Eyelek Yesu wobjiak gõõl cĩ alawini
(Bẽl Matewo 6:9-13; 7:7-11)
11
Alayyie balna Yesu kõr ĩmma ngamanĩ.
Ma balna ngĩ ẽdẽcak nẽ lawinit,
ethek wobjiaiti ĩmma cĩnnẽ ne,
“Makayyioit,
limanehet ageeta buu gõõl cĩ kalawinia kĩ balna ngĩ aliman Yoanẽ Batithta wobjiak cĩgĩnĩk.”
2 Ngaatĩ ẽthẽcĩ ĩnõõgõ ne,
“Katĩ mĩ alawinu,
alayyiõy ketee.
“ ‘Baangiet cĩnang,
abulie thara cugunniek.
Anyĩk kabicoc cunni kikiyyia.
3 Anyet ageeta kõr coo, dainit cĩ kõr coo.
4 Tũngehet ageeta gerthetin cĩnang,
kĩcĩ kũũngnĩca naaga eet cĩk adĩmannet ageeta buth.
Ĩthõng nyĩ okoyyiet ageeta tĩmanintia.’ ”
5 Ma natẽ,
ethek Yesu ĩnõõgõ ne,
“Yoko kẽyẽk eeti ĩmma kõrgẽna cunung gõõnĩ,
ĩthõng ũũk ala ĩnõõnõ kõrgẽna cĩ baalino,
ĩthõng ennek ne, ‘Gõõna, anya baai aheenin wũk avaadiay cĩk ẽẽn iyyio,
6 nyatarka kayai kerennioit ĩmma cĩ alibaca õlõõ viyyio,
ĩthõng amũdaai nẽ kaavẽ na athĩnẽy kollin.’
7 “Ẽdẽcĩ kẽnnẽ goonia ciitha ennei ne,
‘Nyĩ acanannanĩ.
Ũnyũgẽ katũga,
ĩthõng kataguthia naaga kĩ dõõlĩ vẽlẽk.
Athii woccia cĩ kĩngathi, ĩthõng kaanyi gimma.’
8 Kaduwacung dĩdĩ,
mĩ thẽk ngĩ abũrĩ nẽ ngatĩ ĩngannĩ,
ĩthõng anyĩk gõõnĩ cĩnnĩ aheenin cĩk avaadiay,
nyatarka nga goonia uuk katũk noko, ĩngathĩ katĩ nẽ, ĩthõng anyĩk gõõnĩ aheenin cĩk avaadiay vẽlẽk cĩk adiim nẽ.
9 “Ĩthõng kaduwacunga,
ijinit,
ĩthõng katĩ anyĩwothiwunga,
idiimit, ĩthõng katĩ umuddiawu, uukit katũk, kĩĩ katĩ koyiwunga.
10 Nyatarka eeti cĩ ajin,
anyĩwothi katĩna.
Eeti cĩ adiimi,
amũda katĩna.
Ĩthõng eeti cĩ uuk katũk,
owothi katĩ ĩnõõnõ katũga.
11 “Ngẽnẽ kõrgẽna cunung cĩ woccia mĩ ajin ngẽrĩnẽ kuluguac, anyi kẽnnẽ ĩnõõnõ kũwaat?
12 Kõdẽ mĩ ajin burnanit,
anyi kẽnnẽ kĩtõ?
13 Mĩ agayyu niigia ngatĩ anyiccu dõõlĩ cuguk kaal cĩk abũnna,
kõdẽ woyyia ma ngĩ eeginnu niigia gerthe,
adiim Baaba cĩ aavĩ tammuatiddina õrrõt ngĩ anyi eet cĩk ajin ĩnõõnõ Ririwac cĩ Dĩhĩmĩ!”
Yesu kĩ et cĩ agam ririwanĩna cĩk gerthek
(Bẽl Matewo 12:22-30; Marĩkõ 3:20-27)
14 Ingka balna Yesu ririwac cĩ gerthe cĩ anyi et cĩ adĩĩtĩ kĩĩna athii cĩ õthõõthĩ.
Ma balna ngĩ ũũk ririwacĩ cĩ gerthe wo,
ikiyyia õthõõth eeti jurrung,
ngaatĩ atubuanini meelitini.
