Ition Yesu wobjiak eet iyyio kõmmõtõ kĩ ramma
10
Ma vurtia cĩnnĩ,
ẽbẽra Makayyioiti wobjiak eet iyyio kõmmõtõ kĩ ramma naboo,
ĩthõng ition ĩnõõgõ kĩĩ ramma,
ramma,
kutuwantẽ kõõt korookjiowẽy ĩcĩk gaalawu kĩ vatĩk vẽlẽk ĩcĩk katĩ õkõyyĩ nẽnẽ.
2 Ngaatĩ irionĩcẽ ĩnõõgõ ẽthẽcĩ ne,
“Ibbir mana cobbi õrrõt,
ĩthõng dĩcẽ kẽnnẽ teddiowua. Alaac Makayyioit baatĩ manu kitionĩk teddiok õõgĩ mana cĩnnĩ.
3 Õõtõ,
ĩthõng agaac kitionnung na agiitia aavut kĩ nyiona cĩk aatĩ kudumuanĩy.
4 Nyĩ ayakcu nyarobinya,
kõdẽ locibiro,
kõdẽ nakavacĩt nẽnnẽ kaganoko, ĩthõng nyĩ ĩthayyu et ĩmma gõõla kũdũt.
5 “Mĩ iithioyyu kõrõõk cĩ et ĩmma,
agatanit nõõnõ entek ne,
‘Anyĩk Nyekuc kagatan kõrõõk coo.’
6 Ĩthõng mĩ aavĩ eeti cĩ abũnna õlõõtõtõ nĩcẽ,
agatan katĩ lawinti cunung wo ĩnõõnõ.
Mĩ athii tõ,
õbõda katĩ gatani cunung wo kĩ agiitia.
7 Aavut õlõõtõtõ nĩcẽ,
ĩthõng nyĩ owoyyu jiena kũdũt.
Adait dainit, ĩthõng uwuddu gii cĩ anyung eeta cĩk kõrõõk nĩcẽ, nyatarka eeti cĩ iticanõy vẽlẽk, abũnna thẽk ngĩ adũmanni.
8 “Õlõõ cĩ gaalawu cĩ õvvõ iithioyyu,
ĩthõng elemtung eeta, adait thẽk dainit cĩ anyung nẽẽgẽ.
9 Õõt thẽk anycĩk eet vẽlẽk cĩk ĩmmõrĩ kũbũnta,
ĩthõng uduktiawu entewu ne,
‘Aavu kabicoc cĩ Nyekuco joonui ĩcunung.’
10 Ĩthõng thĩ,
õlõõ cĩ gaalawu ĩcĩ ovvoyyu, ĩthõng utuburyung eeta, õõt goolliowẽy ĩcĩgĩk, ĩthõng entewu ne,
11 ‘Katdudungecung naaga tuduwac cĩ aavĩ thoonĩy cĩgaak wo loota kĩĩ yelinit cĩ aduulothicung kẽẽt.
Ĩthõng thĩ, agaac jurrung ngatĩ aavue kabicocĩ cĩ Nyekuco joonui.’
12 Kaduwacung na agiitia,
mayya katĩ kĩ eet cĩk Thõdõmĩa kõrra cĩ katĩ ẽtẽẽdĩ Nyekuci thoothonniok cĩk eetu vẽlẽk, kijiar eet cĩk kõrõõk cĩ gaalawu nĩcẽ.”
Korookjiok cĩk gaalawu cĩk abũrĩ Thõõth cĩ Nyekuco
(Bẽl Matewo 11:20-24)
13 Ma natẽ,
õthõõth Yesu ĩĩ ne,
“Niigia eeta cĩk Korathini kĩ cĩk Beththaida,b
gẽrtha katĩ kĩ agiitia buu õrrõt!
Ma baalia yoko kĩdĩmantothiwung agiitia thoothiowa cĩk anaat eeta,
cĩk woccia balna ĩdĩmantothĩk eet cĩk Tire kĩ cĩk Thidonĩ.
Ũtũngtek woyyia baalia nẽẽgẽ thoothonniok cĩk gerthek cĩgĩk.
Ĩthõng itihimit nẽẽgẽ ceremua cĩk uluanak,
ĩthõng ubukantek tithet ooti.
14 Ĩthõng thĩ, mayya katĩ kĩ eet cĩk Tire kĩ cĩk Thidonĩ kõrra cĩ katĩ ẽtẽẽdĩ Nyekuci thoothonniok cĩk eetu, kĩjaryung agiitia.
15 Ĩthõng niigia eeta cĩk Kaparnaumi,c
ahaddu niigia athinnu ne,
okoyyung katĩ Nyekuci agiitia tammuatiddina? Atdukothicu katĩ niigia guo cĩ aavĩ kũdũt!”
