Ijinit makayyiowa Yesu yelinit
(Bẽl Marĩkõ 8:11-13; Luka 12:54-56)
16
Ma balna natẽ, ivitia Varithei kĩ Thaduthei õõt ĩcĩ Yesu, ĩthõng ĩtĩmanit ĩnõõnõ ngatĩ ajini ẽthẽcĩ ne, “Yelehet da ageeta yelinit cĩ aku tammuatiddina.”2 Ĩthõng uduwak nẽ ĩnõõgõ ethek ne, “Ma ngĩĩ merik tammutiddin jiat, ‘Athinnu kẽnnẽ niigia ne, õkõlĩ lõõcĩ,’ 3 ĩthõng ma ngĩĩ merik tammutiddin, ĩthõng ĩĩ diith kulurkulur ngerenniet, othooththu kẽggẽ niigia athinnu ne, ‘Atĩĩlĩ katĩ tammu.’ Agayyu niigia ngatĩ aduwuanu thõõth cĩ athĩ ne, aavĩ katĩ lõõcĩ kuu ngatĩ acĩnnu tammutiddin. Ĩthõng athii kir cĩ agayyu nyia cĩ edenyiay yoko noko. 4 Ajinnu niigia yelinit, nyatarka eeginnu niigia gẽrẽthanniok, ĩthõng athii cĩ athunnu thõõth cĩ aduwuanu, ĩthõng thĩ, kothii katĩ yelinita cĩ anyĩwothicung agiitia, yelinit wũ balna anyĩwothi Yiona dõ.” Ngaatĩ thĩ balna ũũngnĩcẽ Yesu ĩnõõgõ, ĩthõng ũũwa.
Nyĩgĩt cĩk Varithei kĩ cĩk Thaduthei
(Bẽl Marĩkõ 8:14-21)
5 Ma balna ngĩ abaaktẽ nẽẽgẽ bũlũc, monogo da erektek wobjiak ngatĩ ayahĩ ahat cĩ avaadiay. 6 Ĩthõng ĩtĩrĩth Yesu ĩnõõgõ ethek ne, “Ĩcĩnĩt jurrung nyĩgĩt cĩk Varithei kĩ cĩk Thaduthei.”b
7 Õthõõth balna wobjiaha nyaguana athĩ ne, “Õthõõth Yesu ketee, nyatarka erehehet ageeta ahat cĩ avaadiay ngĩ kayaha.”
8 Aga balna Yesu muwẽẽnĩt cĩnĩng ẽẽ, ĩthõng ijin ethek ne, “Athii cĩ ayakcu niigia leminit cobbi! Nyia othoothit niigia ĩĩtõ ne, athii cĩ ayakcu niigia ahat cĩ avaadiay wo? 9 Athii niigia cĩ agayyu jurrung? Athii niigia cĩ ahadanu aheenin wũk balna avaadiay wũk ẽẽn tur wũk balna aduk eeta wũk ẽẽn vucciaknya tur (5,000), ĩthõng ẽẽn balna dongokwuana cĩk aheenin wũk anyigiay wũk balna alũtanu niigia, ĩthõng? 10 Kõdẽ aheenin wũk avaadiay wũk ẽẽn tũrgẽrẽm wũk balna anyiccu niigia eet wũk ẽẽn vucciaknya wec (4,000), ĩthõng ẽẽn balna dongokwuana wũk aheenin wũk anyigiay wũk balna alũtanu niigia, ĩthõng? 11 Nyia niigia athii cĩ agawu jurrung ngĩ athii na cĩ kothoothung agiitia thõõtha cĩ ahat cĩ avaadiay? Ĩcĩnĩt jurrung nyĩgĩt cĩk Varithei kĩ Thaduthei!” 12 Ĩthõng balna, ivitia agaacõ wobjiaha cĩk Yesu jurrung ngatĩ athii cĩ õthõõthĩ nẽ thõõth cĩ nyĩgĩtc cĩk avadiane aheenina cĩk avaadiay, ĩthõng thĩ, balna õthõõth nẽ thõõth cĩ võlõng cĩ liman cĩ Varithei kĩ Thaduthei.
Ẽẽn Yesu ngẽnẽ?
(Bẽl Marĩkõ 8:27-30; Luka 9:18-21)
13 Ma balna ngĩ ivitia Yesu kĩ wobjiak cĩgĩnĩk joonui õlõõ cĩ gaalawu cĩ Cithariya Vilipi, ijin nẽ ĩnõõgõ ethek ne, “Athĩ yoko thẽk eeta, Ngẽrtĩ Eeto ne, ngẽnẽ nẽ?”
14 Ẽdẽcĩ wobjiaha cĩgĩnnẽk athĩ ne, “Athĩ eeta gwuak ne, Yoanẽ Batithta, ĩthõng athĩ gwuak ne, Elija, ĩthõng gwuak naboo athĩ ne, Jeremia, kõdẽ et ĩmma cĩ õthõõth molook cĩ Nyekuco.”
15 Ĩthõng ijin Yesu ĩnõõgõ ethek ne, “Ma thẽk niigia athinnu ne, ngẽnẽ na?”