15 Ĩthõng thĩ,
õthõõth kẽnnẽ gwuak athĩ ne,
“Ingka nẽ ririwanĩn cĩk gerthek tiirthẽta cĩ Beelthebubi,a alaan cĩ ririwanĩn cĩk gerthek.”
16 Ngaatĩ atĩmanĩ gwuak Yesu ajini yelinit cĩ aku tammuatiddina.
17 Aga balna Yesu muwẽẽnĩt cĩnĩng,
ngaatĩ aduwacĩ ĩnõõgõ ẽthẽcĩ ne,
“Kabicocĩ cĩ uukõy eeta cĩgĩnnẽk mĩn,
agiiriay katĩna.
Ĩthõng kõrõõgĩ cĩ uukõy eeta cĩgĩnnẽk nyaguana,
athanni katĩna.
18 Mĩ ẽngẽr Thĩttanĩ ẽlẽ cĩnnĩ mĩn,
aku katĩ aavĩ kabicocĩ cĩnnẽ kuumuc kuu?
Kaduwa na thõõth coo,
nyatarka othooththu niigia athinnu ne, kingka na ririwanĩn cĩk gerthek tiirthẽta cĩ Beelthebubi.
19 Ma ngĩ kingka na ririwanĩn cĩk gerthek tiirthẽta ĩcĩ Beelthebubi,
ma wobjiaha cuguk ingka tiirthẽta ĩcĩ ngẽnẽ?
Ĩnõõgõ thĩ katĩ cĩk ẽẽn eet cĩk ẽtẽd thoothonniok cuguk.
20 Ĩthõng thĩ,
mĩ kingka na ririwanĩn cĩk gerthek tiirthẽta cĩ Nyekuco, ikiyyia thĩ kabicocĩ cĩ Nyekuco ĩcunung vẽlẽk.
21 “Mĩ ẽbẽk eeti cĩ tiiri kõrõõk cĩnnĩ,
ĩthõng ayak ijjio cĩk jorak,
athũnnĩ katĩ nẽ ijjio cĩgĩnĩk jurrung.
22 Ĩthõng thĩ,
mĩ ikiyyia eeti ĩmma cĩ tiiri õrrõt atamaac ĩnõõnõ,
õkõyyĩ katĩ nẽ ijjio cĩk jorak vẽlẽk,
wũk balna ayak eeti neccie, ĩthõng ẽngẽr nẽ ijjio cĩk balna ayak eeti neccie ẽẽ.
23 Eeti ĩmma cĩ abũrĩ thõõth cannĩ athii cĩ ẽẽn et cannĩ.
Ĩthõng eeti cĩ athii cĩ ẽlla aneeta keteddia mana kõdõwẽ,
adawana nẽ aneeta.
Õbõda ririwacĩ cĩ gerthe
24 “Mĩ ẽtẽha ririwacĩ cĩ gerthe ẽla cĩ eeto,
õyõkõn katĩ baath kuumuc,
adiim ngĩtĩ woccia ayuwuthi.
Ĩthõng mĩ adĩccẽ ngatĩ arũbanĩ,
õthõõth katĩ mĩn athĩ ne,
‘Nyẽ da kimiiri kũũk õlõõ wũ balna nannĩ.’
25 Ĩthõng thĩ, mĩ ũũk ũrũbothĩk kõrõõk abũnna,
26 õkkõ katĩ ayaha ririwanĩn tũrgẽrẽm cĩk gerthek cĩk ijiar ĩnõõnõ.
Ĩthõng õõt abaaitõ natẽ.
Ngaatĩ katĩ akuni gẽrtha eeti õrrõt kijiar gõõl wũ balna aavẽ ĩcĩ owu.”
27 Balna nganĩ õthõõth Yesu,
õthõõth ngaa ĩmma ĩnõõnõ meelitina ennek ne,
“Agatanẽ ngaa cĩ balna aritianĩ aniitia,
ĩthõng itilingaai tõrkõwõy ẽẽ.”
28 Ẽdẽcĩ kẽnnẽ Yesu ennei ne,
“Agatantẽ eeta cĩk athĩrar thõõth cĩ Nyekuco,
ĩthõng elemita.”
Yelinit cĩ aku Nyekuca
(Bẽl Matewo 12:38-42; Marĩkõ 8:12)
29 Ma balna ngĩ aluttiay meelitini coo kĩĩ maka wo,
irionĩk Yesu ĩnõõgõ ethek ne,
“Gẽrthẽ niigia eeta cĩk erkinya cĩkkõ õrrõt.
