Thoothonniok cĩk kũũnyĩ athĩna
7
Avvu alutiai balna Varithei gwuak kĩ limanniok cĩk Ngiran cĩ Mutha,
cĩk balna avvu Yeruthalẽma Yesu.
2 Avvu thĩ balna kẽnnẽ ijiowa ngatĩ aduwi wobjiaha cĩgĩnnẽk gwuak ahat,
ngaanĩ kũtũũnyĩtõ athĩn cĩgĩk.
3 Õwõb thĩ baa lõõla Varithei kĩ Yudei cĩk meelĩk ngiran cĩ baajigi cĩgĩk,
ũũny thĩ dõõkĩthĩ nẽẽgẽ athĩn cĩgĩk jurrung nga kuduktõy.
4 Ma ngĩ avvu nẽẽgẽ ngatĩ tũwẽnto,
athii nẽẽgẽ cĩ aduwue katĩ nga kũtũũnycõy. Õwõb naboo nẽẽgẽ ngirantiok õõgĩ cĩk õgõõn kĩ cĩk ũũnyĩ dũũcẽ kĩ lõkũlkũlẽta kĩ ijjionya kĩ kõjõrõõnĩta.
5 Ma natẽ,
ijinit Varithei cĩkkõ kĩ limanniok cĩk Ngiranak Yesu entek ne,
“Nyia athii wobjiaha cugunniek cĩ õwõb ngiran cĩ õõ baangietĩ cĩgaak,
ĩthõng uduktõy athĩnẽy cĩk ẽẽn riiriny wo?”
6 Ẽdẽcĩ Yesu ethei ne.
“Ẽdẽẽm balna Ĩthaia eeti cĩ õthõõth molook cĩ Nyekuco,
ngatĩ ẽhẽẽdĩ Nyaragawa cĩ Nyekuco athĩ ne,
nyatarka agiitia volongnyiak,
“ ‘Ẽthẽrya aneeta eeta cĩkkõ kutugetinẽy kaganoko,
ĩthõng thĩ, rẽẽntĩ thinneti cĩgĩk kĩ aneeta.
7 Alayya nẽẽgẽ aneeta kutugetinẽy kaganoko.
Ẽẽn limanĩ cĩ aliman nẽẽgẽ wo,
ngiran cĩ eetu dõ.’a
8 Uungniccu niigia thoothonniok cĩk Nyekucak, ĩthõng owobtu ngirantiok cĩk eetu.”
9 Ma thĩ baa natẽ uduwak Yesu ĩnõõgõ naboo ethek ne,
“Ayakcu niigia gẽẽnyĩth cĩ anyung agiitia ũtũbũrĩt thoothonniok cĩk Nyekucak,
kĩĩ katĩ uthuutti ngiran cunung.
10 Nyatarka balna aduwa Mutha athĩ ne,
‘Tõngõlẽ baaba cunni kĩ yaaya,’b
ĩthõng,
‘Eeti cĩ acĩĩn baatĩnnĩ,
kõdẽ yaatĩnnĩ, aruwue woccia nẽ kadaak thõng.’c
11 Ĩthõng thĩ,
kẽnnẽ athinnu niigia ne,
mĩ ayak eeti ĩmma gimma cĩ woccia ẽẽlĩ baatĩnnĩ, kõdẽ yaatĩnnĩ, athinnu kẽnnẽ niigia ne, gii neccie ẽẽn anyinit cĩ Nyekuco.
12 Nyĩ nga anyiccu et cĩ aavu noko,
kẽẽl baatĩnnĩ, kõdẽ yaatĩnnĩ.
13 Aburnu niigia thoothonniok cĩk Nyekucak,
nyatarka owobju liman cunung.
Adĩmannu thẽk niigia thoothonniok õõgĩ cĩk gerthek.”
Kaal cĩk anyi eet kĩĩtõ riiriny dĩdĩ
14 Ma balna thĩ natẽ ũtũvvũwa Yesu meelitin kivitia ĩcĩnnĩ naboo,
ĩthõng ikiyyia ethek nẽ ĩnõõgõ ne,
“Ĩthĩktangũ niigia vẽlẽk aneeta,
ĩthõng agaac thõõth coo jurrung.
