Liman cĩ eet cĩk obbitik
(Bẽl Marĩkõ 7:1-13)
15
Avvu balna Varithei gwuak kĩ limanniok cĩk Ngiran cĩ Mutha ĩcĩ Yeruthalẽmĩ, ĩthõng ivitia ijinit Yesu entek ne, 2 “Nyia wobjiaha cugunniek kẽgẽrẽthanit liman cĩ eet cĩk obbitik wo? Athii nẽẽgẽ cĩ ũũny athĩn katĩ nga kuduktõy wo!”3 Ẽdẽcĩ Yesu ĩnõõgõ ethei ne, “Nyia niigia ẽgẽrẽthanit tĩrĩthẽnĩt cĩ Nyekuco, nyatarka liman cĩ eet cĩk obbitik cuguk wo? 4 Nyatarka athĩ Nyekuci ne, ‘Tõngõlẽ niia baaba cunni kĩ yaaya,’a ĩthõng ‘Eeti cĩ adaac baatĩnnĩ, kõdẽ yaatĩnnĩ, aruwue nẽ.’b 5 Othooththu kẽnnẽ niigia athinnu ne, mĩ ethei eeti ĩmma baatĩnnĩ, kõdẽ yaatĩnnĩ ne, ‘Elinti vẽlẽk cĩ woyyia baalia keeli na aniitia, anyĩwothĩk Nyekuc.’ 6 Ĩthõng gõõla ĩcoo athii nẽ cĩ ‘Ongollie baatĩnnĩ.’ Ĩnõõnõ thĩ cĩ aburnu niigia tĩrĩthẽnĩt cĩ Nyekuco, nyatarka owobju niigia liman cĩ eet cĩk obbitik cuguk dõ. 7 Niigia volongnyiaha cĩkkõ! Edeemi balna Ĩthaia eeti wũ õthõõth molook cĩ Nyekuco baa ngĩ othoothung agiitia athĩ ne,
8 “ ‘Ẽthẽrya aneeta eeta cĩkkõ kutugetinẽy kaganoko,
ĩthõng thĩ, rẽẽntĩ thinneti cĩgĩk kĩ aneeta.
9 Alayya nẽẽgẽ aneeta kutugetinẽy kaganoko.
Ẽẽn limanĩ cĩ aliman nẽẽgẽ wo, ngiran cĩ eetu dõ.’ ”c
Nyia thẽk cĩ anyi eet kĩĩtõ riiriny
10 Ĩthõng balna ũtũvvũ Yesu meelitin cĩ eetu kivitia ĩcĩnnĩ, ĩthõng ethek ne, “Ĩthĩktõy, ĩthõng agaac jurrung kethecung na ne, 11 dainti cĩ adui niia kũtũga cunni, athii cĩ anyi aniitia ĩthĩ, riiriny ĩcĩ Nyekuco. Ĩthõng thoothonniok cĩk gerthek cĩk aduwa niia kũtũga cunni, cĩk anyi aniitia ĩthĩ riiriny ĩcĩ Nyekuco.”d
12 Ĩthõng ivitia ijinit wobjiaha cĩgĩnnẽk ĩnõõnõ entek ne, “Aga niia thẽk pee ngatĩ avaracĩ Varithei thõõth wũ viyyio aduwa niia?”
13 Ẽdẽcĩ Yesu ĩnõõgõ ethei ne, “Abutaniay katĩ kẽẽt kẽgẽrõy vẽlẽk cĩk balna athii cĩ akatĩ Baangĩ cannie cĩ aavĩ tammuatiddina noko. 14 Ũtũngtek niigia Varithei nĩĩko mĩn! Aatĩ nẽẽgẽ kĩ eeta cĩk rubentĩk cĩk atĩ eet cĩk rubentĩk, ĩthõng katĩ utduktothĩk nẽẽgẽ vẽlẽk looru.”
15 Ẽdẽcĩ Pẽtũrũ ĩnõõnõ ethei ne, “Duwaet da ageeta jurrung thõõth wũ viyyio othoothi niia wũ owovothi cĩ alĩta eet ẽẽ.”
