Itiling Yesu eet vucciaknya wec (4,000)
8
Ma baa wathinniowẽy nĩĩkẽ,
ikiyyia meelitini cobbi ĩmma naboo,
ĩthõng balna amũdaai athii dainti cĩ woccia adak eeta tõ. Ngaatĩ avvẽ Yesu wobjiak cĩgĩnĩk, ĩthõng ethek ne,
2 “Kamanni na eet cĩkkõ õrrõt,
nyatarka kũrũmtea kĩ ĩnõõgõ wathinniok iyyio, ĩthõng athii dainti cĩ woccia adak nẽẽgẽ tõ.
3 Ma kitioni na ĩnõõgõ gõõl kõõt ĩcĩ olu ngaanĩ kuduktõy,
avalĩth woccia kẽnnẽ nẽẽgẽ gõõla,
ĩthõng uukitõ looc, nyatarka avvu gwuak rẽẽna õrrõt.”
4 Ẽdẽcĩ balna wobjiaha cĩgĩnnẽk ethei ne,
“Amũda woccia eeti ahat ngatdang ngato ngatĩ kothii eet wo,
kĩĩ katĩ kuduktõy eeta cĩkkõ vẽlẽk?”
5 Ĩthõng ijin Yesu ĩnõõgõ ethek ne,
“Ayakcu niigia aheenin cĩk avaadiay cĩk ẽẽn ĩthõng?”
Ẽdẽcĩ nẽẽgẽ ethei ne,
“Ẽẽn tũrgẽrẽm.”
6 Ma natẽ,
uduwak nẽ meelitin kaavutõ loota.
Ngaatĩ adĩmanĩ nẽ aheenin cĩk avaadiay cĩk ẽẽn tũrgẽrẽm ẽẽ,
ĩthõng ethek Nyekuc ne,
ibalallẽ,
ĩthõng ẽngẽr, kĩĩ kaanyĩk wobjiak cĩgĩnĩk kengeryiek eeta. Ĩthõng balna engeryiek nẽẽgẽ eet kĩ baa ngĩ aduwa nẽ ẽẽ.
7 Ĩthõng thĩ,
balna amũdaai ayak nẽẽgẽ kulugua cĩk kĩdĩk buu,
ngaatĩ agatanĩ Yesu kulugua nĩĩkẽ, ĩthõng aanyĩk wobjiak cĩgĩnĩk kẽẽ kengeryiek eeta.
8 Ma thĩ balna mĩ uduktõy eeta vẽlẽk kĩccacõ,
ivitia ulluttia wobjiaha lõtaabũr kĩbbĩtĩt dongokua tũrgẽrẽm.
9 Ẽẽn balna eeta vẽlẽk vucciaknya wec (4,000),
ngaatĩ thĩ balna itionĩcẽ nẽ ĩnõõgõ gõõl kõõt.
10 Ma baa thĩ tamanoko,
otodit Yesu kovowol kĩ wobjiak cĩgĩnĩk vẽlẽk õõt ĩcĩ looc cĩ athĩ Dalmanutha.
Ijinit Varithei yelinit
(Bẽl Matewo 16:1-4)
11 Avvu balna Varithei,
ĩthõng ẽpẽkantõy kĩ Yesu. Adiim balna nẽẽgẽ ngĩ atĩman ĩnõõnõ kĩdĩman thõõth cĩ eyeliay cĩ aku tammuatiddina.
12 Õbõdẽcĩ balna Yesu thĩnĩn õrrõt,
ĩthõng õthõõth ĩthĩ ne,
“Nyia gõõ eeta cĩk erkinya cĩkkõ kijinit thõõth cĩ ẽẽn yelinit wo?
Kaduwacung na agiitia,
athii katĩ cĩ kaanyi na eet cĩkkõ yelinit.”
13 Ma natẽ ikiyyia,
ũtũngek nẽ ĩnõõgõ, ĩthõng õtõd kovowol abaaẽ bũlũc ũũk tõõna ĩcĩ gõlla.
Gerthetin cĩ Varithei kĩ Ẽrõõd
(Bẽl Matewo 16:5-12)
14 Erektek balna wobjiak ngatĩ ayahanĩ aheenin cĩk avaadiay kĩĩ mẽẽlĩ,
ayaha kẽggẽ nẽẽgẽ codoi dõ cĩ balna aavĩ kovowolatõ ẽẽ.
