Daaĩth cĩ Yoanẽ Batithta
(Bẽl Marĩkõ 6:14-29; Luka 9:7-9)
14
Ẽẽn balna Ẽrõõdĩ alaana wathinniowẽy nĩĩkẽ, ma balna ngĩ ĩthĩrar nẽ nyemut cĩ Yesu wo, 2 ikiyyia uduwak nẽ gaala cĩgĩnĩk ethek ne, “Ẽẽn coo Yoanẽ Batithta. Ũrũga nẽ daaĩtha! Ĩnõõnõ thĩ cĩ ayahĩ tiirthẽt cĩ adĩmanĩ thoothonniok cĩk anaat eeta wo.”3 Agam balna Ẽrõõdĩ Yoanẽ kĩĩ kẽcẽb, ĩthõng arĩk ĩnõõnõ kĩjana, nyatarka ngaa cĩ gõtõnõnĩ cĩ athĩ Ẽrõõdiath,b ngaa cĩ Pilipo, 4 nyatarka balna aduwaai Yoanẽ ĩnõõnõ ethei ne, “Angiranni ngatĩ atihie niia ngaa cĩ gotononu nga kadaak gotonu.” 5 Adiim balna ngĩ aruk Ẽrõõdĩ Yoanẽ, ĩthõng balna ongollie nẽ meelitin cĩ eetu, nyatarka balna athĩ nẽẽgẽ ne, ẽẽn Yoanẽ et cĩ õthõõth molook cĩ Nyekuco.
6 Ma balna ngĩ arawak kõr cĩ peyian wũ balna aritianĩ Ẽrõõdĩ, ikiyyia bũwẽnyĩ Ẽrõõdiath ũrũgũmek kerenniok peyiana, anyi kẽnnẽ nẽ Ẽrõõd kẽbẽlbẽl õrrõt, 7 ĩthõng balna natẽ ũbũtan ngatĩ anyĩcẽ ĩnõõnõ gii vẽlẽk cĩ adiim nẽ. 8 Ma balna uduwak yaatĩnnẽ bũwanyĩnĩ, ethek ne, “Bĩt ennek ne, ‘Kadiimi ngĩ aaricia õõ cĩ Yoanẽ Batithta dũũca.’ ” 9 Athii balna cĩ ẽbẽlbẽl alaanĩ, ĩthõng thĩ, nyatarka bũtan wũ baa abũtan nẽ kẽbẽrẽnĩy ĩcĩk kerenniowu, ikiyyia uduwak nyĩcẽkẽrowoc, 10 kũũk ĩcĩ kĩjano, kũũk kẽtẽda õõ cĩ Yoanẽ Batithta. 11 Ngaatĩ thĩ baa ayahianĩ õõ cĩnnẽ dũũca, ĩthõng anyĩwothĩk bũweec nĩcẽ kayawothĩk yaatĩnnĩ. 12 Ma baa natẽ, ivitia ootti wobjiaha cĩk Yoanẽ ẽlẽ cĩnnĩ, ĩthõng õõt adaacõ. Ngaatĩ õvvõ aduwacĩ Yesu daaĩth nĩcẽ.
Itiling Yesu eet cĩk ẽẽn vucciaknya tur (5,000)
(Bẽl Marĩkõ 6:30-44; Luka 9:10-17; Yoanẽ 6:1-14)
13 Ma vurtia cĩ athĩknĩ Yesu daaĩth cĩ Yoanẽ, ikiyyia abaaẽ nẽ bũlũc cĩ Galilea kũũk ngamanĩ ngatĩ woccia aavẽ nẽdõ. Ma balna mĩ athĩrar eeta thõõth coo wo, ivitia owobit ĩnõõnõ meelitini cĩ eet cĩk avvu korookjiowẽy ĩcĩk gaalawu cĩk õwõyya thoonĩy. 14 Ma baa ngĩ uluciay Yesu kovowola ngĩtĩvõrĩ, ikiyyia ĩcĩn nẽ meelitin cĩ eetu, ĩthõng atamatĩk ĩnõõgõ, ngaatĩ anyĩcẽ eet cĩk ĩmmõrĩ kũbũnta.
15 Ma balna ngĩĩ jiatĩn, ivitia umuddiak wobjiaha ĩnõõnõ, ĩthõng entek ne, “Õgõõn ngittio kĩ baath cĩ õdõõĩ kak, ĩthõng ĩĩ baalin lõõcĩ. Anyĩk niia eet kathaantẽ kõõt kutuyyia dainit korookjiowẽy.”
16 Ẽdẽcĩ Yesu ĩnõõgõ ethei ne, “Athii woccia cĩ adiim ngĩ õvvõ nẽẽgẽ nginiwa ĩmmanĩ. Anycĩk ĩnõõgõ gimma kadait.”
17 Ẽdẽcĩ nẽẽgẽ ethei ne, “Kayakca naaga ngato aheenin cĩk avaadiay tur kĩ kulugua ramma dõ.”