16 “Eeti cĩ athĩknung agiitia,
athĩkna katĩ aneeta.
Ĩthõng eeti cĩ aburnung agiitia,
abũrna katĩ nẽ buu aneeta.
Ĩthõng eeti cĩ abũrna aneeta,
abũrĩ Et wũ balna itionana aneeta buu.”
Oboddia wobjiaha wũk balna ẽẽn eet iyyio kõmmõtõ kĩ ramma
17 Ma balna ngĩ oboddia wobjiaha cĩk ẽẽn eet iyyio kõmmõtõ kĩ ramma wo,
atalit nẽẽgẽ õrrõt,
ĩthõng uduktiak Yesu entek ne,
“Makayyioit,
ĩthĩktet wanĩco ririwanĩnẽ cĩk gerthek buu ngatĩ kabuungia thar cugunik!”
18 Ẽdẽcĩ Yesu ĩnõõgõ ennei ne,
“Kacini balna thẽk na buu ngatĩ atdukuanĩ Thĩttanĩ õgõõn kĩ lanyĩtĩd tammuatiddina kĩ cĩ abadĩ thõng.
19 Kaanyung na agiitia tiirthẽt cĩ aathu kũwaanya kĩ kĩtẽẽn vẽlẽk kĩ tiirthẽt cĩ ijiaru mĩrõk,
ĩthõng athii thẽk katĩ gii cĩ adakcung tõ.
20 Nyĩ kẽnnẽ thĩ atalnu niigia õrrõt,
nyatarka athĩknung ririwanĩna cĩk gerthek. Atalit, nyatarka eteheddie thara cuguk tammuatiddina.”
Ethek Yesu Baatĩnnĩ ne, ibalallẽ
(Bẽl Matewo 11:25-27; 13:16-17)
21 Ma natẽ,
anyĩk Ririwacĩ cĩ Dĩhĩmĩ Yesu kẽbẽlbẽl õrrõt ngaatĩ õthõõthĩ athĩnnĩ ne,
“Kadihiththi na aniitia õrrõt Baang,
Makayyioit cĩ tammutiddin kĩ cĩ loocu,
ngatĩ alugunyie thoothonniok cĩkkõ eetĩnẽy cĩk ẽgẽẽnyĩ kĩ cĩk ilimantẽ,
ĩthõng eyelewu thoothonniok cĩkkõ dõõlĩ cĩk kĩdĩk.
Ii Baang,
gii cĩ anyi aniitia tal coo.
22 “Anya balna thẽk aneeta Baangĩ kaggam gii vẽlẽk.
Ĩthõng athii eeti cĩ agayya aneeta Ngẽrĩnĩ tõ,
Baang dõ cĩ agayyanĩ.
Ĩthõng athii eeti cĩ aga Baang tõ,
aneeta dõ Ngẽrĩnĩ kĩ eet cĩk kẽbẽra na cĩk aga ĩnõõnõ.”
23 Ma natẽ,
ũtũwẽ Yesu kĩĩ kuduwak wobjiak cĩgĩnĩk thõõth kabanyca kĩĩ kethek ne,
“Agatantewu niigia ngatĩ anyung Nyekuci ĩcĩnĩt thoothonniok cĩk acĩnnu niigia yoko wo.
24 Kaduwacung dĩdĩ,
mẽẽlĩ balna alaanẽta kĩ eet cĩk õthõõth molook cĩ Nyekuco cĩk balna adiim acĩn kaal cĩk yoko acĩnnu niigia wo.
Ĩthõng ngaanĩ kẽnnẽ kĩcĩnĩt kũdũt.
Kõdẽ ngatĩ athĩknĩ thoothonniok cĩk yoko athĩknu niigia wo,
ngaanĩ kĩthĩraritõ kũdũt.”
Et cĩ abũnna thĩnĩn
25 Aku balna ajin eeti ĩmma cĩ aga Ngiran cĩ Mutha õrrõt Yesu ennei ne,
“Limannioit,
nyia woccia thẽk cĩ kadĩmani na, kĩĩ katĩ kijiowa rũgẽt cĩ alna kũdũt?”
26 Ẽdẽcĩ Yesu ĩnõõnõ ennei ne,
“Nyia cĩ eheeddi Ngirana ĩcĩ Mutha?
Ĩthõng mĩ ebeli niia õthõõth,
athĩ ne?”
27 Ẽdẽcĩ eeti neccie buu jurrung athĩ ne,
“Õthõõth athĩ ne,
‘Mĩnan Makayyioit Nyekuc cunni thĩnĩna cunni vẽlẽk,
kĩ ririwaca cunni vẽlẽk,
kĩ tiirthẽta cunni vẽlẽk,
ĩthõng kĩ muwẽẽnta cunni vẽlẽk’e ĩthõng athĩ ne, ‘Mĩnan et cĩ abakanonu kaavu kĩcĩ amĩnani niia ẽlẽ cunni.’ ”f
28 Ẽdẽcĩ Yesu ĩnõõnõ ennei ne,
“Edeemiwu.