15 Athii cĩ ẽnnẽ gii cĩ ẽhẽẽt kẽẽng cĩ anyi aniitia ĩthĩ riiriny,
thõõth cĩ ẽẽkta thĩnĩna ĩcunni cĩ anyi aniitia ĩthĩ ‘riiriny.’
16 Eeti cĩ ayak kĩĩn, anyĩk ĩnõõnõ kĩthĩwõy jurrung.”
17 Ma balna thĩ natẽ ũtũngek nẽ meelitin,
ĩthõng ũũk ittio ciith,
ivitia ijinit wobjiaha cĩgĩnnẽk ĩnõõnõ kuduwak ĩnõõgõ thõõth cĩ owovothi cĩ alĩtanẽ eeta.
18 Ẽdẽcĩ Yesu ĩnõõgõ ethei ne,
“Athii niigia cĩ egeenyu?
Athii niigia cĩ agayyu ngĩ,
athii ahat cĩ ẽhẽẽt et,
cĩ aku ngatĩvõrĩ cĩ woccia anyi et kĩĩ ‘riiriny’?
19 Nyatarka athii ahat cĩ ẽhẽẽt õkkõ thĩnĩna cĩnnĩ,
ẽhẽẽt õkkõ kẽẽngatõ,
ĩthõng ẽtẽha ngĩtĩvõrĩ.”
Thõõtha ĩcĩ aduwa Yesu ketee wo,
aduwa nẽ athĩ ne,
abũnna dainti vẽlẽk õrrõt dĩhĩma.d
20 Ma balna natẽ ĩthĩ Yesu ne,
“Thõõth cĩ ẽẽkta ngĩtĩvõrĩ ẽla cĩ eeto,
anyi ĩnõõnõ kĩĩ ‘riiriny.’
21 Nyatarka muwẽẽnĩt cĩ aku thĩnĩna cĩ eeto cĩ anyi ĩnõõnõ kĩdĩman thoothonniok cĩk gerthek cĩk oginnie nẽ kĩ ngaay taktak,
cĩk ogorthini,
cĩk aruwi et, cĩk oginnie nẽ kĩ ngaa cĩ et ĩmma,
22 ngarubitin cĩ balintio,
tuwẽẽnĩt cĩ adĩmanĩ nẽ thõõth cĩ gerthe,
võlõng,
othoothi ngaa adiim ngĩ ogini,
barritõn cĩ kaal cĩk eetu,
teedinet cĩ eetu võlõnga,
ngẽrẽn,
kĩ tdĩvalitin.
23 Kaala cĩkkõ vẽlẽk avvu thĩnĩna cunni,
ĩthõng ĩnõõgõ cĩk anyi aniitia ĩthĩ ‘riiriny.’ ”
Leminit cĩ ngaa ĩmma cĩ athii cĩ ẽẽn Yudenit
24 Ma thĩ balna natẽ,
ĩtĩnga Yesu ũũk ĩcĩ looc ĩmma cĩ õjõõn kĩ kõrõõk cĩ gaalawu cĩ Tire.
Aavĩ balna nẽ õlõõ ĩcĩ et ĩmma.
Athii balna nẽ cĩ adiim eet kagaacõ ngatĩ aavẽ nẽ natẽ,
ĩthõng thĩ, balna umuddia eeta ĩnõõnõ noko.
25 Aavĩ balna ngaa ĩmma cĩ ayak bũwanyĩnẽ ririwac cĩ gerthe,
ĩthõng balna ĩthĩrar nẽ mĩ aavĩ Yesu natẽ,
ĩthõng thĩ, balna ũũk nẽ mũrũũr, ĩthõng akat kuthungti thoonĩy cĩgĩnĩk.
26 Ẽẽn thĩ balna ngaa neccie Girihenit,
ĩthõng arittiay looca cĩ athĩ Vonethia tõõna cĩ looc cĩ athĩ Thiiria.
Ikiyyia thĩ balna ala nẽ Yesu kũũk kitingka ririwac cĩ gerthe cĩ aavĩ ẽla cĩ bũwanyĩnĩ.
