Nyia cĩk ẽẽn nyĩgĩt cĩk Varithei
12
Alutiay balna eeta cĩk ẽẽn vucciaknya cĩk meelĩk,
ĩthõng ĩkĩnycõĩ gõõl kaathiõy nẽẽgẽ õrrõt,
ĩthõng uduwak Yesu wobjiak cĩgĩnĩk ethek ne,
“Egeenyit niigia nyĩgĩt cĩk Varithei,a
egeenyit ĩnõõgõ ngatĩ aatẽ kĩ eeta cĩk abũnna, ĩthõng thĩ, gẽrthẽ nẽẽgẽ thõng.
2 Gii vẽlẽk cĩ alugunyi edenyiay katĩna,
ĩthõng gii cĩ amigẽnĩ eeta edenyiay katĩna.
3 Thõõth cĩ othooththu niigia muwuratõ,
athĩknẽ katĩ waath.
Ĩthõng thõõth cĩ alakiddu niigia ciitha,
othooththi, kĩĩ katĩ kĩthĩhĩt eeta vẽlẽk.”
Ngẽnẽ cĩ woccia kongollie naaga?
(Bẽl Matewo 10:28-31)
4 Ngaatĩ irionĩcẽ ĩnõõgõ naboo ẽthẽcĩ ne,
“Gõõnõga kaduwacunga,
nyĩ ongolinu eet cĩk aruk ẽlẽ dõ,
ĩthõng katĩna,
athii gii ĩmma cĩ woccia adĩman nẽẽgẽ naboo tõ.
5 Ĩthõng thĩ,
kaduwacung Et cĩ woccia ongolinu.
Otongollie Nyekuc, nyatarka ĩnõõnõ dõ cĩ ayak tiirthẽt cĩ aruwung agiitia, ĩthõng utdukeewung guyyia cĩ aavĩ kũdũt.b Ii kathĩ na ne, otongollie ĩnõõnõ dõ.
6 Ũũtĩ ballonya cĩk ẽẽn tur nyarobinyay ĩcĩk kĩdĩk kaganoko?
Ĩthõng thĩ, athii cĩ erehei Nyekuci codoi ĩcĩnĩng.
7 Ĩthõng ĩmana cĩk õõ cunni wo,
ẽkẽb Nyekuci vẽlẽk.
Ĩthõng nyĩ ongolinu gii ĩmma,
eeginnu niigia tiirti ijiaryu ballonya cĩk meelĩk koo.
Uduktiak niigia eet õõgĩ thõõth cĩ Yesu Kiristo
8 “Kaduwaccunga,
eeti cĩ aduwaai eet athĩ ne,
õwõbja aneeta, ẽyẽla katĩ Ngẽrtĩ Eeto ĩnõõnõ buu kõrgẽna cĩ anjĩlẽt cĩk Nyekucak.
9 Ĩthõng thĩ,
eeti cĩ abũrna aneeta bẽrẽnĩy ĩcĩk eetu, kaburi katĩ na buu ĩnõõnõ bẽrẽnĩy cĩk anjĩlẽt cĩk Nyekucak.
10 Eeti ĩmma cĩ adaac Ngẽrtĩ Eeto,
uungnothi katĩ thõõth cĩ gerthe cĩnnẽ,
ĩthõng thĩ, eeti cĩ adaac Ririwac cĩ Dĩhĩmĩ, athii katĩ gerthetini cĩnnẽ cĩ uungnothi kũdũt.
11 “Ĩthõng mĩ õvvõ abilnung eeta Ciithẽnẽy ĩcĩk Lawintiak,
kõdẽ kĩ gaala looca coo,
nyĩ omothinu thõõth cĩ katĩ ovvoyyu aduwuanu,
12 nyatarka aduwaccung katĩ Ririwacĩ cĩ Dĩhĩmĩ kõrra nĩcẽ thõõth cĩ katĩ othooththu.”
Ballioit cĩ agiithi
13 Ma natẽ,
othoothĩk eeti ĩmma Yesu meelitina ennek ne,
“Limannioit,
duwahia baai gõtõna kẽngẽraha kaal cĩk balna uungniciet baangietĩ balna ngĩ adaak nẽ.”
14 Ẽdẽcĩ kẽnnẽ Yesu ennei ne,
“Ngẽnẽ da balna cĩ ẽbẽrana aneeta kĩĩ kikiyyia kẽngẽr thõõth cunung kĩ gotonu wo?”
15 Ngaatĩ ẽthẽcĩ nẽ meelitin ne,
“Uthuutti eleeti cuguk!