Bĩt thĩ thẽk dĩman kĩyokowẽ,
kĩĩ thĩ katĩ rũgũ.”
29 Adiim balna ngĩ ẽyẽla eeti neccie athĩ ne,
ẽẽn nẽ et cĩ edeemi thõõth õrrõt,
ngaatĩ ajini nẽ Yesu naboo ẽthẽcĩ ne,
“Ngẽnẽ cĩ kabakanona kĩ aneeta?”
30 Ĩthõng uduwak Yesu ĩnõõnõ iyiainit ĩmma ennei ne,
“Aavĩ balna eeti ĩmma cĩ ĩnganna kõr ĩmma Yeruthalẽma õkkõ ĩcĩ Jeriko.g
Ma gõõla,
urumtõy kĩ goryiak,
ĩthõng uukitõ ĩnõõnõ kataval, kĩĩ kupuruccia ceremua, ĩthõng ootti nyarobinya cĩgĩnĩk buu. Ngaatĩ ũũngnĩcẽ ĩnõõnõ natẽ.
31 Õkkõ kẽnnẽ balna paadĩrĩ ĩmma buu gõõla nĩcẽ.
Ngaatĩ acĩnĩ et nĩcẽ,
aatha gõõl kabanyca, ĩthõng ũũk ĩcĩ owu.
32 Ma natẽ,
ikiyyia eeti ĩmma cĩ tatũk cĩ Levi,h
ĩthõng ĩcĩn et nĩcẽ loota, ĩthõng aatha nẽ buu gõõl cĩnnĩ kabanyca.
33 “Ĩthõng thĩ,
vurtia cĩnnĩ,
uppuaniay eeti ĩmma cĩ looc cĩ Thamaria natẽ.
Ngaatĩ acĩnĩ et nĩcẽ avalĩth loota ẽẽ, atamatĩk nẽ et nĩcẽ.
34 Ngaatĩ ũũnyĩ nẽ kaakuanya cĩk et nĩcẽ,
ĩthõng utduutik ngooroc kĩ mẽrtẽ,
ĩthõng ẽcẽb kaakuanya jurrung.
Ma natẽ,
odongek ĩnõõnõ thigirieca ĩcĩnnĩ,
ĩthõng ũũwĩ ciitha cĩ kerenniowu, ĩthõng thẽk ũũk ẽtẽnan ĩnõõnõ jurrung.
35 Ma ngerethietĩn cĩnnĩ,
ĩdĩma nyarobinya ramma cĩk ẽẽn thĩĩk cĩk athĩ kathalkathal,i
ĩthõng aanyĩk baatĩ ciitho,
ĩthõng uduwak ethek ne,
‘Tẽnanea nõ et coo,
ma kõbõda, kakuni katĩ kadũmaneci nyarobinya vẽlẽk cĩk ẽtẽnanẽ niia ĩnõõnõ wo.’ ”
36 Ĩthõng ijin Yesu et cĩ aga Ngiran õrrõt wo ethek ne,
“Mĩ amui niia ngẽnẽ eetĩnẽy ĩcĩkkõ cĩk ẽẽn iyyio wo,
cĩ abakanõy kĩ et cĩ uuk goryiaha wo?”
37 Ẽdẽcĩ eeti neccie athĩ ne,
“Et thẽk cĩ ẽẽl ĩnõõnõ ẽẽ.”
Ĩthõng ethek Yesu ĩnõõnõ ne,
“Bĩt thĩ dĩman niia buu kĩ yoko wo.”
Eheronothĩk Yesu Marĩta kĩ Maria
38 Ĩngathĩ balna Yesu kĩ wobjiak cĩgĩnĩk,
ĩthõng õõt upwantothĩk kõrõõk cĩ aavẽ ngaa cĩ athĩ Marĩta,
ĩthõng ũtũvvũ nẽ Yesu ũũwĩ ciitha cĩnnĩ.
39 Ayak balna Marĩta ngõõnĩ cĩ athĩ Maria,
cĩ balna õkkõ aavĩ loota ngatĩ aavẽ Makayyioiti Yesu ẽẽ,
ĩthõng ĩthĩrar liman cĩnnĩ.
40 Alingling balna kẽnnẽ Marĩta adĩmaneei dainit kĩ tiic cĩ olu.
Ngaatĩ õkkõ ẽthẽcĩ nẽ Yesu ne,
“Makayyioit,
athii niia cĩ acini Maria ngatĩ uungnicia aneeta tiic?
Duwahia ĩnõõnõ baai kikiyyia kẽẽla!”