Nga adiimnyu niigia yelinit cĩ aku Nyekuca noko,
ĩthõng thĩ, yelinit wũ balna amũda Yionab dõ cĩ katĩ anyĩwothicunga.
30 Kĩ balna ngĩ ẽẽn Yiona yelinit cĩ eet cĩk Nineve,
ẽẽn katĩ Ngẽrtĩ Eeto buu yelinit cĩ eet cĩk erkinya cĩkkõ.
31 Aku katĩ ngaa wũ balna aku looca cĩ diinu cĩ ẽẽn alaan cĩ Thẽbac kĩ eet cĩk erkinya cĩkkõ kõrra cĩ etedinie thoothiowa,
nyatarka balna aku athĩrar nẽ gẽẽnyĩth cĩ alaan Thõlõmõnẽ.
Ĩthõng thĩ,
yoko aavu eeti cĩ ijiar Thõlõmõn ngato,d
ĩthõng athii niigia cĩ athĩknu ĩnõõnõ.
32 Abĩlĩ katĩ eeta cĩk Nineve kĩ eet cĩk erkinya cĩkkõ kõrra cĩ teedintio,
ĩthõng etedicung katĩ nẽẽgẽ agiitia thõõtha cunung,
nyatarka balna ũtũngtek nẽẽgẽ thoothonniok cĩk gerthek cĩgĩk cĩk balna thẽk irionĩcẽ Yiona ĩnõõgõ.
Ĩthõng thĩ,
yoko aavu eeti cĩ ijiar Yiona ngato.
Gii cĩ katũkũlẽnĩ cĩ elo
(Bẽl Matewo 5:15; 6:22-23)
33 “Athii eeti cĩ atũkũlei gii cĩ katũkũlẽnĩ,
ĩthõng uluguny thõng,
kõdẽ aari ijjia vurtia tõ. Aari woccia thẽk nẽ lobela, kĩĩ katĩ kĩcĩnĩt eeta cĩk ẽẽkta ciith cĩtõ.
34 Ẽẽn keberecĩ cunnie gii cĩ katũkũlẽnĩ cĩ ẽlẽ cunni.
Mĩ abũnna kẽbẽrẽ cugunniek,
maka lanyĩtĩ ẽla cunni tũrũr.
Ĩthõng thĩ,
ma ngĩ gẽrthẽ nẽẽgẽ, maka muwuri ẽla cunni.
35 Cĩn jurrung, athii cĩ ẽẽn lanyĩtĩ ẽla cunni muwur.
36 Ĩthõng thĩna,
noko mĩ maka lanyĩtĩ ẽla cunni,
ĩthõng athii tõõn cĩ ẽẽn muwur tõ,
atũkũlĩ katĩ ẽlẽ cunnie jurrung kĩ gõõ mĩ atukulli gii cĩ tũkũlẽnto aniitia.”
Ĩbĩlĩ Yesu Varithei kĩ limanniok cĩk Ngiran cĩ Mutha
(Bẽl Matewo 23:1-36; Marĩkõ 12:38-40; Luka 20:45-47)
37 Ma balna ngĩ ẽdẽcak Yesu ngatĩ õthõõthĩ wo,
ikiyyia okolek Varitheniti ĩmma ĩnõõnõ thooc kõõt daintia õlõõ cĩnnĩ.
Ngaatĩ õkõyyĩ Yesu õkkõ aduwẽẽnĩ.
38 Ĩthõng thĩ,
balna ngĩ acĩn Varitheniti Yesu ngatĩ aduwẽẽnĩ ngaanĩ kũtũũny athĩn wo, ikiyyia itdirlangẽ nẽ õrrõt.
39 Ngaatĩ ẽthẽcĩ Makayyioiti ĩnõõnõ ne,
“Uunyu niigia Varithei lõkũlkũlẽt kĩ dũũcẽ ngĩtĩvõrĩ dõ,
ĩthõng thĩ, ĩcĩtõ eeginnu niigia eet cĩk gerthek ngarubitina kĩ gerthetina dõ.
40 Niigia eeta cĩk ẽẽn giithiak wo!
Athii Nyekuci balna cĩ ẽngẽnyca ngĩtĩvõrĩ kĩ ĩcĩtõ buu?