15 Ĩthõng balna uduwak Yesu ĩnõõgõ ethek ne,
“Ĩcĩnĩt jurrung,
ĩĩtõ rẽẽntĩ kĩ nyĩgĩt cĩk Varithei kĩ Ẽrõõd.”a
16 Ngaatĩ thĩ balna õthõõthõnẽ nẽẽgẽ nyaguana athĩnnĩ ne,
“Õthõõth nẽ ketee, nyatarka athii naaga cĩ kayak aheenin cĩk avaaddi.”
17 Aga thĩ balna Yesu thõõth cĩ õthõõth nẽẽgẽ ẽẽ,
ĩthõng ijin ĩnõõgõ ethek ne,
“Nyia othoothit niigia ĩĩtõ ne,
athii cĩ ayakcu aheenin cĩk avaadiay wo?
Athii niigia cĩ athĩknenu?
Adĩĩtĩ ooti cuguk?
18 Ayakcu niigia kẽbẽrẽ,
ĩthõng athii cĩ acĩnenu,
ayakcu kĩĩn, ĩthõng athii cĩ athĩknenu, ĩthõng athii cĩ ahadanu thõõth wũ balna kadĩmani na buu?
19 Kõr wũ balna kengereei na aheenin cĩk avaaddi cĩk ẽẽn tur,
eet cĩk ẽẽn vucciaknya tur (5,000),
ĩthõng uluttiawu niigia dongokua cĩk abbĩththĩ wũk balna anyigiay cĩk ẽẽn lõtaabũr ĩthõng?”
Ẽdẽcĩ nẽẽgẽ athĩ ne, “Ẽẽn õmmõtõ kĩ ramma.”
20 “Ma balna mĩ kengereei na aheenin cĩk avaadiay cĩk ẽẽn tũrgẽrẽm,
eet cĩk ẽẽn vucciaknya wec (4,000),
ĩthõng uluttiawu niigia dongokua cĩk abbĩththĩ wũk balna anyigiay cĩk ẽẽn lõtaabũr ĩthõng?”
Ẽdẽcĩ nẽẽgẽ athĩ ne, “Ẽẽn tũrgẽrẽm.”
21 Ĩthõng ijin nẽ ĩnõõgõ ethek ne,
“Nga niigia athii cĩ agayyu noko?”
Anyĩk Yesu et cĩ rubenĩ kĩcĩnẽ
22 Ma balna mĩ ivitia nẽẽgẽ Beththaida,
ivitia ayaktak eeta gwuak Yesu et ĩmma cĩ rubenĩ,
ĩthõng ivitia alaacõ ĩnõõnõ kuwum et nĩcẽ.
23 Ma thĩ natẽ ikiyyia agam Yesu athiit cĩ et nĩcĩ rubenĩ ẽẽ,
ĩthõng ũũwĩ ĩnõõnõ ngatĩvõrĩ kĩĩ kũtũrĩk nẽ amũt bẽrẽ cĩgĩnĩk.
Ĩthõng atadĩk Yesu athĩn cĩgĩnĩk ẽla ĩcĩ et nĩcẽ,
ĩthõng ijin nẽ ĩnõõnõ ethek ne,
“Acini niia gimma?”
24 Ma thĩ balna natẽ ẽdẽnya eeti coo looc,
ĩthõng ĩthĩ ne,
“Ii,
kacini eeta, ĩthõng kẽdẽnya ĩnõõgõ õgõõn kĩ kẽẽna cĩk õwõ thõng.”
25 Ma natẽ,
atadĩk naboo Yesu athĩn kẽbẽrẽnĩy ĩcĩgĩnĩk.
Ma thĩ baa natẽ,
ikiyyia ĩcĩnẽ eeti neccie jurrung,
nyatarka ũbũnta kẽbẽrẽ, ĩthõng ĩcĩn nẽ kaal vẽlẽk jurrung.
26 Ngaatĩ thĩ baa itionĩcẽ Yesu ĩnõõnõ gõõl kũũk ĩcĩ ciith cĩnnĩ,
ĩthõng uduwak ethek ne, “Nyĩ ngaanĩ amiirie õkkõ õlõõ naboo.”
Athĩ Pẽtũrũ ne, ẽẽn Yesu ngẽnẽ
27 Ngaatĩ thĩ õvvõ õwõyyĩ Yesu kĩ wobjiak cĩgĩnĩk korookjiowẽy ĩcĩk õjõõntĩ kĩ kõrõõk cĩ gaalawu cĩ athĩ thar Cithariya Vilipi.