Nyĩ angarubenu,
nyatarka kaal cĩk looc coo. Athii eeti cĩ arũgĩ, nyatarka balinit cĩnnĩ cobbi õrrõt.”
16 Ngaatĩ aduwacĩ ĩnõõgõ iyiainit cĩ owovothi cĩ alĩta et cĩ athĩ ne,
“Aavĩ balna ballioiti ĩmma cĩ abiiri mana cĩnnẽ õrrõt.
17 Ngaatĩ amui thĩnĩna cĩnnĩ athĩ ne,
‘Kogooni woccia katĩ na kuu?
Athiina bẽrẽ ngĩtĩ karĩccẽ labĩ cĩganĩk wo tõ.’
18 “Ĩthõng naboo õthõõth mĩn ĩĩ ne,
‘Kĩdĩman ketee,
kathaani katĩ deherua cĩganĩk,
ĩthõng kĩdĩmana cĩk obbitik,
ĩthõng kaarĩha labĩ kĩ ijjio cĩganĩk vẽlẽk ĩcĩtõ.
19 Ĩthõng thĩ,
katĩ kennea ẽlẽ cannĩ ne,
“Ayahi dainit kĩ ijjio cĩk katĩ aatĩ erkinya cĩk meelĩk.
Duwõy, ĩthõng ũwũdẽ nyĩ ngaanĩ amui gimma, ũbũna avuthiti cunnie.” ’
20 “Ennei kẽnnẽ Nyekuci ĩnõõnõ ne,
‘Niinia giitheeiti,
adaawu katĩ niia baalin coo.
Ngẽnẽ katĩ cĩ õkõyyĩ dainit kĩ ijjio cĩk iyiangei niia ẽlẽ cunni wo?’
21 “Ẽẽn eeti giitheeit katĩ mĩ iyiang nẽ dainit kĩ ijjio cĩk ẽlẽ cĩnnĩ,
ĩthõng thĩ, athii cĩ agawõnĩ nẽ kĩ Nyekuc.”
Nyĩ omothinu
(Bẽl Matewo 6:25-34)
22 Ngaatĩ ẽthẽcĩ Yesu wobjiak cĩgĩnĩk ne,
“Kaduwacung na agiitia,
nyĩ omothinu rũgẽt cunung,
kõdẽ gii cĩ adakcu,
kõdẽ eleeti cuguk,
kõdẽ ceremua cĩk ahimittu.
23 Ijiar rũgẽtĩ dainit, ĩthõng ijiar ẽlẽ cẽrẽm.
24 Ummuit da nõ kurruukua,
athii nẽẽgẽ cĩ evyi,
ĩthõng athii cĩ ayak deherua cĩk aari dainit,
ĩthõng kẽnnẽ alingit Nyekuci ĩnõõgõ.
Athunnung katĩ agiitia Nyekuci kijiar kĩballĩ.
25 Ngẽnẽ kõrgẽna cunung cĩ woccia anyi mothinti ĩnõõnõ kaavu kuumuc kõr codoi doo?
26 Mĩ athii cĩ ullu ngatĩ woccia adĩmanu gii cĩ dĩcĩ kaganoko,
nyia thĩ woccia cĩ omothinu niigia, nyatarka kaal cĩk meelĩk wo?
27 “Ĩcĩnĩt da nõ vurẽẽna,
athii nẽẽgẽ cĩ aticanni õrrõt adĩmana ceremua cĩgĩk.
Ĩthõng thĩ,
kaduwacung dĩdĩ,
athii balna cĩ ahimit Thõlõmõnẽ ceremua cĩk dĩhĩmĩk balintia ĩcĩnnĩ vẽlẽk,
cĩk aduwõy kĩ vurẽẽn nĩĩkẽ.
28 Ma ngĩ anyi Nyekuci kartẽ cĩk aatĩ ngato wo kitihimtie kõr coo,
ĩthõng ũtũũthẽ lootha guyyia.
Niigia eeta cĩk ayakcu leminit cĩ dĩcĩ wo,
athii woccia katĩ nẽ cĩ ahimittung agiitia õrrõt kijiar?
29 Ĩthõng nyĩ anyiccu thinneti cuguk kumuit dainit cĩ adakcu, kõdẽ gii cĩ awuddu. Nyĩ omothinu kaalĩy ĩcĩkkõ.
30 Eet cĩk athii cĩ aga Nyekuc cĩk alĩk kaal cĩk õgõõn ketee.
Aga Baaba cunung ngatĩ adiimnyu niigia kaal cĩkkõ.