16 Ẽdẽcĩ Yesu ethei ne, “Nga niigia agaac thõõth cannĩ wo jurrung? 17 Athii cĩ agayyu niigia, dainit cĩ aaricu niigia kutugetinẽy cuguk koo, õkkõ kẽẽngatõ, ĩthõng ẽtẽha ẽla cunni? 18 Ĩthõng thĩ, thoothiowa cĩk aduwuanu niigia kutugetinẽy cuguk, avvu thinnetinẽy cuguk, ĩthõng thoothonniok cĩkkõ cĩk anyung agiitia ĩĩtõ riiriny ĩcĩ Nyekuco. 19 Ẽẽkta muwẽẽnĩtĩ cĩ gerthe thinnetinẽy cuguk, ruwẽẽnĩt, tdoliniet cĩ ngaa cĩ eeto, kĩ et cĩ oogin kĩ ngaay taktak, kĩ gõr kĩ ngatĩ aduwanĩ eeti thoothonniok cĩk ẽẽn võlõng lokika kĩ dacinet cĩ adaacĩ eeti et. 20 Thoothonniok cĩk anyi et kĩĩ riiriny ĩcĩ Nyekuco wo cĩkkõ, ĩthõng thĩ, ngĩ aduwue eeti ngaanĩ kũtũũny athĩn cĩgĩnĩk, athii woccia cĩ anyi ĩnõõnõ kĩĩ riiriny ĩcĩ Nyekuco.”
Leminit cĩ ngaa cĩ ẽẽn Kananenit
(Bẽl Marĩkõ 7:24-30)
21 Ma balna thĩ natẽ ũtũngek Yesu nginicẽ, ĩthõng ũũk ĩcĩ looc cĩ õjõõn kĩ korookjiok cĩk gaalawu cĩ Tire kĩ Thidon. 22 Ikiyyia ilibak ngaa ĩmma Yesu, ngaa cĩ ẽẽn Kananenit cĩ abaak natẽ, ĩthõng ẽgẽrẽny ĩthĩ ne, “Makayyioit, Ngẽrtĩ Davide, tamatĩhanĩ! Apĩrna bũwanyanie cannie ayak ririwac cĩ gerthe.”
23 Athii balna Yesu cĩ ẽdẽcĩ ĩnõõnõ. Ma natẽ, ivitia wobjiaha cĩgĩnnẽk uduktiak Yesu entek ne, “Tingkawek ngaa nĩco gõõla, nyatarka ẽgẽrẽny nẽ owobjet ageeta.”
24 Ẽdẽcĩ Yesu ethei ne, “Itionana balna aneeta Nyekuci kũũk ĩcĩ eet cĩk Ĩthraĩlĩ dõ, nyatarka balna aavutõ nẽẽgẽ kĩ athaa cĩk ithiicõ.”
25 Ma balna ikiyyia akatek ngaa neccie ĩnõõnõ kuthungti, ĩthõng ethek ne, “Makayyioit, ẽẽla aneeta!”
26 Ẽdẽcĩ Yesu ethei ne, “Athii cĩ abũnna ngatĩ kadĩma na dainit cĩ doolenu, ĩthõng kutduktẽĩ kũrthĩĩ.”e
27 Ẽdẽcĩ ngaa neccie athĩ ne, “Dĩdĩ Makayyioit, ẽbẽra thẽk kũrthĩĩ buu lõtaabũr cĩk okoliai looc lobela cĩ aduwẽẽnĩ makayyiowa cĩgĩk.”
28 Ẽdẽcĩ Yesu ethei ne, “Ngaa coo, ayahi niia leminit cobbi õrrõt! Kẽlẽma na thõõth cĩ ajini niia wo.” Ngaatĩ abũnnanĩ bũwẽnyĩnĩ itin nĩcẽ noko.