27 Ẽdẽcĩ Yesu ĩnõõnõ ethei ne,
“Anyĩk nõõnõ niia dõõlĩ kuduktõy kĩccacõ,
nyatarka athii cĩ abũnna ngatĩ kadĩmaanĩ ahat cĩ doolenu, ĩthõng kaanycĩk kũrthĩĩ cĩgĩk.”
28 Ẽdẽcĩ ngaa athĩ ne,
“Makayyioit,
aduk kũrthĩĩ buu,
lõtaabũr cĩk doolenu,e
cĩk atdukuay lobela.”
29 Ma thĩ balna natẽ uduwak Yesu ĩnõõnõ ethek ne,
“Miirie bĩt õlõõ,
nyatarka decinit cunni wo ũrũbothiwu katĩ bũwanyuni ũbũna,
ẽtẽha ririwacĩ cĩ gerthe ẽẽ, ẽla cĩnnĩ.”
30 Ngaatĩ thĩ balna amiirẽnẽ nẽ õkõyyĩ ĩcĩ olu,
ũũk ũrũbothĩk doolec cĩnnĩ ẽẽ,
õõngĩ lobela, ẽtẽha ririwacĩ cĩ gerthe ẽẽ, ẽla cĩnnĩ.
Anyĩk Yesu et cĩ adĩĩtĩ kĩĩna kũbũna
31 Ma balna ngĩ ũtũngek Yesu kõrõõk cĩ gaalawu cĩ Tire,
ĩthõng ũũk ẽdẽẽm kõrõõk cĩ gaalawu cĩ Thidonĩ,
ĩthõng edecek ũũk ĩcĩ Bũlũc cĩ Galilea, ngatĩ õjõõn kĩ Dekapolith cĩ athĩ thar cĩgĩnĩk, korookjiok cĩk gaalawu cĩk ẽẽn õmmõtõ.
32 Ma natẽ,
ayaktak eeta gwuak ĩnõõnõ et ĩmma cĩ adĩĩtĩ kĩĩna,
ĩthõng athii cĩ õthõõthĩ. Ĩthõng alaacõ thĩ nẽẽgẽ Yesu kuwum ĩnõõnõ athĩnẽy cĩgĩnĩk.
33 Ma balna thĩ ẽnyẽẽĩ Yesu ĩnõõnõ meelitina ũũwĩ kabanyca,
ikiyyia owothẽk athĩn cĩgĩnĩk kĩĩnĩy cĩk eetak,
ĩthõng ũtũrĩk amũt athĩn cĩgĩnĩk, ĩthõng uwum ahaat cĩ eeto.
34 Ma natẽ,
ẽdẽnya Yesu tammutiddin,
ĩthõng õbõdẽẽĩ thĩnĩn ngaatĩ ẽthẽcĩ et nĩcẽ ne,
“Ẽpatha,”
athĩ thõõth coo ne, “Oyyie!”
35 Ma baa thĩ natẽ,
ivitia ubuuktie kĩĩna cĩk et nĩcẽ, ĩthõng ũbũna ahaatĩ buu ngaatĩ õthõõthĩ nẽ jurrung.
36 Ngaatĩ thĩ balna aduwacĩ Yesu ĩnõõgõ ẽthẽcĩ ne,
“Nyĩ ovvoyyu aduwaccu et ĩmma thõõth coo kũdũt.
Ma balna thĩ mĩ uduwak nẽ ĩnõõgõ ketee wo,
nga kẽggẽ õvvõ aduwa thõõth coo õrrõt noko.”
37 Ma balna thĩna itdirlangan thõõth coo eet vẽlẽk wũk balna athĩrar ĩnõõnõ õrrõt,
ĩthõng othoothitõ ĩĩtõ ne,
“Atican nẽ kaal vẽlẽk jurrung ngatĩ anyĩcẽ eet cĩk adĩĩtĩ kĩĩna kĩthĩktõy, ĩthõng anyĩk eet cĩk athii cĩ õthõõth kothoothitõ jurrung!”