31 Ĩthõng thĩ,
ĩlĩhĩt kabicoc cĩ Nyekuco, ĩthõng anyĩwothicung katĩ kir kaala cĩk adiimnyu niigia wo, vẽlẽk.
Balinit tammuatiddina
(Bẽl Matewo 6:19-21)
32 “Niigia wobjiaha cĩganniek cĩk ngatũrĩk kaganoko wo,
nyĩ ongolinu.
Ẽbẽlbẽl Baaba cunung ngatĩ anyung agiitia kabicoc cĩnnĩ.
33 Utuyyiõĩ niigia ijjio cuguk,
ĩthõng anyciwu nyarobinya piryiak.
Anycĩk niigia balinit cunung kiitiangẽ tammuatiddina ngatĩ woccia athii cĩ ogorthini, ĩthõng athii cĩ adak thõrõwõnyẽ.
34 Nyatarka ngatĩ aavẽ balinti cunnie,
aavĩ thẽk katĩ thĩnĩn cunnie buu natẽ.
Aavut vĩrĩngĩng
(Bẽl Matewo 24:45-51)
35 “Ĩdĩmantothĩk jurrung, ĩthõng utukullu kaal cuguk cĩk atũkũlĩ kũbũnta,
36 kĩ eeta cĩk ẽrẽwa makayyioit cĩnĩng kõbõda tihẽnta,
kĩĩ katĩ mĩ õbõda,
ĩthõng uuk katũk, oowi katĩ nẽẽgẽ ĩnõõnõ katũk tamanoko.
37 Abũnna katĩ ticcianniowa ma ngĩ aku makayyioiti cĩnĩng,
amũdaai ĩnõõgõ acĩnẽ.
Kaduwacung dĩdĩ,
aku katĩ adĩmanothi makayyioiti, ĩthõng anyĩk ticcianniok cĩgĩnĩk kaavutõ loota, ĩthõng anyĩk ĩnõõgõ dainit kuduktõy kĩ ĩnõõnõ kõdõwẽ.
38 Ĩthõng ẽbẽlbẽl katĩ ticcianniowa cĩk amũdaai makayyioiti acĩnẽ,
kõdẽ woyyia ma ngĩ aku kõrgẽna cĩ baalino, kõdẽ aku nẽ ngerenniet.
39 “Ĩthõng thĩ,
agaac thõõth coo,
mĩ kagga baatĩ olu itin cĩ akuni goryiaiti, athii woccia cĩ anyi nẽ goryiait kikiyyia kõrõõk cĩnnĩ kõgõrõth ijjio cĩgĩnĩk.
40 Ĩdĩmantothĩk niigia buu jurrung,
nyatarka aku katĩ Ngẽrtĩ Eeto kõrra cĩ athii cĩ agawu niigia.”
41 Ngaatĩ ajini Pẽtũrũ Yesu ẽthẽcĩ ne,
“Makayyioit,
aduwacet niia ageeta dõ thõõth cĩ owovothi cĩ alĩta eet wo,
kõdẽ aduwaai eet vẽlẽk?”
42 Ẽdẽcĩ Makayyioiti ennei ne,
“Ngẽnẽ cĩ aari makayyioiti tiica cĩ agamĩ ticcianniok cĩgĩnĩk,
cĩ anyi ĩnõõgõ dainit itina ĩcĩ edeemothi?
Ẽẽn nẽ ticciannioit cĩ ẽgẽẽnyĩ cĩ athĩhĩ thõõth cĩnnĩ.
43 Abũnna katĩ ticciannioiti neccie, ma ngĩ õbõda makayyioiti amũdaai ĩnõõnõ aticanni.
44 Kaduwacung dĩdĩ,
aari katĩ makayyioiti cĩnnẽ ĩnõõnõ kẽbẽk ijjio cĩgĩnĩk vẽlẽk.
45 Ĩthõng thĩ,
ma ngĩ amuk ticciannioiti,
‘Athĩ nẽ ne,
athii cĩ aku makayyioiti cannie tamanoko,’
ĩthõng ithianaĩ uuk ticcianniok cĩk ngayyik kĩ cĩk maacĩk vẽlẽk, ĩthõng uduwõy õrrõt, ĩthõng ũwũdẽ kĩbaaẽ.
46 Atinya katĩ ticciannioiti makayyioit cĩnnĩ ngatĩ akuni katĩ kõrra cĩ athii nẽ cĩ agawĩ,
ngatĩ akuni nẽnẽ itina cĩ athii nẽ cĩ agawĩ. Ẽtẽd katĩ nẽ ĩnõõnõ kĩĩ tẽbẽlẽcẽ, ĩthõng kĩĩ kaarĩk ĩnõõnõ nginiwa ĩcĩ eet wũk athii cĩ ẽẽn eet cĩk Nyekucak.