18 Ma natẽ, ethek Yesu ĩnõõgõ ne, “Ayaktahangũ da aneeta ngato.” 19 Ngaatĩ thĩ baa aduwacĩ nẽ eet kaavutõ loota kartẽnẽẽĩ. Ĩthõng ĩdĩma nẽ aheenin cĩk avaadiay cĩk ẽẽn tur kĩ kulugua cĩk ẽẽn ramma ẽẽ, ĩthõng ẽdẽnya tammutiddin, ĩthõng agatan kĩĩ kẽngẽr, ĩthõng aanyĩk wobjiak cĩgĩnĩk kengeryiek eeta. 20 Ma balna ngĩ uduktõy eeta vẽlẽk ĩcaacõ, ivitia ulluttia wobjiaha dainit cĩ anyigiay ẽẽ, abbĩththĩ dongokua õmmõtõ kĩ ramma. 21 Ẽẽn balna eeta cĩk maacĩk cĩk aduwue vucciaknya tur (5,000), ĩthõng athii balna cĩ ekebji ngaay kĩ dõõlĩ cĩk kĩdĩk.
Õtõ Yesu maamĩy tiddina
(Bẽl Marĩkõ 6:45-52; Yoanẽ 6:15-21)
22 Ma natẽ, ikiyyia uduwak Yesu wobjiak cĩgĩnĩk kimiiryie kõõt kotodit kovowol kabaaktẽ bũlũc, ĩthõng athaan nẽ meelitin. 23 Ma vurtia cĩ athaanĩ nẽ meelitin cĩ eetu, ikiyyia õtõd nẽ thiir, ĩthõng ũũk aavu nẽdõ, kĩĩ kalawõy. Ma baa jiatĩn nĩcẽ nga baa aavĩ nẽdõ natẽ, 24 ĩthõng thĩ, baa ngĩĩ rẽẽn kovowolĩ titimma cĩ bũlũco, avungan balna ngõõtĩ cĩ tiiri cĩ õmmõnnĩ maam buu õrrõt.
25 Ma baa ngĩ õbõwẽ alia, ikiyyia õtõõwa Yesu maamĩy, ĩthõng ũmũdõthĩk wobjiak cĩgĩnĩk. 26 Ma baa ngĩ acĩn wobjiaha ĩnõõnõ wo, amuk kẽggẽ nẽẽgẽ athĩ ne, ẽẽn nẽ miningit. Ngaatĩ akulẽcĩ jien, ĩthõng otongollie, ĩthõng utuluthõ.
27 Ma baa tamanoko, ikiyyia othoothĩk Yesu ĩnõõgõ ethek ne, “Anycĩk thinneti cuguk kokomit! Aneeta Yesu. Nyĩ ongolinangũ aneeta.”
28 Ẽdẽcĩ Pẽtũrũ ethei ne, “Makayyioit, ma ngĩ ẽẽn aniitia dĩdĩ, duwaha da kõtõõwa maamĩy tiddina kikiyyia ĩcunni.”
29 Ẽdẽcĩ Yesu ĩnõõnõ ethei ne, “Tõõwa ijjia!”
Ngaatĩ aluucianẽ Pẽtũrũ kovowola, ĩthõng õtõ maamĩy tiddina ũũk ĩcĩ aavẽ Yesu. 30 Ĩthõng thĩ, ma baa ngĩ, acĩn Pẽtũrũ ngatĩ tiir ngõõtĩ wo, ikiyyia õtõngõlẽ, ĩthõng okolothĩk maamĩy ĩcĩtõ. Ĩthõng utulu nẽ ĩthĩ ne, “Makayyioit, ẽẽla aneeta!”
31 Ma baa tamanoko, agam Yesu athiit cĩnnĩ kĩĩ kõdõnga ĩnõõnõ, ĩthõng ethek ne, “Dĩc leminiti cunnie. Akidani niia nyia?”
32 Ma baa ngĩ otodit Yesu kĩ Pẽtũrũ kovowol, ikiyyia ĩbĩl ngõõtĩ. 33 Ma balna wobjiaha wũk aatĩ kovowola ĩcĩtõ ivitia alaacõ Yesu entek ne, “Eeni niia Ngẽrtĩ Nyekuco dĩdĩ!”
Anyĩk Yesu mooryiak kũbũnta Jẽnẽtharẽta
(Bẽl Marĩkõ 6:53-56)
34 Ma baa ngĩ abaaktẽ Yesu kĩ wobjiak cĩgĩnĩk bũlũc, ĩthõng õdõlanit titim cĩ õjõõn kĩ kõrõõk cĩ gaalawu cĩ Jẽnẽtharẽtĩ. 35 Ivitia agaacõ eeta ngatĩ ẽnnẽ nẽ Yesu, ngaatĩ avaanĩ gõõnõgĩ cĩk õjõõntĩ kĩ looc nĩcẽ. Ĩthõng ivitia ayaktak nẽẽgẽ ĩnõõnõ eet cĩk ĩmmõrĩ vẽlẽk, 36 ĩthõng thĩ, baa ivitia alayyiek nẽẽgẽ Yesu kẽlẽmaĩ eet cĩk ĩmmõrĩ kuwumit ceremua cĩgĩnĩk, ĩthõng eeta wũk balna uwumit ceremua cĩgĩnĩk vẽlẽk, ivitia ũbũnta.