Anyĩk Yesu eet cĩk ĩmmõrĩ cĩk meelĩk kũbũnta
29 Ma balna natẽ ĩtĩnga Yesu ũũk titimma cĩ Bũlũc cĩ Galilea. Ĩthõng õtõd thiir ũũk aavu loota. 30 Ikiyyia meelitini cobbi õrrõt, cĩ ayahai Yesu eet cĩk ngõõltĩk, kĩ cĩk rubentĩk, kĩ cĩk awuli kĩ cĩk athii cĩ õthõõthĩ kĩ õõgĩ cĩk meelĩk cĩk ĩmmõrĩ. Ĩthõng aryik ĩnõõgõ vẽlẽk kaavutõ ĩcĩ owu loota ngatĩ baa aavẽ Yesu ẽẽ. Ngaatĩ thĩ balna anyĩcẽ nẽ ĩnõõgõ vẽlẽk kũbũnta. 31 Ma natẽ, utubuantẽ eeta vẽlẽk, nyatarka gii cĩ balna acĩn nẽẽgẽ ngĩ, othoothitõ eeta wũk balna athii cĩ õthõõthĩ, õtõõthõ ngooliaha ũbũnta, ĩthõng ũbũnta tuwulliaha, ĩthõng ĩcĩntẽ eeta wũk balna rubentĩk, ĩthõng ĩdĩhĩthĩt nẽẽgẽ Nyekuc cĩ Ĩthraĩlĩ.
Itiling Yesu eet cĩk ẽẽn vucciaknya wec (4,000)
(Bẽl Marĩkõ 8:1-10)
32 Avva balna Yesu wobjiak cĩgĩnĩk kivitia ĩcĩnnĩ, ĩthõng uduwak ĩnõõgõ ethek ne, “Kamanni na eet cĩkkõ õrrõt, kũrũmtea balna na kĩ ĩnõõgõ wathinniok iyyio, ĩthõng athii dainti cĩ anyigiay cĩ adak buu tõ. Ĩthõng yoko, athii na cĩ kadiimi ngĩ kitioni ĩnõõgõ gõõl kõõt booba, ma woccia kẽnnẽ ngĩ õõt uruit looc gõõla.”
33 Ẽdẽcĩ wobjiaha cĩgĩnnẽk athĩ ne, “Kamũdana woccia katĩ naaga ahat cĩ avaadiay cĩ awũpan ngatĩ kalingitia meelitin cobbi õrrõt wo ngatdang, ngatĩ aavĩ kĩ baath cĩ õdõõĩ kak wo nga?”
34 Ẽdẽcĩ Yesu ĩnõõgõ naboo ethei ne, “Ẽẽn yoko aheenina cĩk avaadiay cĩk ayakcu niigia wo ĩthõng?”
Ẽdẽcĩ nẽẽgẽ athĩ ne, “Kayakca aheenin cĩk avaadiay cĩk ẽẽn tũrgẽrẽm kĩ kulugua cĩk kĩdĩcĩlĩm cĩk kĩdĩk.” 35 Ngaatĩ baa aduwacĩ Yesu meelitin kaavutõ loota. 36 Ma natẽ, ĩdĩma nẽ aheenin cĩk avaadiay cĩk ẽẽn tũrgẽrẽm kĩ kulugua cĩk kĩdĩcĩlĩm cĩk kĩdĩk ẽẽ, ĩthõng agatan kĩĩ kẽngẽr, ĩthõng aanyĩk wobjiak cĩgĩnĩk ẽẽ, kengeryiek meelitin cĩ eetu.
37 Uduktõy nẽẽgẽ vẽlẽk kĩccacõ. Ma baa vurtia cĩ duwẽnto, ivitia ulluttia wobjiaha cĩgĩnnẽk lõtaabũr cĩk daintiak dongokua tũrgẽrẽm cĩk abbĩththĩ. 38 Ẽẽn balna eeta cĩk aduwue wo vẽlẽk, vucciaknya wec (4,000), ĩthõng athii balna cĩ ekebinie ngaay kĩ dõõlĩ. 39 Ma balna ngĩ itionĩk Yesu meelitin cĩ eetu gõõl vẽlẽk, ikiyyia õtõd nẽ kovowol, ĩthõng abaaẽ ũũk ĩcĩ kõrõõk cĩ gaalawu cĩ athĩ Magadan.