47 “Abicie katĩ ticciannioiti kallia ngõnana cĩk meelĩk,
cĩ aga tiic cĩ adiim makayyioiti cĩnnẽ, ĩthõng thĩ, athii cĩ adĩmaneei, kõdẽ athii cĩ adĩman tiic cĩ adiim makayyioiti wo.
48 Ĩthõng thĩ,
ticciannioiti cĩ athii cĩ aga tiic cĩ woccia adĩman,
ĩthõng ĩdĩman kaal cĩk woccia uukẽnẽ,
abicie katĩ kallia ngõnana ĩcĩk kĩdĩk kaganoko.
Eeti cĩ anyi Nyekuci gii cĩ obbi,
adiim katĩ Nyekuci gii cĩ obbi buu ĩcĩnnĩ.
Ĩthõng eeti cĩ anyi Nyekuci kaal cĩk meelĩk õrrõt, adiim katĩ Nyekuci kaal cĩk meelĩk õrrõt buu ĩcĩnnĩ.
Ayaha Yesu ngerinit
(Bẽl Matewo 10:34-36)
49 “Kakuni balna na,
kĩĩ katĩ kakatĩ guo looc,
ĩthõng kadiimi woccia thẽk kũtũthẽ vẽlẽk!
50 Ĩthõng thĩ, kayai na batithimo cĩ tĩmanõ cĩ ngaanĩ avĩya ĩcĩ owu cĩ katĩ kapĩrnanẽ õrrõt kuumuc gii ngĩ edecciay!
51 Ahaddu niigia athinnu ne,
kayaha balna na ganõn looca ĩcoo?
Athii tõ, kakuni balna na kayaha ngerinit.
52 Ẽtẽrẽhanĩ yoko,
aatĩ katĩ eeta tur cĩk ciith codoi dõ,
ĩthõng engeryiõy mĩn,
ẽngẽrõy eeta iyyio kĩ ramma,
ĩthõng ẽngẽrõy eeta ramma kĩ iyyio.
53 Ẽngẽrõy katĩ nẽẽgẽ,
baatĩnnĩ kĩ ngẽrĩnĩ,
ngẽrĩnĩ kĩ baatĩnnĩ. Engeryiõy katĩ yaatĩnnẽ kĩ bũwẽnyĩnĩ, bũwẽnyĩnĩ kĩ yaatĩnnĩ. Ẽngẽrõy katĩ kinyik kĩ kalawan cĩnnĩ, kalawan kĩ kinyik cĩnnĩ.”
Yelinit cĩ agawini itini
(Bẽl Matewo 16:2-3, 5:25-26)
54 Ngatĩ ẽthẽcĩ Yesu meelitin naboo ne,
“Mĩ icintu niigia diith kũdũt ĩtĩnga ĩcĩ okolothĩcẽ kõr,
othooththu tamanoko iittu ne,
‘Ĩtĩĩl katĩ tammu,’
ngaatĩ thẽk atĩlnĩ dĩdĩ.
55 Ĩthõng mĩ icintu uvungana ngõõtĩ cĩ aku ĩcĩ diinu,
othooththu iittu ne,
‘Ikiyyia attienĩ,’
ĩthõng thẽk ĩĩ dĩdĩ.
56 Niigia volongnyiaha cĩkkõ,
agayyu niigia ngatĩ aduwuanu gõõl cĩ ũũkcẽnẽ lõõcĩ kĩ tammutiddin.
Ĩthõng erekcung ngatĩ õgõõn itini cĩ yoko wo kuu?”
57 “Nyia niigia athii cĩ eteddu thoothonniok cĩk edeemothi eletinẽy ĩcuguk dõ wo?
58 Katĩ mĩ iriokcu kĩ et cĩ balna ẽpẽkanonu kĩ aniitia ovvoyyu lokika,
tĩman õrrõt ngatĩ woccia ẽdẽcacu kĩ ĩnõõnõ thõõth cunung wo gõõla,
ngaanĩ õdõlanit et cĩ ẽtẽd thõõth.
Kõdẽ katĩ ngĩ ayawothici nẽ aniitia et cĩ ẽtẽd thõõth, cĩ avva bolithoc cĩ atdukeci aniitia kĩjana.
59 Kaduwacina dĩdĩ,
athii thẽk katĩ cĩ ooguay niia gii ngĩ ũdũmanu nyarobinya vẽlẽk.”