ, ummudie Yesu, ĩthõng ĩcĩn ĩnõõnõ, ngaatĩ ẽthẽcĩ ne, “Doolec cannĩ nyĩ omoththie! Anyi leminiti cunnie bũna.” Ma natẽ noko ũbũna ngaa neccie.
23 Ma balna ngĩ ittio Yesu kõrõõk cĩ gaalĩnto amũdothi kẽnnẽ meelitin cĩ eet cĩk abũ nyalomorieta kĩ eet cĩk acalcal uluana, 24 ĩthõng ikiyyia ĩthĩ ne, “Ĩtĩngath õõtõ. Nga kadaak dooleca, õõngĩ nẽ thõng.” Arannĩ balna kẽnnẽ eeta Yesu thõng. 25 Ma balna vurtia cĩ athaanõĩ meelitini cĩ eetu ngatĩvõrĩ, ũũk Yesu ciitha ngatĩ aviyie doolec ẽẽ, ĩthõng agam ĩnõõnõ attia cĩnnĩ, ĩthõng ĩtĩnga nẽ jiena. 26 Ngaatĩ aku athanothĩcẽ nyemut coo looc nĩcẽ vẽlẽk.
Anyĩk Yesu eet cĩk ẽẽn ramma cĩk rubentĩk kũbũnta
27 Ma balna nga õwõ Yesu gõõla, owobit eeta cĩk rubentĩk cĩk ẽẽn ramma ĩnõõnõ, ĩthõng egerenyit ĩĩtõ ne, “Ngẽrtĩ Davide,c tamatĩhet ageeta!”
28 Ma balna ngĩ ittio Yesu ciith, ivitiak eeta cĩk rubentĩk cĩk ẽẽn ramma ĩnõõnõ, ĩthõng ijin nẽ ĩnõõgõ ethek ne, “Elemnyu niigia ngĩ ẽẽn dĩdĩ ngĩ kuuli na ngatĩ keelung agiitia ũbũnta?”
Ẽdẽcĩ nẽẽgẽ athĩ ne, “Ii Makayyioit.”
29 Ma natẽ uwum Yesu bẽrẽ cĩgĩk, ĩthõng ĩthĩ ne, “Nyatarka leminit cunung wo, anyung agiitia ũbũnta.” 30 Ma baa natẽ, ĩcĩntẽ bẽrẽ cĩgĩk. Ĩthõng ĩtĩrĩth Yesu ĩnõõgõ õrrõt ethek ne, “Nyĩ ovvoyyu aduwaccu et ĩmma thõõth coo kũdũt.” 31 Ĩthõng thĩ, õvvõ balna kẽggẽ nẽẽgẽ athaani nyemut cĩnnĩ looc nĩcẽ vẽlẽk.
Anyĩk Yesu et cĩ athii cĩ õthõõth kõthõõth
32 Baa nga õwõ Yesu kĩ wobjiak cĩgĩnĩk, ivitia ayaktak eeta gwuak ĩnõõnõ et ĩmma cĩ athii cĩ õthõõthĩ, nyatarka ayak nẽ ririwac cĩ gerthe. 33 Ma vurtia cĩ itingkawi Yesu ririwac cĩ gerthe, ikiyyia õthõõth eeti jurrung. Atubuan balna kẽnnẽ thõõth coo meelitin cĩ eetu ngaatĩ õthõõthĩ athĩnnĩ ne, “Cĩ gõõ ngaanĩ kedenyiay thõõth cĩ aavĩ ketee Ĩthraĩla!”
34 Athĩ kẽnnẽ balna Varithei ne, “Alaan cĩ ririwanĩn cĩk gerthek cĩ anyi ĩnõõnõ makathĩt cĩ ingkawĩ ririwanĩn cĩk gerthek wo.”
Amanni Yesu eeta
35 Õkkõ balna Yesu õwõ ĩcĩ korookjiok cĩk gaalawu kĩ korookjiowẽy vẽlẽk aliman eet Ciithẽnẽy ĩcĩk Lawintiak, irion Nyemut cĩ Abũnna cĩ kabicoc cĩ Nyekuco, ĩthõng aanyĩk eet cĩk ĩmmõrĩ moorithiok cĩk aatĩ mĩn mĩn kũbũnta. 36 Ma balna ngĩ acĩn nẽ meelitin cĩ eetu, atamatĩk nẽ ĩnõõgõ, nyatarka balna alanglang amaatĩ, ĩthõng apĩrna õrrõt kaavutõ kĩ athaa cĩk athii cĩ ayak tũwayyioit. 37 Ngaatĩ ẽthẽcĩ nẽ wobjiak cĩgĩnĩk ne, “Mẽẽlĩ labĩna cĩk eteediay, ĩthõng dĩcẽ ticcianniowa cĩk ẽtẽda. 38 Alaac Makayyioit cĩ manu kayaha ticcianniok cĩk ẽtẽda labĩ manatõ cĩnnĩ.”