16 Ẽdẽcĩ Thimõnẽ Pẽtũrũ ĩnõõnõ ethei ne, “Eeni niia Kiristo, Ngẽrtĩ Nyekuc cĩ arũgĩ kũdũt.”
17 Ẽdẽcĩ Yesu ĩnõõnõ ethei ne, “Thimõnẽ ngẽrtĩ Yiona, agatanni Nyekuci aniitia, nyatarka athii balna eeti ĩmma cĩ aduwacci aniitia thõõth coo, ĩthõng thĩ, thẽk eyeleci aniitia Papa cannie cĩ aavĩ tammuatiddina. 18 Athĩ thar cugunik Pẽtũrũ,d ĩthõng naaraba coo, kengenyeti katĩ na kelethia cannĩe cĩ athii katĩ daaĩthĩ cĩ ũũlĩ ngatĩ athaanĩ ĩnõõnõ. 19 Kaanyi katĩ na aniitia mũwũtanya cĩk kabicoc cĩ tammutiddino, ĩthõng katĩ ẽlẽmanĩ Nyekuci tammuatiddina thoothonniok vẽlẽk cĩk ẽlẽmanẽ niia loota ngato. Ĩthõng abũrĩ katĩ Nyekuci buu tammuatiddina kaal cĩk aburi niia loota ngato.” 20 Ngaatĩ atĩrĩthĩ Yesu wobjiak cĩgĩnĩk õrrõt ẽthẽcĩ ne, “Nyĩ aduwaccu et ĩmma ethecu ne, keeni na Kiristo.”
Õthõõth Yesu thõõth cĩ ehecini nẽ kĩ daaĩth cĩnnĩ
21 Ma balna kõr nĩcẽ, ẽtẽrẽhaĩ Yesu uduwak wobjiak cĩgĩnĩk jurrung thõõth cĩ katĩ adĩmanothi ĩnõõnõ. Aduwaai balna nẽ ĩnõõgõ ethei ne, “Kadiimi thẽk na kũũk Yeruthalẽma kacananẽ õrrõt athĩnẽy cĩk eet cĩk obbitik, kĩ makayyiok cĩk paadĩrnyawu, kĩ limanniok cĩk Ngiran cĩ Mutha, nyatarka thõõth cĩ Nyekuco. Karuwue katĩ na, ma katĩ kõr cĩ ẽẽn iyyio, karũkna katĩ na daaĩtha naboo.”
22 Ngaatĩ õkõyyĩ Pẽtũrũ Yesu kabanyca, ĩthõng ĩtĩrĩth ĩnõõnõ ethek ne, “Makayyioit, athii tõ! Athii katĩ Nyekuci cĩ ẽlẽmanĩ thõõth nĩcẽ kĩdĩmanothihi aniitia!”
23 Ma natẽ, ummudie Yesu, ĩthõng ethek Pẽtũrũ ne, “Nyẽhẽ ĩcannĩ, Thĩttan! Alaamana niia aneeta gõõla cĩ katicanẽ na thõõth cĩ Nyekuco, nyatarka ayahi niia muwẽẽnĩt cĩ eeto, ĩthõng athii cĩ ẽnnẽ cĩ Nyekuco.”
24 Ngaatĩ baa aduwacĩ Yesu wobjiak cĩgĩnĩk ẽthẽcĩ ne, “Mĩ adiim eeti ĩmma ngĩ ẽẽn wobjiait cannĩ, anycĩk thẽk niigia ĩnõõnõ kerehek ẽlẽ cĩnnẽ, ĩthõng õdõng kuruce cĩnnĩ, ĩthõng õwõba aneeta. 25 Nyatarka eeti cĩ adiim athũnnĩ rũgẽt cĩnnĩ loota ngato, atdukeei katĩ nẽ rũgẽt cĩnnĩ wo tuu. Ĩthõng thĩ, eeti cĩ atdukeei rũgẽt cĩnnĩ tuu, nyatarka aneeta, amũda katĩ nẽ rũgẽt. 26 Nyia woccia thẽk cĩ abũnna cĩ amũda eeti katĩ ngĩ ayak nẽ kaal vẽlẽk cĩk loocu, ĩthõng utdukeek rũgẽt cĩnnĩ tuu? Kõdẽ nyia woccia thẽk cĩ amũda eeti kataalaĩ rũgẽt cĩnnĩ? 27 Nyatarka õkkõ aku katĩ Ngẽrtĩ Eeto makathĩta cobbi cĩ Baatĩnnĩ kĩ anjĩlẽt cĩgĩnĩk, ĩthõng katĩ ikiyyia ũdũman eet codoi codoi gõõla cĩ balna adĩman nẽẽgẽ. 28 Kaduwacung na dĩdĩ, aatĩ eeta gwuak kõrgẽna cunung ngato cĩk katĩ athii cĩ adaaĩ ngaanĩ kĩcĩnĩt Ngẽrtĩ Eeto ngatĩ aluucianẽ kabicoca cĩnnĩ kikiyyia kagam looc vẽlẽk.”