41 Ĩthõng thĩ,
anycĩk eet cĩk apĩrna gii cĩ aavĩ dũũcẽnẽy cuguk, ĩthõng iittu katĩ niigia dĩhĩmẽ thoothonniowẽy vẽlẽk.
42 “Pĩrnanẽt ĩcunung niigia Varithei,
nyatarka thõõth cĩ anyiccu Nyekuc anyinit cĩ dĩcĩe cĩ manẽẽn cuguk,
ĩthõng thĩ,
abayahannu niigia eet,
athii cĩ adĩmanecu ĩnõõgõ kaal cĩk abũnna jurrung,
ĩthõng athii cĩ amĩnannu Nyekuc.
Ĩdĩmanit thẽk niigia kaal cĩk tiirtik cĩkkõ, ĩthõng naboo anyciwu Nyekuc gii cĩ dĩcĩ cĩ manẽẽn cuguk.
43 “Pĩrnanẽt ĩcunung Varithei,
nyatarka ebelbellu ngatĩ attu taabĩtẽy ĩcĩk ootinu õrrõt Ciithẽnẽy cĩk Lawintiak kĩ ngatĩ ĩthaawung eeta ngatĩ tũwẽnto.
44 “Pĩrnanẽt ĩcunung,
nyatarka attiyyu niigia kĩ eeta cĩk adayyie loowuanĩy,
cĩk õwõyyĩ eeta athii cĩ agawĩ.”
45 Ngaatĩ atajanẽcĩ limannioiti ĩmma cĩ aga Ngiran õrrõt ĩnõõnõ ennei ne,
“Limannioit,
mĩ othoothi kĩyokowo,
aavĩ kẽnnẽ kĩcĩ adaaccet niia ageeta buu.”
46 Ẽdẽcĩ Yesu ĩnõõnõ ennei ne,
“Pĩrnanẽt ĩcunung,
niigia eeta cĩk agayyu Ngiran wo,
nyatarka anyiccu niigia eet kodongit ijjio cĩk adĩngdĩngĩ, ĩthõng athii cĩ eelu ĩnõõgõ buu.
47 “Pĩrnanẽt ĩcunung, nyatarka engenyettu niigia bĩĩyẽn cĩk eet cĩk õthõõth molook cĩ Nyekuco wũk balna uruit õõ baatĩ baatĩ baajigu cuguk.
48 Ahaddu yoko athinnu ne,
atican balna õõ baatĩ baatĩ baajigu cuguk thõõth cĩ abũnna ngatĩ aruwi eet cĩk õthõõth molook cĩ Nyekuco. Ĩnõõnõ thĩ cĩ aaricu niigia bĩĩyẽn loowuanĩy ĩcĩgĩk koo.
49 Nyatarka thoothonniok cĩkkõ vẽlẽk,
athĩ Nyekuci gẽẽnyĩtha cĩnnĩ ne,
‘Kitioni katĩ na ĩnõõgõ eet cĩk õthõõth molook cĩ Nyekuco kĩ tionniak.
Aruk katĩ nẽẽgẽ õõgĩ, ĩthõng õgõrgõrranit õõgĩ thõng.’
50 Ĩthõng thĩna,
uuki katĩ eeta cĩk erkinya cĩkkõ,
nyatarka ruwẽẽnĩt cĩ eet cĩk õthõõth molook cĩ Nyekuco balna thẽk ĩcĩ thiananĩt cĩ tengenyinit cĩ loocu.
51 Arahanĩ katĩ ruwẽẽntĩ wũ balna Abẽlĩ gii ngĩ õdõlan Thakariya,f
wũ balna aruwue kõrgẽna cĩ ngatĩ todongintio kĩ Ciitha cĩ Nyekuco.
Kaduwacung na agiitia dĩdĩ,
uuki katĩ thẽk eeta cĩk erkinya cĩkkõ, nyatarka thoothonniok cĩkkõ vẽlẽk.
52 “Pĩrnanẽt ĩcunung limanniok cĩk Ngiranak,
nyatarka uthuuttu niigia mũwũta cĩ õõ katũk cĩ gẽẽnyĩtho.
Ĩthõng niigia kir athii cĩ iithioyyu katũk nĩcẽ,
ĩthõng kẽnnẽ alamtu eet cĩk adiim iithio.”