Ma thĩ balna gõõla,
ijin nẽ ĩnõõgõ ethek ne,
“Athĩ eeta ne,
aneeta ngẽnẽ na?”
28 Ẽdẽcĩ nẽẽgẽ Yesu athĩ ne,
“Athĩ eeta gwuak ne,
eeni niia Yoanẽ Batithta,
athĩ naboo gwuak ne,
eeni niia Elija,
ĩthõng naboo athĩ gwuak ne, eeni niia et ĩmma eetĩnẽy ĩcĩk õthõõth molook cĩ Nyekuco.”
29 Ĩthõng ijin nẽ ĩnõõgõ ethek ne,
“Ma niigia athinnu ne,
ngẽnẽ na?”
Ẽdẽcĩ Pẽtũrũ athĩ ne, “Eeni niia Kiristo.”
30 Ngaatĩ thĩ atĩrĩthĩ Yesu ĩnõõgõ ẽthẽcĩ ne,
“Nyĩ aduwaccu et ĩmma enneccu ne, ngẽnẽ na.”
Õthõõth Yesu thõõth cĩ daaĩth cĩnnĩ
31 Ma natẽ,
ithianaĩ nẽ illiman ĩnõõgõ ethek ne,
“Amũda katĩ Ngẽrtĩ Eeto hecinit cobbi õrrõt,
ĩthõng abũrĩ katĩ eeta cĩk obbitik kĩ makayyiok cĩk paadĩrnyawu kĩ limanniok cĩk Ngiran cĩ Mutha ĩnõõnõ.
Aruwue katĩ nẽ kadaak, ĩthõng ũrũga naboo vurtia cĩ wathinniok iyyio.”
32 Aduwa balna nẽ thõõth coo jurrung tirgilun.
Ma natẽ,
ikiyyia ũũwĩ Pẽtũrũ Yesu kabanyca,
ĩthõng ũũk ĩtĩrĩth ĩnõõnõ kĩbĩlĩ thõõth nĩcẽ.
33 Ma natẽ ummudie Yesu,
ĩthõng ẽdẽnya wobjiak cĩgĩnĩk,
kĩĩ kegerenyek Pẽtũrũ kethek ne,
“Eeni niia Thĩttan!
Nyẽhẽ ĩcannĩ.
Ẽẽn muwẽẽnĩtĩ cunnie muwẽẽnĩt cĩ eeto,
athii cĩ ẽnnẽ cĩ Nyekuco.”
34 Ngaatĩ thĩ balna avvẽ Yesu meelitin kĩ wobjiak cĩgĩnĩk kivitia joonui ĩcĩnnĩ,
ĩthõng uduwak ĩnõõgõ ethek ne,
“Mĩ adiim eeti ĩmma ngĩ ẽẽn wobjiait cannĩ,
anycĩk thẽk ĩnõõnõ kerehek ẽlẽ cĩnnẽ,
ĩthõng õdõng kuruce b cĩnnĩ,
ĩthõng õwõba aneeta.
35 Nyatarka mĩ adiim eeti ĩmma ngĩ ẽẽla rũgẽt cĩnnĩ,
atdukeei katĩ nẽ tuu,
ĩthõng eeti cĩ atdukeei rũgẽt cĩnnĩ tuu,
nyatarka aneeta kĩ Nyemut cĩ Abũnna, ẽẽla katĩ nẽ rũgẽt cĩnnĩ.
36 Nyia woccia cĩ abũnna ngĩ amũda niia looca coo vẽlẽk,
ĩthõng thĩ, utdukeewu niia rũgẽt cunni tuu?
37 Kõdẽ nyia woccia cĩ ataala niia kĩĩ rũba rũgẽt cunni?
38 Mĩ angawan eeti ĩmma ĩcannĩ,
kĩ thõõtha cannĩ,
eetĩnẽy ĩcĩk abũrĩ Nyekuc wo,
kĩ eet cĩk adĩman thoothonniok cĩk gerthek. Angawan katĩ Ngẽrtĩ Eeto buu, nyatarka ĩnõõnõ katĩ mĩ ikiyyia nẽ bulẽnta ĩcĩ Baatĩnnĩ kĩ anjĩlẽt cĩgĩnĩk cĩk dĩhĩmĩk.”